၆၉.၂။ ပွံက်ပွမကဵုအခေါၚ် သွက်ဂွံစၞောန်ထ္ၜးပါတိမုက်
၁၃၅။ ပါတိမုက် မ္ဂးဂှ် ပါမောက္ခသံဝရသဳလဝွံ ဒှ်တမ်ဓရ်ကုသိုလ်ဂမၠိုၚ်ရ၊ ပါမောက္ခသံဝရသဳလဝွံ ဒှ်အာဂတပၠတရဴ ဓရ်ကုသိုလ်ဂမၠိုၚ်ရ၊ ပါမောက္ခသံဝရသဳလဝွံ ဒှ်က္ဍိုပ်သကိုပ်ဇၞော်သကိုပ်သက ဓရ်ကုသိုလ်ဂမၠိုၚ်ရ၊ ဟိုတ်ဂှ်ရ ဂပ်ဝ်ကော်ခဴဂး ပါတိမုက်ရ။
ဂလာန်မတွံဂး ယွံတၠဇမၠိၚ်အာယုက်တအ်ဝွံ ဒှ်ဂလာန်ဟီုသ္ဂးသ္ဍိုက်ဆာန်ရ၊ ဂလာန်ဝွံ ဒှ်ဂလာန်သ္ပအဲပရဲတုဲဟီုသ္ဂးရ၊ ဂလာန်မတွံဂး ယွံတၠဇမၠိၚ်အာယုက်တအ်ဝွံ ဒှ်ဂလာန်ဟီုသ္ဂး မွဲဟာန်ကေုာံ ပွမရှ်ေသှ်ေရဴဂဴ ပွမဇအ်သဝ်အောပ်မာရောၚ်။
ကြက်စၞောန်ထ္ၜးရ မ္ဂးဂှ် ကြက်ဟီုသ္ဂးရ၊ ကြက်တွံရ၊ ကြက်ပညပ်ရ၊ ကြက်စွံပတန်ရ၊ ကြက်ပံက်ထ္ၜးရ၊ ကြက်ပါ်ပရအ်ရ၊ ကြက်သ္ပညံၚ်ဂွံမံက်ဂတဝ်ရ၊ ကြက်သ္ပညံၚ်ဂွံပြာကဋ်ရ။
အလုံအိုတ်သီုဟေၚ် မဒှ်ညးသပ္ပုရိုဟ် မ္ဂးဂှ် ပ္ဍဲပရိသာတ်ဂှ် ယြဴခမဳမဒှ်ထေရ်ဇၞော်ဂမၠိုၚ်ကီု ခမဳမဒှ်ထေရ်သၟတ်ဂမၠိုၚ်ကီု ခမဳမဒှ်ထေရ်လဒေါဝ်ဂမၠိုၚ်ကီု မၞုံဗၞတ်မွဲ နွံအိုတ်ရ၊ ခမဳဂမၠိုၚ်ဂှ် သ္ဂးတဴရဴဝွံမ္ဂး အလုံအိုတ်သီုဟေၚ် မဒှ်ညးသပ္ပုရိုဟ်ရ။
သြဝ်ကလၚ်ပၚ်မှိၚ် ဗွဲမ္ဒးရးအိုတ်ညိ မ္ဂးဂှ် သ္ပရှ်ေသှ်ေရဴဂဴတုဲ သ္ပပၠုပ်စိုတ်တုဲ ရၚ်တၠုၚ် နစိုတ်အိုတ်သီု ဗွဲမ္ဒးရးအိုတ်ရ ရဴဝွံ မိက်သ္ဂးရ။
ပၠုပ်စိုတ်အိုတ်ညိ မ္ဂးဂှ် မၞုံကဵုစိုတ်မွဲဓဝ်ဂမၠိုၚ်ဒှ်တုဲ မၞုံကဵုစိုတ်မဟွံကလှ်လဖှ်ဂမၠိုၚ်ဒှ်တုဲ မၞုံကဵုစိုတ်မဟွံဍောၚ်ၜိုတ်ဂမၠိုၚ်ဒှ်တုဲ ကလၚ်အိုတ်ရ ရဴဝွံ မိက်သ္ဂးရ။
ယြဴကုခမဳမွဲ မၞုံကဵုအာပတ်ဒှ်မ္ဂး မ္ဂးဂှ် ကုခမဳမဒှ်ထေရ်ဇၞော်ကီု ကုခမဳမဒှ်ထေရ်သၟတ်ကီု ကုခမဳမဒှ်ထေရ်လဒေါဝ်ကီု ပၞေါဝ်ကဵုဂကောံအာပတ်ဂမၠိုၚ်မသုန်ပြကာဂှ် အာပတ်မွဲမွဲကီု ပၞေါဝ်ကဵုဂကောံအာပတ်ဂမၠိုၚ်ထပှ်ပြကာဂှ် အာပတ်မွဲမွဲကီု နွံရောၚ်ဒှ်မ္ဂး။
