၈၆။ ညးစ္ဍးအာဌာန်သအာၚ်
၁၆၃။ ပ္ဍဲကာလမွဲအခိၚ်တေံ ခမဳဂမၠိုၚ်မဂၠိုၚ်ဂၠၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ် အာတဴဌာန်မွဲသအာၚ်မ္ဂး ဟွံဂရၚ်ပတီပါန်အခေါၚ် အ္စာဥပဇ္ၛာယ်ဂမၠိုၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဂမၠိုၚ်မဂၠိုၚ်ဂၠၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ် အာတဴဌာန်မွဲသအာၚ်မ္ဂး ဒးဂရၚ်ပတီပါန်အခေါၚ် အ္စာဥပဇ္ၛာယ်ဂမၠိုၚ်ရ၊ ယွံခမဳတအ် အ္စာဥပဇ္ၛာယ်ဂမၠိုၚ်လေဝ် “အာတဴ မုရဴဌာန်မွဲရော? အာတဴ ကေုာံညးလဵုရော?” ရဴဝွံ ဒးသၟာန်ခမဳဂမၠိုၚ်ဂှ်ရ၊ ယွံခမဳတအ် ခမဳဂမၠိုၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ် ယဝ်စၞောန်ထ္ၜး ခမဳမွဲသအာၚ်ဂမၠိုၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)အိုတ်မ္ဂး၊ ယွံခမဳတအ် အ္စာဥပဇ္ၛာယ်ဂမၠိုၚ် ဟဂပ်ဝ်ကဵုအခေါၚ်အိုတ်ရ၊ ယဝ်ကဵုအခေါၚ်အိုတ်မ္ဂး၊ (ကုအ္စာဥပဇ္ၛာယ်ဂမၠိုၚ်ဂှ်) ဒးအာပတ်ဒုက္ကဋ်ရ။
ယွံခမဳတအ် အ္စာဥပဇ္ၛာယ်ဂမၠိုၚ် သီုဟွံကဵုအခေါၚ် ခမဳဂမၠိုၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ်လေဝ် ယဝ်အာအိုတ်မ္ဂး၊ ကုခမဳဂမၠိုၚ်ဂှ် ဒးအာပတ်ဒုက္ကဋ်ရ။
ယွံခမဳတအ် ပ္ဍဲအပ္ဍဲဘာမွဲ ခမဳဂမၠိုၚ်မဂၠိုၚ်ဂၠၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ် ပဒတဴဒၟံၚ်အိုတ်ရ၊ ခမဳဂမၠိုၚ်ဂှ် ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီု ဟွံတီအိုတ်ရ။ ခမဳမွဲဇကု မၞုံကဵုလၟိၚ်လညာတ်ဂၠိုၚ် မပကၚ်ရၚ်ခၜမ်လဝ်ပါဠိ ပကၚ်ရၚ်လဝ်ဓရ် ပကၚ်ရၚ်လဝ်ဝိနယ် ပကၚ်ရၚ်လဝ်ပါတိမုက် မၞုံကဵုပညာ မကေက်သကာ မၞုံကဵုဉာဏ်ထပက်ခၠၚ်ကေတ် မလေပ်ဂွပါပ် မၞုံကဵု‘သံသယကုက္ကုစ္စ’ ပွမချပ်သၠေဟ်ပၟါ မၞုံပၟိက်ကဵုသိက္ခာဂှ် ကၠုၚ်ဘာဂှ်ရ။ ယွံခမဳတအ် ခမဳဂမၠိုၚ်ဂှ် သ္ဒးထံက်ပၚ် ခမဳမကၠုၚ်စိုပ်ဂှ် (နကဵုပစ္စယ်ပန်ဂမၠိုၚ်)ရ၊ သ္ဒးယိုက်ဒိုက်သၚ်ရိုဟ်ရ၊ သ္ဒးလှေံလှန် (နကဵုဂလာန်သ္ဍိုက်ဆာန်)ရ၊ နကဵုခၞိက်ကြကောတ်ဟုမ်ဍာ်ကီု နကဵုတိကမၠေတ်ကီု နကဵုဆုဒကကီု နကဵုဍာ်လာၚ်မုက်ကီု သ္ဒးကၠောန်ၜိုတ်ရ၊ ယဝ်ဟွံထံက်ပၚ် (နကဵုပစ္စယ်ပန်ဂမၠိုၚ်)အိုတ်မ္ဂး၊ ဟွံယိုက်ဒိုက်သၚ်ရိုဟ်အိုတ်မ္ဂး၊ ဟွံလှေံလှန် (နကဵုဂလာန်သ္ဍိုက်ဆာန်)အိုတ်မ္ဂး၊ နကဵုခၞိက်ကြကောတ်ဟုမ်ဍာ်ကီု နကဵုတိကမၠေတ်ကီု နကဵုဆုဒကကီု နကဵုဍာ်လာၚ်မုက်ကီု ဟွံကၠောန်ၜိုတ်အိုတ်မ္ဂး၊ (ကုခမဳဂမၠိုၚ်ဂှ်) ဒးအာပတ်ဒုက္ကဋ်ရ။
