၇၁။ ကဵုအခေါၚ်သိမ်
၁၃၈။ ပ္ဍဲကာလမွဲအခိၚ် “တဳလမၞုံပိုဉ်ကျာ်တြဲဂှ် ခမဳဂမၠိုၚ်ဗၞတ်မပဒတဴမွဲစွံဂှ် ပညပ်တဴ ရဴဝွံမ္ဂး ‘သာမဂ္ဂဳ’ ပွမညဳသာသၟဟ်သၟန်ရ၊ မုရဴနဗၞတ်ဂမၠိုၚ် ဒှ်ပဒတဴမွဲစွံရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ကဵုအခေါၚ် တၞဟ်နပွမသၟိတ်(ထ္ၜုတ်)သိမ်ရ၊ ယွံခမဳတအ် ရဴဝွံ သ္ဒးသၟိတ်ရ၊ ဗွဲကိုပ်ကၠာ သ္ဒးဟီုလၟိၚ်နိမိတ်ဂမၠိုၚ်ရ၊ နိမိတ်ဒဵု နိမိတ်တၟံ နိမိတ်ဂြိုပ် နိမိတ်တၞံဆု နိမိတ်ဂၠံၚ်တရဴ နိမိတ်တၞအ်ဂြုန် နိမိတ်ၜဳကြုၚ် နိမိတ်ဍာ် ရဴဝွံ သ္ဒးဟီုလၟိၚ်နိမိတ်ဂမၠိုၚ်ရ။ ဟီုလၟိၚ်နိမိတ်တုဲပ္ဍဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိ သ္ဒးကဵုသၚ်တီရ—
၁၃၉။ “ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ဂပ်ဝ်ဟီုလၟိၚ်နိမိတ်ဂမၠိုၚ် နူပွဳပွူတုဲရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်သိမ် မဒှ်အရာပံက်ဖက်တုပ်သၟဟ် သ္ပဥပေါသ်တုပ်သၟဟ် နကဵုနိမိတ်ဂမၠိုၚ်ဂှ်ရ၊ ဣဝွံတုန် ပွမကဵုတီရ။
ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ ဂပ်ဝ်ဟီုလၟိၚ် နိမိတ်ဂမၠိုၚ် နူပွဳပွူတုဲရ၊ သၚ် သၟိတ်သိမ် မဒှ်အရာက်ပံၚ်ဖက်တုပ်သၟဟ် သ္ပဥပေါသ်တုပ်သၟဟ် နကဵုနိမိတ်ဂမၠိုၚ်ဂှ်ရ။ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်သိမ် မဒှ်အရာပံၚ်ဖက်တုပ်သၟဟ် သ္ပဥပေါသ်တုပ်သၟဟ် နကဵုနိမိတ်ဂမၠိုၚ်ဂှ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သၟိတ်သိမ် မဒှ်အရာမပံၚ်ဖက်တုပ်သၟဟ် သ္ပဥပေါသ်တုပ်သၟဟ် နကဵုနိမိတ်ဂမၠိုၚ်ဂှ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။
၁၄၀။ ပ္ဍဲမွဲအခိၚ်တေံ ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ကဵုအခေါၚ်ပွမသၟိတ်သိမ်ရ” ရဴဝွံ သၟိတ်တဴသိမ်ဂမၠိုၚ်မဇၞော်လောန် မၞုံပန်ယောဇနာ မသုန်ယောဇနာ တြဴယောဇနာအိုတ်ရ။ ခမဳဂမၠိုၚ် ကၠုၚ်တဴဌာန်သ္ပဥပေါသ်မ္ဂး ဃောစၞောန်ထ္ၜးပါတိမုက်လေဝ် ကၠုၚ်စိုပ်အိုတ်ရ၊ ပ္ဍဲအယာံမတ် မစၞောန်ထ္ၜးတုဲလေဝ် ကၠုၚ်စိုပ်အိုတ်ရ၊ ကိုပ်ကၠာဟွံစိုပ် ဌာန်သ္ပဥပေါသ်ဏီ ပ္ဍဲအကြာလေဝ် ပဒတဴအိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် ဟဂပ်ဝ်သၟိတ်တဴ သိမ်ဂမၠိုၚ်မဇၞော်လောန် မၞုံပန်ယောဇနာ မသုန်ယောဇနာ တြဴယောဇနာရ၊ ကုခမဳမသၟိတ်ဂှ် ဒးအာပတ်ဒုက္ကဋ်ရ။ “ယွံခမဳတအ် ကဵုအခေါၚ် တၞဟ်နပွမသၟိတ်သိမ်လောန်အိုတ် ပိယောဇနာရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် သၟိတ်တဴသိမ် ပ္ဍဲသြၚ်ၜဳမွဲလပါ်အိုတ်ရ။ ကၠုၚ်တဴဌာန်သ္ပဥပေါသ်မ္ဂး ခမဳဂမၠိုၚ်လေဝ် ဟဳအာဍာ်အိုတ်ရ၊ ဗဗေၚ်ဂမၠိုၚ်လေဝ် ဟဳအာဍာ်အိုတ်ရ၊ သ္ၚာဂမၠိုၚ်လေဝ် ဟဳအာဍာ်အိုတ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် ဟဂပ်ဝ်သၟိတ်တဴသိမ် ပ္ဍဲသြၚ်ၜဳမွဲလပါ်ရ၊ ကုခမဳ မသၟိတ်ဂှ် ဒးအာပတ်ဒုက္ကဋ်ရ။ “ယွံခမဳတအ် ကဵုအခေါၚ် တၞဟ်နပွမသၟိတ်တဴ သိမ်သြၚ်ၜဳမွဲလပါ် ယြဴပ္ဍဲဌာန် မၞုံကဵုဂၠုၚ်မစွံပတန်လဝ်လၟိုန် ဒဒန်မလးစွံလဝ်လၟိုန်ရ” ရဴဝွံ (သ္ဂးရ)။
