၁၄၇.၂။ သောဏဒှ်ခမဳ
၂၄၃။ ပ္ဍဲအခိၚ်ဂှ် “ဓရ်အတိုၚ်တဳလမၞုံပိုဉ်ကျာ်တြဲ ဟီုတွံလဝ်ဂှ် အဲဂွံတီကေတ်ရ၊ ညးမပဒတဴ ပ္ဍဲအဝေါၚ်ဘဝခရှ်ဂှ် တၞဟ်နဂွံဒ္ဂေတ်လ္ၚတ်ဒ္ဂေတ်မပြဲ မဍိုက်ပေၚ်သအးဇ္ၚးစၟတ် မတုပ်သၟဟ်ကဵု ကၞသၚ်ပေါတ်လဝ်တၟိဝွံ ဟွံလောဲသွာရ၊ အဲ ကးပါဲကၠေံ သော်က္ဍိုပ်၊ သော်သၟိပ်တုဲမ္ဂး သၠောံလတက်ကေတ် ယာတ်ဂမၠိုၚ် မဖျောန်လဝ်ဍာံလွံက်တုဲ နူအဝေါၚ်ဘဝခရှ်ဂှ် ဂွံလုပ်စိုပ်အဝေါၚ်ဘဝခမဳမ္ဂး ခိုဟ်ရ” ရဴဝွံ ကသပ်ဒှ် ကုသောဏ မကတဵုဒှ်ပ္ဍဲဂကူကောဠိဝိသရ။
ပ္ဍဲအခိၚ်ဂှ် ကောန်ကွာန်ဂမၠိုၚ်ဒ္စာံဠက်ဂှ် သ္ဍိုက်မၠိုက်ဓရ်တဳလမၞုံပိုဉ်ကျာ်တြဲ မဂပ်ဝ်တွံလောန် အိုဟ်တၟိုဟ်လောန်ဂမၠိုၚ်ဒှ်တုဲ ဒၠိုက်ကတဵုနူဒၞာဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သ္ပရှ်ေသှ်ေရဴဂဴကၠာ ပါဲစ္ဍးအာရ။
ပ္ဍဲအခိၚ်ဂှ် သောဏမကတဵုဒှ်ပ္ဍဲဂကူကောဠိဝသ ကောန်ကွာန်ဂမၠိုၚ်ဒ္စာံဠက်ဂှ် ပါဲစ္ဍးအာတုဲ ဟွံသက်ဂတာပ်လအ် ပြာပ်အာဇရေၚ် တဳလမၞုံပိုဉ်ကျာ်တြဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ် ပ္ဍဲမွဲဒၞာဲတုဲ သောဏမကတဵုဒှ်ပ္ဍဲဂကူကောဠိဝိသဂှ် “ယွံတဳလမၞုံပိုဉ် ဓရ်အတိုၚ်တဳလမၞုံပိုဉ်ကျာ်တြဲ ဟီုတွံလဝ်ဂှ် အဲဍိက် ဂွံတီကေတ်ရ၊ ညးမပဒတဴ ပ္ဍဲအဝေါၚ်ဘဝခရှ်ဂှ် တၞဟ်နဂွံဒ္ဂေတ်လ္ၚတ်ဒ္ဂေတ်မပြဲ မဍိုက်ပေၚ်သအးဇ္ၚးစၟတ် မတုပ်သၟဟ်ကဵုကၞုသၚ်ပေါတ်လဝ်တၟိဝွံ ဟွံလောဲသွာရ။ ယွံတဳလမၞုံပိုဉ် အဲဍိက်ကးပါဲကၠေံ သော်က္ဍိုပ်၊ သော်သၟိပ်တုဲမ္ဂး သၠောံလတက်ကေတ် ယာတ်ဂမၠိုၚ် မဖျေန်လဝ်ဍာ်လွံက်တုဲ နူအဝေါၚ်ဘဝခရှ်ဂှ် မိက်ဂွံလုပ်စိုပ်အဝေါၚ်ဘဝခမဳရ၊ ယွံတဳလမၞုံပိုဉ် တဳလမၞုံပိုဉ်ကျာ်တြဲဂှ် ဩဝ်သ္ပကဵုအဲဍိက် ထပိုဲခမဳညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
