၁၄၈။ ပွမပါဲကၠေံ မပ္တံဒၞပ်ၜါဂၠးၜါထပ်
၂၄၅။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ကော်လၟိၚ်တိုန် ခမဳဂမၠိုၚ်ရ၊ “ယွံခမဳတအ်ရဴဝွံဟေၚ် ကောန်ဂကူဂမၠိုၚ် ဂရၚ်ပတီ အရဟတ္တဖိုလ်အိုတ်ရ၊ သီုဟွံရၚ်တၠုၚ်ဟီုတုဲ ဇကုဇကု ဗွဲတိုက်ရိုက်ဂှ် ဟိုတ်မကတဵုဒှ် (တၠအရှန်) လေဝ် ဟီုလၟိၚ်ရ။
သီုကဵုဒှ်တဴသာ်ဂှ် တြုံမလ္ၚုသၟး (နူမဂ်ဖိုလ်) ဂမၠိုၚ်လ္ၚဵု ညံၚ်ရဴသ္ပဝေၚ်ဂရိုၚ်စရဵုကီု ဟီုလၟိၚ် အရဟတ္တဖိုလ်အိုတ်ရ၊ ညးဂမၠိုၚ်ဂှ် ပ္ဍဲကာလကြဴ အာစိုပ်ပွဍောၚ်ၜိုတ်ဒှ်ဒဒိုခ်အိုတ်ရ” ရဴဝွံ (ကော်လၟိၚ်တိုန်ရ)။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံသောဏ တၠအဲ ဍိုန်ဍောတ်ၜတ်တကတ်ရ၊ ယွံသောဏ ကဵုအခေါၚ် ဒၞပ်မွဲဂၠးမွဲထပ် ကုတၠအဲရ” ရဴဝွံ သ္ဂးကဵုတဳလပိုဉ်သောဏရ။ ယွံကျာ်မၞုံပိုဉ် အဲဍိက်ဂှ် သၠးကၠေံထဝ်သြန်ဂမၠိုၚ် မ္ဒးဇက်ပ္ဍိုက်ကဵုကွဳဒ္စာံစှော်ဖ္ဍိုက်ကီု ဒပ်စိၚ်ထပှ်ဒပ် (ပန်စှ်ေဒ္စိတ်ဖ္ဍိုက်) ကီုတုဲ နူအဝေါၚ်ခရှ် လုပ်စိုပ်အဝေါၚ်ခမဳရ၊ ယွံကျာ်မၞုံပိုဉ် သီုကဵုဒှ်တဴသာ်ဂှ် အဲဍိက် ယဝ်ပကၚ်ရၚ် ဒၞပ်မွဲဂၠးမွဲထပ်မ္ဂး၊ “သောဏမကတဵုဒှ်ပ္ဍဲကောဠိဝိသဂှ် သၠးကၠေံထဝ်သြန်ဂမၠိုၚ် မ္ဒးဇက်ပ္ဍိုက်ကဵုကွဳဒ္စာံစှော်ဖ္ဍိုက်ကီု ဒပ်စိၚ်ထပှ်ဒပ် (ပန်စှော်ဒ္စိတ်ဖ္ဍိုက်) ကီုတုဲ နူအဝေါၚ်ခရှ် လုပ်စိုပ်အဝေါၚ်ခမဳရ၊ သောဏဂှ် ပ္ဍဲအခိၚ်လၟုဟ် စောဲစပ်ဗာန်ခြပ်ဒၟံၚ် ပ္ဍဲဒၞပ်မွဲဂၠးမွဲထပ်ဂမၠိုၚ်ရ” ရဴဝွံ ကြက်ဟီုသ္ဂးကဵု ကုအဲဍိက်အိုတ်ရ၊ ယဝ်တဳလမၞုံပိုဉ်ကျာ်တြဲ ကဵုအခေါၚ်ကုဂကောံခမဳမ္ဂး အဲဍိက်လေဝ် ပြဘိုဂ်ရပ်စပ်ရ၊ ယဝ်တဳလမၞုံပိုဉ်ကျာ်တြဲ ဟွံကဵုအခေါၚ်ကုဂကောံခမဳမ္ဂး၊ အဲဍိက်လေဝ် ဟွံပြဘိုဂ်ရပ်စပ်ရ ရဴဝွံ (ဂရၚ်ပတီရ)။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး–
“ယွံခမဳတအ် ကဵုခေါၚ်ဒၞပ်မွဲဂၠးမွဲထပ်ရ၊ ယွံခမဳတအ် ဟဂပ်ဝ်ပကၚ်ရၚ် ဒၞပ်ၜါဂၠးၜါထပ် ဒၞပ်ပိဂၠးပိထပ် ဒၞပ်မၞုံကဵုဂၠးထပ်မဂၠိုၚ်ဂမၠိုၚ်ရ၊ ကုခမဳမပကၚ်ရၚ်ဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
