၈၃။ မပ္တံပွမဗတိုက်ဖအောဝ်ညးစၞောန်ထ္ၜးပါတိမုက်
၁၅၅။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဍုၚ်ရာဇဂြိုဟ် ဗွဲမမိပ်လဟိၚ်တုဲမ္ဂး အတိုၚ်လၟေၚ်လၟေၚ် က္ညဂ္ၚေၚ်အာဒေသစာရိတ် နဂၠံၚ်တရဴ အာဍုၚ်မၞုံယၟုစောဒနဝတ္ထုမ္ဂး စိုပ်ကၠုၚ် ဍုၚ်စောဒနာဝတ္ထုရ။ ပ္ဍဲအဃောအခိၚ်ဂှ် ပ္ဍဲဘာမွဲ ခမဳဂမၠိုၚ်မဂၠိုၚ်ဂၠၚ် ပဒတဴဒၟံၚ်အိုတ်ရ၊ ပ္ဍဲဘာဂှ် ခမဳမဒှ်မှာထေရ်ဇၞော်ဂှ် ဟွံတီကၠိုဟ်(ဝိနယ်သိက္ခာပိုဒ်)ရ၊ ဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ရ၊ မှာထေရ်ဇၞော်ဂှ် ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီု ဟွံတီရ။ ပ္ဍဲအခိၚ်ဂှ် “ပွမစၞောန်ထ္ၜးပါတိမုက်ဂှ် ဆေၚ်စပ်မှာထေရ်ဇၞော်ရ ရဴဝွံ တဳလမၞုံပိုဉ်ကျာ်တြဲ ပညပ်လဝ်ရ၊ မှာထေရ်ဇၞော် ပိုဲညးဂမၠိုၚ်ဝွံတုန် ဟွံတီကၠိုဟ်(ဝိနယ်သိက္ခာပိုဒ်)ရ၊ ဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ရ၊ ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီု ဟွံတီရ၊ ပိုဲညးဂမၠိုၚ် မုရဴသာ်လဵု ဂွံဒ္ဂေတ်ရော?” ရဴဝွံ ကသပ်ဒှ် ကုခမဳဂမၠိုၚ်ဂှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပ္ဍဲဘာဂှ် ယြဴခမဳမွဲ စဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)တုဲ မၞုံကဵုစောံသတ္တိရ၊ ပွမစၞောန်ထ္ၜးပါတိမုက်ဂှ် ဆေၚ်စပ်ကဵုခမဳဂှ်ရ ရဴဝွံ ကဵုအခေါၚ်ရ” ရဴဝွံ (သ္ဂးရ)။
ပ္ဍဲမွဲအခိၚ်တေံ အပ္ဍဲဘာမွဲ ပ္ဍဲတ္ၚဲဥပေါသ်ဂှ် ခမဳဂမၠိုၚ်မဂၠိုၚ်ဂၠၚ် မဟွံတီကၠိုဟ်(ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဂှ် ပဒတဴဒၟံၚ်အိုတ်ရ၊ ခမဳဂမၠိုၚ်ဂှ် ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီု ဟွံတီအိုတ်ရ။ ခမဳဂမၠိုၚ်ဂှ် “ယွံတဳလပိုဉ် မှာထေရ်မပြဲ သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် မှာထေရ်ဇၞော်အိုတ်ရ။ မှာထေရ်ဇၞော်ဂှ် “ယွံကောန်တၠတအ် အဲဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးရ။ “ယွံတဳလပိုဉ် မှာထေရ်မပြဲ သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် မှာထေရ်ဇၞော်ဒုတိယအိုတ်ရ။ မှာထေရ်ဇၞော်ဂှ်လေဝ် “ယွံကောန်တၠတအ် အဲဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးရ။ “ယွံတဳလပိုဉ် မှာထေရ်မပြဲ သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် မှာထေရ်ဇၞော်တတိယအိုတ်ရ။ မှာထေရ်ဇၞော်ဂှ်လေဝ် “ယွံကောန်တၠတအ် အဲဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးရ။ နနဲဝွံဟေၚ် “တဳလပိုဉ် သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် စဵုကဵုစိုပ်သၚ်ဍောတ်အိုတ် အိုတ်ရ၊ သၚ်ဍောတ်အိုတ်ဂှ်လေဝ် “ယွံတဳလပိုဉ်တအ် အဲဍိက်ဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ အပ္ဍဲဘာမွဲ ပ္ဍဲတ္ၚဲဥပေါသ်ဂှ် ခမဳဂမၠိုၚ်မဂၠိုၚ်ဂၠၚ် မဟွံတီကၠိုဟ်(ဝိနယ်သိက္ခာပိုဒ်) မဟွံစဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်)ဖအိုတ် ပဒတဴဒၟံၚ်အိုတ်မ္ဂး၊ ခမဳဂမၠိုၚ်ဂှ် ဥပေါသ်ကီု ကမ်ဥပေါသ်ကီု ပါတိမုက်ကီု ပွမစၞောန်ထ္ၜးပါတိမုက်ကီု ဟွံတီအိုတ်ရ။ ခမဳဂမၠိုၚ်ဂှ် “ယွံတဳလပိုဉ် မှာထေရ်မပြဲ သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် မှာထေရ်ဇၞော်အိုတ်မ္ဂး။ မှာထေရ်ဇၞော်ဂှ် “ယွံကောန်တၠတအ် အဲဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးမ္ဂး။ “ယွံတဳလပိုဉ် မှာထေရ်မပြဲ သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် မှာထေရ်ဇၞော်ဒုတိယအိုတ်မ္ဂး။ မှာထေရ်ဇၞော်ဂှ်လေဝ် “ယွံကောန်တၠတအ် အဲဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးမ္ဂး။ “ယွံတဳလပိုဉ် မှာထေရ်မပြဲ သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် မှာထေရ်ဇၞော်တတိယအိုတ်မ္ဂး။ မှာထေရ်ဇၞော်ဂှ်လေဝ် “ယွံကောန်တၠတအ် အဲဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးမ္ဂး။ နနဲဝွံဟေၚ် “တဳလပိုဉ် သြဝ်စၞောန်ထ္ၜးပါတိမုက်ညိ” ရဴဝွံ ဗတိုက်ဖအောဝ် စဵုကဵုစိုပ်သၚ်ဍောတ်အိုတ်အိုတ်မ္ဂး။ သၚ်ဍောတ်အိုတ်ဂှ်လေဝ် “ယွံတဳလပိုဉ်တအ် အဲဍိက် ဗှ်ဖ္ဍောတ်ဟွံမာန်ရ” ရဴဝွံ ဟီုသ္ဂးမ္ဂး။
ယွံခမဳတအ် ခမဳဂမၠိုၚ်ဂှ် “ယွံကောန်တၠ သြဝ်အာညိ၊ ဂိုၚ်ကေတ်ကေတ်ပါတိမုက် ဗွဲခမ္ဍန်ကဵုဒှ် ဗွဲတြးကဵုဒှ်တုဲ သြဝ်ကၠုၚ်ညိ” ရဴဝွံ သ္ဒးဖအောဝ်ဗလးဏာ ခမဳမွဲဇကု ဘာဇရေၚ်ဗ္ဒာဲဂှ် သကဵုကလေၚ်စဴတ္ၚဲဂှ်ရ။
ပ္ဍဲအခိၚ်ဂှ် “မုရဴခမဳမွဲ ဖအောဝ်ဗလးဏာမာန်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမဒှ်မှာထေရ်ဇၞော် သွက်ဂွံဖအောဝ်ဗလး ခမဳသၟတ်ဂှ် ကဵုအခေါၚ်ရ ရဴဝွံ (သ္ဂးရ)။
ၜိုန်မှာထေရ်ဇၞော် ဖအောဝ်ဗလးလေဝ် ခမဳသၟတ်ဂမၠိုၚ် ဟွံအာအိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် မှာထေရ်ဇၞော် ဖအောဝ်ဗလးမ္ဂး ခမဳမဟွံဂိယဲဂှ် ဒးအာဟေၚ်ရ၊ ကုခမဳဟွံအာဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
