၉၄။ နဲဇအုဲဇဗဝဳဗလးအာပတ်သဘဴတုပ်သၟဟ်
၁၇၁။ ပ္ဍဲကာလမွဲအခိၚ် ပ္ဍဲအပ္ဍဲဘာမွဲ ပ္ဍဲတ္ၚဲဥပေါသ်ဂှ် သၚ်အိုတ်သီုအာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘ဟဂပ်ဝ်ဟီုလၟိၚ်ဒေသနာအာပတ် မ္ဒးဟိုတ်နူဟိုတ်ဝတ္ထုသဘဴတုပ်သၟဟ်ရ၊ ဟဂပ်ဝ်ဒုၚ်ဂိုၚ်ကေတ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ’ ရဴဝွံ ပညပ်လဝ်ရ၊ သၚ်အိုတ်သီုဝွံလေဝ် အာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ပိုဲညးဂမၠိုၚ် မုရဴသာ်လဵု သ္ဂောံဒ္ဂေတ်ရော?” ရဴဝွံ သကပ်ဒှ် ကုခမဳဂမၠိုၚ်ဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ပ္ဍဲအပ္ဍဲဘာမွဲ ပ္ဍဲတ္ၚဲဥပေါသ်ဂှ် သၚ်အိုတ်သီုအာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ယွံခမဳတအ် ခမဳဂမၠိုၚ်ဂှ် “ယွံကောန်တၠ သြဝ်အာညိ၊ ဇအုဲဇဗဝဳဗလးအာပတ်ဂှ်တုဲ သြဝ်ကၠုၚ်ညိ၊ ပိုဲညးဂမၠိုၚ် ကြက်ဇအုဲဇဗဝဳဗလး အာပတ်ဂှ် ပ္ဍဲဇရေၚ်တၠအဲအိုတ်ရ” ရဴဝွံ သ္ဒးဖအောဝ်ဗလးဏာ ခမဳမွဲဇကု ဘာဇရေၚ်ဗ္ဒာဲဂှ် သကဵုကလေၚ်စဴတ္ၚဲဂှ်ရ။ ကလိဂွံရဴဝွံမ္ဂး ဆာန်သန်ရ။ ယဝ်ဟွံကလိဂွံမ္ဂး၊ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳလပိုဉ်တအ် သၚ် သြဝ်ကလိၚ်ပၚ်မှိၚ် (ဂလာန်) အဲဍိက်ညိ၊ သၚ်အိုတ်သီုဝွံ အာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ပ္ဍဲအခိၚ်မညာတ်ခမဳမွဲဇကု မသ္အးဇ္ၚးဟွံမွဲကဵုအာပတ်ဂှ် ကြက်ဇအုဲဇဗဝဳဗလးအာပတ်ဂှ် ပ္ဍဲခမဳဂှ်အိုတ်ရ” ရဴဝွံ ဒးသ္ပဥပေါသ်ရ၊ သ္ဒးကလၚ်ပါတိမုက်ရ၊ ဟိုတ်နူဟိုတ်မတွံဂးအာပတ်ဂှ် မဟဂပ်ဝ်သ္ပအန္တရာယ် ဥပေါသ်ဟေၚ်ရ ရဴဝွံ (သ္ဂးရ)။
