၁၆၄။ ပါဲကၠေံပွမတိုပ်ဒေပ် ပ္ဍဲအကပ္ပိယကုဋဳ
၂၇၄။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် ဂေတ်ဂ္ၚေၚ်က္ညအာဒေသစာရိတ်မ္ဂး စိုပ်အာဍုၚ်ရာဇဂြိုဟ်တုဲ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞါဲကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ်ရ။ ပ္ဍဲအခိၚ်ဂှ် ယဲကျာ ပ္ဍဲဗုၚ်ဂၞဴ ကတဵုဒှ် ကုတဳလမၞုံပိုဉ်ကျာ်တြဲဂှ်ရ။ ပ္ဍဲအခိၚ်ဂှ် တဳလပိုဉ်အာနန္ဒ “ပ္ဍဲကိုပ်ကၠာတေံ ယဲကျာ မကတဵုဒှ်ပ္ဍဲဗုၚ်ဂၞဴ တဳလမၞုံပိုဉ်ကျာ်တြဲဂှ် ကေၚ်ကၠေံအာ နကဵုတေကဋုလယာဂုရ” ရဴဝွံ (ပၠုပ်စိုတ်တုဲ) အလဵုဇကု အာတ်ကေတ်လ္ၚဴကီု သ္ၚုကီု ၜဲမုဂ်ကီု တိုၚ်ဒေပ်လဝ် ပ္ဍဲအပ္ဍဲဘာတုဲမ္ဂး အလဵုဇကု ဖျိန်ပ္ဍဲအပ္ဍဲဘာတုဲ “တဳလမၞုံပိုဉ်ကျာ်တြဲ ဩဝ်သုၚ်တေကဋုလယာဂုညိ” ရဴဝွံ ဗဂိန်ကဵုကုတဳလမၞုံပိုဉ်ကျာ်တြဲရ။
ကျာ်တြဲဂမၠိုၚ် သီုမတီတဴလေဝ် သၟာန်သၟုန်အိုတ်ရ၊ သီုမတီတဴလေဝ် ဟွံသၟာန်သၟုက်အိုတ်ရ။ တီအခိၚ်အခါတုဲ သၟာန်သၟုက်အိုတ်ရ၊ တီအခိၚ်အခါတုဲ ဟွံသၟာန်သၟုက်အိုတ်ရ။ ကျာ်တြဲဂမၠိုၚ် သၟာန်သၟုက်တဴ စပ်ကဵုဒတုဲဖဵုအိုတ်၊ ဟွံစပ်ကဵုဒတုဲဖဵုဂှ် ဟွံသၟာန်သၟုက်အိုတ်။ ကျာ်တြဲဂမၠိုၚ် ပါဲကၠေံ မဟွံစပ်ကဵုဒတုဲဖဵုဂမၠိုၚ် နကဵုမဂ်တုဲအိုတ်ရ။ နကဵုဟိုတ်ဂမၠိုၚ် ၜါပြကာမတွံဂး “ဓရ်ဂှ်လေဝ် ကြက်တွံအိုတ်ရ၊ သိက္ခာပိုဒ်ဂှ်လေဝ် ကြက်ပညပ်တဴ ကုကွးဂမၠိုၚ်အိုတ်ရ”ဂှ် ကျာ်တြဲ မပတၠတြဴပြကာဂမၠိုၚ် သၟာန်သၟုက်တဴ ခမဳဂမၠိုၚ်အိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံအာနန္ဒ မုရဴနူဌာန်မွဲ ကလိဂွံနၚ် ယာဂုဝွံရော? ရဴဝွံ သၟာန်တဳလပိုဉ်အာနန္ဒရ။ ပ္ဍဲအခိၚ်ဂှ် တဳလပိုဉ်အာနန္ဒ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံအာနန္ဒ ဟွံထေက်ရ၊ ဟွံဗဗွဲရ၊ ဟွံသပ္ပါယ်ရ၊ အာကာဲအရာခမဳတအ် ဟွံသေၚ်ရ၊ ဟဂပ်ဝ် ကုခမဳဂမၠိုၚ်ရ၊ ဟွံထေက်ကဵုခမဳဂမၠိုၚ်သ္ပရ။ ယွံအာနန္ဒ မုဟိုတ် တၠအဲ ပတိတ်ဇြဟတ် တၞဟ်နယာဂုဂွံဂၠိုၚ် မၞုံသဘဴဝွံရော?
