၁၅၁။ ပွမပါဲကၠေံဒၞပ် ပ္ဍဲအပ္ဍဲအာရှာမ်ဘာ
၂၄၈။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သီုဟွံလိုန်ဍိုက်ဒၞပ် ကွာ်ဒၟံၚ်စၚ်္ကြမ် ပ္ဍဲအမှဲအကးရ၊ တဳလမၞုံပိုဉ်ကျာ်တြဲ သီုဟွံလိုန်ဍိုက်ဒၞပ် ကွာ်ဒၟံၚ်စၚ်္ကြမ် ပ္ဍဲအမှဲအကးရ ရဴဝွံ ခမဳဂမၠိုၚ်မဒှ်ထေရ်ဇၞော်လေဝ် သီုဟွံလိုန်ဍိုက်ဒၞပ် ကွာ်ဒၟံၚ်စၚ်္ကြမ်အိုတ်ရ။
တဳလမၞုံပိုဉ်ကျာ်တြဲ ကေုာံခမဳဂမၠိုၚ်မဒှ်ထေရ်ဇၞော် သီုဟွံလိုန်ဍိုက်ဒၞပ် ကွာ်ဒၟံၚ်စၚ်္ကြမ်အိုတ်ဂှ် ခမဳဆဗ္ဗဂ္ဂဳဂမၠိုၚ် လိုန်ဍိုက်ဒၞပ်တုဲ ကွာ်ဒၟံၚ်စၚ်္ကြမ်အိုတ်ရ။ ခမဳပၟိက်အောန်ဂမၠိုၚ်ဂှ် “တဳလမၞုံပိုဉ်ကျာ်တြဲ ကေုာံခမဳဂမၠိုၚ်မဒှ်ထေရ်ဇၞော် သီုဟွံလိုန်ဍိုက်ဒၞပ် ကွာ်ဒၟံၚ်စၚ်္ကြမ်အိုတ်ဂှ် မုဟိုတ်ခမဳဆဗ္ဗဂ္ဂဳဂမၠိုၚ် လိုန်ဍိုက်ဒၞပ်တုဲ ကွာ်ဒၟံၚ်စၚ်္ကြမ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ၊ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။
ယွံခမဳတအ် ကျာ်တြဲ ကေုာံခမဳဂမၠိုၚ်မဒှ်ထေရ်ဇၞော် သီုဟွံလိုန်ဍိုက်ဒၞပ် ကွာ်ဒၟံၚ်စၚ်္ကြမ်အိုတ်ဂှ် ခမဳဆဗ္ဗဂ္ဂဳဂမၠိုၚ် လိုန်ဍိုက်ဒၞပ်တုဲ ကွာ်ဒၟံၚ်စၚ်္ကြမ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ ။ ပ ။ ယွံခမဳတအ် ကျာ်တြဲကေုာံခမဳဂမၠိုၚ် မဒှ်ထေရ်ဇၞော် သီုဟွံလိုန်ဍိုက်ဒၞပ် ကွာ်ဒၟံၚ်စၚ်္ကြမ်အိုတ်ဂှ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် လိုန်ဍိုက်ဒၞပ်တုဲ ကွာ်ဒၟံၚ်စၚ်္ကြမ်အိုတ်ရော?
ယွံခမဳတအ် မၞိဟ်ဂမၠိုၚ်မဗိုက်လတက်ယာတ်ဗုဝွံလေဝ် ဟိုတ်နူဟိုတ်ဒဒက်တဴကွတ် မဒှ်ဟိုတ်ဂယိုၚ်လမျီုဂှ် မၞုံကဵုပွမရှ်ေသှ်ေရဴဂဴ ပွမဇအ်သဝ်အောပ်မာ ပ္ဍဲအ္စာဂမၠိုၚ် မၞုံကဵုပွမဂယိုၚ်လမျီု တုပ်သၟဟ်ဂမၠိုၚ်ဒှ်တုဲ ပဒတဴဒၟံၚ်အိုတ်ဏီရ။
ယွံခမဳတအ် မၞးတအ်ညးဂမၠိုၚ် သီုမဒှ်တဴ ညးသ္ပခမဳပ္ဍဲသာသနာ မဂပ်ဝ်တွံလဝ်ဗွဲမဒးရးရဴဝွံအိုတ်ဂှ် ပ္ဍဲအ္စာဂမၠိုၚ်ကီု ပ္ဍဲခမဳဂမၠိုၚ်မဒှ်ဗၞတ်အ္စာကီု ပ္ဍဲဥပဇ္ၛာယ်ဂမၠိုၚ်ကီု ပ္ဍဲခမဳဂမၠိုၚ်မဒှ်ဗၞတ်ဥပဇ္ၛာယ်ကီု သီုဟွံမွဲကဵုပွမရှ်ေသှ်ေရဴဂဴ ပွမဇအ်သဝ်အောပ်မာ ပွမဂယိုၚ်လမျီုတုပ်သၟဟ်ဂမၠိုၚ်ဂှ် ပဒတဴဒၟံၚ်အိုတ်မ္ဂး၊ ဆာဲဂေါဝ်ဒၟံၚ်အိုတ်ဟာ။
ယွံခမဳတအ် (ပွခမဳဆဗ္ဗဂ္ဂဳဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး–
“ယွံခမဳတအ် အ္စာဂမၠိုၚ်ကီု ခမဳဂမၠိုၚ်မဒှ်ဗၞတ်အ္စာကီု ဥပဇ္ၛာယ်ဂမၠိုၚ်ကီု ခမဳဂမၠိုၚ်မဒှ်ဗၞတ်ဥပဇ္ၛာယ်ကီု သီုလိုန်ဍိုက်ဒၞပ် ကွာ်ဒၟံၚ်စၚ်္ကြမ်အိုတ်ဂှ် လိုန်ဍိုက်ဒၞပ်တုဲ ဟဂပ်ဝ်ကွာ်စၚ်္ကြမ်ရ၊ ကုခမဳမကွာ်စၚ်္ကြမ်ဂှ် ဒးအာပတ်ဒုက္ကဋ်ရ၊ ယွံခမဳတအ် ပ္ဍဲအပ္ဍဲအာရှာမ် ဟဂပ်ဝ်လိုန်ဍိုက်ဒၞပ်ရ၊ ကုခမဳမလိုန်ဍိုက်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
၂၄၉။ ပ္ဍဲကာလမွဲအခိၚ် ကုခမဳမွဲဇကု ဒှ်ယဲဖျုန်ကၟဝ် (ဖျုန်တ္ၜတ်) ဠတ်တိတ် ပ္ဍဲဂတာဇိုၚ်ညံၚ်ရဴကၞက်ဂဂဵုရ။ ထ္ၜၚ်ကယျာ ခမဳဂှ်တုဲ ဒးကဵုသၠးတရဴဇၞော်တရဴသၟတ်အိုတ်ရ၊ တဳလမၞုံပိုဉ်ကျာ်တြဲ ဂေတ်ဂ္ၚေၚ်ဒေသစာရိတ် လၟေၚ်ဘာမ္ဂး ညာတ်ဒးခမဳဂမၠိုၚ် ထ္ၜၚ်ကယျာခမဳဂှ်တုဲ ဒးကဵုသၠးတရဴဇၞော် တရဴသၟတ်ဂမၠိုၚ်ဂှ်တုဒ ပြာပ်အာဇရေၚ် ခမဳဂမၠိုၚ်ဂှ်တုဲပ္ဍဲကြဴ “ယွံခမဳတအ် ယဲခမဳဝွံတုန် မုယဲရော?” ရဴဝွံ သၟာန်ခမဳဂမၠိုၚ်ဂှ်ရ။ ယွံတဳလမၞုံပိုဉ် ပ္ဍဲဂတာဇိုၚ် တဳလပိုဉ်ဝွံ ယဲဖျုန်ကၟဝ် (ဖျုန်တ္ၜတ်) ဠတ်တိတ် ညံၚ်ရဴကၞက်ဂဂဵုရ။ ပိုဲဍိက်တအ်ညးဂမၠိုၚ် ထ္ၜၚ်ကယျာ ခမဳဝွံတုဲ ဒးကဵုသၠးတရဴဇၞော် တရဴသၟတ်အိုတ်ရ ရဴဝွံ (ဂရၚ်ပတီအိုတ်ရ)။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး–
“ယွံခမဳတအ် ယြဴကုခမဳမွဲ ဂၠးဂတာဇိုၚ်ဂမၠိုၚ် ဂိသကေဝ်အိုတ်မ္ဂး၊ ဂၠးဂတာဇိုၚ်ဂမၠိုၚ်ဗကးအိုတ်မ္ဂး၊ ပ္ဍဲဂၠးဂတာဇိုၚ် ဒှ်ယဲဖျုန်ကၟဝ်ဠတ်တိတ် ညံၚ်ရဴကၞက်ဂဂဵုအိုတ်မ္ဂး၊ (ကုခမဳဂှ်) ကဵုအခေါၚ် တၞဟ်နလိုန်ဍိုက်ဒၞပ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဂမၠိုၚ် ဟီုဟွံကြာတ်ဇိုၚ် တိုန်လတူဇံၚ်ဂတဵုအိုတ်ရ၊ သ္ၚာကေုာံသၞာသတိတ် သၞာဒၟံၚ်ဂမၠိုၚ် ကၠိၚေတ် ‘လီုလာ်’ ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် “ပ္ဍဲအခိၚ်လၟုဟ် ကြက်တိုန်လတူဇံၚ်ဂတဵုရ” ရဴဝွံ တၞဟ်နလိုန်ဍိုက်ဒၞပ်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် အာတဴ ရုၚ်ဥပေါဟ်ကီု ဌာန်ကောံဓရီုကီုအိုတ်မ္ဂး ပ္ဍဲဒမၠု ဟိုတ်မလိုန်ဒး ကၞက်ဂဂဵုကီု ဇၠကီုဂှ်ရ ဇိုၚ်ဂမၠိုၚ် ဂိသကေဝ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် “ပ္ဍဲအပ္ဍဲအရှာမ် တၞဟ်နလိုန်ဍိုက်ဒၞပ်ကီု တၞဟ်ပွမပကၚ်ရၚ်လဝ်ပၟတ်သူ လေံဒစုန်ဂမၠိုၚ်ဂှ် ကဵုအခေါၚ်ရ” ရဴဝွံ (သ္ဂးရ)။
