၇၀။ ဝတ္ထုမဟာကပ္ပိန
၁၃၇။ ပ္ဍဲကာလမွဲအခိၚ် တဳလပိုဉ်မဟာကပ္ပိန သ္ပဒတဴဒၟံၚ်ပ္ဍဲဂြိုပ်ဒြာဲမဒ္ဒကုစ္ဆိ ဇရေၚ်ဍုၚ်ရာဇဂြိုဟ်ရ။ ပ္ဍဲအခိၚ်ဂှ် ကုတဳလပိုဉ်မဟာကပ္ပိန ပြာပ်အာဌာန်မ္ၚုသ္ၚိတ်ဇြတုဲ ပဒတဴဒၟံၚ်ဗွဲမသ္ၚိတ်ဇြဂှ် “အဲ ဒးအာဌာန်သ္ပဥပေါသ်ဟာ၊ သီုဟွံအာဂှ် ပဒတဴဂွံဟာ၊ အဲ ဒးအာဌာန်သ္ပကမ်သၚ်ဟာ၊ သီုဟွံအာဂှ် ပဒတဴဂွံဟာ။ ဗွဲစၟတ်တုန် အဲဂှ် ညးသ္အးဇ္ၚး နပွမသ္အးဇ္ၚးမလောန်ကာဲရ” ရဴဝွံ ကသပ်စိုတ်ဒှ်ရ။
ပ္ဍဲအခိၚ်ဂှ် တဳမၞုံပိုဉ်ကျာ်တြဲ တီကေတ်ကသပ်စိုတ် တဳလပိုဉ်မဟာကပ္ပိန နကဵုစိုတ်ဇကုတုဲ တြုံမၞုံကဵုဇြဟတ်ဂှ် သပါတဲမခ္ဍောပ်ကဝေန်လဝ်ဂှ် သၟဟ်ညံၚ်ရဴပၠးပတိတ်ကီု သပါတဲပၠးလဝ်ဂှ် သၟဟ်ညံၚ်ရဴခ္ဍောပ်ကဝေန်ပၠုပ်ကီု တုပ်သာ်ဂှ်ရ ကၠေံဗ္ဒန်အာ နူဒဵုဂိဇ္ၛကုဋ်တုဲ ဒှ်ပြာကဋ် ပ္ဍဲဂတမုက်တဳလပိုဉ်မဟာကပ္ပိန အပ္ဍဲဂြိုပ်ဒြာဲမဒ္ဒကုစ္ဆိရ။ တဳလမၞုံပိုဉ်ကျာ်တြဲ ဂဇအ်တဴ ပ္ဍဲသၞာမလးပညပ်လဝ်ရ။ တဳလပိုဉ်မဟာကပ္ပိန လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ် ပ္ဍဲဒၞာဲမွဲရ၊ တဳလပိုဉ်မဟာကပ္ပိန မဂဇအ်ဒၟံၚ် ပ္ဍဲဒၞာဲမွဲဂှ် “ယွံကပ္ပိန ကုတၠအဲ မပြာပ်အာဌာန်လ္ၚုသ္ၚိတ်ဇြတုဲ ပဒတဴဒၟံၚ်ဗွဲမသ္ၚိတ်ဇြဂှ် အဲ ဒးအာဌာန်သ္ပဥပေါသ်ဟာ၊ သီုဟွံအာဂှ် ပဒတဴဂွံဟာ၊ အဲ ဒးအာဌာန်သ္ပကမ်သၚ်ဟာ၊ သီုဟွံအာဂှ် ပဒတဴဂွံဟာ။ ဗွဲစၟတ်တုန် အဲဂှ် ညးသ္အးဇ္ၚး နပွမသ္အးဇ္ၚးမလောန်ကာဲရ ရဴဝွံ ကသပ်စိုတ်ဒှ်ရ ဟွံသေၚ်ဟာ” ရဴဝွံ တဳလမၞုံပိုဉ်ကျာ်တြဲသ္ဂးရ။ ယွံတဳလမၞုံပိုဉ် ကသပ်ဒှ်အတိုၚ်ဂှ်ဂှ် ဍာံပြရ ရဴဝွံ (ဂရၚ်ပတီရ)။ မၞးတအ်ညးဂမၠိုၚ် မသ္ပကၠေံပွသရာံပါပ်မ္ၚးတုဲဂှ် ယဝ်သွံသ္ပရှ်ေသှ်ေရဴဂဴ ဥပေါသ်အိုတ်မ္ဂး၊ ဟွံသ္ပအဲပရဲအိုတ်မ္ဂး၊ ဟွံသၞေံသၞဴအိုတ်မ္ဂး၊ ဟွံပူဇဴအိုတ်မ္ဂး၊ ဒှ်သာ်ဂှ်မ္ဂး မုရဴညးမွဲ ကြက်သ္ပရှ်ေသှ်ေရဴဂဴ ဥပေါသ်ရော? ကြက်သ္ပအဲပရဲရော? ကြက်သၞေံသၞဴရော? ကြက်ပူဇဴရော? တၠအဲခမဳ မသ္ပကၠေံပွသရာံပါပ်မ္ၚးတုဲဂှ် သြဝ်အာဌာန်သ္ပဥပေါသ်ညိ၊ သြဝ်အာဌာန်သ္ပကမ်သၚ်ညိ၊ သီုဟွံအာဂှ် လ္ပပဒတဴညိ ရဴဝွံ (သ္ဂးရ)။
“ယွံတဳလမၞုံပိုဉ် ခိုဟ်သန်ရ” ရဴဝွံ တဳလပိုဉ်မဟာကပ္ပိန ဒုၚ်ဝန်ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုတဳလပိုဉ်မဟာကပ္ပိန တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ်(ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး တြုံမၞုံကဵုဇြဟတ်ဂှ် သပါတဲမခ္ဍောပ်ကဝေန်လဝ်ဂှ် သၟဟ်ညံၚ်ရဴပၠးပတိတ်ကီု သပါတဲ ပၠးလဝ်ဂှ် သၟဟ်ညံၚ်ရဴခ္ဍောပ်ကဝေန်ပၠုပ်ကီု တုပ်သာ်ဂှ်ရ ကၠေံဗ္ဒန်အာ နူပ္ဍဲဂတမုက် တဳလပိုဉ်မဟာကပ္ပိန အပ္ဍဲဂြိုပ်ဒြာဲမဒ္ဒကုစ္ဆိတုဲ ဒှ်ပြာကဋ် ပ္ဍဲဒဵုဂိဇ္ၛကုဋ်ရ။
