၉၂။ နဲဇအုဲဇဗဝဳဗလးအာပတ်

၁၆၉။ ပ္ဍဲကာလမွဲအခိၚ် ခမဳမွဲဇကု ပ္ဍဲတ္ၚဲဥပေါသ်ဂှ် ဒးအာပတ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘မွဲဟာန်ကေုာံအာပတ် ဟဂပ်ဝ်သ္ပဥပေါသ်ရ’ ရဴဝွံ ပညပ်လဝ်ရ၊ အဲလေဝ် ဒးအာပတ်ရ၊ မုရဴသာ်လဵု အဲသ္ဂောံဒ္ဂေတ်ရော?” ရဴဝွံ ကသပ်ဒှ် ကုခမဳဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဂှ် ပ္ဍဲတ္ၚဲဥပေါသ် ဒးအာပတ်ရ၊ ယွံခမဳတအ် ခမဳဂှ် ပြာပ်အာဇရေၚ်ခမဳမွဲဇကုတုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူမၞးပါဲမွဲလပါ်တုဲမ္ဂး သီုဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တုဲတုဲမ္ဂး “ယွံကောန်တၠ အဲဍိက် အာစိုပ်အာပတ် မၞုံယၟုဝွံရ၊ ဟီုလၟိၚ်အာပတ်ဂှ်ရ” ရဴဝွံ သ္ဂးဟီုရ။ ခမဳမဒုၚ်ဒေသနာဂှ် “သြဝ်မၠာ်သ္ၚေဝ်အာပတ်ညိ” ရဴဝွံ သ္ဒးဟီုရ။ “ခိုဟ်ရ မၠာ်သ္ၚေဝ်ရ” ရဴဝွံ ခမဳမဒးအာပတ်ဂှ် သ္ဒးဟီုရ။ “ပ္ဍဲကာလကြဴလေဝ် သြဝ်သ္ၚဳလလမ်မၚ်မွဲညိ” ရဴဴဝွံ ခမဳမဒုၚ်ဒေသနာဂှ် သ္ဒးဟီုရ။

ယွံခမဳတအ် ခမဳဂှ် ပ္ဍဲတ္ၚဲဥပေါသ် မၞုံကဵုသၠေဟ်ပၟါ ပ္ဍဲအာပတ်ရ၊ ယွံခမဳတအ် ခမဳဂှ် ပြာပ်အာ ဇရေၚ်ခမဳမွဲဇကုတုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး သီုဂဇအ်ဒၟံၚ်လံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး “ယွံကောန်တၠ အဲဍိက် မၞုံကဵုသၟေဟ်ပၟါ ပ္ဍဲအာပတ် မၞုံယၟုဝွံရ၊ ယြဴပ္ဍဲအခိၚ်မွဲ စာ်စ္ဍးနူသၠေဟ်ပၟါဒှ်မ္ဂး၊ ပ္ဍဲအခိၚ်ဂှ် ကြက်ဇအုဲဇဗ အာပတ်ဂှ်ရ” ရဴဝွံ သ္ဂးတုဲ ဒးသ္ပဥပေါသ်ရ၊ သ္ဒးကလၚ်ပါတိမုက်ရ၊ ဟိုတ်နူပွမသၠေဟ်ပၟါဂှ် မဟဂပ်ဝ် သ္ပအန္တရာယ် ဥပေါသ်ဟေၚ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဟီုလၟိၚ်ဒေသနာ အာပတ်မ္ဒးဟိုတ်နူဝတ္ထုသဘဴတုပ်သၟဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်ဟီု လၟိၚ်ဒေသနာ အာပတ်မ္ဒးဟိုတ်နူဝတ္ထုသဘဴတုပ်သၟဟ်ရ၊ ကုခမဳမဟီုလၟိၚ်ဒေသနာဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဒုၚ်ဂိုၚ်ကေတ် အာပတ်မ္ဒးဟိုတ်နူဝတ္ထုသဘဴတုပ်သၟဟ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်ဒုၚ်ဂိုၚ်ကေတ် အာပတ်မ္ဒးဟိုတ်နူဝတ္ထုသဘဴတုပ်သၟဟ်ရ၊ ကုခမဳမဒုၚ်ဂိုၚ်ကေတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။