သောဏမကတဵုဒှ်ပ္ဍဲဂကူကောဠိဝိသဂှ် ကလိဂွံဒဒှ်ထပိုဲ ပ္ဍဲဇရေၚ်တဳလမၞုံပိုဉ်ကျာ်တြဲရ၊ ဒဒှ်ခမဳပယျၚ်လေဝ် ကလိဂွံရ၊ ဒှ်ခမဳတုဲခြာဟွံလအ် တဳလပိုဉ်သောဏ သ္ပဒတဴဒၟံၚ်ပ္ဍဲဂြိုပ်ကြက်ဂြၚ်ရ၊ မၞုံကဵုဝဳရိယမဂပ်ဝ်ပတိတ်ဇြဟတ်လောန်ဒှ်တုဲ ဂၠးဇိုၚ်သောဏဂမၠိုၚ်မကွာ်စၚ်္ကြမ်ဂှ် ဗကးအိုတ်ရ။ စၚ်္ကြမ်ဂှ် ညံၚ်ရဴဒၞာဲဂစိုတ်ဂၠဴကီု ကၠေဝ်ဗာန်ဒၟံၚ် နကဵုဆီရ။ ပ္ဍဲအခိၚ်ဂှ် ပြာပ်အာဌာန်လ္ၚုသ္ၚိတ်ဇြတုဲ ကုတဳလပိုဉ်သောဏ မသတၚ်တန်တဴဒၟံၚ် ညးမွဲဓဝ်ဂှ် “ကွးသာဝကတဳလမၞုံပိုဉ်ကျာ်တြဲဂမၠိုၚ်အိုတ်သီု မၞုံကဵုဝဳရိယမဂပ်ဝ်ပတိတ်ဇြဟဂမၠိုၚ်ဂှ်ဒှ်တုဲ ပဒတဴအိုတ်ရ။ ပၞောဝ်ကဵုညးဂမၠိုၚ်ဂှ် အဲ ဒှ်ညးပါလုပ်လၟိဟ်မွဲရ၊ သီုကဵုဒှ်သာ်ဂှ် စိုတ်အဲဂှ် ဟွံစောဲလာံ (အာရီုမမိက်ကဵုမွဲမွဲနကဵုတဏှာ ဒိဋ္ဌိဂမၠိုၚ်) တုဲ ဟွံတိတ်ဗၠးနူဓရ်အာသဝဂမၠိုၚ်ရ။ ပ္ဍဲသ္ၚိအဲ ပိုန်ဟာန်ဂြတ်ရတ်ဂမၠိုၚ်နွံအိုတ်ရ၊ တၞဟ်နဒိုၚ်စသိုၚ် ပိုန်ဟာန်ဂြပ်ရတ်ဂမၠိုၚ်ကီု တၞဟ်နကၠောန်ကုသိုလ်ဂမၠိုၚ်ကီု သၟဟ်ရအထရ၊ အဲဖျေံထောံသိက္ခာတုဲ ရာမ်တိတ်အာခရှ်တုဲမ္ဂး ပိုန်ဟာန်ဂြပ်ရတ်ဂမၠိုၚ်လေဝ် ဂွံဒုၚ်စသိုၚ်မ္ဂး ကုသိုလ်ဂမၠိုၚ်လေဝ် ဂွံကၠောန်သ္ပမ္ဂး ခိုဟ်ရ” ရဴဝွံ ကသပ်စိုတ် ဒှ်ကၠုၚ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ်ကသပ်စိုတ် တဳလပိုဉ်သောဏ နကဵုစိုတ် (ဇကု) တုဲ တြုံမၞုံဇြဟတ် သၟဟ်ညံၚ်ရဴပၠးပတိတ်သပါတဲ မခ္ဍပ်လဝ်ကီု သၟဟ်ညံၚ်ရဴ ခ္ဍပ်ကၠေံသပါတဲ မပၠလဝ်ကီု တုပ်တဴသာ်ဝွံဟေၚ်ရ၊ ကၠေံဗ္ဒန်အာ နူဒဵုဂိဇ္ၛကုဋ်တုဲ ဒှ်ပြာကဋ်ပ္ဍဲဂြိုပ်ကြက်ဂြၚ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ မွဲဟာန်ကေုာံခမဳဂမၠိုၚ်မဂၠိုၚ်ဂၠၚ် ဂေတ်ဂ္ၚေၚ်ဒေသစာရိတ်လၟေၚ်ဘာမ္ဂး ပြာပ်စိုပ်အာစၚ်္ကြမ် တဳလပိုဉ်သောဏရ။ တဳလမၞုံပိုဉ်ကျာ်တြဲ ညာတ်ဒး စၚ်္ကြမ်တဳလပိုဉ်သောဏ မကၠေဝ်ဗာန်ဒၟံၚ်နဆီတုဲ “ယွံခမဳတအ် ညံၚ်ရဴဒၞာဲဂစိုတ်ဂၠဴကီု စၚ်္ကြမ် မကၠေဝ်ပြးဇးဒၟံၚ်နဆီဝွံ စၚ်္ကြမ် မုရဴခမဳမွဲရော?” ရဴဝွံ သၟာန်ခမဳဂမၠိုၚ်ရ။
ယွံတဳလမၞုံပိုဉ် မၞုံကဵုဝဳရိယမဂပ်ဝ်ပတိတ်ဇြဟတ်လောန်ဒှ်တုဲ ဂၠးဇိုၚ်သောဏဂမၠိုၚ်မကွာ်စၚ်္ကြမ်ဂှ် ဗကးအိုတ်ရ၊ ညံၚ်ရဴဒၞာဲဂစိုတ်ဂၠဴကီု စၚ်္ကြမ်ကၠေဝ်ဗာန်ဒၟံၚ် နကဵုဆီဝွံတုန် ဒှ်စၚ်္ကြမ်တဳလပိုဉ်သောဏဂှ်ရ ရဴဝွံ (ဂရၚ်ပတီအိုတ်ရ)။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပြာပ်အာဘာ တဳလပိုဉ်သောဏတုဲ ဂဇအ်ပ္ဍဲဒၞာဲသၞာမလးပညပ်စွံလဝ်ရ၊ တဳလပိုဉ်သောဏလေဝ် လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ်ပ္ဍဲဒၞာဲမဗဗွဲမွဲရ၊ တဳလပိုဉ်သောဏ မဂဇအ်ဒၟံၚ် ပ္ဍဲဒၞာဲမဗဗွဲမွဲဂှ် တဳလမၞုံပိုဉ်ကျာ်တြဲ သၟာန်ဂလာန်ဝွံရ “ယွံသောဏ ပြာပ်အာဌာန်လ္ၚုသ္ၚိတ်ဇြတုဲ ကုတၠအဲ မသတၚ်တန်တဴဒၟံၚ် ညးမွဲဓဝ်ဂှ် “ကွးသာဝက တဳလမၞုံပိုဉ်ကျာ်တြဲဂမၠိုၚ်အိုတ်သီု မၞုံကဵုဝဳရိယမဂပ်ဝ်ပတိတ်ဇြဟတ်ဂမၠိုၚ်ဂှ်ဒှ်တုဲ ပဒတဴအိုတ်ရ၊ ပၞောဝ်ညးဂမၠိုၚ်ဂှ် အဲဒှ်ညးပါလုပ်လၟိဟ်မွဲရ၊ သီုကဵုဒှ်တဴသာ်ဂှ် စိုတ်အဲဂှ် ဟွံစောဲလာံ (အာရီုမမိက်ကဵုမွဲမွဲ နကဵုတဏှာဒိဋ္ဌိဂမၠိုၚ်) တုဲ ဟွံတိတ်ဗၠးနူဓရ်အာသဝဂမၠိုၚ်ရ၊ ပ္ဍဲသ္ၚိအဲပိုန်ဟာန်ဂြပ်ရတ်ဂမၠိုၚ် နွံအိုတ်ရ။ တၞဟ်နဒုၚ်စသိုၚ် ပိုန်ဟာန်ဂြပ်ရတ်ဂမၠိုၚ်ကီု တၞဟ်နကၠောန်ကုသိုလ်ဂမၠိုၚ်ကီု သၟဟ်ရထရ။ အဲဖျေံထောံသိက္ခာတုဲ ရာမ်တိတ်အာခရှ်တုဲမ္ဂး ပိုန်ဟာန်ဂြပ်ရတ်ဂမၠိုၚ်လေဝ် ဂွံဒုၚ်စသိုၚ်မ္ဂး ကုသိုလ်ဂမၠိုၚ်လေဝ် ဂွံကၠောန်သ္ပမ္ဂး ခိုဟ်ရ” ရဴဝွံ ကသပ်စိုတ်ဒှ်ကၠုၚ်ရ ဟွံသေၚ်ဟာ ရဴဝွံ သၟာန်တိုန်ဂှ် ဍာံပြရ ယွံတဳလမၞုံပိုဉ် ရဴဝွံ (ဂရၚ်ပတီရ)။
ယွံသောဏ အရာဂှ် ပသာ်သမ္တီထေၚ်ကေတ်ရော? တၠအဲ ဃောဒှ်မၞိဟ်ကိုပ်ကၠာတေံဂှ် စဳကၠးဆိုက်ဗ္ဒက် ပ္ဍဲပွမပေါဟ်စံၚ်ရ ဟွံသေၚ်ဟာ ရဴဝွံ (သၟာန်တိုန်ဂှ်) ဍာံပြရ ယွံကျာ်မၞုံပိုဉ်။
ယွံသောဏ အရာဂှ် ပသာ်သမ္တီထေၚ်ကေတ်ရော? ယြဴပ္ဍဲအခိၚ်မွဲ ဇုက်ထၞစံၚ် တၠအဲဂမၠိုၚ် တေၚ်လောန်အိုတ်ရ၊ ပ္ဍဲအခိၚ်ဂှ် ထၞ စံၚ်တၠအဲဂှ် မၞုံကဵုဗရုရမျာၚ်သာယာတိတ်ကီု မၞုံကဵုပွမဒုၚ်စရၚ် (ပ္ဍဲပွမတိၚ်ပေါဟ်လအ်လအ်) ကီု ဒှ်ဟာ ရဴဝွံ (သၟာန်တိုန်ပၠန်ဂှ်) ယွံကျာ်မၞုံပိုဉ် ရဴဝွံတုန် ဟွံဒှ်ရ ရဴတွံ (ဂရၚ်ပတီရ)။
ယွံသောဏ အရာဂှ် ပသာ်သမ္တီထေၚ်ကေတ်ရော? ယြဴပ္ဍဲအခိၚ်မွဲ ဇုက်ထၞစံၚ်တၠအဲဂမၠိုၚ် လၞောအ်လျအ်လောန်အိုတ်ရ၊ ပ္ဍဲအခိၚ်ဂှ် ထၞ စံၚ်တၠအဲဂှ် မၞုံကဵုဗရုရမျာၚ်သာယာတိတ်ကီု မၞုံကဵုပွမဒုၚ်စရၚ် (ပ္ဍဲပွမတိၚ်ပေါဟ်လအ်လအ်) ကီု ဒှ်ဟာ ရဴဝွံ (သၟာန်တိုန်ပၠန်ဂှ်) ယွံကျာ်မၞုံပိုဉ် ရဴဝွံတုန် ဟွံဒှ်ရ ရဴဝွံ (ဂရၚ်ပတီရ)။
