ပိဋကတ်ပိ ဘာသာမန် - ၇.၂။ ပရူပရာသကအ်ရဲယသပန်တၠ သ္ပခမဳ

၇.၂။ ပရူပရာသကအ်ရဲယသပန်တၠ သ္ပခမဳ

၂၉။ ပ္ဍဲကြဴနူဂှ် တဳလမၞုံပိုဉ်ကျာ်တြဲ ပ္ဍဲအခိၚ်တူဂယး ဗိုက်ပဠေဝ်သ္ၚာတုဲ သီုမဂိုၚ်ကေတ်ဗဗေၚ်သ္ၚာ က္ညပြာပ်အာသ္ၚိဒကာသေဌဳ မွဲဟာန်ကေုာံတဳလပိုဉ်ယသ မဒှ်ခမဳဗွက်ကြဴတုဲမ္ဂး ဂဇအ်ဒၟံၚ်ပ္ဍဲသၞာမလး ပညပ်လဝ်ရ။

ပ္ဍဲအခိၚ်ဂှ် မိယာဲ ကေုာံသမ္ဘာတြေံတဳလပိုဉ်ယသဂမၠိုၚ် ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲအိုတ်တုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ်ပ္ဍဲဒၞါဲမွဲအိုတ်ရ။ တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကုဗြဴဂမၠိုၚ် မဂဇအ်ဒၟံၚ် ပ္ဍဲဒၞါဲမွဲဂှ်ရ၊ ဂလာန်ဓရ်ဂှ် ညးဍေံဂှ်ရော? ဂလာန်မစပ်ကဵုဒါနကီု ဂလာန်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီု ပွမကၠိခ္ဍက်ကာမဂုဏ်ဂမၠိုၚ်ကီု ဖဵုပ္ဍဲပွမတိတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။

တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ ‘နဳဝရဏ’ ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲဗြဴဂမၠိုၚ်ဂှ် ထ္ၜးကဵု ‘ဒုက္ခသစ္စ’ ဒဒိုခ်ကီု ‘သမုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ်ပၠိုတ်ကီု ‘မဂ္ဂသစ္စ’ ဂၠံၚ်တရဴဒှ်ဟိုတ်အာစိုပ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကံသိက’ မတီညာတ် ဓမံက်ပတိတ်အလဵုဇကုကျာ်ဂမၠိုၚ်ရ။

ယာတ်ဗုသအး မစာ်စ္ဍးနူကမၠိကၠိခ္ဍက်ဂှ် သၟဟ်ညံၚ်ရဴဒုၚ်ဂိုၚ်ကေတ်ဍာ်လွံက် ဗွဲမ္ဒးရးကီု တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ်ကုဗြဴဂမၠိုၚ်ဂှ်ရ။

ဗြဴဂမၠိုၚ်ဂှ် ညာတ်ကေတ်ဓရ်ဂမၠိုၚ်တုဲဒှ်တုဲ အာစိုပ်ဓရ်တုဲဂှ်ဒှ်တုဲ တီကေတ်ဓရ်ဂမၠိုၚ်တုဲဒှ်တုဲ တၞီလုပ်အာဓရ်ဂမၠိုၚ်တုဲဒှ်တုဲ ကလိလောန်အာသၠေဟ်ပၟာဂမၠိုၚ်တုဲဒှ်တုဲ စာ်စ္ဍးနူချပ်သၠေဟ်ပၟာသာ်တေံဟာ, သာ်ဏအ်ဟာဂမၠိုၚ်တုဲဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲဂမၠိုၚ်တုဲဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂမၠိုၚ်တုဲဒှ်တုဲ—

“ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ ။ ပ ။ ယွံတဳလမၞုံပိုဉ် ပိုဲဍိက်တအ်ညးဂမၠိုၚ် ပြာပ်ခသ္ပစ္ၜုဲစ္ၜော်သကအ်ဗ္ဒကဵု တဳလမၞုံပိုဉ်ကျာ်တြဲအိုတ်ရ၊ ဓရ်ဂှ်လေဝ် ပြာပ်ခသ္ပစ္ၜုဲစ္ၜော်သကအ်ဗ္ဒအိုတ်ရ၊ သၚ်ဂှ်လေဝ် ပြာပ်ခသ္ပစ္ၜုဲစ္ၜော်သကအ်ဗ္ဒအိုတ်ရ၊ တဳလမၞုံပိုဉ်ဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု ပိုဲဍိက်တအ်ညးဂမၠိုၚ်ဂှ် ဥပးဗြဴ ပြာပ်ခသ္ပစ္ၜုဲစ္ၜော်သကအ်ဗ္ဒဂမၠိုၚ်ရ ရဴဝွံ ဩဝ်ဂိုၚ်သမ္တီလဝ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။

