၁၅၂။ ပွမပါဲကၠေံ မပ္တံဒၞပ်ဆုဂမၠိုၚ်
၂၅၀။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲအခိၚ်ဖလာၚ်ဂယးဗ္တံဂှ် ဒၠိုက်ကဵုပြဟ်ပြဟ်တုဲ လိုန်ဍိုက်ဒၞပ်ဆုဂမၠိုၚ်တုဲမ္ဂး မၞုံကဵုဗရုရမျာၚ်သကာတ်မြဟ်ဇၞော်လှဲ မၞုံကဵုဗရုရမျာၚ် ဍက်ဍက်ဂမၠိုၚ်ဒှ်တုဲ သီုမဟီုသ္ဂးတဴ ‘တိရစ္ဆာန်နကထာ’ ဂလာန်မဒစဵုဒစးကဵုမဂ်ဖိုလ်မဂၠိုၚ်ဂၠၚ်ဂှ် ကွာ်ဒၟံၚ်စၚ်္ကြမ် ပ္ဍဲအမှဲအကးအိုတ်ရ။
ဂလာန်မဒစဵုဒစးဂှ် ညးဍေံဂှ်ရော? ဂလာန်မစပ်ကဵုသၟိၚ် ဂလာန်မစပ်ကဵုကမၠတ် ဂလာန်မစပ်ကဵုအမာတ် ဇၞော် ဂလာန်မစပ်ကဵုဒပ်ပၞာန် ဂလာန်မစပ်ကဵုဘဲဖေက်ဂၟံက် ဂလာန်မစပ်ကဵု တဝ်စၞောဟ်ပၞာန် ဂလာန်မစပ်ကဵုစၞစ ဂလာန်မစပ်ကဵုစၞသုၚ် ဂလာန်မစပ်ကဵုယာတ်ဗွိုက်လတက် ဂလာန်စမပ်ကဵုဒၞာဲသတိက် ဂလာန်မစပ်ကဵုပကဴသြဴ ဂလာန်မစပ်ကဵုမြမောဝ် ဂလာန်မစပ်ကဵုကလောဒညာဝ် ဂလာန်မစပ်ကဵုယာန် ဂလာန်မစပ်ကဵုကွာန် ဂလာန်မစပ်ကဵုနိဂီု ဂလာန်မစပ်ကဵုဍုၚ် ဂလာန်မစပ်ကဵုဇနပိုဒ် (ရး) ဂလာန်မစပ်ကဵုမၞိဟ်ဗြဴ (ဂလာန်မစပ်ကဵုမၞိဟ်တြုံ) ဂလာမစပ်ကဵုသရာဲသဂံၚ် ဂလာန်မစပ်ကဵုဂၠံၚ် ဂလာန်မစပ်ကဵုသၞေဟ်ဍာ် ဂလာန်မစပ်ကဵုညးစုတိ ဂလိလောန်အာတုဲ ဂလာန်တၟေၚ်တၟဟ်တၞဟ်တၞဟ်သာ် ဂလာန်မစပ်ကဵုဟိုတ်ပရူပရာလောက ဂလာန်မစပ်ကဵုဟိုတ်ပရူပရာမှာသၟိဒ် ဂလာန်မစပ်ကဵုပွမဇၞော်မောဝ် ပွမဟုတ်ယုတ်ဂမၠိုၚ်ရောၚ်။ လိုန်ဒးစၟသၟတ်တုဲလေဝ် ကဵုချိုတ်အာအိုတ်ရ၊ ခမဳမဇၞော်ပၟဝ်ဒၟံၚ်ကမ္မဋ္ဌာန်ဂမၠိုၚ်လေဝ် ကဵုတသိုတ်အာနူသမာဓိအိုတ်ရ။
ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ပ္ဍဲအခိၚ်ဖလာၚ်ဂယးဗ္တံဂှ် ဒၠိုက်ကတဵုပြဟ်ပြဟ်တုဲ လိုန်ဍိုက်ဒၞပ်ဆုဂမၠိုၚ်တုဲမ္ဂး မၞုံကဵုဗရုရမျာၚ်သကာတ်မြဟ်ဇၞော်လှဲ မၞုံကဵုဗရုရမျာၚ်ဍက်ဍက်ဂမၠိုၚ်ဒှ်တုဲ သီုမဟီုသ္ဂးတဴ ‘တိရစ္ဆာနကထာ’ ဂလာန်မဒစဵုဒစးကဵုမဂ်ဖိုလ်မဂၠိုၚ်ဂၠၚ်ဂှ် ကွာ်ဒၟံၚ်စၚ်္ကြမ် ပ္ဍဲအမှဲအကးအိုတ်ရော?