ယွံအာနန္ဒ သ္ပတိုပ်ဒေပ်စွံ ပ္ဍဲအပ္ဍဲအကပ္ပိယကုဋဳလေဝ် ဟွံဂပ်ဝ်ရ၊ ပွမဖျိန် ပ္ဍဲအပ္ဍဲအကပ္ပိယကုဋဳလေဝ် ဟွံဂပ်ဝ်ရ၊ ပွမဖျိန်အလဵုဇကုဂှ်လေဝ် ဟွံဂပ်ဝ်ရ။ ယွံအာနန္ဒ (ပွတၠအဲသ္ပဒး)ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး—
“ယွံခမဳတအ် ဘောဇိုန် မဂပ်ဝ်တိုပ်ဒေပ်စွံ ပ္ဍဲအပ္ဍဲအကပ္ပိယကုဋဳဂှ် ဟဂပ်ဝ်သ္ပပြဘိုဂ်ရ၊ ဘောဇိုန်မဂပ်ဝ်ဖျိန် ပ္ဍဲအပ္ဍဲအကပ္ပိယကုဋဳ ဟဂပ်ဝ်သ္ပပြဘိုဂ်ရ၊ ဘောဇိုန်မဂပ်ဝ်ဖျိန် အလဵုဇကုဂှ် ပ္ဍဲအပ္ဍဲအကပ္ပိယကုဋဳ ဟဂပ်ဝ်သ္ပပြဘိုဂ်ရ၊ ကုခမဳမသ္ပပြဘိုဂ်ဂှ် ဒးအာပတ်ဒုက္ကဋ်ရ။
ယဝ်သ္ပပြဘိုဂ် ဘောဇိုန် မတိုပ်ဒေပ်စွံ ပ္ဍဲအပ္ဍဲအကပ္ပိယကုဋဳ မဖျိန် ပ္ဍဲအပ္ဍဲအကပ္ပိယကုဋဳ မဖျိန်အလဵုဇကုဂှ်မ္ဂး၊ ဒးအာပတ်ဒုက္ကဋ်ပိလ္စုတ်ရ။
ယဝ်သ္ပပြဘိုဂ် ဘောဇိုန် မတိုပ်ဒေပ်စွံ ပ္ဍဲအပ္ဍဲအကပ္ပိယကုဋဳ မဖျိန် ပ္ဍဲအပ္ဍဲအကပ္ပိယကုဋဳ ညးသအာၚ်ဂမၠိုၚ်ဖျိန်ဂှ်မ္ဂး၊ ဒးအာပတ်ဒုက္ကဋ်ၜါလ္စုတ်ရ။
ယဝ်သ္ပပြဘိုဂ် ဘောဇိုန် မတိုပ်ဒေပ်စွံ ပ္ဍဲအပ္ဍဲအကပ္ပိယကုဋဳ မဖျိန် ပ္ဍဲအပ္ဍဲအကပ္ပိယကုဋဳ မဖျိန်အလဵုဇကုဂှ်မ္ဂး၊ ဒးအာပတ်ဒုက္ကဋ်ၜါလ္စုတ်ရ။
ယဝ်သ္ပပြဘိုဂ် ဘောဇိုန် မတိုပ်ဒေပ်စွံ ပ္ဍဲမ္ၚးအကပ္ပိယကုဋဳ မဖျိန် ပ္ဍဲအပ္ဍဲအကပ္ပိယကုဋဳ မဖျိန်အလဵုဇကုမ္ဂး၊ ဒးအာပတ်ဒုက္ကဋ်ၜါလ္စုတ်ရ။
ယဝ်သ္ပပြဘိုဂ် ဘောဇိုန် မတိုပ်ဒေပ်စွံ ပ္ဍဲမ္ၚးအကပ္ပိယကုဋဳ မဖျိန် ပ္ဍဲအပ္ဍဲအကပ္ပိယကုဋဳ ညးသအာၚ်ဂမၠိုၚ်ဖျိန်ဂှ်မ္ဂး၊ ဒးအာပတ်ဒုက္ကဋ်ရ။
ယဝ်သ္ပပြဘိုဂ် ဘောဇိုန် မတိုပ်ဒေပ်စွံ ပ္ဍဲမ္ၚးအကပ္ပိယကုဋဳ မဖျိန် ပ္ဍဲမ္ၚးအကပ္ပိယကုဋဳ မဖျိန်အလဵုဇကုဂှ်မ္ဂး၊ ဒးအာပတ်ဒုက္ကဋ်ရ။