ယွံသောဏ တုပ်တဴသာ်ဝွံဟေၚ် ဝဳရိယမဂ်ဝ်ပတိတ်ဇြဟတ်လောန်ဂှ် ဒှ်တဴတၞဟ်နဂွံကလှ်လဖှ်ရ၊ ဝဳရိယမလၞောအ်လျအ်လောန်ဂှ် ဒှ်တဴတၞဟ်နဂွံလၞုဟ်လၞန်ရ၊ ယွံသောဏ ဟိုတ်ဂှ်ရတၠအဲ ဩဝ်သှ်ပတဴ ဒဒှ်ဝဳရိယကေုာံသမာဓိ မသၟဟ်သၟန်ညိ၊ ဒဒှ်မညဳသၟဟ်သၟန် ဣန္ဒြဳဂမၠိုၚ် (မပ္တံကဵုသဒ္ဓါ) ဂှ်လေဝ် ဩဝ်တီညိ၊ ပ္ဍဲအခိၚ် မညဳသၟဟ်သၟန်သာ်ဂှ် ဩဝ်ကဵုကတဵုဒှ် နိမိတ် (မပ္တံကဵုသမထ) ညိ ရဴဝွံ ဒၠောံဗတောန်ရ။ “ခိုဟ်ရ ယွံကျာ်မၞုံပိုဉ်” ရဴဝွံ တဳလပိုဉ်သောဏ ဒုၚ်ဝန်ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဒၠောံဗတောန်တဳလပိုဉ်သောဏ နဒၠောံဗတောန်ဝွံတုဲ တြုံမၞုံကဵုဇြဟတ် သၟဟ်ညံၚ်ရဴပၠးပတိတ်သပါတဲ မခ္ဍပ်လဝ်ကီု သၟဟ်ညံၚ်ရဴ ခ္ဍပ်ကၠေံသပါတဲ မပၠးလဝ်ကီု တုပ်တဴသာ်ဝွံဟေၚ် ကၠေံဗ္ဒန်အာ နူဂတမုက်တဳလပိုဉ်သောဏ ပ္ဍဲဂြိုပ်ကြက်ဂြၚ်တုဲ ဒှ်ပြာကဋ် ပ္ဍဲဒဵုဂိဇ္ဇကုဋ်ရ။
ပ္ဍဲအခိၚ်ဂှ် တဳလပိုဉ်သောဏ ညးမွဲဓဝ် ပြာပ်အာဌာန် လ္ၚုသ္ၚိတ်ဇြတုဲ ဟွံဝိဝိၚ်ဟိုတ်မာဲဒှ်တုဲ ပတိတ်ဇြဟတ်ဗွဲမသကာတ်မြဟ်ဒှ်တုဲ မၞုံကဵုစိုတ်မတန်ကြန်ဂှ်ဒှ်တုဲ ပဒတဴမ္ဂး ဖဵု (အရဟတ္တဖိုလ်) မဒှ်လအိတ်ဒ္ဂေတ်မပြဲ မဟွံမွဲပတောံၜတ် ကောန်ဂကူဂမၠိုၚ် နူအဝေါၚ်ဘဝခရှ် မလုပ်စိုပ် အဝေါၚ်ဘဝခမဳ ဗွဲမဒးရး မဂပ်ဝ်နွံပၟိက်ဂှ် ခြာဟွံလအ် ပ္ဍဲဘဝလၟုဟ်ဟေၚ် အလဵုဇကု သ္ပကေတ်ဇၞောဝ်မတ် နကဵုဉာဏ်တၟေၚ်ကၠာ အာစိုပ်တုဲ သ္ပဒတဴရ။ “ပွမတန်ပဋိသန္ဓိအိုတ်တုဲရ၊ ဒ္ဂေတ်လ္ၚတ် ဒ္ဂေတ်မပြဲတုဲရ၊ သ္ပပတုဲကိစ္စမဂ်တုဲရ၊ တၞဟ်နကိစ္စမဂ်ဝွံ ကိစ္စထေက်ကဵုဒးသ္ပ မွဲသအာၚ် ဟွံမွဲတုဲရ” ရဴဝွံ တီရ၊ တဳလပိုဉ်သောဏဂှ် ပၞောဝ်ကဵုတၠအရှန်ဂမၠိုၚ် ဒှ်ပါလုပ်လၟိဟ် မွဲဇကုရ။
၂၄၄။ ပ္ဍဲအခိၚ်ဂှ် ကုတဳလပိုဉ်သောဏ မအာစိုပ်အရဟတ္တဖိုလ်ဂှ် “အဲ သ္ဂောံဂရၚ်ပတီ အရဟတ္တဖိုလ် ပ္ဍဲဇရေၚ်တဳလမၞုံပိုဉ်ကျာ်တြဲမ္ဂး ခိုဟ်ရ” ရဴဝွံ ကသပ်ဒှ်ရ၊ ပ္ဍဲအခိၚ်ဂှ် တဳလပိုဉ်သောဏ ပ္ၚောံပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး သီုမဂဇအ်ပ္ဍဲဒၞာဲမဗဗွဲမွဲဂှ် ဂရၚ်ပတီ တဳလမၞုံပိုဉ်ကျာ်တြဲဂလာန်ဝွံရ “ယွံကျာ်မၞုံပိုဉ် ခမဳမဒှ်တၠအရှန် ဓရ်အာသဝအိုတ်တုဲ မဒ္ဂေတ်လ္ၚတ် (ဒ္ဂေတ်မဂ်) တုဲ မသ္ပကိစ္စမဂ်တုဲ မဖျေံကၠေံသဇိုၚ်ဝန်ခန္ဓတုဲ မအာစိုပ်ဖဵုဇကု (အရဟတ္တဖိုလ်) အတိုၚ်လၟေၚ်တုဲ ဘဝသံယောဇိုန်အိုတ်တုဲ တီကေတ်ဗွဲမ္ဒးရးတုဲ မတိတ်ဗၠး (နူကိလေသ) တုဲဂှ် သ္ပဇၞောဝ်မတ် ဟိုတ်ဂမၠိုၚ်တြဴပြကာတုဲ တန်တဴရ။ သ္ပဇၞောဝ်မတ် (အရဟတ္တဖိုလ်) မတိတ်ဗၠးနူကိလေသတုဲ တန်တဴရ၊ သ္ပဇၞောဝ်မတ် (အရဟတ္တဖိုလ်) မလ္ၚုသုန်ဂြာံ (နူကိလေသ) တုဲ တန်တဴရ၊ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အရာဥပါဒါန်ဂမၠိုၚ် အိုတ်တုဲတန်တဴရ၊ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အရာဥပါဒါန်ဂမၠိုၚ်အိုတ်တုဲ တန်တဴရ၊ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အာတဏှာအိုတ်တုဲ တန်တဴရ၊ သ္ပဇၞောဝ်မတ် (အရဟတ္တဖိုလ်) မဟွံမွဲကဵုမောဟတုဲ တန်တဴရ။
ယွံကျာ်မၞုံပိုဉ် ကာလလဆောဝ် ကုတဳလပိုဉ်လ္ၚဵုဂှ် ‘ဗွဲစၟတ် တဳလပိုဉ်ဝွံ နိဿယ်ကဵုအယာံမာတ် (သဒ္ဓါ) ပွမလျုၚ်ပတှ်ေသက်သက် မဟွံနှဴရဴကေုာံပဋိဝေဓဉာဏ်တုဲ (အဲတုန်) ဒှ်တၠအရှန် သ္ပဇၞောဝ်မတ် (အရဟတ္တဖိုလ်) မတိတ်ဗၠး (နူကိလေသဂမၠိုၚ်) တုဲ တန်တဴရ’ ရဴဝွံ ဟီုသ္ဂးဟာ ရဴဝွံ ကသပ်ဒှ်ရ။
ယွံကျာ်မၞုံပိုဉ် အတိုၚ်ချပ်ရဴဝွံဂှ် ဟွံထေက်ကဵုသမ္တီ ဟိုတ်ဂှ်ရ၊ ယွံကျာ်မၞုံပိုဉ် ခမဳအာသဝအိုတ်အာတုဲ မဒ္ဂေတ်လ္ၚတ် (ဒ္ဂေတ်မဂ်) တုဲ မသ္ပကိစ္စမဂ်တုဲ မသ္ပကိစ္စမဂ်တုဲ မဟွံညာတ်ကိစ္စဇကုမ္ဒးသ္ပကေုာံ ပွမ္ဒးဇၞောဝ်ပၟဝ်ကိစ္စမဂ် သ္ပတုဲဂှ် ဟိုတ်နူရာဂအိုတ်အာဂှ်ရ စာ်စ္ဍးအာနူရာဂရ၊ ဟိုတ်နူရာဂစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မတိတ်ဗၠးနူရာဂတုဲ တန်တဴရ။ ဟိုတ်နူဒေါသအိုတ်အာဂှ်ရ စာ်စ္ဍးအာနူဒေါသရ၊ ဟိုတ်နူဒေါသစာ်စ္ဍးအာဂှ်ရ သ္ပေဇၞောဝ်မတ် (အရဟတ္တဖိုလ်) မတိတ်ဗၠးနူဒေါသတုဲ တန်တဴရ။ ဟိုတ်နူမောဟအိုတ်အာဂှ်ရ စာ်စ္ဍးအာနူမောဟရ၊ ဟိုတ်နူစာ်စ္ဍးအာနူမောဟဂှ်ရ သ္ပဇၞောဝ်မတ် (အရဟတ္တဖိုလ်) ပွမတိတ်ဗၠးနူမောဟတုဲ တန်တဴရ။
