၁၅၃။ ပွမပါဲကၠေံ မပ္တံယာန်ဂမၠိုၚ်
၂၅၃။ ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် အာတဴ နကဵုယာန် ဗ္ဂန်ၝောံတုဲ ညးတြုံဗက်ဒဳကီုနကဵုယာန် ဗ္ဂန်တၟက်တုဲ ညးဗြဴဗက်ဒဳကီုအိုတ်ရ။ မၞိဟ်ဂမၠိုၚ် “တုပ်သၟဟ်ကဵုပေါဲသဘၚ်ကြုၚ်ဂၚ်္ဂါ ပေါဲသဘၚ်ကြုၚ်မဟဳအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
“ယွံခမဳတအ် ဟဂပ်ဝ်အာ နကဵုယာန်ရ၊ ကုခမဳ မအာဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမွဲဇကု နူဇနပိုဒ်ကောသလရး တၞဟ်နပွမဗဵုလ္ၚောဝ် တဳလမၞုံပိုဉ်ကျာ်တြဲ ကၠုၚ်တဴဍုၚ်သာရဝှ်မ္ဂး ဂိယဲအာ ပ္ဍဲအကြာဂၠံၚ်တရဴရ။ ပ္ဍဲအခိၚ်ဂှ် ခမဳဂှ် ပါဲစျ်ေအာနူဂၠံၚ်တရဴတုဲ ဂဇအ်ဒၟံၚ် ပ္ဍဲသၟဝ်တမ်ဆုမွဲရ။
မၞိဟ်ဂမၠိုၚ် ညာတ်ဒးခမဳဂှ်တုဲ “ယွံတဳလပိုဉ် တဳလပိုဉ် အာတဴမုရဴဌာန်မွဲရော?” ရဴဝွံ ဂရၚ်ပတီ သၟာန်အိုတ်ရ။ ယွံဒကာတအ် တၞဟ်နပွမဗဵုလ္ၚောဝ် တဳလမၞုံပိုဉ်ကျာ်တြဲ အဲက္ညအာဍုၚ်သာရဝှ်ရ ရဴဝွံ (သ္ဂးရ)။ ယွံတဳလပိုဉ် ဩဝ်က္ညညိ၊ ကြက်အာရ ရဴဝွံ (ဂရၚ်ပတီအိုတ်ရ)။ ယွံဒကာတအ် အဲ အာဟွံမာန်ရ၊ ဂိယဲဒၟံၚ်ရ ရဴဝွံ (သ္ဂးရ)။ ယွံတဳလပိုဉ် ဩဝ်က္ညညိ၊ ဩဝ်တိုန်ဍိုက်လတူယာန်ညိ ရဴဝွံ (ဂရၚ်ပတီအိုတ်ရ)။ ယွံဒကာတအ် ဟွံဗဗွဲရ၊ တဳလမၞုံပိုဉ်ကျာ်တြဲ ပါဲဒဝ်လဝ်ယာန်ရ ရဴဝွံ (သ္ဂးတုဲ) မၞုံကဵု ‘သံသယကုက္ကစ္စ’ ပွမချပ်သၠေဟ်ပၟာဒှ်တုဲ ဟွံတိုန်ဍိုက်ယာန်ရ။
ပ္ဍဲအခိၚ်ဂှ် ခမဳဂှ် စိုပ်ဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်ရ၊ ခမဳဂမၠိုၚ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကုခမဳမဂိယဲဂှ် ကဵုအခေါၚ်ယာန်ရ ရဴဝွံ (သ္ဂးရ)။ ပ္ဍဲအခိၚ်ဂှ် “ယာန်မဗ္ဂန်ၝောံဂှ် ဂပ်ဝ်ဟာ၊ ယာန်မဗ္ဂန်တၟက်ဂှ် ဂပ်ဝ်ဟာ” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ယာန်ဗ္ဂန်လဝ်တၟက်ကီု ယာန်မတံၚ်ဓဇက်ဓရိုဟ်နတဲကီု ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ကုခမဳမွဲဇကုဂှ် ဟိုတ်နူကွဳယာတိုန် (ကွဳကဆံက်ကွဳထၟုက်) တုဲ ဒှ်ဟွံတသိုခ်ဇကု ဗွဲမသကာတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဝဝ်ကီု သရေၚ်ကီု ကဵုခေါၚ်ရ ရဴဝွံ (သ္ဂးရ)။
