၈၂။ မပ္တံပွမဆေဝ်ဒဝ်အဓမ္မကမ်

၁၅၄။ ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် သ္ပအဓမ္မကမ် ပ္ဍဲလဒေါဝ်သၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်သ္ပ အဓမ္မကမ်ရ၊ ကုခမဳမသ္ပဂှ် ဒးအာပတ်ဒုက္ကဋ်ရ။

သ္ပတဴအဓမ္မကမ် အတိုၚ်မသ္ပလၟိုန်အိုတ်ဟေၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် သ္ပတဴအဓမ္မကမ်မ္ဂး တၞဟ်နဆေဝ်ဒဝ်ကၠေံဂှ် ကဵုအခေါၚ်ရ” ရဴဝွံ (သ္ဂးရ)။

ပ္ဍဲအခိၚ်ဂှ် ခမဳမသ္ဍိုက်ဆာန်သဳလဂမၠိုၚ် ခမဳဆဗ္ဗဂ္ဂဳဂမၠိုၚ်ဂှ် သ္ပတဴအဓမ္မကမ်မ္ဂး ဆေဝ်ဒဝ်အိုတ်ရ။ ခမဳဆဗ္ဗဂ္ဂဳဂမၠိုၚ် ဒက်ဝဲအိုတ်ရ၊ ဒှ်ဒေါသအိုတ်ရ၊ ဘပဠ နကဵုလွဟ်လနက်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကွေတ်ဂှ်လေဝ် တၞဟ်နသ္ပဗွဲမပြာကဋ် ကဵုအခေါၚ်ရ” ရဴဝွံ (သ္ဂးရ)။ ပ္ဍဲဇရေၚ် ခမဳဆဗ္ဗဂ္ဂဳဂမၠိုၚ်ဂှ်ဟေၚ် သ္ပတဴကွေတ် ဗွဲမပြာကဋ်အိုတ်ရ။ ခမဳဆဗ္ဗဂ္ဂဳဂမၠိုၚ် ဒက်ဝဲအိုတ်ရ၊ ဒှ်ဒေါသအိုတ်ရ၊ ဘပဠ နကဵုလွဟ်လနက်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ခမဳဂမၠိုၚ်ပန်ဇကု မသုန်ဇကု တၞဟ်နပွမဆေဝ်ဒဝ် ခမဳဂမၠိုၚ်ၜါဇကု ပိဇကု တၞဟ်နပွမသသ္ပကွေတ် ဗွဲမပြာကဋ် ကဵုအခေါၚ်ရ၊ ခမဳမွဲဇကုဂှ် တၞဟ်နသှ်ပတူ ရဴဝွံမ္ဂး ‘အဲဟွံသ္ဍိုက်မၠိုက်ကမ်ဂှ်ရ’ဂှ် ကဵုအခေါၚ်ရ” ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် စၞောန်ထ္ၜးပါတိမုက် ပ္ဍဲလဒေါဝ်သၚ်မ္ဂး မၞုံကဵုစေတနာ ဟွံမိက်ကဵုမိၚ်တုဲ ဟွံဖ္ဍောတ်ညံၚ်ဂွံမိၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမစၞောန်ထ္ၜးပါတိမုက်ဂှ် ဂပ်ဝ်ဒးဖ္ဍောတ် စဵုကဵုမိၚ်ဟေၚ်ရ၊ ကုခမဳမဖ္ဍောတ် ညံၚ်ဟွံဂွံမိၚ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲအခိၚ်ဂှ် တဳလပိုဉ်ဥဒါယဳ မၞုံကဵုရမျာၚ်မတုပ်သၟဟ်ကေုာံရမျာၚ်ခ္ဍာ်ဂှ် ဒှ်ညးစၞောန်ထ္ၜးပါတိမုက် ကုသၚ်။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲဂှ် ‘ခမဳမစၞောန်ထ္ၜးပါတိမုက်ဂှ် ဒးဖ္ဍောတ် စဵုကဵုမိၚ်ဟေၚ်ရ’ ရဴဝွံ ပညပ်လဝ်ရ၊ အဲတုန် မၞုံကဵုရမျာၚ် ညံၚ်ရမျာၚ်ခ္ဍာ်ရ၊ အဲ မုရဴသာ်လဵု ဂွံဒ္ဂေတ်ရော?” ရဴဝွံ ကသပ်ဒှ် ကုတဳလပိုဉ်ဥဒါယဳရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳမစၞောန်ထ္ၜးပါတိမုက်ဂှ် “သာ်လဵုသ္ဂောံကဵုမိၚ်ရော?” ရဴဝွံ တၞဟ်နသ္ပလွဳပရာဂှ် ကဵုအခေါၚ်ရ၊ ကုခမဳမသ္ပလွဳပရာဂှ် ဟွံဒးအာပတ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ဒေဝဒတ် စၞောန်ထ္ၜးပါတိမုက် ပ္ဍဲပရိသာတ် မဒှ်မွဲဟာန်ကေုာံခရှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စၞောန်ထ္ၜးပါတိမုက် ပ္ဍဲပရိသာတ် မဒှ်မွဲဟာန်ကေုာံခရှ်ရ၊ ကုခမဳမစၞောန်ထ္ၜးဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် သီုဟွံမွဲကဵုပွမဗတိုက်ဖအောဝ်ဂှ် စၞောန်ထ္ၜးပါတိမုက် ပ္ဍဲလဒေါဝ်သၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သီုမဟဂပ်ဝ်ဗတိုက်ဖအောဝ်ဂှ် ဟဂပ်ဝ်စၞောန်ထ္ၜးပါတိမုက် ပ္ဍဲလဒေါဝ်သၚ်ရ၊ ကုခမဳမစၞောန်ထ္ၜးဂှ် ဒးအာပတ်ဒုက္ကဋ်ရ၊ “ယွံခမဳတအ် ပွမစၞောန်ထ္ၜးပါတိမုက်ဂှ် ဆေၚ်စပ်ကဵုမှာထေရ်ဇၞော်ရ ရဴဝွံ ကဵုအခေါၚ်ရ” (သ္ဂးရ)။

ခဏ်အညတိတ္ထိယပဌမတုဲရ