ယွံခမဳတအ် ပ္ဍဲအပ္ဍဲဘာမွဲ ပ္ဍဲတ္ၚဲဥပေါသ်ဂှ် သၚ်အိုတ်သီုမၞုံကဵုသၠေဟ်ပၟါ ပ္ဍဲအာပတ် မ္ဒးဟိုတ်နူဝတ္ထုသဘဴတုပ်သၟဟ်ဒှ်မ္ဂး၊ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳလပိုဉ်တအ် သၚ် သြဝ်ကလိၚ်ပၚ်မှိၚ် (ဂလာန်) အဲဍိက်ညိ၊ သၚ်အိုတ်သီုဝွံ အာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ပ္ဍဲအခိၚ်စာ်စ္ဍးနူသၠေဟ်ပၟါဂှ် ကြက်ဇအုဲဇဗအာပတ်ဂှ်ရ” ရဴဝွံ သ္ဂးတုဲ ဒးသ္ပဥပေါသ်ရ၊ သ္ဒးကလၚ်ပါတိမုက်ရ၊ ဟိုတ်နူဟိုတ်မတွံဂး ပွမသၠေဟ်ပၟါဂှ် မဟဂပ်ဝ်သ္ပအန္တရာယ် ဥပေါသ်ဟေၚ်ရ ရဴဝွံ (သ္ဂးရ)။
ယွံခမဳတအ် သၚ်မပြာပ်လုပ်ဒဂိုန် ပ္ဍဲအပ္ဍဲဘာမွဲဂှ် အာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ယွံခမဳတအ် ခမဳဂမၠိုၚ်ဂှ် “ယွံကောန်တၠ သြဝ်ကၠုၚ်ညိ၊ ပိုဲညးဂမၠိုၚ် ကြက်ဇအုဲဇဗဝဳဗလးအာပတ်ဂှ် ပ္ဍဲဇရေၚ်တၠအဲအိုတ်ရ” ရဴဝွံ သ္ဒးဖအောဝ်ဗလးဏာ ခမဳမွဲဇကု ဘာဇရေၚ်ဗ္ဒာဲဂှ် သကဵုကလေၚ်စဴတ္ၚဲဂှ်ရ။ သ္ပရဴဝွံတုဲ ကလိဂွံမ္ဂး ဆာဲသန်ရ။ ယဝ်ဟွံကလိဂွံမ္ဂး၊ ကဵုခမဳမွဲဇကု သ္ပသတ္တာဟတုဲ ‘ကဵုပါန်ဒဂိုန်’တုဲ “ယွံကောန်တၠ သြဝ်ကၠုၚ်ညိ၊ ပိုဲညးဂမၠိုၚ် ကြက်ဇအုဲဇဗဝဳဗလးအာပတ်ဂှ် ပ္ဍဲဇရေၚ်တၠအဲအိုတ်ရ” ရဴဝွံ သ္ဒးဖအောဝ်ဗလးဏာ ခမဳမွဲဇကုရ ရဴဝွံ (သ္ဂးရ)။
ပ္ဍဲကာလမွဲအခိၚ် ပ္ဍဲအပ္ဍဲဘာမွဲဂှ် သၚ်အိုတ်သီုအာစိုပ်အာပတ် မ္ဒးဟိုတ်နူဝတ္ထုသဘဴတုပ်သၟဟ်ရ၊ ခမဳသၚ်ဂှ် ဟွံတီယၟုဂကူ အာပတ်ဂှ်ရ။ ခမဳမွဲဇကု မၞုံကဵုလမိၚ်လညာတ်ဂၠိုၚ် မပကၚ်ရၚ်ခၜမ်လဝ်ပါဠိ ပကၚ်ရၚ်လဝ်ဓရ် ပကၚ်ရၚ်လဝ်ဝိနယ် ပကၚ်ရၚ်လဝ်ပါတိမုက် မၞုံကဵုပညာမကေက်သကာ မၞုံကဵုဉာဏ်ထပက်ခၠၚ်ကေတ် မလေပ်ဂွပါပ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟါ မၞုံပၟိက်ကဵုသိက္ခာဂှ် ကၠုၚ်ဘာဂှ်ရ၊ ခမဳမွဲဇကုဂှ် ပြာပ်အာဇရေၚ်ခမဳဂှ်တုဲမ္ဂး “ယွံကောန်တၠ ယြဴခမဳမွဲ သ္ပတဴ ရဴဝွံ ရဴဝွံရ၊ ခမဳဂှ် ဒးအာပတ်မုမွဲရော?” ရဴဝွံ သၟာန်ခမဳဂှ်ရ၊ ခမဳဂှ် “ယွံကောန်တၠ ယြဴခမဳမွဲ သ္ပတဴ ရဴဝွံ ရဴဝွံရ၊ ခမဳဂှ် ဒးအာပတ်မၞုံယၟုဝွံရ၊ ယွံကောန်တၠ တၠအဲ ဒးအာပတ်မၞုံယၟုဝွံရ၊ တၠအဲ သြဝ်ဇအုဲဇဗဝဳဗလးအာပတ်ဂှ်” ရဴဝွံ ဟီုသ္ဂးရ။
ခမဳဂှ် “ယွံကောန််တၠ အဲညးမွဲဓဝ်ဟေၚ် ဒးအာပတ်ဝွံ ဟွံသေၚ်ရ၊ သၚ်အိုတ်သီုဝွံ ဒးအာပတ်ဝွံရ” ရဴဝွံ ဟီုသ္ဂးရ။ ခမဳဂှ် “ယွံကောန်တၠ ခမဳမွဲသအာၚ်ဂှ် ဒးအာပတ်ကဵုဒှ် ဟွံဒးအာပတ်ကဵုဒှ် ပသာ်ကြက်သ္ပ ကုတၠအဲရော? ယွံကောန်တၠ ဗတိုက်ဖအောဝ်ရ၊ တၠအဲ သြဝ်ဒၠိုက်ကတဵုနူအာပတ်ဇကုညိ ‘သြဝ်ဇအုဲဇဗဝဳဗလးအာပတ်ညိ’” ရဴဝွံ ဟီုသ္ဂးရ။ ပ္ဍဲကြဴနူဂှ် ခမဳဂှ် နကဵုဂလာန် ခမဳ(မဍိုက်ပေၚ်တဴကေုာံမပ္တံဗဟုသုတ)ဂှ် ဇအုဲဇဗအာပတ်ဂှ်တုဲ ပြာပ်အာဇရေၚ် ခမဳဂမၠိုၚ်ဂှ်တုဲမ္ဂး “ယွံကောန်တၠတအ် ယြဴခမဳမွဲ သ္ပတဴ ရဴဝွံ ရဴဝွံရ၊ ခမဳဂှ် အာစိုပ်အာပတ်မၞုံယၟုဝွံရဂး၊ ယွံကောန်တၠတအ် မၞးတအ်ညးဂမၠိုၚ် အာစိုပ်အာပတ်မၞုံယၟုဝွံအိုတ်ရ၊ သြဝ်ဇအုဲဇဗဝဳဗလးအာပတ်ဂှ်အိုတ်ညိ” ရဴဝွံ ဟီုသ္ဂးရ။ ပ္ဍဲအခိၚ်ဂှ် ခမဳဂမၠိုၚ်ဂှ် နကဵုဂလာန်ခမဳဂှ် ဟွံမွဲပၟိက် တၞဟ်နဇအုဲဇဗကၠေံအာပတ်ဂှ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ပ္ဍဲအပ္ဍဲဘာမွဲ သၚ်အိုတ်သီုအာစိုပ်အာပတ် သၚ်အိုတ်သီုအာစိုပ်အာပတ် မ္ဒးဟိုတ်နူဝတ္ထုသဘဴ တုပ်သၟဟ်ရ၊ ခမဳသၚ်ဂှ် ဟွံတီယၟုဂကူ အာပတ်ဂှ်ရ။ ခမဳမွဲဇကု မၞုံကဵုလမိၚ်လညာတ်ဂၠိုၚ် မပကၚ်ရၚ်ခၜမ်လဝ်ပါဠိ ပကၚ်ရၚ်လဝ်ဓရ် ပကၚ်ရၚ်လဝ်ဝိနယ် ပကၚ်ရၚ်လဝ်ပါတိမုက် မၞုံကဵုပညာမကေက်ေသကာ မၞုံကဵုဉာဏ်ထပက်ခၠၚ်ကေတ် မလေပ်ဂွပါပ် မၞုံကဵု‘သံသယကုက္ကုစ္စ’ ပွမချပ်သၠေဟ်ပၟါ မၞုံပၟိက်ကဵုသိက္ခာဂှ် ကၠုၚ်ဘာဂှ်ရ၊ ခမဳမွဲဇကုဂှ် ပြာပ်အာဇရေၚ်ခမဳဂှ်တုဲမ္ဂး “ယွံကောန်တၠ ယြဴခမဳမွဲ သ္ပတဴ ရဴဝွံ ရဴဝွံရ၊ ခမဳဂှ် ဒးအာပတ်မုမွဲရော?” ရဴဝွံ သၟာန်ခမဳဂှ်ရ၊ ခမဳဂှ် “ယွံကောန်တၠ ယြဴခမဳမွဲ သ္ပတဴ ရဴဝွံ ရဴဝွံရ၊ ခမဳဂှ် ဒးအာပတ်မၞုံယၟုဝွံရ၊ ယွံကောန်တၠ တၠအဲ ဒးအာပတ်မၞုံယၟုဝွံရ၊ တၠအဲ သြဝ်ဇအုဲဇဗဝဳဗလးအာပတ်ဂှ်” ရဴဝွံ ဟီုသ္ဂးရ။
ခမဳဂှ် “ယွံကောန််တၠ အဲညးမွဲဓဝ်ဟေၚ် ဒးအာပတ်ဝွံ ဟွံသေၚ်ရ၊ သၚ်အိုတ်သီုဝွံ ဒးအာပတ်ဝွံရ” ရဴဝွံ ဟီုသ္ဂးရ။ ခမဳဂှ် “ယွံကောန်တၠ ခမဳမွဲသအာၚ်ဂှ် ဒးအာပတ်ကဵုဒှ် ဟွံဒးအာပတ်ကဵုဒှ် ပသာ်ကြက်သ္ပ ကုတၠအဲရော? ယွံကောန်တၠ ဗတိုက်ဖအောဝ်ရ၊ တၠအဲ သြဝ်ဒၠိုက်ကတဵုနူအာပတ်ဇကုညိ ‘သြဝ်ဇအုဲဇဗဝဳဗလးအာပတ်ညိ’—” ရဴဝွံ ဟီုသ္ဂးရ။ ပ္ဍဲကြဴနူဂှ် ခမဳဂှ် နကဵုဂလာန် ခမဳ(မဍိုက်ပေၚ်တဴကေုာံမပ္တံဗဟုသုတ)ဂှ် ဇအုဲဇဗအာပတ်ဂှ်တုဲ ပြာပ်အာဇရေၚ် ခမဳဂမၠိုၚ်ဂှ်တုဲမ္ဂး “ယွံကောန်တၠတအ် ယြဴခမဳမွဲ သ္ပတဴ ရဴဝွံ ရဴဝွံရ၊ ခမဳဂှ် အာစိုပ်အာပတ်မၞုံယၟုဝွံရဂး၊ ယွံကောန်တၠတအ် မၞးတအ်ညးဂမၠိုၚ် အာစိုပ်အာပတ်မၞုံယၟုဝွံအိုတ်ရ၊ သြဝ်ဇအုဲဇဗဝဳဗလးအာပတ်ဂှ်အိုတ်ညိ” ရဴဝွံ ဟီုသ္ဂးရ။ ယွံခမဳတအ် ခမဳဂမၠိုၚ်ဂှ် နကဵုဂလာန်ခမဳဂှ် ယဝ်ဇအုဲဇဗကၠေံ အာပတ်ဂှ်အိုတ်မ္ဂး ဆာဲသန်ရ၊ ယဝ်ဟွံဇအုဲဇဗကၠေံအိုတ်မ္ဂး ခမဳမဒၠိုက်ကတဵုနူအာပတ်တုဲဂှ် ဟွံထေက်ကဵုဟီုသ္ဂးကဵု ခမဳမဟွံမွဲပၟိက် သွက်ဂွံဇအုဲဇဗဂမၠိုၚ်ရ ရဴဝွံ (သ္ဂးရ)။
ခဏ်စၞောန်ထ္ၜးကဵုစောဒနာဝတ္ထုတုဲရ။