ယွံခမဳတအ် ပ္ဍဲအပ္ဍဲဘာမွဲ ခမဳဂမၠိုၚ်မဂၠိုၚ်ဂၠၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ် ပဒတဴဒၟံၚ်အိုတ်ရ၊ ခမဳဂမၠိုၚ်ဂှ် ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီု ဟွံတီအိုတ်ရ။ ယွံခမဳတအ် ခမဳဂမၠိုၚ်ဂှ် “ယွံကောန်တၠ သြဝ်အာညိ၊ ဂိုၚ်ကတ်ကေတ် ပါတိမုက် ဗွဲခမ္ဍန်ကဵုဒှ် ဗွဲတြးကဵုဒှ်တုဲ သြဝ်ကၠုၚ်ညိ” ရဴဝွံ သ္ဒးဖအောဝ်ဗလးဏာ ခမဳမွဲဇကု ဘာဇရေၚ်ဗ္ဒာဲဂှ် သကဵုကလေၚ်စဴတ္ၚဲဂှ်ရ။ ဖအောဝ်ဗလးဏာ ရဴဝွံတုဲ ကလိဂွံခမဳမစၞောန်ထ္ၜးပါတိမုက်အိုတ်မ္ဂး၊ ပွမကလိဂွံရဴဝွံ ဆာဲသန်ရ။ ယဝ်ဟွံကလိဂွံအိုတ်မ္ဂး၊ ယွံခမဳတအ် ခမဳဂမၠိုၚ်အိုတ်သီုဟေၚ် ယြဴပ္ဍဲဘာမွဲ တီတဴ ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီုအိုတ်ရ၊ သ္ဒးအာဘာဂှ်ရ၊ ကုခမဳမဟွံအာဂှ် ဒးအာပတ်ဒုက္ကဋ်ရ။
ယွံခမဳတအ် ပ္ဍဲအပ္ဍဲဘာမွဲ ခမဳဂမၠိုၚ်မဂၠိုၚ်ဂၠၚ် မဟွံတီကၠိုဟ် (ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ် လုပ်ဒဂိုန်အိုတ်ရ။ ခမဳဂမၠိုၚ်ဂှ် ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီု ဟွံတီအိုတ်ရ။ ယွံခမဳတအ် ခမဳဂမၠိုၚ်ဂှ် “ယွံကောန်တၠ သြဝ်အာညိ၊ ဂိုၚ်ကတ်ကေတ် ပါတိမုက် ဗွဲခမ္ဍန်ကဵုဒှ် ဗွဲတြးကဵုဒှ်တုဲ သြဝ်ကၠုၚ်ညိ” ရဴဝွံ သ္ဒးဖအောဝ်ဗလးဏာ ခမဳမွဲဇကု ဘာဇရေၚ်ဗ္ဒာဲဂှ် သကဵုကလေၚ်စဴတ္ၚဲဂှ်ရ။ ဖအောဝ်ဗလးဏာ ရဴဝွံတုဲ ကလိဂွံခမဳမစၞောန်ထ္ၜးပါတိမုက်အိုတ်မ္ဂး၊ ပွမကလိဂွံရဴဝွံ ဆာဲသန်ရ။ ယဝ်ဟွံကလိဂွံအိုတ်မ္ဂး၊ ယွံခမဳတအ် ကဵုခမဳမွဲဇကု သ္ပသတ္တာဟတုဲ ‘ကဵုပါန်ဒဂိုန်’တုဲ “ယွံကောန်တၠ သြဝ်အာညိ၊ ဂိုၚ်ကတ်ကေတ်ပါတိမုက် ဗွဲခမ္ဍန်ကဵုဒှ် ဗွဲတြးကဵုဒှ်တုဲ သြဝ်ကၠုၚ်ညိ” ရဴဝွံ သ္ဒးဖအောဝ်ဗလးဏာရ။ ဖအောဝ်ဗလးဏာ ရဴဝွံတုဲ ကလိဂွံခမဳစၞောန်ထ္ၜးပါတိမုက်အိုတ်မ္ဂး၊ ပွမကလိဂွံရဴဝွံ ဆာန်သန်ရ။ ယဝ်ဟွံကလိဂွံအိုတ်မ္ဂး၊ ယွံခမဳတအ် ခမဳဂမၠိုၚ်ဂှ် လုပ်ဒဂိုန်ပ္ဍဲဘာဂှ်တုဲ ဟဂပ်ဝ်ပဒတဴရ၊ ယဝ်လုပ်ဒဂိုန်မ္ဂး၊ (ကုခမဳဂမၠိုၚ်ဂှ်) ဒးအာပတ်ဒုက္ကဋ်ရ ရဴဝွံ (သ္ဂးရ)။