ခမဳဂှ် သ္ဒးသ္ပဗွဲမပြာကဋ်ရ မ္ဂးဂှ် ပ္ဍဲလဒေါဝ်သၚ်ကီု ပ္ဍဲလဒေါဝ်ဂိုဏ်ကီု ပ္ဍဲဇရေၚ်ပူဂိုလ်မွဲဇကုကီု ခမဳဂှ် ဒးဟီုလၟိၚ်ရ၊ ခမဳဂှ် ဒးပံက်ဟီုရ၊ ခမဳဂှ် ဒးသ္ပစဵုကဵုမံက်ဂတဝ်ပြာကဋ်ရ၊ ခမဳဂှ် ဒးသ္ပစဵုကဵုပြာကဋ်ရ။
အာပတ်ဟွံမွဲရ မ္ဂးဂှ် ဟွံအာစိုပ်အာပတ်ကီု ဒးအာပတ်တုဲ ဒၠိုက်နူအာပတ်ဂှ်တုဲကီု ဒှ်ရ။
ဒးမံၚ်သ္ၚိတ်သ္ၚိတ်ရ မ္ဂးဂှ် အေၚ်ဒုၚ်တုဲဒးမံၚ်ရ၊ ဟွံထေက်ကဵုဟီုသ္ဂးရ။
သ္အးဇ္ၚးနူအာပတ်အိုတ်ရ ရဴဝွံ ဂွံတီရ မ္ဂးဂှ် ဂွံသမ္တီရ။
ဗွဲဥပမာမ္ဂး သၟဟ်ညံၚ်ရဴဟီုသှ် ညးမဒးဒုၚ်သၟာန်တၞဟ်တၞဟ်ကီု မ္ဂးဂှ် ဗွဲဥပမာမ္ဂး ညးမွဲဂှ် ဂပ်ဝ်သၟာန်ညးမွဲမ္ဂး ညံၚ်ရဴဟီုသှ်တဴကီု တုပ်သၟဟ်သာ်ဂှ်ဟေၚ် ပ္ဍဲပရိသာတ်ဂှ် “သၟာန်ဒၟံၚ်အဲရ” ရဴဝွံ ဒးတီရ မိက်သ္ဂးရ။
ပ္ဍဲပရိသာတ်မၞုံသဘဴရဴဝွံ မ္ဂးဂှ် သ္ဂးတဴပရိသာတ်ခမဳရ။
စဵုကဵုပေၚ်ပိဝါ ဂပ်ဝ်သၟာန်စၟဳစၟတ်ဂၠိုၚ်ဂၠိုၚ်ကဵုဝါရ မ္ဂးဂှ် ဗၞတ်မွဲအလန်လေဝ် ဂပ်ဝ်ဟီုသ္ဂးရ၊ ဗၞဟ်ၜါအလန်လေဝ် ဂပ်ဝ်ဟီုသ္ဂးရ၊ ဗၞတ်ပိအလန်လေဝ် ဂပ်ဝ်ဟီုသ္ဂးရ။
သီုကဵုမတီတဴ မ္ဂးဂှ် သီုကဵုမတီတဴ သီုကဵုမတီတဴ ဗွဲမ္ဒးရး။
အာပတ်မၞုံပြာကဋ် မ္ဂးဂှ် အာစိုပ်အာပတ်လေဝ်ဒှ်ရ၊ ဒးအာပတ်တုဲလေဝ် ဟွံဒၠိုက်ကတဵုနူအာပတ်ဏီရ။
ဟွံသ္ပဗွဲမပြာကဋ် မ္ဂးဂှ် ပ္ဍဲလဒေါဝ်သၚ်ကီု ပ္ဍဲလဒေါဝ်ဂိုဏ်ကီု ပ္ဍဲဇရေၚ်ပူဂိုလ်မွဲဇကုကီု ဟွံဟီုလၟိၚ်မ္ဂး၊ ဟွံလပံက်ဟီုမ္ဂး၊ ဟွံသ္ပစဵုကဵုမံက်ဂတဝ်ပြာကဋ်မ္ဂး၊ ဟွံသ္ပစဵုကဵုပြာကဋ်မ္ဂး။
ကုခမဳဂှ် ဟိုတ်မဟီုသ္ဂးဂလာန်မဆောတ်ယောၚ် သီုကဵုမတီတဴ ဒှ်မုသာဝါဒရ ဟိုတ်မဟီုသ္ဂးဂလာန် မဆောတ်ယောၚ် သီုကဵုမတီတဴ ဒးအာပတ်မုရော ဒးအာတ်ဒုက္ကဋ်ရ။
