၁၆၃။ ကဵုအခေါၚ်မပ္တံတၚ်လာဲ

၂၇၂။ ပ္ဍဲအခိၚ်ဂှ် တဳလမၞုံပိုည်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်သာရဝှ် ဗွဲမိပ်လဟိၚ်တုဲမ္ဂး က္ညစ္ဍးအာ ဍုၚ်ရာဇဂြိုဟ်ရ။ တဳလပိုဉ်ကၚ်္ခါရေဝတဂှ် ပ္ဍဲအကြာဂၠံၚ်တရဴ လုပ်အာတာဲဖျိန်တၚ်လာဲတုဲ ဟိုတ်မညာတ်ကေတ် တၚ်လာဲဂမၠိုၚ် မစုတ်လဝ်ဝိုဟ်ကေုာံပတေၚ် (သဗိုက်သ္ၚု)ဂှ်ရ “တၚ်လာဲ ဒှ်မွဲဟာန်ကေုာံအာမိသဂှ် ဟွံဂပ်ဝ်ရ၊ တၚ်လာဲဂှ် တၞဟ်နပြဘိုဂ် ပ္ဍဲအခိၚ်တ္ၚဲစေၚ် ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ မွဲဟာန်ကေုာံ ပရိသာတ် ဟွံပြဘိုဂ်တၚ်လာဲရ။

ခမဳဂမၠိုၚ် မကလၚ်ဗက်ဂလာန်မှာထေရ်ဂှ်လေဝ် ဟွံသ္ပပြဘိုဂ် တၚ်လာဲအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် မုဟိုတ် စုတ်တဴဝိုဟ်ကီု ပတောၚ်ကီု ပ္ဍဲတၚ်လာဲအိုတ်ရော? ရဴဝွံ (သၟာန်ရ)။ ယွံတဳလမၞုံပိုဉ် တၞဟ်နဂွံကြံၚ်မ္ၚိုဟ် စုတ်အိုတ်ရ ရဴဝွံ (ဂရၚ်ပတီအိုတ်ရ)။ ယွံခမဳတအ် တၞဟ်နဂွံကြံၚ်မ္ၚိုဟ် ယဝ်စုတ်တဴ ဝိုဟ်ကီု ပတေၚ်ကီု ပ္ဍဲတၚ်လာဲအိုတ်မ္ဂး၊ ဝိုဟ်ပတေၚ် မစုတ်ဂှ်လေဝ် အာစိုပ်ရိုဟ်လၟိဟ်မတွံဂး တၚ်လာဲဟေၚ်ရ။ ယွံခမဳတအ် အတိုၚ်နွံပၟိက် တၞဟ်နသ္ပပြဘိုဂ်တၚ်လာဲဂှ် ကဵုအခေါၚ်ရ ရဴဝွံ (သ္ဂးရ)။

တဳလပိုဉ်ကၚ်္ခါရေဝတဂှ် အပ္ဍဲအကြာဂၠံၚ်တရဴ ညာတ်ဒး တၞံၜဲမုဂ်ကၠုတ်တိုန်ဒၟံၚ် ပ္ဍဲဂအုံတရဴဇၞော်တုဲ “ၜဲမုဂ်ဂမၠိုၚ်် ဟွံဂပ်ဝ်အိုတ်ရ၊ ၜဲမုဂ်ဂမၠိုၚ် မဂပ်ဝ်ဖျိန်လဝ်တုဲဂှ်လေဝ် တၞံကၠုတ်တိုန်အိုတ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ ရဴဝွံမ္ဂး ဟွံဂပ်ဝ်ဒှ်တုဲ မွဲဟာန်ကေုာံပရိသာတ် ဟွံပြဘိုဂ်ၜဲမုဂ်ရ။ ခမဳဂမၠိုၚ် မကလၚ်ဗက်ဂလာန်မှာထေရ်ဂှ်လေဝ် ဟွံသ္ပပြဘိုဂ်ၜဲမုဂ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ၜဲမုဂ်ဂမၠိုၚ် မဂပ်ဝ်ဖျိန်လဝ်တုဲဂှ် ၜိုန်တၞံကၠုတ်တိုန်လေဝ် အတိုၚ်နွံပၟိက် တၞဟ်နသ္ပပြဘိုဂ်ၜဲမုဂ်ဂှ် ကဵုအခေါၚ်ရ ရဴဝွံ (သ္ဂးရ)။

၂၇၃။ ပ္ဍဲအခိၚ်ဂှ် ခမဳမွဲဇကု ကတဵုဒှ်ယဲကျာ ပ္ဍဲဗုၚ်ဂၞဴရ၊ ခမဳဂှ် သုၚ်ဍာ်ပၠာဲလောဏသောဝဳရကရ၊ ယဲကျာမကတဵုဒှ်ပ္ဍဲဗုၚ်ဂၞဴဂှ် လလမ်အာ ကုခမဳဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုည်ကျာ်တြဲအိုတ်ရ။ ယွံခမဳတအ် ကုခမဳမဂိယဲဂှ် ကဵုအခေါၚ် ဍာ်ပၠာဲလောဏသောဝဳရကရ၊ ကုခမဳမဟွံဂိယဲဂှ် တၞဟ်နသုၚ်တဴလောဏသောဝဳရက မနှဴရဴကေုာံဍာ် နကဵုစၟတ်သမ္တီ မတွံဂးဍာ်ပၠာဲဂှ် ကဵုအခေါၚ်ရ ရဴဝွံ (သ္ဂးရ)။