၇၇။ တၟေၚ်ဥပေါသ်
၁၄၉။ ပ္ဍဲကာလမွဲအခိၚ် “ဥပေါသ်ဂမၠိုၚ် မၞုံဗၞတ်မုစိအိုတ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဥပေါသ်ဂမၠိုၚ် ဥပေါသ်စှ်ပန်တ္ၚဲ ဥပေါသ်စှ်သုန်တ္ၚဲ ရဴဝွံ မၞုံၜါပြကာအိုတ်ရ ရဴဝွံ (သ္ဂးရ)။
ပ္ဍဲကြဴနူဂှ် “ကမ်ဥပေါသ်ဂမၠိုၚ် မၞုံဗၞတ်မုစိအိုတ်ရော?” ရဴဝွံ ကသပ်ဒှ် ကုခမဳဂမၠိုၚ်ပၠန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကမ်ဥပေါသ်ဂမၠိုၚ် ကမ်ဥပေါသ် ဟွံဗဗွဲကဵုဓရ်တုဲ မဒှ်ဝဂ် ‘ဂကောံပါ်ဒကး’၊ ကမ်ဥပေါသ် ဟွံဗဗွဲကဵုဓရ်တုဲ မညဳသာသၟဟ်သၟန်၊ ကမ်ဥပေါသ် ဗဗွဲကဵုဓရ်တုဲ မဒှ်ဝဂ် ‘ဂကောံပါ်ဒကး’၊ ကမ်ဥပေါသ် ဗဗွဲကဵုဓရ်တုဲ မညဳသာသၟဟ်သၟန် ရဴဝွံ မၞုံပန်ပြကာအိုတ်ရ။
ယွံခမဳတအ် ပၞေါဝ်ကဵုကမ်ဥပေါသ်ဂမၠိုၚ်ပန်ပြကာဂှ် ကမ်ဥပေါသ် ဟွံဗဗွဲကဵုဓရ်တုဲ မဒှ်ဝဂ်ဂှ် ဟဂပ်ဝ်သ္ပရ၊ အဲလေဝ် ဟွံကဵုအခေါၚ်ကမ်ဥပေါသ် မၞုံသဘဴသာ်ဂှ်ရ။ ယွံခမဳတအ် ပၞေါဝ်ကဵုကမ်ဥပေါသ်ဂမၠိုၚ်ပန်ပြကာဂှ် ကမ်ဥပေါသ် ဟွံဗဗွဲကဵုဓရ်တုဲ မညဳသာသၟဟ်သၟန်ဂှ်လေဝ် ဟဂပ်ဝ်သ္ပရ၊ အဲလေဝ် ဟွံကဵုအခေါၚ်ကမ်ဥပေါသ် မၞုံသဘဴသာ်ဂှ်ရ၊ ယွံခမဳတအ် ပၞေါဝ်ကဵုကမ်ဥပေါသ်ဂမၠိုၚ်ပန်ပြကာဂှ် ကမ်ဥပေါသ် ဗဗွဲကဵုဓရ်တုဲ မဒှ်ဝဂ်ဂှ် ဟဂပ်ဝ်သ္ပရ၊ အဲလေဝ် ဟွံကဵုအခေါၚ်ကမ်ဥပေါသ် မၞုံသဘဴသာ်ဂှ်ရ။ ယွံခမဳတအ် ပၞေါဝ်ကဵုကမ်ဥပေါသ်ဂမၠိုၚ်ပန်ပြကာဂှ် ကမ်ဥပေါသ် ဗဗွဲကဵုဓရ်တုဲ မညဳသာသၟဟ်သၟန်ဂှ်ဟေၚ် ဂပ်ဝ်သ္ပရ။ အဲလေဝ် ကဵုအခေါၚ် ကမ်ဥပေါသ် မၞုံသဘဴသာ်ဂှ်ဟေၚ်ရ။
ယွံခမဳတအ် ဟိုတ်ဂှ်ရ ပ္ဍဲသာသနာဝွံ ကမ်ဥပေါသ် ဗဗွဲကဵုဓရ်တုဲ မညဳသာသၟဟ်သၟန်ဂှ်ဟေၚ် ကြက်သ္ပအိုတ်ရ ရဴဝွံ မၞးတအ်ညးဂမၠိုၚ် သ္ဒးဒ္ဂေတ်လ္ၚတ်ပတိတ်ဇြဟတ်ရ ရဴဝွံ (သ္ဂးရ)။
