၆၉.၁။ ကဵုအခေါၚ် သွက်ဂွံစၞောန်ထ္ၜးပါတိမုက်

၁၃၃။ ပ္ဍဲအခိၚ်ဂှ် ကုတဳလမၞုံပိုဉ်ကျာ်တြဲ ပြာပ်အာဌာန်လ္ၚုသ္ၚိတ်ဇြတုဲ မတန်တဴဒၟံၚ် ဗွဲမသ္ၚိတ်ဇြဂှ်—

“သိက္ခာပိုဒ်ဂမၠိုၚ် အဲပညပ်လဝ်သွက်ခမဳဂမၠိုၚ်ဂှ် သ္ဂောံကဵုအခေါၚ် တၞဟ်နပွမကဵုစၞောန်ထ္ၜးပါတိမုက် ကုခမဳဂမၠိုၚ်မ္ဂး ခိုသ်သန်ရ၊ ပွမစၞောန်ထ္ၜးပါတိမုက်ဂှ် ကြက်ဒှ်ကမ်ဥပေါသ် ကုခမဳဂမၠိုၚ်ရ” ရဴဝွံ ကသပ်ဒှ်ရ။

ပ္ဍဲကြဴနူဂှ် တဳလမၞုံပိုဉ်ကျာ်တြဲ ပ္ဍဲအခိၚ်သဝ်တ္ၚဲ ဒၠိုက်ကတဵုနူမပဒတတဴ ဗွဲမသ္ၚိတ်ဇြတုဲမ္ဂး ဟိုတ်နူဟိုတ်အရာဝွံ တွံကဵုဂလာန်ဓရ်တုဲ—

“ယွံခမဳတအ် ကုအဲ မပြာပ်အာဌာန်လ္ၚုသ္ၚိတ်ဇြတုဲ တန်တဴဒၟံၚ်ဗွဲမသ္ၚိတ်ဇြဂှ် ‘သိက္ခာပိုဒ်ဂမၠိုၚ် အဲပညပ်လဝ်သွက်ခမဳဂမၠိုၚ်ဂှ် သ္ဂောံကဵုအခေါၚ် တၞဟ်နပွမကဵုစၞောန်ထ္ၜးပါတိမုက် ကုခမဳဂမၠိုၚ်မ္ဂး ခိုဟ်သန်ရ၊ ပွမစၞောန်ထ္ၜးပါတိမုက်ဂှ်လေဝ် ကြက်ဒှ်ကမ်ဥပေါသ် ကုခမဳဂမၠိုၚ်ရ” ရဴဝွံ ကသပ်ဒှ်ရဂှ် သ္ဂးရ။

ယွံခမဳတအ် ကဵုအခေါၚ် တၞဟ်နစၞောန်ထ္ၜးပါတိမုက်။ ယွံခမဳတအ် ရဴဝွံ သ္ဒးစၞောန်ထ္ၜးရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

၁၃၄။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သ္ပဥပေါသ်ရ၊ စၞောန်ထ္ၜးပါတိမုက်ရ။ သၚ်ဂှ် ဗွဲကိုပ်ကၠာ ပတုဲတဴပုဗ္ဗကိစ္စ ဒ္စိတ်သာ် မဂပ်ဝ်ပတုဲတုဲရဟာ၊ ယွံတၠဇမၠိၚ်အာယုက်တအ် သြဝ်ဟီုလၟိၚ် ဒဒှ်မသ္အးဇ္ၚး (နူအာပတ်)အိုတ်ညိ၊ ကြက်စၞောန်ထ္ၜးပါတိမုက်ရ၊ ပိုယ်ညးဂမၠိုၚ်အလုံအိုတ်သီုဟေၚ် မဒှ်ညးသပ္ပုရိုဟ်ဂှ် ကလၚ်ပၚ်မှိၚ် ပါတိမုက်ဂှ် ဗွဲမ္ဒးရးအိုတ်ရ၊ ပၠုပ်စိုတ်အိုတ်ရ၊ ယြဴကုခမဳမွဲ မၞုံကဵုအာပတ်ဒှ်မ္ဂး၊ ခမဳဂှ် သ္ဒးသ္ပဗွဲမပြာကဋ်ရ၊ အာပတ်ဟွံမွဲမ္ဂး သ္ဒးမံၚ်သ္ၚိတ်သ္ၚိတ်ရ၊ နမဒၟံၚ်သ္ၚိတ်သ္ၚိတ်ဂှ် တၠဇမၠိၚ်အာယုက်တအ်ညးဂမၠိုၚ် သ္အးဇ္ၚးနူအာပတ်အိုတ်ရ ရဴဝွံ ဂွံတီကေတ်ရ၊ ဗွဲဥပမာမ္ဂး သၟဟ်ညံၚ်ရဴ ဟီုသှ် ညးမဒးဒုၚ်သၟာန်တၞဟ်တၞဟ်ကီု တုပ်သၟဟ်သာ်ဝွံဟေၚ် ပ္ဍဲပရိသာတ် မၞုံသဘဴရဴဝွံ စဵုကဵုပေၚ်ပိဝါ ဂပ်ဝ်သၟာန်စၟဳစၟတ်ဂၠိုၚ်ဂၠိုၚ်ကဵုဝါရ၊ စဵုကဵုပေၚ်ပိဝါ သီုကဵုမဂပ်ဝ်ဟီုသ္ဂးဂၠိုၚ်ဂၠိုၚ်ကဵုဝါဂှ် ဟွံသ္ပပြာကဋ် အာပတ်မၞုံတဴပြာကဋ်ပ္ဍဲဇကုမ္ဂး၊ ကုခမဳဂှ် ဟိုတ်မဟီုသ္ဂးဂလာန်မဆောတ်ယောၚ် သီုကဵုမတီတဴ ဒှ်မုသာဝါဒရ။ ယွံတၠဇမၠိၚ်အာယုက်တအ် ပွမဟီုသ္ဂးဂလာန်မဆောတ်ယောၚ် သီုကဵုမတီတဴဂှ် ဓရ်မလေပ်သ္ပကဵုအန္တရာယ်(ၛာန်မဂ်ဖိုလ်) ရဴဝွံ တဳလမၞုံပိုဉ်ကျာ်တြဲ ဂပ်ဝ်တွံလဝ်ရ၊ ဟိုတ်ဂှ်ရ ခမဳမဒးအာပတ်ဂှ် မဂွံသတိ(အာပတ်)ဂှ် မၞုံပၟိက်ကဵုသ္အးဇ္ၚးမ္ဂး သ္ဒးသ္ပပြာကဋ် မၞုံတဴပြာကဋ်ရ၊ ဟိုတ်ပွမသ္ပဗွဲပြာကဋ်ဂှ် ဒှ်တသိုခ် ကုခမဳဂှ်ရ” ရဴဝွံ (သ္ဒးကဵုတီရ)။