၇၃။ ကဵုအခေါၚ်ဥပစာရုၚ်ဥပေါသ်

၁၄၂။ ပ္ဍဲအခိၚ်ဂှ် ပ္ဍဲဘာဂှ် (အပ္ဍဲမဟာသိမ်)ဂှ် သၟိတ်စွံလဝ် ရုပ်ဥပေါသ်မဍောတ်လောန်ရ၊ ပ္ဍဲတ္ၚဲဥပေါသ်ဂှ် ခမဳဂမၠိုၚ်ဗွဲမဂၠိုၚ် ကောံဓရီုရ။ ခမဳဂမၠိုၚ် ဒးဂဇအ်ဒၟံၚ်ပ္ဍဲတိ မဟဂွံသၟိတ်လဝ်တုဲ ကလၚ်တဴပါတိမုက်အိုတ်ရ။ ပ္ဍဲကြဴနူဂှ် “တဳလမၞုံပိုဉ်ကျာ်တြဲဂှ် ‘သၟိတ်တဴရုပ်ဥပေါသ်တုဲ သ္ဒးသ္ပဥပေါသ်ရ’ ရဴဝွံ ပညပ်လဝ်ရ၊ ပိုဲညးဂမၠိုၚ်တုန် ပဒတဴပ္ဍဲတိ မဟဂွံသၟိတ်လဝ်တုဲ ကလၚ်တဴပါတိမုက်အိုတ်ရ၊ ပိုဲညးဂမၠိုၚ် ဒှ်သ္ပဥပေါသ်ဟာ၊ ဟွံဒှ်သ္ပဥပေါသ်ဟာ” ရဴဝွံ ကသပ်ဒှ် ကုခမဳဂမၠိုၚ်ဒှ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဂမၠိုၚ် မပဒတဴ ပ္ဍဲတိ မဂပ်ဝ်သၟိတ်လဝ် (ရုၚ်ဥပေါသ်)ကဵုဒှ် ပ္ဍဲမဟဂပ်ဝ်သၟိတ်လဝ်ကဵုဒှ် ကလၚ်တဴပါတိမုက်မ္ဂး ဒှ်သ္ပဥပေါသ်ဟေၚ်ရ။ ယွံခမဳတအ် ဒှ်သာ်ဂှ်မ္ဂး သၚ် သြဝ်သၟိတ်တဴ ဥပစာမုက်ရုၚ် ဥပေါသ်မဇၞော်ဗၞတ်နွံပၟိက်ညိ။

ယွံခမဳတအ် ရဴဝွံ သ္ဒးသၟိတ်ရ၊ ဗွဲကိုပ်ကၠာ သ္ဒးဟီုလၟိၚ်နိမိတ်ဂမၠိုၚ်ရ၊ ဟီုလၟိၚ်နိမိတ်တုဲ ပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုစောံသတ္တိဂှ် သ္ဒးကဵုသၚ်တီရ—

“ယွံတဳလပိုဉ်တအ် သၚ် သြဝ်ကလၚ်ပၚ်မှိၚ်( ဂလာန်) အဲဍိက်ညိ၊ ဂပ်ဝ်ဟီုလၟိၚ်နိမိတ်ဂမၠိုၚ် နူပွဳပွူတုဲရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်တဴဥပစာမုက်ရုၚ်ဥပေါသ် နကဵုနိမိတ်ဂမၠိုၚ်ဂှ်ရ၊ ဣဝွံတုန် ပွမကဵုတီရ။

ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ဂပ်ဝ်ဟီုလၟိၚ် နိမိတ်ဂမၠိုၚ် နူပွဳပွူတုဲရ၊ သၚ် သၟိတ်တဴ ဥပစာမုက်ရုၚ်ဥပေါသ် နကဵုနိမိတ်ဂမၠိုၚ်ဂှ်ရ။ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်တဴ ဥပစာမုက်ရုၚ်ဥပေါသ် နကဵုနိမိတ်ဂမၠိုၚ်ဂှ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

သၚ် ဂပ်ဝ်သၟိတ်တဴ ဥပစာမုက်ရုၚ်ဥပေါသ် နကဵုနိမိတ်ဂမၠိုၚ်ဂှ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

ပ္ဍဲအခိၚ်ဂှ် ပ္ဍဲဘာမွဲဘာ ပ္ဍဲတ္ၚဲဥပေါသ်ဂှ် ခမဳသၟတ်ဂမၠိုၚ် ကောံဓရီုဗွဲကိုပ်ကၠာတုဲမ္ဂး “မှာထေရ်ဇၞော်ဂမၠိုၚ် ဟွံက္ညကၠုၚ်အိုတ်ဏီရ” ရဴဝွံ ပါဲစ္ဍးတိတ်အာအိုတ်ရ၊ အခိၚ်လောန်မှ သ္ဂောံသ္ပဥပေါသ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုက်ကျာ်တြဲအိုတ်ရ။ “ယွံခမဳတအ် ပ္ဍဲတ္ၚဲဥပေါသ်ဂှ် ခမဳမဒှ်ထေရ်ဇၞော်ဂမၠိုၚ် တၞဟ်နပွမကောံဓရီုဗွဲကိုပ်ကၠာဂှ် ကဵုအခေါၚ်ရ” ရဴဝွံ (သ္ဂးရ)။

ပ္ဍဲအခိၚ် ပ္ဍဲဍုၚ်ရာဇဂြိုဟ် ဘာဂမၠိုၚ်ဗွဲမဂၠိုၚ်ဂၠၚ် (ဒှ်မဟာသိမ်တုဲ) သိမ်တုဲသၟဟ်အိုတ်ရ၊ ပ္ဍဲဘာဂမၠိုၚ်ဂှ် ခမဳဂမၠိုၚ် “ထေက်ကဵုသ္ပဥပေါသ် ပ္ဍဲဘာပိုဲညးဂမၠိုၚ်ရ၊ ထေက်ကဵုသ္ပဥပေါသ် ပ္ဍဲဘာပိုဲညးဂမၠိုၚ်ရ” ရဴဝွံ ကယျာန်ဓဝါတ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပ္ဍဲဍုၚ်ရာဇဂြိုဟ်ဝွံ ဘာဂမၠိုၚ်ဗွဲမဂၠိုၚ်ဂၠၚ် သိမ်တုပ်သၟဟ်အိုတ်ရ။ ပ္ဍဲဘာဂမၠိုၚ်ဂှ် ခမဳဂမၠိုၚ် “ထေက်ကဵုသ္ပဥပေါသ် ပ္ဍဲဘာပိုဲညးဂမၠိုၚ်ရ၊ ထေက်ကဵုသ္ပဥပေါသ် ပ္ဍဲဘာပိုဲညးဂမၠိုၚ်ရ” ရဴဝွံ ကယျာန်ဓဝါတ်အိုတ်မ္ဂး။ ယွံခမဳတအ် ဒှ်သာ်ဂှ်မ္ဂး ခမဳဂမၠိုၚ်အိုတ်သီု ကောံဓရီုတုဲ သ္ဒးသ္ပဥပေါသ်ရ၊ သၚ်မဒှ်ဝဂ် ‘ဂကောံပါ်ဒကး’ဂှ် ဟဂပ်ဝ်သ္ပဥပေါသ်ဟေၚ်ရ၊ ကုခမဳမသ္ပဂှ် ဒးအာပတ်ဒုက္ကဋ်ရ ရဴဝွံ (သ္ဂးရ)။