ယွံကျာ်မၞုံပိုဉ် ကာလလဆောဝ် ကုတဳလပိုဉ်လ္ၚဵုဂှ် ‘ဗွဲစၟတ် တဳလပိုဉ်ဝွံ ရာဒနာကဵုလာဘ်ပူဇဴသကာဒယှ်တှ်တုဲ (အဲတုန်) တၠအရှန် သ္ပဇၞောဝ်မတ် (အရဟတ္တဖိုလ်) မလ္ၚုသုန်ဂြာံ (နူကိလေသဂမၠိုၚ်) တုဲ တန်တဴရ ရဴဝွံ ဟီုသ္ဂးဟာ’ ရဴဝွံ ကသပ်ဒှ်ရ။ ယွံကျာ်မၞုံပိုဉ် အတိုၚ်ချပ်ရဴဝွံဂှ် ဟွံထေက်ကဵုသမ္တီ ဟိုတ်ဂှ်ရ၊ ယွံကျာ်မၞုံပိုဉ် ခမဳအာသဝအိုတ်အာတုဲ မဒ္ဂေတ်လ္ၚတ် (ဒ္ဂေတ်မဂ်) တုဲ မသ္ပကိစ္စမဂ်တုဲ မဟွံညာတ် ကိစ္စဇကုမ္ဒးသ္ပ ကေုာံပွမဇၞော်ပၟဝ်ကိစ္စမဂ်သ္ပတုဲဂှ် ဟိုတ်နူရာဂအိုတ်အာဂှ်ရ စာ်စ္ဍအာနူရာဂရ၊ ဟိုတ်နူရာဂစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မလ္ၚုသုန်ဂြာံနူရာဂတုဲ တန်တဴရ။ ဟိုတ်နူဒေါသအိုတ်အာဂှ်ရ စာ်စ္ဍးအာနူဒေါသရ၊ ဟိုတ်နူဒေါသစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မလ္ၚုသုန်ဂြာံနူဒေါသတုဲ တန်တဴရ။ ဟိုတ်နူမောဟအိုတ်အာဂှ်ရ စာ်စ္ဍးအာနူမောဟရ၊ ဟိုတ်နူစာ်စ္ဍးအာနူမောဟဂှ်ရ သ္ပဇၞောဝ်မတ် (အရဟတ္တဖိုလ်) မလ္ၚုသုန်ဂြာံနူမောဟတုဲ တန်တဴရ။
ယွံကျာ်မၞုံပိုဉ် ကာလလဆောဝ် ကုတဳလပိုဉ်လ္ၚဵုဂှ် ‘ဗွဲစၟတ် တဳလပိုဉ်ဝွံ ပတှ်ေကေတ်အလေံဒ္ဂေတ်လ္ၚတ်ဂၠဴဂမၠိုၚ် မဂပ်ဝ်ဇွိတ်သပေါတ်ဗွဲမမှာရာ ဗွဲအစောံကြက်ဂှ်ဒှ်တုဲ (အဲတုန်) တၠအရှန် သ္ပဇၞောဝ်မတ် (အရဟတ္တဖိုလ်) မဟွံမွဲကဵုဂဗုတ် (ပၞတ်) တုဲ တန်တဴရ ရဴဝွံ ဟီုသ္ဂးဟာ’ ရဴဝွံကသပ်ဒှ်ရ။ ယွံကျာ်မၞုံပိုဉ် အတိုၚ်ချပ်ရဴဝွံဂှ် ဟွံထေက်ကဵုသမ္တီ ဟိုတ်ဂှ်ရ၊ ယွံကျာ်မၞုံပိုဉ် ခမဳအာသဝအိုတ်အာတုဲ မဒ္ဂေတ်လ္ၚတ် (ဒ္ဂေတ်မတ်) တုဲ မသ္ပကိစ္စမဂ်တုဲ မဟွံညာတ်ကိစ္စဇကုမ္ဒးသ္ပေကေုာံ ပွမဇၞော်ပၟဝ်ကိစ္စမဂ်သ္ပတုဲဂှ် ဟိုတ်နူရာဂအိုတ်အာဂှ်ရ စာ်စ္ဍးအာနူရာဂရ၊ ဟိုတ်နူရာဂစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဟွံမွဲကဵုဂဗုတ်ပၞတ်တုဲ တန်တဴရ။ ဟိုတ်နူဒေါသအိုတ်အာဂှ်ရ စာ်စ္ဍးအာနူဒေါသရ၊ ဟိုတ်နူစာ်စ္ဍးအာနူဒေါသဂှ်ရ သ္ပဇၞောဝ်မတ် (အရဟတ္တဖိုလ်) မဟွံမွဲကဵုဂဗုတ်ပၞတ်တုဲ တန်တဴရ။ ဟိုတ်နူမောဟအိုတ်အာဂှ်ရ စာ်စ္ဍးအာနူမောဟဂှ်ရ၊ ဟိုတ်နူမောဟစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဟွံမွဲကဵုဂဗုတ်ပၞတ်တုဲ တန်တဴရ။
ဟိုတ်နူရာဂအိုတ်အာဂှ်ရ စာ်စ္ဍးအာနူရာဂရ၊ ဟိုတ်နူရာစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အရာဥပါဒါန်ဂမၠိုၚ်အိုတ်တုဲ တန်တဴရ။ ဟိုတ်နူဒေါသအိုတ်အာဂှ်ရ စာ်စ္ဍးအာနူဒေါသရ၊ ဟိုတ်နူဒေါသစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အရာဥပါဒါန်ဂမၠိုၚ်အိုတ်တုဲ တန်တဴရ။ ဟိုတ်နူမောဟအိုတ်အာဂှ်ရ စာ်စ္ဍးအာနူမောဟရ၊ ဟိုတ်နူမောဟစာ်စ္ဍးအာဂှ်ရ ဟိုတ်နူရာဂအိုတ်အာဂှ်ရ စာ်စ္ဍးအာနူရာဂရ၊ ဟိုတ်နူရာဂစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဟွံမွဲကဵုဂဗုတ်ပၞတ်တုဲ တန်တဴရ။
ဟိုတ်နူရာဂအိုတ်အာဂှ်ရ စာ်စ္ဍးအာနူရာဂရ၊ ဟိုတ်နူရာဂစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အရာတဏှာအိုတ်တုဲ တန်တဴရ။ ဟိုတ်နူဒေါသအိုတ်အာဂှ်ရ စာ်စ္ဍးအာနူဒေါသရ၊ ဟိုတ်နူဒေါသစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အရာတဏှာအိုတ်တုဲ တန်တဴရ။ ဟိုတ်နူမောဟအိုတ်အာဂှ်ရ စာ်စ္ဍးအာနူမောဟရ၊ ဟိုတ်နူမောဟစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဒှ်လအိတ်မဂ် ဒှ်အရာတဏှာအိုတ်တုဲ တန်တဴရ။
ဟိုတ်နူရာဂအိုတ်အာဂှ်ရ စာ်စ္ဍးအာနူရာဂရ၊ ဟိုတ်နူရာဂစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဟွံမွဲကဵုမောဟတုဲ တန်တဴရ။ ဟိုတ်နူဒေါသအိုတ်အာဂှ်ရ စာ်စ္ဍးအာနူဒေါသရ၊ ဟိုတ်နူဒေါသစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဟွံမွဲကဵုမောဟတုဲ တန်တဴရ။ ဟိုတ်နူမောဟအိုတ်အာဂှ်ရ စာ်စ္ဍးအာနူမောဟရ၊ ဟိုတ်နူမောဟစာ်စ္ဍးအာဂှ်ရ သ္ပဇၞောဝ်မတ် (အရဟတ္တဖိုလ်) မဟွံမွဲကဵုမောဟတုဲ တန်တဴရ။
ယွံကျာ်မၞုံပိုဉ် ရဴဝွံ ကုခမဳမၞုံကဵုစိုတ်မတိတ်ဗၠး (နူကိလေသဂမၠိုၚ်) ဗွဲမ္ဒးရးတုဲဂှ် ‘ရူပါရီု’ ရုပ်သာ်ဂမၠိုၚ်မလောန်ကာဲ မဂပ်ဝ်တီနကဵုစက္ခုဝိညာဏ် ယဝ်ကၠုၚ်စိုပ် ပွမတၟးပြကဋ် ကုမတ်အိုတ်မ္ဂးလေဝ် သီဗ္ၜောဝ်ကေတ်စိုတ်ခမဳဂှ်တုဲ ဂိုၚ်ကေတ်ဟွံမာန်အိုတ်ရ၊ စိုတ်ခမဳဂှ် ဟွံနှဴရဴကေုာံကိလေသဂမၠိုၚ်ဟေၚ်ဒှ်ရ၊ တန်တဴရ၊ ဟွံမွဲကဵုပွမချဳဇတဝ်ရ၊ မၠာ်သ္ၚေဝ်ဒှ်လီု စိုတ်ဂှ်ဟေၚ်ရ။