ယဝ်သ္ပပြဘိုဂ် ဘောဇိုန် မတိုပ်ဒေပ်စွံ ပ္ဍဲမ္ၚးအကပ္ပိယကုဋဳ မဖျိန် ပ္ဍဲအပ္ဍဲအကပ္ပိယကုဋဳ ညးသအာၚ်ဂမၠိုၚ်ဂှ်မ္ဂး၊ ဟွံဒးအာပတ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဂမၠိုၚ် “တဳလမၞုံပိုဉ်ကျာ်တြဲ ပါဲကၠေံ စၞမဂပ်ဝ်ဖျိန်အလဵုဇကုရ” ရဴဝွံ ပ္ဍဲပွမကလေၚ် ဖျိန်မွဲလှ်ေပၠန် (ကလေၚ်ဟတူ) မၞုံကဵု‘သံသယကုက္ကုစ္စ’ ပွမချပ်သၠေဟ်ပၟာ ရဴဝွံမ္ဂး ဟွံဂပ်ဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် စိန်ဒၟံၚ်တုဲဂှ် တၞဟ်နပွမကလေၚ်ဟတူမွဲလှ်ေပၠန်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ဍုၚ်ရာဇဂြိုဟ် ကတဵုဒှ်ကၞောဝ်ကၠောဝ်စၞစသုၚ်ရ၊ မၞိဟ်ဂမၠိုၚ် ရၚ်တၠုၚ်နၚ်အာရှာမ် ၜဵုကီု ကၠေၚ်ကီု သ္ၚုကီု စၞစကီုအိုတ်ရ၊ မပ္တံကဵုသ္ၚုဂမၠိုၚ်ဂှ် ခမဳဂမၠိုၚ် စွံပတန်လဝ် တိုပ်ဒေပ်လဝ် ပ္ဍဲမ္ၚးအိုတ်ရ။ ဗ္ဂဲ ကၞိ ဟကောတ် ဇၞးဇာတ်ဂမၠိုၚ်လေဝ် ကိတ်စအိုတ်ရ၊ ကမၠတ်ဂမၠိုၚ်လေဝ် ရၚ်တၠုၚ်ဏာအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် တၞဟ်နစွံပတန် ပ္ဍဲအပ္ဍဲဂှ် ကဵုအခေါၚ်ရ ရဴဝွံ (သ္ဂးရ)။ တိုပ်ဒေပ်လဝ် ပ္ဍဲအပ္ဍဲတုဲ ကဵုဖျိန်ပ္ဍဲမ္ၚးအိုတ်ရ၊ ညးစစၞဇမ္ၚးဂမၠိုၚ် ကောံဗိုၚ်ဒၟံၚ်အိုတ်ရ၊ ခမဳဂမၠိုၚ် သီုမဇအိုန်ဇရဂှ် ဒးစအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နပွမဖျိန် ပ္ဍဲအပ္ဍဲဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဒှ်ကၞောဝ်ကၠောဝ်ဗျဵုဂှ် ကပ္ပိယကာရကဂမၠိုၚ် ရၚ်တၠုၚ်ကေတ်ဏာဗွဲမဂၠိုၚ်အိုတ်ရ၊ ဗၞတ်ညိနာၚ်ဟေၚ် ကဵုခမဳဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နပွမဖျိန်အလဵုဇကုဂှ် ကဵုအခေါၚ်ရ၊ ယွံခမဳတအ် ကဵုအခေါၚ် ပွမတိုပ်ဒေပ်စွံ ပ္ဍဲအပ္ဍဲ ပွမဖျိန်ပ္ဍဲအပ္ဍဲ ပွမဖျိန်အလဵုဇကုရ ရဴဝွံ (သ္ဂးရ)။
