၇၄။ ကဵုအခေါၚ်အဝိပ္ပဝါသသိမ်

၁၄၃။ ပ္ဍဲကာလမွဲအခိၚ် တဳလမၞုံပိုဉ်မဟာကဿပ နူဌာန်မၞုံယၟုအန္ဓကဝိန္ဒ သွက်ဂွံသ္ပဥပေါသ် ကၠုၚ်တဴဍုၚ်ရာဇဂြိုဟ််မ္ဂး ပ္ဍဲအကြာဂၠံၚ်တရဴ ဃောတတ်ကၠောံၜဳ ဟဳပါဗက်အာ ဗၞတ်ညိနာၚ်ရ၊ ဟိုတ်ဂှ်ရ သ္ၚာတဳလပိုဉ်မဟာကဿပဂမၠိုၚ် ဍေက်အာဍာ်အိုတ်ရ။ ခမဳဂမၠိုၚ် “ယွံကောန်တၠ မုဟိုတ် သ္ၚာတၠအဲဂမၠိုၚ် ဍေက်ဍာ်အိုတ်ရော?” ရဴဝွံ သၟာန်တဳလပိုဉ်မဟာကဿပအိုတ်ရ။ ယွံကောန်တၠတအ် နူဌာန်မၞုံယၟုအန္ဓကဝိန္ဒ သွက်ဂွံသ္ပဥပေါသ် အဲကၠုၚ်တဴ ဍုၚ်ရာဇဂြိုဟ်မ္ဂး ပ္ဍဲအကြာဂၠံၚ်တရဴ ဃောတတ်ကၠောံၜဳ ဟဳပါဗက်အာ ဗၞတ်ညိနာၚ်ရ၊ ဟိုတ်ဂှ်ရ သ္ၚာအဲဂမၠိုၚ် ဍေက်အာဍာ်အိုတ်ရ ရဴဝွံ (ဟီုသ္ဂးရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သၚ် ဂပ်ဝ်သၟိတ်သိမ် မဒှ်မရာပံၚ်ဖက်တုပ်သၟဟ် သ္ပဥပေါသ် တုပ်သၟဟ်တုဲရ၊ သၚ် သြဝ်သၟိတ်တဴသိမ်ဂှ် ညံၚ်ဂွံဒှ်သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ညိ။

ယွံခမဳတအ် ရဴဝွံ သ္ဒးသၟိတ်ရ၊ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

“ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သၟိတ်တဴ သိမ်မဒှ်အရာ ပံၚ်ဖက်တုပ်သၟဟ် သ္ပဥပေါသ်တုပ်သၟဟ်တုဲရ၊ သၚ် သၟိတ်တဴသိမ်ဂှ် စဵုကဵုမဒှ် ‘အဝိပ္ပဝါသ’ သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသၟိတ်တဴသိမ်ဂှ် စဵုကဵုမဒှ် ‘အဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

သၚ် ဂပ်ဝ်သၟိတ်တဴ သိမ်ဂှ် စဵုကဵုမဒှ် ‘အဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ် မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။

ပ္ဍဲအခိၚ်ဂှ် ခမဳဂမၠိုၚ် “တဳလမၞုံပိုဉ်ကျာ်တြဲဂှ် ကဵုအခေါၚ် ပွမသၟိတ် ‘အဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ရ” ရဴဝွံ စွံပတန်လဝ်သ္ၚာဂမၠိုၚ် ပ္ဍဲကွာန်အိုတ်ရ၊ သ္ၚာဂမၠိုၚ်ဂှ် ကၠေံလေၚ်အိုတ်ရ၊ တူပၟတ်အိုတ်ရ၊ ကၞိဂမၠိုၚ်ကိတ်အိုတ်ရ၊ ခမဳဂမၠိုၚ် မၞုံကဵုယာတ် ဟွံဒးရးအိုတ်ရ၊ မၞုံကဵုဒေက်ခ္ဍေက်အိုတ်ရ။ ခမဳဂမၠိုၚ် “ယွံကောန်တၠတအ် မၞးတအ်ညးဂမၠိုၚ် မုဟိုတ် မၞုံကဵုယာတ်ဟွံဒးရး သ္ၚာဒေက်ခ္ဍေက်အိုတ်ရော?” ရဴဝွံ သၟာန်အိုတ်ရ။ ယွံကောန်တၠတအ် ပိုဲညးဂမၠိုၚ် တဳလမၞုံပိုဉ်ကျာ်တြဲဂှ် “ကဵုအခေါၚ် ပွမသၟိတ် ‘အဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ရ” ရဴဝွံ စွံပတန်လဝ်သ္ၚာဂမၠိုၚ် ပ္ဍဲကွာန်အိုတ်ရ၊ သ္ၚာဂမၠိုၚ်ဂှ် ကၠေံလေၚ်အိုတ်ရ၊ တူပၟတ်အိုတ်ရ၊ ကၞိဂမၠိုၚ်ကိတ်အိုတ်ရ၊ ဟိုတ်ဂှ်ရ ပိုဲညးဂမၠိုၚ် မၞုံကဵုယာတ်ဟွံဒးရး သ္ၚာဒေက်ခ္ဍေက်အိုတ်ရ ရဴဝွံ (ဟီုသ္ဂးအိုတ်ရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် သၚ် ဂပ်ဝ်သၟိတ်သိမ် မဒှ်အရာပံၚ်ဖက်တုပ်သၟဟ် သ္ပဥပေါသ်တုပ်သၟဟ်တုဲရ၊ ပါဲကၠေံကွာန်ကီု ဥပစာကွာန်ကီုတုဲလေဝ် သၚ် သြဝ်သၟိတ်တဴသိမ်ဂှ် ညံၚ်ဂွံဒှ်သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ညိ။

ယွံခမဳတအ် ရဴဝွံ သ္ဒးသၟိတ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ—

၁၄၄။ “ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သၟိတ်တဴ သိမ်မဒှ်အရာပံၚ်ဖက်တုပ်သၟဟ် သ္ပဥပေါသ်တုပ်သၟဟ်တုဲရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ ပါဲကၠေံကွာန်ကီု ဥပစာကွာန်ကီုတုဲ သၚ် သၟိတ်တဴသိမ်ဂှ် စဵုကဵုမဒှ် ‘အဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ရ၊ ဣဝွံတုန် ပွမကဵုတီရ။

ယွံတဳလပိုဉ်တအ် သၚ် သြဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် ဂပ်ဝ်သၟိတ်တဴ သိမ်မဒှ်အရာပံၚ်ဖက်တုပ်သၟဟ် သ္ပဥပေါသ်တုပ်သၟဟ်တုဲရ၊ ပါဲကၠေံကွာန်ကီု ဥပစာကွာန်ကီုတုဲ သၚ် သၟိတ်တဴသိမ်ဂှ် စဵုကဵုမဒှ် ‘အိဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ရ၊ ယြဴကုတဳလပိုဉ်မွဲ သ္ဍိုက်မၠိုက် ပါဲကၠေံကွာန်ကီု ဥပစာကွာန်ကီုတုဲ ပွမသၟိတ်တဴသိမ်ဂှ် စဵုကဵုမဒှ် ‘အဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။

ပါဲကၠေံကွာန်ကီု ဥပစာကွာန်ကီုတုဲ သၚ် ဂပ်ဝ်သၟိတ်တဴသိမ်ဂှ် စဵုကဵုမဒှ် ‘အဝိပ္ပဝါသ’သိမ် စာ်စ္ဍးကေုာံသ္ၚာပိဂတှ်ေတုဲ ပဒတဴမာန်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။