၆၈။ ကဵုအခေါၚ် သွက်ဂွံကောံဓရီု
၁၃၂။ ပ္ဍဲကာလမွဲအခိၚ် တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဒဵုဂိဇ္ၛကုဋ် ဇရေၚ်ဍုၚ်ရာဇဂြိုဟ်ဂှ် ပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) ဂှ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်စွေက်ဂမၠိုၚ်ကီု ကောံဓရီုတုဲ ဟီုတွံဓရ်အိုတ်ရ။
တၞဟ်နကလၚ်ပၚ်မှိၚ်ဓရ် မၞိဟ်ဂမၠိုၚ် ပြာပ်အာဇရေၚ် ပြဘာဇ်ဂမၠိုၚ်ဂှ်အိုတ်ရ၊ မၞိဟ်ဂမၠိုၚ်ဂှ် သ္ဍိုက်ဆာန် ပ္ဍဲပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) အိုတ်ရ၊ လျုၚ်ဇြုၚ်သ္ဍိုက်အိုတ်ရ၊ ပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) ဂှ် ကလိဂွံဗော်သွးအိုတ်ရ။
ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ပြာပ်အာဌာန်လ္ၚုသ္ၚိတ်ဇြတုဲ ဃောမတန်တဴဒၟံၚ်ဗွဲမသ္ၚိတ်ဇြဂှ် ပ္ဍဲအခိၚ်လၟုဟ် ပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) ဂှ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကောံဓရီုတုဲ ဟီုတွံဓရ်အိုတ်ရ။ တၞဟ်နကလၚ်ပၚ်မှိၚ်ဓရ် မၞိဟ်ဂမၠိုၚ် ပြာပ်အာဇရေၚ် ပြဘာဇ်ဂမၠိုၚ်အိုတ်ရ၊ မၞိဟ်ဂမၠိုၚ်ဂှ် သ္ဍိုက်ဆာန် ပ္ဍဲပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) အိုတ်ရ၊ လျုၚ်ဇြုၚ်သ္ဍိုက်အိုတ်ရ၊ ပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) ကလိဂွံဗော်သွးအိုတ်ရ၊ တဳလပိုဉ်မဆာဲဂမၠိုၚ်လေဝ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု ယဝ်ဂွံကောံဓရီုအိုတ်မ္ဂး ခိုဟ်သန်ရ ရဴဝွံ ကသပ်စိုတ်ဒှ်ရ။
ပ္ဍဲကြဴနူဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ပြာပ်အာဇရေၚ် တဳလပိုဉ်ကျာ်တြဲတုဲ လ္ၚောဝ်သ္ပဝတ် တဳလပိုဉ်ကျာ်တြဲတုဲမ္ဂး ဂဇအ်ဒၟံၚ် ပ္ဍဲမွဲဒၞာဲတုဲ ‘ယွံတဳလမၞုံပိုဉ် အဲဍိက် ပြာပ်အာဌာန်လ္ၚုသ္ၚိတ်ဇြတုဲ ဃောမတန်တဴဒၟံၚ် ဗွဲမသ္ၚိတ်ဇြဂှ် ‘ပ္ဍဲအခိၚ်လၟုဟ် ပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) ဂှ် ပ္ဍတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု ကောံဓရီုတုဲ ဟီုတွံဓရ်အိုတ်ရ၊ တၞဟ်နကလၚ်ပၚ်မှိၚ်ဓရ် မၞိဟ်ဂမၠိုၚ် ပြာပ်အာဇရေၚ် ပြဘာဇ်ဂမၠိုၚ်ဂှ်အိုတ်ရ၊ မၞိဟ်ဂမၠိုၚ်ဂှ် သ္ဍိုက်ဆာန် ပ္ဍဲပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) အိုတ်ရ၊ လျုၚ်ဇြုၚ်သ္ဍိုက်အိုတ်ရ၊ ပြဘာဇ်တဳဂမၠိုၚ် မၞုံကဵုကွေတ်မသအာၚ် (နူသာသနာ) ကလိဂွံဗော်သွးအိုတ်ရ၊ တဳလပိုဉ်မဆာဲဂမၠိုၚ်လေဝ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု ယဝ်ဂွံကောံဓရီုအိုတ်မ္ဂး ခိုဟ်သန်ရ’ ရဴဝွံ ကသပ်စိုတ်ဒှ်ရ။
ယွံတဳလမၞုံပိုဉ် အာတ်ပါန်အခေါၚ်ရ၊ တဳလပိုဉ်မဆာဲဂမၠိုၚ်လေဝ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု သြဝ်ကဵုကောံဓရီုအိုတ်ညိ” ရဴဝွံ ဂရၚ်ပတီရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရး တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသေက်သကာ ကဵုမြဟ်မြာရ။ သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး ဒၠိုက်ကတဵုနူဒၞာဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှ်ေသှ်ေရဴဂဴတုဲမ္ဂး ပါဲစ္ဍးအာရ။
ပ္ဍဲအခိၚ်ဂှ် ခမဳဂမၠိုၚ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု ကဵုအခေါၚ် တၞဟ်နကောံဓရီုရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ခမဳဂမၠိုၚ် “တဳလမၞုံပိုဉ်ကျာ်တြဲဂှ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံစွေက်ဂမၠိုၚ်ကီု ကဵုအခေါၚ်တၞဟ်နကောံဓရီုရ” ရဴဝွံ (ပၠုပ်စိုတ်တုဲ) ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု ကောံဓရီုတုဲမ္ဂး ဒၟံၚ်တဴကၞပ်သ္ၚောံသ္ၚိတ်ဇြအိုတ်ရ။ မၞိဟ်ဂမၠိုၚ် တၞဟ်နကလၚ်ပၚ်မှိၚ်ဓရ် ပြာပ်အာဇရေၚ် ခမဳဂမၠိုၚ်ဂှ်အိုတ်ရ၊ မၞိဟ်ဂမၠိုၚ်ဂှ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု ကောံဓရီုတုဲမ္ဂး ညံၚ်ရဴကၠိက်ဠဴဠဴဂမၠိုၚ်ကီု ဒၟံၚ်တဴကၞပ်သ္ၚောံသ္ၚိတ်ဇြအိုတ်ရော”ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်ဂှ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရပ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး—
“ယွံခမဳတအ် ပ္ဍဲတ္ၚဲမရနုက်ကဵုစှ်ပန်ကီု ပ္ဍဲတ္ၚဲမရနုက်ကဵုစှ်သုန်ကီု ပ္ဍဲတ္ၚဲဒ္စာံမံက်ဒ္စာံစွေက်ဂမၠိုၚ်ကီု ကောံဓရီုတုဲမ္ဂး တၞဟ်နတွံဓရ် ကဵုအခေါၚ်ရ”ရဴဝွံ သ္ဂးကဵုခမဳဂမၠိုၚ်ရ။
