၇.၃။ ပရူပရာသကအ်ရဲယသမသုန်စှော်တၠ သ္ပခမဳ
၃၁။ ဗွဲအစေန်အဆက် ဒှ်ကောန်ဂကူဂမၠိုၚ်တုဲ ကောန်ညးဇနပိုဒ်ဂမၠိုၚ်မသုန်စှော်တၠ မဒှ်သကအ်ရဲဃောဒှ်ခရှ် တဳလပိုဉ်ယသဂှ် “ကောန်ဂကူယသ ကးပါဲကၠေံ သော်က္ဍိုပ်သော်သၟိပ်တုဲ သၠောံလတက်ကေတ် ယာတ်ဖျောန်ဍာ်လွံက်ဂမၠိုၚ်တုဲမ္ဂး နူအဝေါၚ်ခရှ် လုပ်စိုပ်သ္ပခမဳ အဝေါၚ်ခမဳရဂး” ရဴဝွံ သ္ဂောံမိၚ်ကေတ်အိုတ်တုဲ—
“ယြဴပ္ဍဲဓမ္မဝိနယမွဲ ကောန်ဂကူယသ ကးပါဲကၠေံ သော်က္ဍိုပ်သော်သၟိပ်တုဲ သၠောံလတက်ကေတ် ယာတ်ဖျောန်ဍာ်လွံက်ဂမၠိုၚ်တုဲမ္ဂး နူအဝေါၚ်ခရှ် လုပ်စိုပ်အဝေါၚ်ခမဳရ၊ ဓမ္မဝိနယ (ကောန်ဂကူယသ မလုပ်စိုပ်) ဂှ် ဟွံယုတ်သဝ်ရ၊ ဒဒှ်ခမဳဂှ်လေဝ် ဟွံယုတ်သဝ်ရ” ရဴဝွံကသပ်ဒှ်ကုသကအ်ရဲဂမၠိုၚ်မသုန်စှော်တၠဂှ်ရ။
သကအ်ရဲဂမၠိုၚ်မသုန်စှော်တၠဂှ် ပြာပ်အာဇရေၚ် တဳလပိုဉ်ယသအိုတ်တုဲမ္ဂး လ္ၚောဝ်သ္ပဝတ် တဳလပိုဉ်ယသတုဲ တန်တဴဒၟံၚ် ပ္ဍဲဒၞါဲမွဲအိုတ်ရ။ ပ္ဍဲအခိၚ်ဂှ် တဳလပိုဉ်ယသ ကော်ကေတ်သကအ်ရဲဃောဒှ်ခရှ်ဂမၠိုၚ်မသုန်စှော်တၠဂှ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ် ပ္ဍဲဒၞါဲမွဲရ။ တဳလပိုဉ်ယသ မဂဇအ်ဒၟံၚ် ပ္ဍဲဒၞါဲမွဲဂှ် “ယွံတဳလမၞုံပိုဉ် ညးဂမၠိုၚ်ဝွံ ဗွဲအစေန်အဆက် ဒှ်ကောန်ဂကူဂမၠိုၚ်တုဲ ဒှ်ကောန်ညးဇနပိုဒ်ဂမၠိုၚ်မသုန်စှော်တၠ မဒှ်သကအ်ရဲဃောဒှ်ခရှ် အဲဍိက်အိုတ်ရ၊ တဳလမၞုံပိုဉ်ကျာ်တြဲ ဩဝ်ဒၠောံဗတောန်ဝေတ်စၞောန်ထ္ၜး သကအ်ရဲဂမၠိုၚ်မသုန်စှော်တၠဝွံညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကုညးဂမၠိုၚ်ဂှ်ရ၊ ဂလာန်ဓရ်ဂှ် ညးဍေံဂှ်ရော? ဂလာန်မစပ်ကဵုဒါနကီု ဂလာန်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီု ပွမကၠိခ္ဍက်ကာမဂုဏ်ဂမၠိုၚ်ကီု ဖဵုပ္ဍဲပွမတိတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။
တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ ‘နဳဝရဏ’ ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲညးဂမၠိုၚ်ဂှ် ထ္ၜးကဵု ‘ဒုက္ခသစ္စ’ ဒဒိုခ်ကီု ‘သမုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ်ပၠိုတ်ကီု ‘မဂ္ဂသစ္စ’ ဂၠံၚ်တရဴဒှ်ဟိုတ်အာစိုပ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကံသိက’ မတီညာတ် ဓမံက်ပတိတ်အလဵုဇကုကျာ်ဂမၠိုၚ်ရ။
ယာတ်ဗုသအး မစာ်စ္ဍးနူကမၠိကၠိခ္ဍက်ဂှ် သၟဟ်ညံၚ်ရဴဒုၚ်ဂိုၚ်ကေတ်ဍာ်လွံက် ဗွဲမ္ဒးရးကီု တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ်ကုညးဂမၠိုၚ်ဂှ်ရ။
ညးဂမၠိုၚ်ပန်တၠဂှ် ညာတ်ကေတ်ဓရ်တုဲဂမၠိုၚ်ဒှ်တုဲ အာစိုပ်ဓရ်တုဲဂှ်ဒှ်တုဲ တီကေတ်ဓရ်တုဲဂမၠိုၚ်ဒှ်တုဲ တၞီလုပ်အာဓရ်တုဲဂမၠိုၚ်ဒှ်တုဲ ကလိလောန်အာသၠေဟ်ပၟာတုဲဂမၠိုၚ်ဒှ်တုဲ စာ်စ္ဍးနူချပ်သၠေဟ်ပၟာ သာ်တေံဟာ, သာ်ဏအ်ဟာတုဲဂမၠိုၚ်ဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂမၠိုၚ်ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂမၠိုၚ်ဒှ်တုဲ “ယွံတဳလမၞုံပိုဉ် ပိုဲဍိက်တအ်ညးဂမၠိုၚ် မိက်ကလိဂွံဒဒှ်ထပိုဲ ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ၊ မိက်ကလိဂွံဒဒှ်ခမဳပယျၚ်အိုတ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
“ယွံခမဳတအ် ဩဝ်ကၠုၚ်အိုတ်ညိ၊ ဂပ်ဝ်တွံလဝ်ဓရ် ဗွဲမ္ဒးရးတုဲရ၊ တၞဟ်နသ္ပကၠေံလအိတ်ဒဒိုခ်ဝဋ် ဩဝ်ဒ္ဂေတ်လ္ၚတ် ဒ္ဂေတ်မပြဲ ဗွဲမ္ဒးရးအိုတ်ညိ” ရဴဝွံ တဳလမၞုံပိုဉ်ကျာ်တြဲ သ္ဂးရ။ ဂလာန်ဂှ်ဟေၚ် တဳလပိုဉ်ဂမၠိုၚ်ဂှ် ဒှ်အာခမဳပယျၚ်တုဲရောၚ်။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဒၠောံဗတောန်ဝေတ်စၞောန်ထ္ၜး ခမဳဂမၠိုၚ်ဂှ် နကဵုဂလာန်ဓရ်ရ၊ တဳလမၞုံပိုဉ်ကျာ်တြဲ ဂပ်ဝ်ဒၠောံဗတောန်စၞောန်ထ္ၜး နကဵဂလာန်ဓရ်ဂမၠိုၚ်ဒှ်တုဲ စိုတ်ခမဳဂမၠိုၚ်မသုန်စှော်တၠဂှ် ဟွံစောဲလာံ (မမိက်ကဵုမွဲမွဲ) တုဲ တိတ်ဗၠးနူဓရ်အာသဝဂမၠိုၚ်တုဲအိုတ်၇၊ ပ္ဍဲအခိၚ်ဂှ် ပ္ဍဲလောက ဒှ်အာတၠအရှန်ဂမၠိုၚ် တြဴစှော်မွဲတၠအိုတ်ရ။
ပရူပရာသကအ်ရဲယသမသုန်စှော်တၠ သ္ပခမဳတုဲရ။