ဂလာန်မဒစဵုဒစးဂှ် ညးဍေံဂှ်ရော? ဂလာန်မစပ်ကဵုသၟိၚ် ဂလာန်မစပ်ကဵုကမၠတ် ။ ပ ။ ဂလာန်မစပ်ကဵုပွမဇၞော်မောဝ် ပွမဟုတ်ယုတ်ဂမၠိုၚ်ရောၚ်။ လိုန်ဒးစၟသၟတ်တုဲလေတ် ကဵုချိုတ်အာအိုတ်ရော? ခမဳမဇၞော်ပၟဝ်ဒၟံၚ်ကမ္မဋ္ဌာန်ဂမၠိုၚ်လေဝ် ကဵုတသိုတ်အာနူသမာဓိအိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲကြဴနူဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ခမဳဆဗ္ဗဂ္ဂဳဂမၠိုၚ် ပ္ဍဲအခိၚ်ဖလာၚ်ဂယးဗ္တံဂှ် ဒၠိုက်ကတဵုပြဟ်ပြဟ်တုဲ လိုန်ဍိုက်ဒၞပ်ဆုဂမၠိုၚ်တုဲမ္ဂး မၞုံကဵုဗရုရမျာၚ်သကာတ်မြဟ်ဇၞော်လှဲ မၞုံကဵုဗရုရမျာၚ်ဍက်ဍက်ဂမၠိုၚ်ဒှ်တုဲ သီုမဟီုသ္ဂးတဴ ‘တိရစ္ဆာနကထာ’ ဂလာန်မဒစဵုဒစးကဵုမဂ်ဖိုလ်မဂၠိုၚ်ဂၠၚ်ဂှ် ကွာ်ဒၟံၚ်စၚ်္ကြမ် ပ္ဍဲအမှဲအကးအိုတ်ရ။
ဂလာန်မဒစဵုဒစးဂှ် ညးဍေံဂှ်ရော? ဂလာန်မစပ်ကဵုသၟိၚ် ဂလာန်မစပ်ကဵုကမၠတ် ။ ပ ။ ဂလာန်မစပ်ကဵုပွမဇၞော်မောဝ် ပွမဟုတ်ယုတ်ဂမၠိုၚ်ရောၚ်။ လိုန်ဒးစၟသၟတ်တုဲလေတ် ကဵုချိုတ်အာအိုတ်ရော? ခမဳမဇၞော်ပၟဝ်ဒၟံၚ်ကမ္မဋ္ဌာန်ဂမၠိုၚ်လေဝ် ကဵုတသိုတ်အာနူသမာဓိအိုတ်ရ ဟီုဂှ်ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီ) ရ ။ ပ ။
ဟီုဂရိုဟ်တုဲ တွံကဵုဂလာန်ဓရ်တုဲမ္ဂး “ယွံခမဳတအ် ဟဂပ်ဝ်လိုန်ဍိုက်ဒၞပ်ဆုရ၊ ကုခမဳမလိုန်ဍိုက်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ရာဇဂြိုဟ် ဗွဲမမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိ ဍုၚ်ဗာရာဏသဳရ။ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး ကၠုၚ်စိုပ်ဍုၚ်ဗာရာဏသဳရ။ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဂြိုပ်မိဂဒါဝိုန် မၞုံယၟုဣသိပတန ဇရေၚ်ဍုၚ်ဗာရာဏသဳဂှ်ရ။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ပါဲကၠေံဒၞပ်ဆုဂမၠိုၚ်ရ” ရဴဝွံ ကဵုကုတ် တၞံတာသၟတ်ဂမၠိုၚ်တုဲ လိုန်ဍိုက်ဒၞပ်သၠ ထာၚ်တာဂမၠိုၚ်အိုတ်ရ။ တၞံတာသၟတ်ဂမၠိုၚ်ဂှ် ဂပ်ဝ်ကုတ်ထောံအိုတ်မ္ဂး အေဲကှ်အိုတ်။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ကဵုကုတ်တၞံတာသၟတ်ဂမၠိုၚ်တုဲ လိုန်ဍိုက်ဒၞပ်သၠ ထာၚ်တာဂမၠိုၚ်အိုတ်ရော? တၞံတာသၟတ်ဂမၠိုၚ်ဂှ် ဂပ်ဝ်ကုတ်ထောံအိုတ်မ္ဂး အေဲကှ်အိုတ်ရ၊ ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် မုဟိုတ် ပြိုက်ဂစိုတ်လမျီု မၞုံကဵုဣန္ဒြဳမွဲအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ခမဳဆဗ္ဗဂ္ဂဳဂမၠိုၚ် ကဵုကုတ်တၞံတာသၟတ်ဂမၠိုၚ်တုဲ လိုန်ဍိုက်ဒၞပ်သၠ ထာၚ်တာ ဂမၠိုၚ်အိုတ်ရ၊ တၞံတာသၟတ်ဂမၠိုၚ်ဂှ် ဂပ်ဝ်ကုတ်ထောဴအိုတ်မ္ဂး အေဲကှ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ်တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် ကဵုကုတ် တၞံတာသၟတ်ဂမၠိုၚ်တုဲ လိုန်ဍိုက်ဒၞပ်သၠ ထာၚ်တာဂမၠိုၚ်အိုတ်ရော? တၞံတာသၟတ်ဂမၠိုၚ်ဂှ် ဂပ်ဝ်ကုတ်ထောံအိုတ်မ္ဂး အေဲကှ်အိုတ်ရ၊ ယွံခမဳတအ် ပ္ဍဲတၞံဆုဂှ် မၞိဟ်ဂမၠိုၚ် မၞုံကဵုစၟတ်သမ္တီရဴဝွံမ္ဂး မၞုံကဵုလမျီုအိုတ်ရ၊ ယွံခမဳတအ် (ပွခမဳဆဗ္ဗဂ္ဂဳဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး–
“ယွံခမဳတအ် ဟဂပ်ဝ်လိုန်ဍိုက်ဒၞပ်သၠ ထာၚ်တာဂမၠိုၚ်ရ၊ ကုခမဳမလိုန်ဍိုက်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ပါဲကၠေံ တၞံတာဂမၠိုၚ်ရ” ရဴဝွံ ကဵုကုတ်တၞံဒုန်သၟတ်ဂမၠိုၚ်တုဲ လိုန်ဍိုက်ဒၞပ်တၞံဒုန်ဂမၠိုၚ်အိုတ်ရ၊ တၞံဒုန်သၟတ်ဂမၠိုၚ်ဂှ် ဂပ်ဝ်ကုတ်ထောံအိုတ်မ္ဂး အေဲကှ်အိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ကဵုကုတ်တၞံဒုန်သၟတ်ဂမၠိုၚ်တုဲ လိုန်ဍိုက်ဒၞပ်ဒုန်ဂမၠိုၚ်အိုတ်ရော? တၞံဒုန်သၟတ်ဂမၠိုၚ်ဂှ် ဂပ်ဝ်ကုတ်ထောံအိုတ်မ္ဂး အေဲကှ်အိုတ်ရ၊ ခမဳဂမပိုၚ် မဒှ်တၞောဝ်ကျာ်ကောန်သၟိၚ်သာကျဝၚ် မုဟိုတ်ပြိုက်ဂစိုတ် လမျီုမၞုံကဵုဣန္ဒြဳမွဲအိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံခမဳတအ် ပ္ဍဲတၞံဆုဂှ် မၞိဟ်ဂမၠိုၚ် မၞုံကဵုစၟတ်သမ္တီရဴဝွံမ္ဂး မၞုံကဵုလမျီုအိုတ်ရ ။ ပ ။ “ယွံခမဳတအ် ဟဂပ်ဝ်လိုန်ဍိုက် ဒၞပ်တၞံဒုန်ဂမၠိုၚ်ရ၊ ကုခမဳ မလိုန်ဍိုက်ဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