ပ္ဍဲအရာ ဓရ်မလေပ်သ္ပကဵုအန္တရာယ် ရဴဝွံ တဳလမၞုံပိုဉ်ကျာ်တြဲ ဂပ်ဝ်တွံလဝ်ရဂှ် မုအန္တရာယ်ဂှ်ရောမ္ဂး လေပ်သ္ပကဵုအန္တရာယ် ပွမကလိဂွံပဌမၛာန်ရ၊ လေပ်သ္ပကဵုအန္တရာယ် ပွမကလိဂွံဒုတိယၛာန်ရ၊ လေပ်သ္ပကဵုအန္တရာယ် ပွမကလိဂွံတတိယၛာန်ရ၊ လေပ်သ္ပကဵုအန္တရာယ် ပွမကလိဂွံစတုတ္ထၛာန်ရ၊ လေပ်သ္ပကဵုအန္တရာယ် ပွမကလိဂွံဓရ်ကုသိုလ်ဂမၠိုၚ်မတွံဂးၛာန် မဂ် သမာဓိ သမာပတ် နေက္ခမ္မ နိဿရဏ ပဝိဝေကရ။
ဟိုတ်ဂှ်ရ မ္ဂးဂှ် ဟိုတ်နူဟိုတ်ဂှ်။
နမဂွံသတိ မ္ဂးဂှ် နမတီတဴ နမတီတဴဗွဲမ္ဒးရး။
နွံပၟိက်ကဵုပွမသအးဇ္ၚး မ္ဂးဂှ် နွံပၟိက်ကဵုပွမဒၠိုက်ကတဵု နူအာပတ်မ္ဂး၊ နွံပၟိက်ကဵုပွမသ္အးဇ္ၚးမ္ဂး။
အာပတ်မၞုံပြာကဋ် မ္ဂးဂှ် အာစိုပ်အာပတ်ကီု အာစိုပ်အာပတ်တုဲ ဟွံဒၠိုက်ကတဵုနူအာပတ်ဏီကီု ဒှ်ရ။
ဒးသ္ပဗွဲမပြာကဋ်ရ မ္ဂးဂှ် ပ္ဍဲလဒေါဝ်သၚ်ကီု ပ္ဍဲလဒေါဝ်ဂိုဏ်ကီု ပ္ဍဲဇရေၚ်ပူဂိုလ်မွဲဇကုကီု ဒးသ္ပစဵုကဵုပြာကဋ်ရ။
ပ္ဍဲအရာ ဟိုတ်ပွမသ္ပဗွဲမပြာကဋ်ဂှ် ဒှ်တသိုခ် ကုခမဳဂှ်ရ မ္ဂးဂှ် ကုခမဳဂှ် တသိုခ်သာ်လဵုဒှ်ရော? ဒှ်တသိုခ် တၞဟ်နပွမကလိဂွံပဌမၛာန်ရ၊ ဒှ်တသိုခ် တၞဟ်နပွမကလိဂွံဒုတိယၛာန်ရ၊ ဒှ်တသိုခ် တၞဟ်နကလိဂွံတတိယၛာန်ရ၊ ဒှ်တသိုခ် တၞဟ်နကလိဂွံစတုတ္ထၛာန်ရ၊ ဒှ်တသိုခ် တၞဟ်နကလဂွံဓရ်ကုသိုလ်ဂမၠိုၚ်မတွံဂးၛာန် မဂ် သမာဓိ သမာပတ် နေက္ခမ္မ နိဿရဏ ပဝိဝေကရ။
၁၃၆။ ပ္ဍဲကာလမွဲအခိၚ် ခမဳဂမၠိုၚ် “တဳလမၞုံပိုဉ်ကျာ်တြဲ ကဵုခေါၚ်ပွမစၞောန်ထ္ၜးပါတိမုက်ရ” ရဴဝွံ ဇၟာပ်တ္ၚဲရိုဟ်တ္ၚဲ စၞောန်ထ္ၜးပါတိမုက်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဇၟာပ်တ္ၚဲရိုဟ်တ္ၚဲ ဟဂပ်ဝ်စၞောန်ထ္ၜးပါတိမုက်ရ၊ ကုခမဳ မစၞောန်ထ္ၜးဂှ် ဒးအာပတ်ဒုက္ကဋ်ရ။ “ယွံခမဳတအ် တၞဟ်နစၞောန်ထ္ၜးပါတိမုက် ပ္ဍဲတ္ၚဲဥပေါသ်ဂှ် ကဵုအခေါၚ်ရ” ရဴဝွံ (သ္ဂးရ)။
