၉၃။ ပွမသ္ပပြကဋ်အာပတ်

၁၇၀။ ပ္ဍဲကာလမွဲအခိၚ် ခမဳမွဲဇကု စၞောန်ထ္ၜးပါတိမုက်မ္ဂး ဂွံသတိအာပတ်ရ၊ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘မွဲဟာန်ကေုာံအာပတ် ဟဂပ်ဝ်သ္ပဥပေါသ်ရ’ ရဴဝွံ ပညပ်လဝ်ရ၊ အဲတုန် ဒးအာပတ်ရ၊ မုရဴသာ်လဵု အဲသ္ဂောံဒ္ဂေတ်ဂှ်ရော?” ရဴဝွံ ကသပ်ဒှ် ကုခမဳဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဂှ် စၞောန်ထ္ၜးပါတိမုက်မ္ဂး ဂွံသတိအာပတ်ရ၊ ယွံခမဳတအ် ခမဳဂှ် “ယွံကောန်တၠ အဲဍိက် အာစိုပ်အာပတ်မၞုံယၟုဝွံရ၊ ဒၠိုက်ကတဵုနူဒၞါဲဝွံတုဲ ကြက်ဇအုဲဇဗ အာပတ်ဂှ်ရ” ရဴဝွံ သ္ဂးကဵုခမဳမဒှ်ဇရေၚ်တုဲ ဒးသ္ပဥပေါသ်ရ၊ သ္ဒးကလၚ်ပါတိမုက်ရ၊ ဟိုတ်နူဟိုတ်မတွံဂးအာပတ်ဂှ် မဟဂပ်ဝ်သ္ပအန္တရာယ် ဥပေါသ်ဟေၚ်ရ ရဴဝွံ (သ္ဂးရ)။

ယွံခမဳတအ် ခမဳဂှ် စၞောန်ထ္ၜးပါတိမုက်မ္ဂး မၞုံကဵုသၠေဟ်ပၟါ ပ္ဍဲအာပတ်ရ၊ ယွံခမဳတအ် ခမဳဂှ် “ယွံကောန်တၠ အဲဍိက် မၞုံကဵုသၟေဟ်ပၟါ ပ္ဍဲအာပတ်မၞုံယၟုဝွံရ၊ ယြဴပ္ဍဲအခိၚ်မွဲ စာ်စ္ဍးနူသၠေဟ်ပၟါဒှ်မ္ဂး၊ ပ္ဍဲအခိၚ်ဂှ် ကြက်ဇအုဲဇဗ အာပတ်ဂှ်ရ” ရဴဝွံ သ္ဂးကဵုခမဳမဒှ်ဇရေၚ်တုဲ ဒးသ္ပဥပေါသ်ရ၊ သ္ဒးကလၚ်ပါတိမုက်ရ၊ ဟိုတ်နူဟိုတ်မတွံဂး ပွမသၠေဟ်ပၟါဂှ် မဟဂပ်ဝ်သ္ပအန္တရာယ် ဥပေါသ်ဟေၚ်ရ ရဴဝွံ (သ္ဂးရ)။