၈၀။ ပွမသှ်ဝိနယ်
၁၅၂။ ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် မဟွံကလိဂွံသၟိတ်ဂှ် သှ်ဝိနယ် ပ္ဍဲလဒေါဝ်သၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလပိုဉ်ကျာ်တြဲအိုတ်ရ။ ယွံခမဳတအ် ခမဳမဟွံကလိဂွံသၟိတ်ဂှ် ဟဂပ်ဝ်သှ်ဝိနယ် ပ္ဍဲလဒေါဝ်သၚ်ရ၊ ကုခမဳမသှ်ဂှ် ဒးအာပတ်ဒုက္ကဋ်ရ။ ယွံခမဳတအ် ခမဳမကလိဂွံသၟိတ်ဂှ် ကဵုအခေါၚ် တၞဟ်နသှ်ဝိနယ် ပ္ဍဲလဒေါဝ်သၚ်ရ။
ယွံခမဳတအ် ရဴဝွံ သ္ဒးသၟိတ်ရ၊ အလဵုဇကုဂှ် ဒးသၟိတ် ဇကုဇကုရ၊ ဟွံသေၚ်မ္ဂး ခမဳမွဲသအာၚ်ဂှ် ဒးသၟိတ်ကဵု ခမဳမွဲသအာၚ်ရ၊ မုရဴသာ်လဵု အလဵုဇကု ဂပ်ဝ်သၟိတ်ကဵုဇကုဇကုရော? ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
“ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ ခမဳမၞုံယၟုဝွံ သၟာန်ဝိနယ်မ္ဂး အဲဍိက် သှ်ကဵုရ” ရဴဝွံ အလဵုဇကုဂှ် ဒးသၟိတ်ဇကုဇကုရ။
မုရဴသာ်လဵု ခမဳမွဲသအာၚ်ဂှ် ဂပ်ဝ်သၟိတ်ကဵု ခမဳမွဲသအာၚ်ဂှ်ရော? ခမဳမကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
“ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ ခမဳမၞုံယၟုဝွံ သၟာန်ဝိနယ်မ္ဂး ခမဳမၞုံယၟုဝွံ သှ်ကဵုရ” ရဴဝွံ ခမဳမွဲသအာၚ်ဂှ် ဒးသၟိတ်ကဵု ခမဳမွဲသအာၚ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳမသ္ဍိုက်ဆာန်သဳလ မကလိဂွံသၟိတ်ဂမၠိုၚ် သှ်ဝိနယ် ပ္ဍဲလဒေါဝ်သၚ်အိုတ်ရ။ ခမဳဆဗ္ဗဂ္ဂဳဂမၠိုၚ် ဒက်ဝဲအိုတ်ရ၊ ဒှ်ဒေါသအိုတ်ရ၊ ဘပဠ နကဵုလွဟ်လနက်အိုတ်ရ၊ ဂရပ်တီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ၜိုန်ကလိဂွံသၟိတ်လေဝ် သ္ၚေဝ်ရံၚ်ပရိသာတ်တုဲ ကေဝ်ကၠေဝ်ချိၚ်ဆ ပူဂိုလ်တုဲ တၞဟ်နသှ်ဝိနယ် ပ္ဍဲလဒေါဝ်သၚ်ဂှ် ကဵုအခေါၚ်ရ” ရဴဝွံ (သ္ဂးရ)။
