၇၂။ ရုၚ်ဥပေါသ်
၁၄၁။ ပ္ဍဲကာလမွဲအခိၚ် ခမဳဂမၠိုၚ် ဗက်ကဵုလၟေၚ်ပြဝိုဏ်တုဲ သီုဟွံချိၚ်ဖာပ်(ဌာန်စၞောန်ထ္ၜးပါတိမုက်) စၞောန်ထ္ၜးပါတိမုက်အိုတ်ရ။ ခမဳကၟုဲဂမၠိုၚ် “တ္ၚဲဝွံ မုရဴပ္ဍဲဌာန်မွဲ ကြက်သ္ပဥပေါသ်ရော?” ရဴဝွံ ဟွံတီအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် ဗက်ကဵုလၟေၚ်ပြဝိုဏ်တုဲ သီုဟွံချိၚ်ဖာပ်(ဌာန်စၞောန်ထ္ၜးပါတိမုက်)ဂှ် ဟဂပ်ဝ်စၞောန်ထ္ၜးပါတိမုက်ရ၊ ကုခမဳမစၞောန်ထ္ၜးဂှ် ဒးအာပတ်ဒုက္ကဋ်ရ။ ယွံခမဳတအ် ဘာဖျေံစၟဳၜါလပါ် ဘာဖျေံစၟဳမွဲလပါ် ပြာသာဒ်ပန်ကၠၚ် ပြာသာဒ်ခၠုပ် ထီုဂိုဟ်သၚ်မနွံပၟိက်ဂမၠိုၚ် သၟိတ်ရုၚ်ဥပေါသ်တုဲ တၞဟ်နပွမသ္ပ ဥပေါသ်ဂှ် ကဵုအခေါၚ်ရ။
ယွံခမဳတအ် ရဴဝွံ သ္ဒးသၟိတ်ရ၊ ခမဳမစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်တဴဘာမၞုံယၟုဝွံ ရဴဝွံမ္ဂး ရုၚ်ဥပေါသ်ရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်တဴဘာမၞုံယၟုဝွံ ရဴဝွံမ္ဂး ရုၚ်ဥပေါသ်ရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်တဴဘာမၞုံယၟုဝွံ ရဴဝွံမ္ဂး ရုၚ်ဥပေါသ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုက်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် မဂပ်ဝ်သၟိတ်တဴ ဘာမၞုံယၟုဝွံ ရဴဝွံမ္ဂး ရုၚ်ဥပေါသ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
ပ္ဍဲအခိၚ်ဂှ် ပ္ဍဲဘာမွဲ (မၞုံအပ္ဍဲမဟာသိမ်)ဂှ် သၟိတ်စွံလဝ် ရုၚ်ဥပေါသ်ဂမၠိုၚ်ၜါမအိုတ်ရ၊ ခမဳဂမၠိုၚ် “ကြက်သ္ပဥပေါသ် ပ္ဍဲရုၚ်ဥပေါသ်ဝွံရ” ရဴဝွံ ကောံဓရီုတဴ ပ္ဍဲရုၚ်ဥပေါသ်ၜါမအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် ပ္ဍဲမွဲဘာဓဝ် မဟဂပ်ဝ်သၟိတ်တဴရုၚ်ဥပေါသ်ၜါမရ၊ ကုခမဳ မသၟိတ်ဂှ် ဒးအာပတ်ဒုက္ကဋ်ရ။ ယွံခမဳတအ် ပိုက်နုက်ကၠေံ ရုၚ်ဥပေါသ်မွဲမတုဲ တၞဟ်နပွမသ္ပဥပေါသ် ပ္ဍဲရုၚ်ဥပေါသ်မွဲမဂှ် ကဵုအခေါၚ်ရ။
ယွံခမဳတအ် ရဴဝွံ သ္ဒးပိုက်နုက်ကၠေံရ၊ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—
“ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် ပိုက်နုက်တဴ ရုၚ်ဥပေါသ်မၞုံယၟုဝွံရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ပိုက်နုက်တဴ ရုၚ်ဥပေါသ်မၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမပိုက်နုက်တဴ ရုၚ်ဥပေါသ်မၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် မပ်ဝ်ပိုက်နုက်တဴ ရုၚ်ဥပေါသ်မၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
