၉။ ပွမကဵုအခေါၚ် သ္ပကဵုထပိုဲခမဳမာန်
၃၄။ ပ္ဍဲအခိၚ်ဂှ် ခမဳဂမၠိုၚ် “တဳလမၞုံပိုဉ်ကျာ်တြဲ ကြက်သ္ပကဵုထပိုဲ ကြက်သ္ပကဵုပယျၚ်ရ” ရဴဝွံ ရၚ်တၠုၚ်ကော်နၚ် အလံၚ်ထပိုဲအလံၚ်ပယျၚ်ဂမၠိုၚ် နူဌာန်တၞဟ်တၞဟ် ဇနပိုဒ်တၞဟ်တၞဟ်ဂမၠိုၚ်အိုတ်ရ။ ပ္ဍဲအရာရၚ်တၠုၚ်ကော်နၚ်သာ်ဂှ် ခမဳဂမၠိုၚ်ကီု အလံၚ်ထပိုဲအလံပယျၚ်ဂမၠိုၚ်ကီု ဍောၚ်ၜိုတ်အိုတ်ရ။
ပ္ဍဲအခိၚ်ဂှ် ပြာပ်အာဌာန်လ္ၚုသ္ၚိတ်ဇြတုဲ ကုတဳလမၞုံပိုဉ်ကျာ်တြဲ မသတၚ်တန်တဴဒၟံၚ်ညးမွဲဓဝ်ဂှ်— “ပ္ဍဲအခိၚ်လၟုဟ် ခမဳဂမၠိုၚ် ‘တဳလမၞုံပိုဉ်ကျာ်တြဲ ကြက်သ္ပကဵုထပိုဲ ကြက်သ္ပကဵုပယျၚ်ရ’ ရဴဝွံ ပ္ဍဲအရာရၚ်တပုၚ်ကော်နၚ် အလံၚ်ထပိုဲအလံၚ်ပယျၚ်ဂမၠိုၚ် နူဌာန်တၞဟ်တၞဟ် ဇနပိုဒ်တၞဟ်တၞဟ်ဂမၠိုၚ်ဂှ် ခမဳဂမၠိုၚ်ကီု အလံၚ်ထပိုဲအလံၚ်ပယျၚ်ဂမၠိုၚ်ကီု ဍောၚ်ၜိုတ်အိုတ်ရ၊ ယွံခမဳတအ် ပ္ဍဲအခိၚ်လၟုဟ် အလဵုဇကုမၞးတအ်ညးဂမၠိုၚ်ဟေၚ် ဩဝ်သ္ပကဵုထပိုဲ ဩဝ်သ္ပကဵုပယျၚ် ပ္ဍဲဌာန်ဂှ်ဂှ် ဇနပိုဒ်ဂှ်ဂှ်ဂမၠိုၚ်အိုတ်ညိ ရဴဝွံ ယဝ်အဲကျာ် သ္ဂောံကဵုအခေါၚ် ကုခမဳဂမၠိုၚ်မ္ဂး ခိုဟ်သန်ရ” ရဴဝွံ ကသပ်ကတဵုဒှ်ကၠုၚ်ရ။
ပ္ဍဲကြဴနူဂှ် တဳလမၞုံပိုဉ်ကျာ်တြဲ ပ္ဍဲအခိၚ်သဝ်တ္ၚဲ ဒၠိုက်ကတဵုနူဌာန်မသတၚ်ဒၟံၚ်ညးမွဲဓဝ်တုဲ ဟိုတ်နူဟိုတ်အရာဝွံ ဟီုတွံဂလာန်ဓရ်တုဲမ္ဂး—
“ယွံခမဳတအ် ပြာပ်အာဌာန်လ္ၚုသ္ၚိတ်ဇြတုဲ ကုအဲကျာ် မသတၚ်တန်တဴဒၟံၚ်ညးမွဲဓဝ်ဂှ် ‘ပ္ဍဲအခိၚ်လၟုဟ် ခမဳဂမၠိုၚ် တဳလမၞုံပိုဉ်ကျာ်တြဲ ကြက်သ္ပကဵုထပိုဲ ကြက်သ္ပကဵုပယျၚ်ရ ရဴဝွံ ပ္ဍဲအရာရၚ်တပုၚ်ကော်နၚ် အလံၚ်ထပိုဲအလံၚ်ပယျၚ်ဂမၠိုၚ် နူဌာန်တၞဟ်တၞဟ် ဇနပိုဒ်တၞဟ်တၞဟ်ဂမၠိုၚ်ဂှ် ခမဳဂမၠိုၚ်ကီု အလံၚ်ထပိုဲအလံၚ်ပယျၚ်ဂမၠိုၚ်ကီု ဍောၚ်ၜိုတ်အိုတ်ရ၊ ယွံခမဳတအ် ပ္ဍဲအခိၚ်လၟုဟ် အလဵုဇကုမၞးတအ်ညးဂမၠိုၚ်ဟေၚ် ဩဝ်သ္ပကဵုထပိုဲ ဩဝ်သ္ပကဵုပယျၚ် ပ္ဍဲဌာန်ဂှ်ဂှ် ဇနပိုဒ်ဂှ်ဂှ်ဂမၠိုၚ်အိုတ်ညိ ရဴဝွံ ယဝ်အဲကျာ် သ္ဂောံကဵုအခေါၚ် ကုခမဳဂမၠိုၚ်မ္ဂး ခိုဟ်သန်ရ’ ရဴဝွံ ကသပ်ကတဵုဒှ်ကၠုၚ်ရ ရဴဝွံ သ္ဂးရ။
‘ယွံခမဳတအ် ပ္ဍဲအခိၚ်လၟုဟ် အလဵုဇကုမၞးတအ်ညးဂမၠိုၚ်ဟေၚ် ဩဝ်သ္ပကဵုထပိုဲ ဩဝ်သ္ပကဵုပယျၚ် ပ္ဍဲဌာန်ဂှ်ဂှ် ဇနပိုဒ်ဂှ်ဂှ်အိုတ်ညိ’ ရဴဝွံ ကဵုအခေါၚ်ရ ရဴဝွံ သ္ဂးကဵုခမဳဂမၠိုၚ်ရ။
ယွံခမဳတအ် ရဴဝွံ သ္ဒးသ္ပကဵုထပိုဲရ၊ သ္ဒးသ္ပကဵုခမဳပယျၚ်ရ၊ ဗွဲကိုပ်ကၠာ ကဵုကးပါဲကၠေံသော်က္ဍိုပ်သော်သၟိပ်တုဲမ္ဂး ကဵုဗိုက်လတက် ယာတ်ဖျောန်ဍာ်လွံက်ဂမၠိုၚ်တုဲ ကဵုလ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး ကဵုလ္ၚောဝ် ဂၠးဇိုၚ်ခမဳဂမၠိုၚ်တုဲ သီုမကဵုဂဇအ်ဒၟံၚ်လံက်ဂဇုန် ကဵုပၚ်ပတိုန်ခၠအ်သၟိပ်တဲတုဲမ္ဂး—
‘ဗုဒ္ဓံ သရဏံ ဂစ္ဆာမိ။ ဓမ္မံ သရဏံ ဂစ္ဆာမိ။ သံဃံ သရာဏံ ဂစ္ဆာမိ။ ဒုတိယမ္ပိ ဗုဒ္ဓံ သရဏံ ဂစ္ဆာမိ။ ဒုတိယမ္ပိ ဓမ္မံ သရဏံ ဂစ္ဆာမိ။ ဒုတိယမ္ပိ သံဃံ သရဏံ ဂစ္ဆာမိ။ တတိယမ္ပိ ဗုဒ္ဓံ သရဏံ ဂစ္ဆာမိ။ တတိယမ္ပိ ဓမ္မံ သရဏံ ဂစ္ဆာမိ။ တတိယမ္ပိ သံဃံ သရဏံ ဂစ္ဆာမိ’ ရဴဝွံ ဩဝ်ဖ္ဍောတ် ရဴဝွံညိ ရဴဝွံ သ္ဒးဟီုရ။ ယွံခမဳတအ် ကဵုအခေါၚ် ဒဒှ်ထပိုဲ ခမဳပယျၚ် နကဵုသရဏဂီုဂမၠိုၚ်ပိဝွံရ” ရဴဝွံ (သ္ဂးရ)။
ပွမကဵုအခေါၚ်ဒဒှ်ထပိုဲခမဳပယျၚ် နကဵုသရဏဂီုဂမၠိုၚ်တုဲရ။
