၈၅။ ကဵုအခေါၚ်ကမၠောန်ထေက်ကဵုးပတုဲ ပ္ဍဲကိုပ်ကၠာ
၁၅၉။ ပ္ဍဲကာလမွဲအခိၚ် ပ္ဍဲအပ္ဍဲဘာမွဲ ရုၚ်ဥပေါသ် သၟိက်ဟန်ဗန်ပြးဇးဒၟံၚ်ရ။ ခမဳကၟုဲဂမၠိုၚ် “မုဟိုတ် ခမဳဂမၠိုၚ် ဟွံကွဟ်ကၟဟ် ရုၚ်ဥပေါသ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နကွဟ်ကၟဟ် ရုၚ်ဥပေါသ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် “မုရဴညးမွဲ ဂပ်ဝ်ကွဟ်ကၟဟ် ရုၚ်ဥပေါသ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဒှ်မှာထေရ်ဇၞော် တၞဟ်နဖအောဝ်စကာခမဳသၟတ်ဂှ် ကဵုအခေါၚ်ရ ရဴဝွံ (သ္ဂးရ)။
ၜိုန်မှာထေရ်ဇၞော် ဖအောဝ်စကာလေဝ် ခမဳသၟတ်ဂမၠိုၚ် ဟွံကွဟ်ကၟဟ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် မှာထေရ်ဇၞော် ဖအောဝ်စကာမ္ဂး ခမဳသၟတ် မဟွံဂိယဲဂှ် ဒးကွဟ်ကၟဟ်ရ၊ ကုခမဳ မဟွံကွဟ်ကၟဟ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၁၆၀။ ပ္ဍဲကာလမွဲအခိၚ် ပ္ဍဲရုၚ်ဥပေါသ် ဟွံလးပညပ်စွံလဝ်သၞာဂဇအ်တုဲ ခမဳဂမၠိုၚ် ဂဇအ်တဴ ပ္ဍဲတိအိုတ်ရ။ ဇကုကေုာံသ္ၚာဂမၠိုၚ် ကၠေဝ်ဗာန်အာခၞိက်တိဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နလးပညပ်သၞာဇဂအ် ပ္ဍဲရုၚ်ဥပေါသ် ကဵုခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် “မုရဴညးမွဲ ဂပ်ဝ်လးပညပ်သၞာဂဇအ် ပ္ဍဲရုၚ်ဥပေါသ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဒှ်မှာထေရ်ဇၞော် တၞဟ်နဖအောဝ်စကာခမဳသၟတ်ဂှ် ကဵုအခေါၚ်ရ ရဴဝွံ (သ္ဂးရ)။
ၜိုန်မှာထေရ်ဇၞော် ဖအောဝ်စကာလေဝ် ခမဳသၟတ်ဂမၠိုၚ် ဟွံလးပညပ်သၞာဂဇအ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် မှာထေရ်ဇၞော် ဖအောဝ်စကာမ္ဂး ခမဳသၟတ်မဟွံဂိယဲဂှ် ဒးလးပညပ်သၞာဂဇအ်ရ၊ ကုခမဳ မဟွံလးပညပ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
၁၆၁။ ပ္ဍဲကာလမွဲအခိၚ် ပ္ဍဲရုၚ်ဥပေါသ် ဟွံစံၚ်ဗဵုလဝ်ပၟတ်ကၠေၚ်သ္ဍဴတုဲ ခမဳဂမၠိုၚ် ပ္ဍဲဒမၠု လိုန်ဒးဇကုကေုာံသ္ၚာအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နစံၚ်ဗဂဵုပၟတ်ကၠေၚ်သ္ဍဴ ပ္ဍဲရုၚ်ဥပေါသ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် “မုရဴညးမွဲ ဂပ်ဝ်သ္ပပွမစံၚ်ဗဂဵုပၟတ်ကၠေၚ်သ္ဍဴ ပ္ဍဲရုၚ်ပေါသ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဒှ်မှာထေရ်ဇၞော် တၞဟ်နဖအောဝ်စကာခမဳသၟတ်ဂှ် ကဵုအခေါၚ်ရ ရဴဝွံ (သ္ဂးရ)။
ၜိုန်မှာထေရ်ဇၞော် ဖအောဝ်စကာလေဝ် ခမဳသၟတ်ဂမၠိုၚ် ဟွံစံၚ်ဗဂဵုပၟတ်ကၠေၚ်သ္ဍဴအိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် မှာထေရ်ဇၞော် ဖအောဝ်စကာမ္ဂး ခမဳသၟတ်မဟွံဂိယဲဂှ် ဒးစံၚ်ဗဂဵုပၟတ်ကၠေၚ်သ္ဍဴရ၊ ကုခမဳ မဟွံစံၚ်ဗဂဵုပၟတ်ကၠေၚ်သ္ဍဴဂှ် ဒးအာပတ်ဒုက္ကဋ်ရ (သ္ဂးရ)။
၁၆၂။ ပ္ဍဲကာလမွဲအခိၚ် ပ္ဍဲအပ္ဍဲဘာမွဲ ခမဳပဒတဴဘာဂမၠိုၚ် ဟွံစွံပတန်လတ် ဍာ်သုၚ် ဍာ်ရပ်စပ်အိုတ်ရ။ ခမဳကၟုဲဂမၠိုၚ် “မုဟိုတ် ခမဳပဒတဴဘာဂမၠိုၚ် ဟွံစွံပတန်လဝ် ဍာ်သုၚ်ဍာ်ရပ်စပ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တၞဟ်နစွံပတန်လဝ် ဍာ်သုၚ် ဍာ်ရပ်စပ်ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် “မုရဴညးမွဲ ဂပ်ဝ်စွံပတန် ဍာ်သုၚ်ဍာ်ရပ်စပ်ဂှ်ရော? ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလပိုဉ်ကျာ်တြဲအိုတ်ရ။ ယွံခမဳတအ် ခမဳမဒှ်မှာထေရ်ဇၞော် တၞဟ်နဖအောဝ်စကာခမဳသၟတ်ဂှ် ကဵုအခေါၚ်ရ ရဴဝွံ (သ္ဂးရ)။
ၜိုန်မှာထေရ်ဇၞော် ဖအောဝ်စကာလေဝ် ခမဳသၟတ်ဂမၠိုၚ် ဟွံစွံပတန် ဍာ်သုၚ်ဍာ်ရပ်စပ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် မှာထေရ်ဇၞော် ဖအောဝ်စကာမ္ဂး ခမဳသၟတ်မဟွံဂိယဲဂှ် ဒးစွံပတန် ဍာ်သုၚ်ဍာ်ရပ်စပ်ရ၊ ကုခမဳ မဟွံစွံပတန် ဒးအာပတ်ဒုက္ကဋ်ရ ရဴဝွံ (သ္ဂးရ)။
