၈။ ပရူဒေဝတဴမာရ်
၃၂။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ကော်လၟိၚ်တိုန် ခမဳဂမၠိုၚ်ရ—
“ယွံခမဳတအ် အဲကျာ် တိတ်ဗၠးနူပးဒၞက်ကိလေသဂမၠိုၚ်အိုတ်သီု မဒှ်ပ္ဍဲဒေဝတဴမၞိဟ်ဂမၠိုၚ်တုဲရ၊ ယွံခမဳတအ် မၞးတအ်ညးဂမၠိုၚ်လေဝ် တိတ်ဗၠးနူပးဒၞက်ကိလေသဂမၠိုၚ်အိုတ်သီု မဒှ်ပ္ဍဲဒေဝတဴမၞိဟ်ဂမၠိုၚ်တုဲအိုတ်ရ။
ယွံခမဳတအ် တၞဟ်နဂွံဒှ်ဒတုဲမြမောဝ် မၞိဟ်မဂၠိုၚ် တၞဟ်နဒှ်တသိုခ် မၞိဟ်ဂမၠိုၚ် တၞဟ်နသွက်ဂွံမၚ်မွဲအာလောက တၞဟ်နဒှ်ဒတုဲဖဵု ဒတုဲမြမောဝ် ဒှ်တသိုခ်မၞိဟ်ဒေဝတဴဂမၠိုၚ် ဩဝ်ဂေတ်ဂ္ၚေၚ်ဒေသစာရိတ်အိုတ်ညိ၊ နတရဴမွဲဂၠံၚ်ဓဝ် ခမဳၜါဇကု လ္ပအာအိုတ်ညိ။
ယွံခမဳတအ် ဩဝ်တွံတဴ ဓရ်မၞုံကဵုပွမဆာဲတမ် ပွမဆာဲလဒေါဝ် ပွမဆာဲကၞောတ် မဍိုက်ပေၚ်တဴကေုာံအရထ မဍိုၚ်ပေၚ်တဴကေုာံသဒ္ဒါအိုတ်ညိ၊ ဩဝ်စၞောန်ထ္ၜးဒ္ဂေတ်မပြဲ မဍိုက်ပေၚ်အလုံအိုတ်သီု မသအးဇ္ၚးပွဳပွူအိုတ်ညိ။ သတ်ဂမၠိုၚ် မၞုံသဘဴမၠိုက်ကိလေသအောန် ပ္ဍဲမတ်ပညာဂှ် နွံအိုတ်ရ၊ ဟိုတ်ပွမဟဂွံကလၚ် ဓရ်ဂှ်ရ ဒးဟုတ်ယုတ်နူဓရ်အိုတ်ရ၊ ညးတီကေတ်ဓရ် လောဲသွာဂမၠိုၚ် ကြက်နွံအိုတ်ရ၊ ယွံခမဳတအ် အဲကျာ်လေဝ် သွက်ဂွံတွံဓရ် ကြက်ပြာပ်အာ ဥရုဝေလ နိဂီုသေနရ” ရဴဝွံ (သ္ဂးရ)။
ပ္ဍဲအခိၚ်ဂှ် ဒေဝတဴမာရ် မယုတ်မာ ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ ဖ္ဍောတ်တိုန်ကဵု တဳလမၞုံပိုဉ်ကျာ်တြဲ နကဵုဂါထာရ—
“ယြဴပးဒၞက်ဂမၠိုၚ် မဒှ်ပ္ဍဲဒေဝတဴကီု ယြဴပးဒၞက်ဂမၠိုၚ် မဒှ်ပ္ဍဲမၞိဟ်ကီု နွံအိုတ်ရ၊ နကဵုပဒၞက်ဂမၠိုၚ်ဂှ် ဂပ်ဝ်ဗန်ဒက်တၠအဲရ၊ ဂပ်ဝ်ဗန်ဒက်လဝ် နကဵုအဗန်ဒက်မဇၞော်ရ၊ ယွံခမဳ တၠအဲ ဗၠးတိတ်နူတွဵုရးဍုၚ်အဲ ဟွံမာန်ရ” ရဴဝွံ (ဖ္ဍောတ်တိုန်ရ)။
ဟာဲ ဒေဝတဴမာရ်အယုတ် ယြဴပးဒၞက်ဂမၠိုၚ် မဒှ်ပ္ဍဲဒေဝတဴကီု ယြဴပးဒၞက်ဂမၠိုၚ် မဒှ်ပ္ဍဲမၞိဟ်ကီု နွံအိုတ်ရ၊ အဲကျာ် တိတ်ဗၠးနူပးဒၞက် (ကိလေသ) အိုတ်သီုတုဲရ၊ အြကျာ် တိတ်ဗၠးနူအဗန်ဒက်မဇၞော်တုဲရ၊ ဟာဲ ဒေဝတဴမာရ်အယုတ် တၠအဲတုန် ကျအာတုဲရ ရဴဝွံ (သ္ဂးရ)။
“ယြဴပးဒၞက် (တဏှာ) မစိုတ်သကီုကေုာံစိုတ်မွဲ ညးအာဒၟံၚ်ပ္ဍဲလတူအကးလေဝ် ဗန်ဒက်တုဲ ဂေတ်ဂ္ၚေၚ်အာကၠုၚ်မာန်ရ၊ နကဵုပးဒၞက် (တဏှာ) ဂှ် ကြက်ပျဲပျာရာန်သကိုတ် တၠအဲခမဳရ၊ ယွံခမဳ တၠအဲ တိတ်ဗၠးနူတွဵုရးအြ ဟွံမာန်ရ” ရဴဝွံ (ဖ္ဍောတ်တိုန်ပၠန်ရ)။
ယြဴရူပါရီုရုပ်သာ်ဂမၠိုၚ်ကီု သဒ္ဒါရီုဗရုရမျာၚ်ဂမၠိုၚ်ကီု ဂန္ဓာရီုသၟူအမြာဲဂမၠိုၚ်ကီု ရသာရီုရှ်သာ်ဂမၠိုၚ်ကီု ဖောဋ္ဌဗ္ဗာရီုတၟတဒွံဂမၠိုၚ်ကီု မလေပ်မိပ်လဟိၚ်ကဵုစိုတ်မွဲ နွံအိုတ်ရ၊ ပ္ဍဲအာရီုဂမၠိုၚ် မသုန်ပြကာဝွံ ပၟိက်ဆန္ဒအဲ စာ်စ္ဍးအာရ၊ ဟာဲ ဒေဝတဴမာရ်အယုတ် တၠအဲတုန် ကျအာတုဲရ” ရဴဝွံ (သ္ဂးတိုန်ရ)။
၃၃။ ပ္ဍဲအခိၚ်ဂှ် ဒေဝတဴမာရ် မယုတ်မာဂှ် “တဳလမၞုံပိုဉ်ကျာ်တြဲ တီဒၟံၚ်အဲရ၊ ကျာ်တြဲမလေပ်ဟီုသ္ဂးတဴဂလာန်ခိုဟ်ဆာဲ တီဒၟံၚ်အဲရ” ရဴဝွံ မၞုံကဵုပွမဒှ်ဒဒိုခ် ပွမဟွံမိပ်စိုတ်ဂှ်ဒှ်တုဲ ပ္ဍဲဌာန်ဂှ်ဟေၚ် ကၠေံဗ္ဒန်အာရ။
ပရူဒေဝတဴမာရ်တုဲရ။
