၈၁။ ပွမစောဒနာ

၁၅၃။ ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် စောဒနာ ခမဳမဟွံကဵုအခေါၚ် နကဵုအာပတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စောဒနာ ခမဳမဟွံကဵုအခေါၚ် နကဵုအာပတ်ရ၊ ကုခမဳမစောဒနာဂှ် ဒးအာပတ်ဒုက္ကဋ်ရ။ “ယွံခမဳတအ် ‘ယွံတဳလပိုဉ် သြဝ်သ္ပကဵုအခေါၚ်ညိ၊ အဲဍိက် နွံပၟိက်တၞဟ်နသၟာန် တၠအဲရ’ ရဴဝွံ အာတ်အခေါၚ်တုဲမှ တၞဟ်နစောဒနာ နကဵုအာပတ်ဂှ် ကဵုအခေါၚ်ရ” ရဴဝွံ (သ္ဂးရ)။

ပ္ဍဲအခိၚ်ဂှ် ခမဳမသ္ဍိုက်ဆာန်သဳလ အာတ်အခေါၚ် ခမဳဆဗ္ဗဂ္ဂဳဂမၠိုၚ်တုဲမ္ဂး စောဒနာ နကဵုအာပတ်အိုတ်ရ။ ခမဳဆဗ္ဗဂ္ဂဳဂမၠိုၚ် ဒက်ဝဲအိုတ်ရ၊ ဒှ်ဒေါသအိုတ်ရ၊ ဘပဠ နကဵုလွဟ်လနက်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ၜိုန်ကဵုအခေါၚ်လေဝ် ကေဝ်ကၠေဝ်ချိၚ်ဆ ပူဂိုလ်တုဲ တၞဟ်နစောဒနာ နကဵုအာပတ်ဂှ် ကဵုအခေါၚ်ရ” ရဴဝွံ (သ္ဂးရ)။

ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ခမဳမသ္ဍိုက်ဆာန်သဳလဂမၠိုၚ်ဂှ် အာတ်အခေါၚ် ကုပိုဲညးဂမၠိုၚ် ဗွဲကိုပ်ကၠာအိုတ်ရ” ရဴဝွံ သီုဟွံမွဲကဵုဝတ္ထုဟိုတ် ကြတ်လဝ်ဂတတုဲ အာတ်အခေါၚ် ခမဳဂမၠိုၚ် မသ္အးဇ္ၚး ဟွံမွဲကဵုအာပတ်အိုတ်။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သီုဟွံမွဲကဵုဝတ္ထုဟိုတ် ဟဂပ်ဝ်အာတ်အခေါၚ် ခမဳဂမၠိုၚ် မသ္အးဇ္ၚး ဟွံမွဲကဵုအာပတ်ရ၊ ကုခမဳ မအာတ်အခေါၚ်ဂှ် ဒးအာပတ်ဒုက္ကဋ်ရ။ “ယွံခမဳတအ် ကေဝ်ကၠေဝ်ချိၚ်ဆ ပူဂိုလ်တုဲ တၞဟ်နအခေါၚ်ဂှ် ကဵုအခေါၚ်ရ” ရဴဝွံ (သ္ဂးရ)။