‘သဒ္ဒါရီု’ ရမျာၚ်ဂမၠိုၚ်မလောန်ကဲ မဂပ်ဝ်တီ နကဵုသောတဝိညာဏ် ။ ပ ။
‘ဂန္ဓာရီု’ သၟူအမြာဲဂမၠိုၚ် မဂပ်ဝ်တီ နကဵုဃာနဝိညာဏ် ။ ပ ။
‘ရသာရီု’ ရှ်သာဂမၠိုၚ် မဂပ်ဝ်တီ နကဵုဇိဝှါဝိညာဏ် ။ ပ ။
‘ဖောဋ္ဌဗ္ဗာရီု’ တၟတ်ဒွံလုက်စုတ်ဂမၠိုၚ် မဂပ်ဝ်တီ နကဵုကာယဝိညာဏ် ။ ပ ။
‘ဓမ္မာရီု’ သဘဴဓရ်ဂမၠိုၚ် မဂပ်ဝ်တီ နကဵုမနောဝိညာဏ် ယဝ်ကၠုၚ်စိုပ် ပွမတၟးပြာကဋ်ကုစိုတ်အိုတ်မ္ဂးလေဝ် သီဗ္ၜောဝ်ကေတ် စိုတ်ခမဳဂှ်တုဲ ဂိုၚ်ကေတ်ဟွံမာန်အိုတ်ရ၊ စိုတ်ခမဳဂှ် ဟွံနှဴရဴကေုာံကိလေသဂမၠိုၚ်ဟေၚ် ဒှ်ရ၊ တန်တဴရ၊ ဟွံမွဲကဵုပွမချဳဇတဝ်ရ၊ မၠာ်သ္ၚေဝ်ဒှ်လီု စိုတ်ဂှ်ဟေၚ်ရ။
စိုတ်ပူဂိုလ်တၠအရှန် မသ္ပဇၞောဝ်မတ်အရဟတ္တဖိုလ် မတိတ်ဗၠး (နူကိလေသ) တုဲ အရဟတ္တဖိုလ် မလ္ၚုသုန်ဂြာံ (နူကိလေသဂမၠိုၚ်)၊ အရဟတ္တဖိုလ် မဟွံမွဲကဵုဂဗုတ်ပၞတ်၊ အရဟတ္တဖိုလ် မဒှ်လအိတ်မဂ် ဒှ်အရာဥပါဒါန်ဂမၠိုၚ်အိုတ်၊ အရဟတ္တဖိုလ် မဒှ်လအိတ်မဂ် ဒှ်အာတဏှာအိုတ်၊ အရဟတ္တဖိုလ် မဟွံမွဲကဵုမောဟတုဲ တန်တဴဂှ် ညာတ်ကေတ်ဒှ်လီုအာယတနဂမၠိုၚ် ဗွဲမဒးရးတုဲ တိတ်ဗၠး (နူကိလေသဂမၠိုၚ်ရ)။
တိတ်ဗၠး (နူကိလေသဂမၠိုၚ်) ဗွဲမဒးရးဂှ်ဒှ်တုဲ ကုပူဂိုလ်တၠအရှန် မၞုံကဵုစိုတ်မလလမ်ညိၚ်ဝတ်ဂှ် ဟွံမွဲကဵုပွမဒးကလေၚ်ဇၞော်ပၟဝ် ကိစ္စမသ္ပတုဲရ၊ ကိစ္စကြက်ဒးသ္ပလေဝ်ဟွံမွဲရ။
ဒဵုတၟအ်မတီုက္ဍတ်ဂှ် ဟိုတ်နူကျာ (မပိုက်လွိၚ်ကၠုၚ် ဗွဲမသကာတ်မြဟ်) သၟဟ်ညံၚ်ရဴဟွံချဳဇတဝ်ကီု တုပ်တဴသာ်ဂှ်ရ ရူပါရီု၊ သဒ္ဒါရီု၊ ဂန္ဓာရီု၊ ရသာရီု၊ ဖောဋ္ဌဗ္ဗာရီုဂမၠိုၚ်အိုတ်သီုကီု အာရီုခိုဟ်ဆာဲဂမၠိုၚ်အိုတ်သီုကီု အာရီုဟွံခိုဟ်ဆာဲဂမၠိုၚ်အိုတ်သီုကီု ကဵုချဳဇတဝ်ကၠေံ စိုတ်မတန်ကြန် မတိတ်ဗၠးနူကိလေသ ဒဒက်တဴကဵုပူဂိုလ်တၠအရှန် မဍိုက်ပေၚ်တဴကေုာံဂုဏ်ပွမအေၚ်ဒုၚ်ဂှ် ဟွံမာန်အိုတ်ရ၊ (ပူဂိုလ်တၠအရှန်ဂှ်) မၠာ်သ္ၚေဝ်ဒှ်လီုစိုတ်ဂှ်ဟေၚ်ရ။