၂၅၁။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ဗာရာဏာသဳ ဗွဲမမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် အာဍုၚ်ဘဒ္ဒိယရ။ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး ကၠုၚ်စိုပ်ဍုၚ်ဘဒ္ဒိယရ။ တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဂြိုပ်မၠဵုစေဝ်ဇရေၚ်ဍုၚ်ဘဒ္ဒိယဂှ်ရ။
ပ္ဍဲအခိၚ်ဂှ် ခမဳဂမၠိုၚ် မပဒတဴပ္ဍဲဍုၚ်ဘဒ္ဒိယဂှ် စိုန်သကီုကေုာံပွမပတိတ်ဇြဟတ်ဂၠိုၚ်ဂၠိုၚ်ကဵုဝါ ပ္ဍဲပွမဂ္ညိဂ္ညာတ်ကျိုၚ်ကျဝ်ဒၞပ်ဂမၠိုၚ် မဂၠိုၚ်ဂၠၚ်တုဲ ပဒတဴအိုတ်ရ။ အလဵုဇကုလေဝ် ကဵုကၠောန်ခၞံဒၞပ်ချောဲအိုတ်ရ၊ ညးသအာၚ်လေဝ် ကဵုကၠောန်ခၞံအိုတ်ရ။ အလဵုဇကုလေဝ် ကဵုကၠောန်ခၞံ ဒၞပ်ကၟတ်ဇပူအိုတ်ရ၊ ညးအာၚ်လေဝ် ကဵုကၠောန်ခၞံအိုတ်ရ။ အလဵုဇကုလေဝ် ကဵုကၠောန်ခၞံ ဒၞပ်ကၟတ်စာဗဲအိုတ်ရ၊ ညးသအာၚ်လေဝ် ကဵုကၠောန်ခၞံအိုတ်ရ။ အလဵုဇကုလေဝ် ကဵုကၠောန်ခၞံ ဒၞပ်သၠၜဝ်တၠုန် (သၠသၠု) အိုတ်ရ၊ ညးသအာၚ်လေဝ် ကဵုကၠောန်ခၞံအိုတ်ရ။ အလဵုဇကုလေဝ် ကဵုကၠောန်ခၞံဒၞပ်မခၞံ နချောဲမၞုံယၟုကမလအိုတ်ရ၊ ညးသအာၚ်လေဝ် ကဵုကၠောန်ခၞံအိုတ်ရ။ အလဵုဇကုလေဝ် ကဵုကၠောန်ခၞံဒၞပ်ယာတ်ကၟဝ်အိုတ်ရ၊ ညးသအာၚ်လေဝ် ကဵုကၠောန်ခၞံအိုတ်ရ။ ပွမကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ ကေုာံသဳလမပြြ သမာဓိမပြဲ ပညာမပြဲဂမၠိုၚ် လ္ၚုသုန်ဂြာံအိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂမၠိုၚ် မပဒတဴပ္ဍဲဍုၚ်ဘဒ္ဒိယဂှ် စိုန်သကီုကေုာံပွမပတိတ်ဇြဟတ်ဂၠိုၚ်ဂၠိုၚ်ကဵုဝါ ပ္ဍဲပွမဂ္ညိဂ္ညာတ်ကျိုၚ်ကျဝ် ဒၞပ်ဂမၠိုၚ်မဂၠိုၚ်ဂၠၚ်တုဲ ပဒတဴအိုတ်ရော? အလဵုဇကုလေဝ် ကဵုကၠောန်ခၞံဒၞပ်ချောဲအိုတ်ရော? ညးသအာၚ်လေဝ် ကဵုကၠောန်အိုတ်ရော? အလဵုဇကုလေဝ်ကဵုကၠောန်ခၞံ ဒၞပ်ကၟတ်ဇပူအိုတ်ရော? ညးသအာၚ်လေဝ် ကဵုကၠောန်ခၞံအိုတ်ရော? အလဵုဇကုလေဝ် ကဵုကၠောန်ခၞံ ဒၞပ်ကၟတ်စာဗဲအိုတ်ရော? ညးသအာၚ်လေဝ် ကဵုကၠောန်ခၞံအိုတ်ရော? အလဵုဇကုလေဝ် ကဵုကၠောန်ခၞံ ဒၞပ်သၠၜဝ်တၠုန် (သၠသၠု) အိုတ်ရော? ညးသအာၚ်လေဝ် ကဵုကၠောန်ခၞံအိုတ်ရော? အလဵုဇကုလေဝ် ကဵုကၠောန်ခၞံ ဒၞပ်မခၞံ နချောဲမၞုံယၟုကမလအိုတ်ရော? ညးသအာၚ်လေဝ် ကဵုကၠောန်ခၞံအိုတ်ရော? အလဵုဇကုလေဝ် ကဵုကၠောန်ခၞံ ဒၞပ်ယာတ်ကၟဝ်အိုတ်ရော? ညးသအာၚ်လေဝ် ကဵုကၠောန်ခၞံအိုတ်ရော? ပွမကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ ကေုာံသဳလမပြဲ သမာဓိမပြဲ ပညာမပြဲဂမၠိုၚ် လ္ၚုသုန်ဂြာံအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ် ။ ပ ။ “ယွံခမဳတအ် ခမဳဂမပိုၚ် မပဒတဴပ္ဍဲဍုၚ်ဘဒ္ဒိယဂှ် စိုန်သကီုကေုာံပွမပတိတ်ဇြဟတ်ဂၠိုၚ်ဂၠိုၚ်ကဵုဝါ ပ္ဍဲပွမဂ္ညိဂ္ညာတ်ကျိုၚ်ကျဝ်ဒၞပ်ဂမၠိုၚ် မဂၠိုၚ်ဂၠၚ်တုဲ ပဒတဴအိုတ်ရ။ အလဵုဇကုလေဝ် ကဵုကၠောန်ခၞံဒၞပ်ချောဲအိုတ်ရ၊ ညးသအာၚ်လေဝ် ကဵုကၠောန်ခၞံအိုတ်ရ ။ ပ ။ ပွမကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ ကေုာံသဳလမပြဲ သမာဓိမပြဲ ပညာမပြဲဂမၠိုၚ် လ္ၚုသုန်ဂြာံအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် စိုန်သကီုကေုာံပွမပတိတ်ဇြဟတ်ဂၠိုၚ်ဂၠိုၚ်ကဵုဝါ ပ္ဍဲပွမဂ္ညိဂ္ညာတ်ကျိုၚ်ကျဝ်ဒၞပ်ဂမၠိုၚ် မဂၠိုၚ်ဂၠၚ်တုဲ ပဒတဴအိုတ်ရော? အလဵုဇကုလေဝ် ကဵုကၠောန်ခၞံဒၞပ်ချောဲအိုတ်ရော? ညးသအာၚ်လေဝ် ကဵုကၠောန်ခၞံအိုတ်ရော? ။ ပ ။ ပွမကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ ကေုာံသဳလမပြဲ သမာဓိမပြဲ ပညာမပြဲဂမၠိုၚ် လ္ၚုသုန်ဂြာံအိုတ်ရော? ယွံခမဳတအ် (ပွခမဳဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး–
“ယွံခမဳတအ် ဒၞပ်ချောဲ၊ ဒၞပ်ကၟတ်ဇပူ၊ ဒပ်ကၟတ်စာဗဲ၊ ဒၞပ်ဆုမခၞံလေဝ် နသၠၜဝ်တၠုန်၊ ဒၞပ်ဆုမခၞံလဝ် နချောဲမၞုံယၟုကမလ၊ ဒၞပ်ယာတ်ကၟဝ်၊ ဒၞပ်မတုဲတဴနကဵုထဝ်၊ ဒၞပ်မတုဲတဴနကဵုသြန်၊ ဒၞပ်မတုဲတဴနကဵုမတ်မၞိက်၊ ဒၞပ်မတုဲတဴနကဵုအဖၠိုက် (ဖာန်)၊ ဒၞပ်မတုဲတဴနကဵုသၠာဲ၊ ဒၞပ်မတုဲတဴနကဵုစေဟ် (စိုက်)၊ ဒၞပ်မတုဲတဴနကဵုဗကောဝ်ဒမျိုၚ်၊ ဒၞပ်မတုဲတဴနကဵုဗကောဝ်ဗတာၚ်၊ ဟဂပ်ဝ်လိုန်ဍိုက်ဒၞပ်ဂမၠိုၚ် မတုဲတဴနကဵုဗရိုတ်ဗကေတ်ရ၊ ကုခမဳမလိုန်ဍိုက်ဂှ် ဒးအာပတ်ဒုက္ကဋ်ရ။ ယွံခမဳတအ် ဟဂပ်လိုန်ဍိုက်ဒၞပ်ဂမၠိုၚ်မမိက်ကဵုမွဲမွဲ မဟဂပ်ဝ်ကဵုပြံၚ်ဖျုဲရ၊ ကုခမဳမလိုန်ဍိုက်ဂှ် ဒးအာပတ်ဒုက္ကဋ်ရ ရဴဝွံ သ္ဂးရ။ ယွံခမဳတအ်–
