၇၈။ မပ္တံပွမစၞောန်ထ္ၜးပါတိမုက်ဗွဲခမ္ဍန်
၁၅၀။ ပ္ဍဲကြဴနူဂှ် “ပွမစၞောန်ထ္ၜးပါတိမုက်ဂမၠိုၚ် မၞုံဗၞတ်မုစိအိုတ်ရော?” ရဴဝွံ ကသပ်ဒှ် ကုခမဳဂမၠိုၚ်ပၠန်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပွမစၞောန်ထ္ၜးပါတိမုက်ဂှ် မၞုံဗၞတ်မသုန်ပြကာအိုတ်ရ၊ စၞောန်ထ္ၜးနိဒါန်တုဲ သၟေဟ်ဂှ် သ္ဒးလၟိၚ် နကဵုသုတသဒ္ဒါရ၊ ဣဝွံတုန် ပွမစၞောန်ထ္ၜးပါတိမုက်ပဌမရ။ စၞောန်ထ္ၜးနိဒါန်တုဲ ကေုာံပါရာဇ်ပန်ဂမၠိုၚ်တုဲ သၟေဟ်ဂှ် သ္ဒးလၟိၚ် နကဵုသုတသဒ္ဒါရ၊ ဣဝွံတုန် ပွမစၞောန်ထ္ၜးပါတိမုက်ဒုတိယရ။ စၞောန်ထ္ၜးနိဒါန် ပါရာဇ်ပန် ကေုာံသံဃာဒိသေသ်စှ်ပိဂမၠိုၚ်တုဲ သၟေဟ်ဂှ် သ္ဒးလၟိၚ် နကဵုသုတသဒ္ဒါရ၊ ဣဝွံတုန် ပွမစၞောန်ထ္ၜးပါတိမုက်တတိယရ။ စၞောန်ထ္ၜးနိဒါန် ပါရာဇ်ပန် သံဃာဒိသေသ်စှ်ပိ ကေုာံအနိယၜါဂမၠိုၚ်တုဲ သၟေဟ်ဂှ် သ္ဒးလၟိၚ် နကဵုသုတသဒ္ဒါရ၊ ဣဝွံတုန် ပွမစၞောန်ထ္ၜးပါတိမုက်စတုတ္ထရ။ ပွမစၞောန်ထ္ၜးဗွဲတြးဂှ် ပွမစၞောန်ထ္ၜးပါတိမုက်ပဉ္စမရ။ ယွံခမဳတအ် ပွမစၞောန်ထ္ၜးပါတိမုက်ဂှ် ဣဝွံ မၞုံမသုန်ပြကာအိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် “တဳလမၞုံပိုဉ်ကျာ်တြဲ ကဵုအခေါၚ်ပွမစၞောန်ထ္ၜးပါတိမုက် ဗွဲခမ္ဍန်ရ” ရဴဝွံ အခါကာအိုတ်သီုစၞောန်ထ္ၜးပါတိမုက် ဗွဲခမ္ဍန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဟဂပ်ဝ်စၞောန်ထ္ၜးပါတိမုက် ဗွဲခမ္ဍန်ရ၊ ကုခမဳ မစၞောန်ထ္ၜးဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။ ပ္ဍဲမွဲအခိၚ်တေံ အပ္ဍဲဘာမွဲ မၞုံအပ္ဍဲဇနပိုဒ်ကောသလရး ပ္ဍဲတ္ၚဲဥပေါသ်ဂှ် ပရိုက်ဘဲမၞိဟ်အရိုၚ်ဂမၠိုၚ် ဒှ်ကၠုၚ်ရ။ ခမဳဂမၠိုၚ် ဟွံသၟဟ်ရထ တၞဟ်နစၞောန်ထ္ၜးပါတိမုက် ဗွဲတြးအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် အန္တရာယ်နွံမ္ဂး ကဵုအခေါၚ် တၞဟ်နပွမစၞောန်ထ္ၜးပါတိမုက် ဗွဲခမ္ဍန်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် သီုဟွံမွဲကဵုအန္တရာယ်လေဝ် စၞောန်ထ္ၜးပါတိမုက် ဗွဲခမ္ဍန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သီုဟွံမွဲကဵုအန္တရာယ် ဟဂပ်ဝ်စၞောန်ထ္ၜးပါတိမုက် ဗွဲခမ္ဍန်ရ၊ ကုခမဳမစၞောန်ထ္ၜးဂှ် ဒးအာပတ်ဒုက္ကဋ်ရ။ ယွံခမဳတအ် အန္တရာယ်နွံမ္ဂး ကဵုအခေါၚ် တၞဟ်နပွမစၞောန်ထ္ၜးပါတိမုက် ဗွဲခမ္ဍန်ရ။ ပ္ဍဲအရာစၞောန်ထ္ၜးပါတိမုက်ဂှ် ကြက်သ္ဂးဂတဝွံတုန် အန္တရာယ်ဂမၠိုၚ်ရ၊ အန္တရာယ်သၟိၚ် အန္တရာယ်ကမၠတ်၊ အန္တရာယ်ပၟတ်၊ အန္တရာယ်ဍာ်၊ အန္တရာယ်မၞိဟ်၊ အန္တရာယ်လကိုဟ်၊ အန္တရာယ်သတ်ဒမြိုဟ်၊ အန္တရာယ်ဇြုံဂဂဳအယဴ၊ အန္တရာယ်လမျီု၊ အန္တရာယ်ဒ္ဂေတ်မပြဲဂမၠိုၚ်ရ။ ယွံခမဳတအ် ဟိုတ်နူအန္တရာယ်ဂမၠိုၚ် မၞုံသဘဴရဴဝွံ ကဵုအခေါၚ် တၞဟ်နပွမစၞောန်ထ္ၜးပါတိမုက် ဗွဲခမ္ဍန်ရ။ အန္တရာယ်ဟွံမွဲမ္ဂး ကဵုအခေါၚ် တၞဟ်နပွမစၞောန်ထ္ၜးပါတိမုက် ဗွဲတြးရ” ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် သီုဗတိုက်ဖအောဝ်ဂှ် တွံဓရ်ပ္ဍဲလဒေါဝ်သၚ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သီုဗတိုက်ဖအောဝ်ဂှ် ဟဂပ်ဝ်တွံဓရ် ပ္ဍဲလဒေါဝ်သၚ်ရ၊ ကုခမဳမတွံဂှ် ဒးအာပတ်ဒုက္ကဋ်ရ။ “ယွံခမဳတအ် ခမဳမဒှ်ထေရ်ဇၞော်ဂှ် အလဵုဇကု တၞဟ်နပွမတွံဓရ်ကီု တၞဟ်နပွမဗတိုက်ဖအောဝ်ညးသအာၚ်ကီုဂှ် ကဵုအခေါၚ်ရ” ရဴဝွံ (သ္ဂးရ)။