ပ္ဍဲမွဲအခိၚ်တေံ ခမဳဂမၠိုၚ် “ယွံတဳလမၞုံပိုဉ်ကျာ်တြဲ ကဵုအခေါၚ် ပွမစၞောန်ထ္ၜးပါတိမုက် ပ္ဍဲတ္ၚဲဥပေါသ်ရ” ရဴဝွံ ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲမရနုက်ကဵုဒ္စာံ ဒဒက်တဴကဵုပက်ကီု မွဲပက်မ္ဂး စၞောန်ထ္ၜးပါတိမုက်ပိအလန်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် ပ္ဍဲမွဲပက်ပိအလန် ဟဂပ်ဝ်စၞောန်ထ္ၜးပါတိမုက်ရ၊ ကုခမဳမစၞောန်ထ္ၜးဂှ် ဒးအာပတ်ဒုက္ကဋ်ရ။ “ယွံခမဳတအ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု မွဲပက်မ္ဂး ဗၞတ်မွဲအလန်ဟေၚ် တၞဟ်နစၞောန်ထ္ၜးပါတိမုက်ဂှ် ကဵုအခေါၚ်ရ” ရဴဝွံ (သ္ဂးရ)။
ပ္ဍဲကာလမွဲအခိၚ် ခမဳဆဗ္ဗဂ္ဂဳဂမၠိုၚ် နကဵုပရိသာတ်ဇကုဇကုတအ် ဗၞတ်ပရိသာတ်နွံဂှ် စၞောန်ထ္ၜးပါတိမုက်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ယွံခမဳတအ် နကဵုပရိသာတ်ဇကုဇကုတအ် ဗၞတ်ပရိသာတ်နွံဂှ် ဟဂပ်ဝ်စၞောန်ထ္ၜးပါတိမုက်ရ၊ ကုခမဳမစၞောန်ထ္ၜးဂှ် ဒးအာပတ်ဒုက္ကဋ်ရ။ “ယွံခမဳတအ် ကဵုအခေါၚ်ကမ်ဥပေါသ် သွက်ခမဳမညဳသာသၟဟ်သၟန်ဂမၠိုၚ်ရ” ရဴဝွံ (သ္ဂးရ)။
ပ္ဍဲကြဴနူဂှ် “တဳလမၞုံပိုဉ်ကျာ်တြဲဂှ် ‘ပညပ်တဴ ကမ်ဥပေါသ် သွက်ခမဳမညဳသာသၟဟ်သၟန်ဂမၠိုၚ်ရ’၊ ခမဳဗၞတ်ၜိုတ်လဵု ဒှ်‘သာမဂ္ဂဳ’ ပွမညဳသာသၟဟ်သၟန်ရော? ခမဳဂမၠိုၚ်ပဒတဴမွဲဘာဓဝ်ဂှ် ဒှ်ပွမညဳသာသၟဟ်သၟန်ဟာ၊ ဆဂှ်ဟွံသေၚ်မ္ဂး ခမဳဂမၠိုၚ်အိုတ်သီု မၞုံပ္ဍဲဒၠးတိဂှ် ဒှ်ပွမညဳသာသၟဟ်သၟန်ဟာ” ရဴဴဝွံ ကသပ်ဒှ် ကုခမဳဂမၠိုၚ်ဒှ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ “ယွံခမဳတအ် ခမဳဂမၠိုၚ်ဗၞတ်မပဒတဴမွဲစွံဂှ် ကဵုအခေါၚ် ရဴဝွံမ္ဂး ‘သာမဂ္ဂဳ’ ပွမညဳသာသၟဟ်သၟန်ရ” ရဴဝွံ (သ္ဂးရ)။