“ဒၞပအာသ္ၚိဍာ် ဒၞပ်အာတရဴသၟတ် ဒၞပ်သုၚ်စောဲဒၞာဲဍာ်ကြာတ် ရဴဝွံ ကဵုအခေါၚ် ဒၞပ်ဂမၠိုၚ်ပိဂကူ မတန်တဴလၟိုန်ဒမၠိ မပြံၚ်ဖျုဲဏာဟွံမာန်ရ” ရဝွံ (သ္ဂးရ)။
၂၅၂။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ဘိဒ္ဒိယ ဗွဲမမိပ်လဟိၚ်တုဲမ္ဂးက္ညဂ္ၚေၚ်အာဒေသစာရိတ် ဍုၚ်သာရဝှ်ရ။ အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ်မ္ဂး စိုပ်ကၠုၚ်ဍုၚ်သာရဝှ်ဂှ်တုဲ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ်ရ။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ရပ်ကေတ် ဂြၚ်ဂမၠိုၚ်ကီု သၠကတောဝ်ဂမၠိုၚ်ကီု ကအ်ဂမၠိုၚ်ကီုတမ်ဗ္တဂမၠိုၚ်ကီု ဒဒက်တဴဂၠဴၝောံဂမၠိုၚ် မၜိၚ်ကၠောံ ပ္ဍဲကြုၚ်အစိရဝတဳအိုတ်ရ၊ ပ္ဍဲလတူစးလေဝ်တိုန်ဍိုက်အိုတ်ရ၊ မၞုံကဵုစိုတ်မထၞေန်စပ်ဂမၠိုၚ်ဒှ်တုဲ အၚ်္ဂဇာတ်ဂှ်လေဝ် လုက်စုက်တေံဒး (နကဵုအၚ်္ဂဇာတ်ဇကုဂမၠိုၚ်) အိုတ်ရ၊ ကောန်ဂၠဴၝောံသၟတ်လဝ် ဗလိုက်ဂစိုတ်ဍာ်အိုတ်ရ။
မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ညံၚ်ရဴမၞိဟ်ဂမၠိုၚ်မဒုၚ်စသိုၚ် တသိုခ်ကာမဂုဏ်ကီု ရပ်ကေတ် ဂြၚ်မဂမၠိုၚ်ကီု ။ ပ ။ ဒဒက်တဴဂၠဴၝောံဂမၠိုၚ် မၜိၚ်ကၠောံဍာ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ ယွံခမဳတအ် ဍာံပြဟာ ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ) ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး–
“ယွံခမဳတအ် ဟဂပ်ဝ်ရပ်ဂြၚ်ဂမၠိုၚ် ဒဒက်တဴဂၠဴၝောံဂမၠိုၚ်ရ၊ ဟဂပ်ဝ်ရပ် သၠကတောဝ်ဂမၠိုၚ်ရ၊ ဟဂပ်ဝ်ရပ် ကအ်ရ၊ ဟဂပ်ဝ်ရပ် တမ်ဗ္တရ၊ ဟဂပ်ဝ် (တိုန်) ဍိုက် ပ္ဍဲစၞိန်စးရ၊ ကုခမဳမတိုန်ဍိုက်ဂှ် ဒးအာပတ်ဒုက္ကဋ်ရ။ ယွံခမဳတအ် နကဵုစိုတ်မထၞေန်စပ် ဟဂပ်ဝ်လုက်စုက်တေံအၚ်္ဂဇာတ်ရ၊ ကုခမဳ မလုက်စုက်တေံဒးဂှ် ဒးအာပတ်ထုလ္လစ္စယ်ရ။ ဟဂပ်ဝ်ဂစိုတ်ဂၠဴသၟတ်ရ၊ ကုခမဳမဂစိုတ်ဂှ် ဂပ်ဝ်ဒးသ္ဂုတ်သွာတ် ဗွဲမဗဗွဲကဵုဓရ်ရ” ရဴဝွံ (သ္ဂးရ)။