ဗြဴဂမၠိုၚ်ဂှ်လေဝ် ပ္ဍဲလောကဝွံ ဒှ်ဥပးဗြဴ တေဝါစိကသရဏကီု တန်တဴဂမၠိုၚ် ဗွဲကိုပ်ကၠာအိုတ်ရ။

ပ္ဍဲကြဴနူဂှ် မိမကေုာံသမ္တာတြေံ တဳလပိုဉ်ယသဂမၠိုၚ် အလဵုဇကု ကၠောန်ၜိုတ်ဥပကာတဳလမၞုံပိုဉ်ကျာ်တြဲကီု တဳလပိုဉ်ယသကီု နကဵုစၞအာဟာရဘောဇိုန်မပြဲပြဲ စဵုကဵုတရိုပ်စိုတ် စဵုကဵုဒးဆေဝ်တာပဒေါံကၠေံတုဲမ္ဂး အခိၚ်တဳလမၞုံပိုဉ်ကျာ်တြဲ ပါဲကၠေံ နူဗဗေၚ်တုဲဂှ် ဂဇအ်ဒၟံၚ်ပ္ဍဲဒၞါဲမွဲအိုတ်ရ။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုမိမကေုာံသမ္ဘာတြေံ တဳလပိုဉ်ယသဂမၠိုၚ် တဳညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး ဒၠိုက်ကတဵုနူဒၞါဲ က္ညပါဲစ္ဍးအာရ။

၃၀။ သကအ်ရဲဃောဒှ်ခရှ် တဳလပိုဉ်ယသဂမၠိုၚ်ပန်တၠ မတွံဂးဝိမလ သုဗာဟု ပုဏ္စဇိ ဂဝမ္ပတိ မဒှ်ဂကူသေဌဳတၞောဝ်သေဌဳ ပ္ဍဲဍုၚ်ဗာရာဏသဳဂှ် “ကောန်ဂကူယသ ကးပါဲကၠေံသော်က္ဍိုပ် သော်သၟိပ်တုဲ သၠောံလတက်ကေတ် ယာတ်ဖျောန်ဍာ်လွံက်ဂမၠိုၚ်တုဲမ္ဂး နူအဝေါၚ်ခရှ် လုပ်စိုပ်သ္ပခမဳ အဝေါၚ်ခမဳရဂး” ရဴဝွံ သ္ဂောံမိၚ်ကေတ်အိုတ်တုဲ—

“ယြဴပ္ဍဲဓမ္မဝိနယမွဲ ကောန်ဂကူယသ ကးပါဲကၠေံသော်က္ဍိုပ်သော်သၟိပ်တုဲ သၠောံလတက်ကေတ် ယာတ်ဖျောန်ဍာ်လွံက်ဂမၠိုၚ်တုဲမ္ဂး နူအဝေါၚ်ခရှ် လုပ်စိုပ်အဝေါၚ်ခမဳရ၊ ဓမ္မဝိနယ (ကောန်ဂကူယသ မလုပ်စိုပ်) ဂှ် ဟွံယုတ်သဝ်ရ၊ ဒဒှ်ခမဳဂှ်လေဝ် ဟွံယုတ်သဝ်ရ” ရဴဝွံ ကသပ်ဒှ်ကုသကအ်ရဲဂမၠိုၚ်ပန်တၠဂှ်ရ။

သကအ်ရဲဂမၠိုၚ်ပန်တၠဂှ် ပြာပ်အာဇရေၚ် တဳလပိုဉ်ယသအိုတ်တုဲမ္ဂး လ္ၚောဝ်သ္ပဝတ်တဳလပိုဉ်ယသတုဲ တန်တဴဒၟံၚ် ပ္ဍဲဒၞါဲမွဲအိုတ်ရ။ ပ္ဍဲအခိၚ်ဂှ် တဳလပိုဉ်ယသ ကော်ကေတ် သကအ်ရဲဃောဒှ်ခရှ်ဂမၠိုၚ်ပန်တၠဂှ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံၚ် ပ္ဍဲဒၞါဲမွဲရ။ တဳလပိုဉ်ယသ မဂဇအ်ဒၟံၚ် ပ္ဍဲဒၞါဲမွဲဂှ် “ယွံတဳလမၞုံပိုဉ် ညးဂမၠိုၚ်ပန်တၠ မတွံဂးဝိမလ သုဗဟု ပုဏ္ဏဇိ ဂဝမ္ပတိ မဒှ်ဂကူသေဌဳတၞောဝ်သေဌဳ ပ္ဍဲဍုၚ်ဗာရာဏသဳဝွံ ဒှ်သကအ်ရဲဃောဒှ်ခရှ် အဲဍိက်အိုတ်ရ၊ တဳလမၞုံပိုဉ်ကျာ်တြဲ ဩဝ်ဒၠောံဗတောန်ဝေတ်စၞောန်ထ္ၜး သကအ်ရဲဂမၠိုၚ်ပန်တၠဝွံညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။

တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကုညးဂမၠိုၚ်ဂှ်ရ၊ ဂလာန်ဓရ်ဂှ် ညးဍေံဂှ်ရော? ဂလာန်မစပ်ကဵုဒါနကီု ဂလာန်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီု ပွမကၠိခ္ဍက်ကာမဂုဏ်ဂမၠိုၚ်ကီု ဖဵုပ္ဍဲပွမတိတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။

တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ ‘နဳဝရဏ’ ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲညးဂမၠိုၚ်ဂှ် ထ္ၜးကဵု ‘ဒုက္ခသစ္စ’ ဒဒိုခ်ကီု ‘သမုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ်ပၠိုတ်ကီု ‘မဂ္ဂသစ္စ’ ဂၠံၚ်တရဴဒှ်ဟိုတ်အာစိုပ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကံသိက’ မတီညာတ် ဓမံက်ပတိတ်အလဵုဇကုကျာ်ဂမၠိုၚ်ရ။

ညးဂမၠိုၚ်ပန်တၠဂှ် ညာတ်ကေတ်ဓရ်တုဲဂမၠိုၚ်ဒှ်တုဲ အာစိုပ်ဓရ်တုဲဂှ်ဒှ်တုဲ တီကေတ်ဓရ်တုဲဂမၠိုၚ်ဒှ်တုဲ တၞီလုပ်အာဓရ်တုဲဂမၠိုၚ်ဒှ်တုဲ ကလိလောန်အာသၠေဟ်ပၟာတုဲဂမၠိုၚ်ဒှ်တုဲ စာ်စ္ဍးနူချပ်သၠေဟ်ပၟာ သာ်တေံဟာ, သာ်ဏအ်ဟာတုဲဂမၠိုၚ်ဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂမၠိုၚ်ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂမၠိုၚ်ဒှ်တုဲ “ယွံတဳလမၞုံပိုဉ် ပိုဲဍိက်တအ်ညးဂမၠိုၚ် မိက်ကလိဂွံဒဒှ်ထပိုဲ ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ၊ မိက်ကလိဂွံဒဒှ်ခမဳပယျၚ်အိုတ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။

“ယွံခမဳတအ် ဩဝ်ကၠုၚ်အိုတ်ညိ၊ ဂပ်ဝ်တွံလဝ် ဓရ် ဗွဲမ္ဒးရးတုဲရ၊ တၞဟ်နသ္ပကၠေံလအိတ်ဒဒှ်ဝဋ် ဩဝ်ဒ္ဂေတ်လ္ၚေတ် ဒ္ဂေတ်မပြဲ ဗွဲမ္ဒးရးအိုတ်ညိ” ရဴဝွံ တဳလမၞုံပိုဉ်ကျာ်တြဲသ္ဂးရ။ ဂလာန်ဂှ်ဟေၚ် တဳလပိုဉ်ဂမၠိုၚ်ဂှ် ဒှ်အာခမဳပယျၚ်တုဲရောၚ်။

ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဒၠောံဗတောန်ဝေတ်စၞောန်ထ္ၜး ခမဳဂမၠိုၚ်ဂှ် နကဵုဂလာန်ဓရ်ရ၊ တဳလမၞုံပိုဉ်ကျာ်တြဲ ဂပ်ဝ်ဒၠောံဗတောန်ဝေတ်စၞောန်ထ္ၜး နကဵုဂလာန်ဓရ်ဂမၠိုၚ်ဒှ်တုဲ စိုတ်ခမဳဂမၠိုၚ်ပန်တၠဂှ် ဟွံစောံလာံ (မမိက်ကဵုမွဲမွဲ) တုဲ တိတ်ဗၠးနူဓရ်အာသဝဂမၠိုၚ်တုဲအိုတ်ရ၊ ပ္ဍဲအခိၚ်ဂှ် ပ္ဍဲလောက ဒှ်အာတၠအရှန်စှ်မွဲတၠအိုတ်ရ။

ပရူပရာသကအ်ရဲယသပန်တၠ သ္ပခမဳတုဲရ။