၈၄။ ကဵုအခေါၚ် မပ္တံပွမရိုဟ်လၟိဟ်ပက်
၁၅၆။ ပ္ဍဲအခိၚ်ဂှ် တဳလၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်စောဒနာဝတ္ထု ဗွဲမမိပ်လဟိၚ်တုဲမ္ဂး ကလေၚ်က္ညအာ ပ္ဍဲဍုၚ်ရာဇဂြိုဟ်ပၠန်ရ။ ပ္ဍဲအခိၚ်ဂှ် မၞိဟ်ဂမၠိုၚ် “ယွံတဳလပိုဉ်တအ် မရနုက်ကဵုမုစိပက်ရော? ရဴဝွံ သၟာန်တဴ ခမဳမက္ညကၠုၚ်ဂ္ၚေၚ်ပိဏ္ဍပါတ်ဂမၠိုၚ်အိုတ်ရ။ ခမဳဂမၠိုၚ် “ယွံဒကာတအ် ပိုဲညးဂမၠိုၚ် ဟွံတီအိုတ်ရ” ရဴဝွံ ဟီုသ္ဂးအိုတ်ရ။ မၞိဟ်ဂမၠိုၚ်ဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ အယာံမာတ် လၟိဟ်ပက်လေဝ် ဟွံတီအိုတ်ရ၊ ခမဳဂမၠိုၚ်ဝွံ အရာဝတ္ထုမမိက်ကဵုမွဲမွဲ မခိုဟ်ဆာဲသအာၚ်ဂှ် ပသာ်တီအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သွက်ဂွံကတ်ဗ္တောန် ရိုဟ်လၟိဟ်ပက်ဂှ် ကဵုအခေါၚ်ရ ရဴဝွံ (သ္ဂးရ)။ ပ္ဍဲအခိၚ်ဂှ် “မုရဴညးမွဲ ဂပ်ဝ်ကတ်ဗ္တောန် ရိုဟ်လၟိဟ်ပက်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဂမၠိုၚ်အိုတ်သီုဟေၚ် သွက်ဂွံကတ်ဗ္တောန် ရိုဟ်လၟိဟ်ပက်ဂှ် ကဵုအခေါၚ်ရ ရဴဝွံ (သ္ဂးရ)။
၁၅၇။ ပ္ဍဲအခိၚ်ဂှ် မၞိဟ်ဂမၠိုၚ် “ယွံတဳလပိုဉ်တအ် ခမဳဂမၠိုၚ် မၞုံဗၞတ်မုစိအိုတ်ရော? ရဴဝွံ သၟာန်တဴ ခမဳမက္ညကၠုၚ်ဂ္ၚေၚ်ပိဏ္ဍပါတ်ဂမၠိုၚ်အိုတ်ရ။ ခမဳဂမၠိုၚ် “ယွံဒကာတအ် ပိုဲညးဂမၠိုၚ် ဟွံတီအိုတ်ရ” ရဴဝွံ ဟီုသ္ဂးအိုတ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ကေုာံရၚ်သကအ်လေဝ် ဟွံတီအိုတ်ရ၊ ခမဳဂမၠိုၚ်ဝွံ အရာဝတ္ထုမမိက်ကဵုမွဲမွဲ မခိုဟ်ဆာဲသအာၚ်ဂှ် ပသာ်တီအိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကဵုအခေါၚ် တၞဟ်နရိုဟ်လၟိဟ် ခမဳဂမၠိုၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် “မုရဴပ္ဍဲအခိၚ်မွဲ ဂပ်ဝ်ရိုဟ်လၟိဟ် ခမဳဂမၠိုၚ်ဂှ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပ္ဍဲတ္ၚဲဥပေါသ် တၞဟ်နပွမရိုဟ်လၟိဟ် နလၟေၚ်ယၟုကီု တၞဟ်နပွမဂိုၚ်ကေတ်ဇြေဟ်လိက်မာဲကီု ကဵုအခေါၚ်ရ ရဴဝွံ (သ္ဂးရ)။
၁၅၈။ ပ္ဍဲကာလမွဲအခိၚ် ခမဳဂမၠိုၚ် “တ္ၚဲဝွံ တ္ၚဲဥပေါသ်ရ” ရဴဝွံ ဟွံတီဂမၠိုၚ်ဒှ်တုဲ အာဂေတ်ဂ္ၚေၚ်ပိဏ္ဍပါတ် ကွာန်မသ္ၚောဲအိုတ်ရ။ ခမဳဂမၠိုၚ်ဂှ် ဃောစၞောန်ထ္ၜးပါတိမုက်လေဝ် ကၠုၚ်စိုပ်အိုတ်ရ၊ စၞောန်ထ္ၜးပါတိမုက်တုဲမှလေဝ် ကၠုၚ်စိုပ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် တ္ၚဲဝွံ တ္ၚဲဥပေါသ်ရ ရဴဝွံ တၞဟ်နပွမဟီုလၟိၚ်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲကြဴနူဂှ် “မုရဴညးမွဲ ဂပ်ဝ်ဟီုလၟိၚ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဒှ်မှာထေရ်ဇၞော်ဂှ် ပ္ဍဲနူဂယးပြဟ်ဟေၚ် တၞဟ်နဟီုလၟိၚ်ဂှ် ကဵုအခေါၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် မှာထေရ်ဇၞော်မွဲဇကု ပ္ဍဲနူဂယးပြဟ်ဟေၚ် သွက်ဂွံဟီုလၟိၚ်ဂှ် ဝိုတ်မံၚ်သတိရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပ္ဍဲအခိၚ်ကဵုပိုဉ်လေဝ် တၞဟ်နဟီုလၟိၚ် ကဵုအခေါၚ်ရ ရဴဝွံ (သ္ဂးရ)။ ပ္ဍဲအခိၚ်ကဵုပိုဉ်လေဝ် ဝိုတ်မံၚ်သတိပၠန်ရ။ ယွံခမဳတအ် ပ္ဍဲအခိၚ်ဂွံသတိဂှ် တၞဟ်နဟီုလၟိၚ်ဂှ် ကဵုအခေါၚ်ရ ရဴဝွံ (သ္ဂးရ)။
