၇၆။ မပ္တံဂါမသိမ်
၁၄၇။ ယွံခမဳတအ် သီုဟွံသၟိတ်သိမ် သီုဟွံမွဲကဵုအပိုၚ်အခြာ သ္ပနိဿဲဗ္ဒာဲကဵုကွာန်နိဂီုတုဲ ပဒတဴရ။ အပိုၚ်အခြာကွာန် ဒဒက်တဴကွာန်ဂှ် အပိုၚ်အခြာနိဂီု ဒဒက်တဴနိဂီုဂှ် ဒှ်သမာနသံဝါသသိမ် မဒှ်အရာပံၚ်ဖက်တုပ်သၟဟ် သ္ပဥပေါသ်တုပ်သၟဟ် ပ္ဍဲကွာန်နိဂီုဂှ်ရ။
ယွံခမဳတအ် ဒှ်ပ္ဍဲဂြိုပ်ဟွံသေၚ်ကဵုကွာန်မ္ဂး နူပွဳပွူ ဌာန်မၞုံကဵုအပိုၚ်အခြာထပှ်အဗ္ဘန္တရ (မၞုံကဵုပမာဏမွဲအဗ္ဘန္တရမ္ဂး ၜါစှော်ဒ္စာံဟတ်)ဂှ် ဒှ်သမာနသံဝါသသိမ် မဒှ်မရာပံၚ်ဖက်တုပ်သၟဟ် သ္ပဥပေါသ်တုပ်သၟဟ်ရ။
ယွံခမဳတအ် အလုံၜဳမွဲဂှ် သိမ်ဟွံသေၚ်ရ၊ အလုံမှာသၟိဒ်မွဲဂှ် သိမ်ဟွံသေၚ်ရ၊ အလုံလ္စအၚ်လှာမွဲဂှ် သိမ်ဟွံသေၚ်ရ၊ ယွံခမဳတအ် ပ္ဍဲၜဳမှာသၟိဒ် လ္စအၚ်လှာဂမၠိုၚ်ဂှ် ဌာန်အပိုၚ်အခြာ နူပွဳပွူ နမွဲပက်ဍာ် တြုံမၞုံဇြဟတ်တဲလဒေါဝ်ဂှ် ဒှ်သမာနသံဝါသသိမ် မဒှ်အရာပံၚ်ဖက်တုပ်သၟဟ် သ္ပဥပေါသ်တုပ်သၟဟ်ရ ရဴဝွံ (သ္ဂးရ)။
၁၄၈။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဖျပ်သိမ်ရၚ်သကအ်တုဲ ဗန်ဒက်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ယြဴသိမ်ခမဳဂမၠိုၚ် သၟိတ်လဝ်ဗွဲကိုပ်ကၠာရ၊ ကမ်မသၟိတ်လဝ် ဗွဲကိုပ်ကၠာ ခမဳဂမၠိုၚ်ဂှ် ဗဗွဲကဵုဓရ်ရ၊ ဟွံလီုလာ်ရ၊ ထေက်ကဵုဟိုတ်ရ။ ယြဴသိမ်ခမဳဂမၠိုၚ် သၟိတ်လဝ်နူလက်ကရဴရ၊ ကမ်မသၟိတ်လဝ် နူလက်ကရဴ ခမဳဂမၠိုၚ်ဂှ် ဟွံဗဗွဲကဵုဓရ်ရ၊ လီုလာ်ရ၊ ဟွံထေက်ကဵုဟိုတ်ရ။ ယွံခမဳတအ် ဖျပ်သိမ်ရၚ်သကအ်တုဲ ဟဂပ်ဝ်သၟိတ်ရ၊ ကုခမဳ ဖျပ်တုဲသၟိတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဓလီုဍိုက်သိမ်ရၚ်သကအ်တုဲ ဗန်ဒက်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ယြဴသိမ်ခမဳဂမၠိုၚ် သၟိတ်လဝ်ဗွဲကိုပ်ကၠာရ၊ ကမ်မသၟိတ်လဝ် ဗွဲကိုပ်ကၠာ ခမဳဂမၠိုၚ်ဂှ် ဗဗွဲကဵုဓရ်ရ၊ ဟွံလီုလာ်ရ၊ ထေက်ကဵုဟိုတ်ရ။ ယြဴသိမ်ခမဳဂမၠိုၚ် သၟိတ်လဝ်နူလက်ကရဴရ၊ ကမ်မသၟိတ်လဝ် နူလက်ကရဴ ခမဳဂမၠိုၚ်ဂှ် ဟွံဗဗွဲကဵုဓရ်ရ၊ လီုလာ်ရ၊ ဟွံထေက်ကဵုဟိုတ်ရ။ ယွံခမဳတအ် ဓလီုဍိုက်သိမ်ရၚ်သကအ်တုဲ ဟဂပ်ဝ်သၟိတ်ရ၊ ကုခမဳ မဓလီုဍိုက်တုဲသၟိတ်ဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။ “ယွံခမဳတအ် ခမဳမမိက်သၟိတ်သိမ်ဂှ် ပါဲစွံလဝ် ‘သဳမန္တရိက်’ဇၞးခြာသိမ်ဂမၠိုၚ်တုဲ တၞဟ်နသၟိတ်ဂှ် ကဵုအခေါၚ်ရ” ရဴဝွံ (သ္ဂးရ)။
