၇.၁။ ပွမသ္ပထပိုဲခမဳဂမၠိုၚ်၊ ပရူပရာကောန်သေဌဳယသသ္ပခမဳ
၂၅။ ပ္ဍဲကာလမွဲအခိၚ် ပ္ဍဲဍုၚ်ဗာရာဏသဳ ကောန်ဂကူမၞုံယၟုယသ မဒှ်ကောန်သေဌဳ မဍိုန်ဍောတ်ၜတ်တကတ် နွံမွဲတၠရ။
ပြာသာဒ်ပဒတဴ အခိၚ်မုဟ်ကျာ်ဂှ်မွဲ၊ ပြာသာဒ်ပဒတဴအခိၚ်က္ညၚ်ဂှ်မွဲ၊ ပြာသာဒ်ပဒတဴအခိၚ်ဗြဲဂှ်မွဲ ရဴဝွံ ပြာသာဒ်ဂမၠိုၚ်ပိတၞၚ် နွံတဴ ကုကောန်ဂကူယသဂှ်အိုတ်ရ။
ကောန်ဂကူယသဂှ် ပ္ဍဲပြာသာဒ် မပဒတဴအခိၚ်ဗြဲ လုကဴပိဂတုဗြဲပန်ဂိတု သီုမဒုၚ်စသိုၚ်ပိုဉ်သမ္ပတ္တိ နကဵုကွိၚ်ကွိုက်ဂမၠိုၚ် မၞိဟ်တြုံဟွံပါ မၞိဟ်ဗြဴဂမၠိုၚ်ဟေၚ် မတိၚ်တိုက်ဂှ် ဟွံစှ်ေထပ်သၟဝ်ပြာသာဒ်ရ။ ကောန်ဂကူယသ မဒုၚ်စသိုၚ်ဒၟံၚ်ပိုဉ်သမ္ပတ္တိ ဗွဲမမဍိုက်ပေၚ်စုမ်ရုပ် နကဵုကာမဂုဏ်ဂမၠိုၚ်မသုန်ပြကာဂှ် ဗွဲပြဟ်ပြဟ်ဟေၚ် အာစိုပ်ပွမတိက်လှိၚ်အာရ။ ဂကောံညးမပရေပရံၚ်လေဝ် အာစိုပ်ပွမတိက်လှိၚ်ရ၊ လုကဴမွဲဗ္တံ (ကၠိုဟ်ဗ္တံ) ဍေန်ဗဂဵုထောံလဝ်ကၠေၚ်သ္ဍဴရ။
ကောန်ဂကူယသဂှ် ဗွဲပြဟ်ပြဟ်ဟေၚ် ၚုဟ်တိုန်တုဲ ညာတ်ဒးအာ ဂကောံညးပရေပရံၚ်ဇကု မတိတ်လှိၚ်ဒၟံၚ် ဗြဴမွဲဂှ် (သီုမကၞေပ်လဝ်) စံၚ်, ထဏ ပ္ဍဲပါၚ်ကၞက် ဗြဴမွဲဂှ်(သီုမကွက်ကၟာဲလဝ်) ဖမိမန်ဒုၚ်, ဓဗိုန်ဓာပ် ပ္ဍဲကအ် ဗြဴမွဲဂ်ှ (သီုမကၞေပ်လဝ်) ဖမ်မဏံၚ် ပ္ဍဲပါၚ်ကၞက် ဗြဴမွဲဂှ်တုန် သီုသော်လာဲတာဲဒေါမ် ဗြဴမွဲဂှ်တုန် သီုဍာ်ပါၚ်ဇွောဝ်တဴ ဗြဴမွဲသအာၚ်ဂမၠိုၚ်တု၃န် သီုကၟုက်ကၟဝ်ဒၟံၚ်အိုတ် သၟဟ်ညံၚ်ရဴသုသာန် မကၠုၚ်စိုပ်တဲကီုတုဲ ညာတ်ကၠုၚ်ဒုဟ်တုဲမ္ဂး စိုတ်ဇအိုတ်ဇရဒှ်ကၠုၚ် ကုကောန်ဂကူယသဂှ်ရ။
ပ္ဍဲအခိၚ်ဂှ် ကောန်ဂကူယသဂှ် “ယွံသကအ်တအ် (မိန်ကိလေသဂမၠိုၚ်မပ္တံတဏှာ) ဂပ်ဝ်ပ္ဍဵုပ္ဍိုက်ကွေံရောၚ်သွံ၊ ယွံသအ်တအ် (မိန်ကိလေသဂမၠိုၚ်မပ္တံတဏှာ) ဂပ်ဝ်ပျဲပျာံရာန်သကိုတ်ကွေံရောၚ်သွံ” ရဴဝွံ ကြီုဂအောတ်မြော်တိုန်ဥဒါန်ရ။
ပ္ဍဲကြဴနူဂှ် ကောန်ဂကူယသ တိုန်ဍိုက်ကေတ်ဒၞပ်ထဝ်ဂမၠိုၚ်တုဲ ပြာပ်အာပါၚ်တြၚ်သ္ၚိရ၊ “ညးမမိက်ကဵုမွဲမွဲ လ္ပကဵုသ္ပအန္တရာယ် နူအဝေါၚ်ခရှ် ပွလုပ်စိုပ်အဝေါၚ်ခမဳ ကုကောန်ဂကူယသညိ” ရဴဝွံ ဒေဝတဴဂမၠိုၚ် ပံက်ကဵုတြၚ်အိုတ်ရ။
ပ္ဍဲအခိၚ်ဂှ် ကောန်ဂကူယသ ပြာပ်အာပါၚ်တြၚ်ဍုၚ်ရ၊ “ညးမမိက်ကဵုမွဲမွဲ လ္ပကဵုသ္ပအန္တရာယ် နူအဝေါၚ်ခရှ် ပွလုပ်စိုတ်အဝေါၚ်ခမဳ ကုကောန်ဂကူယသညိ” ရဴဝွံ ဒေဝတဴဂမၠိုၚ် ပံက်ကဵုတြၚ်အိုတ၂်ရ။ ပ္ဍဲကြဴနူဂှ် ကောန်ဂကူယသ ပြာပ်အာဂြိုပ်မိဂဒါဝိုန် မၞုံယၟုဣသိပတနရ။
၂၆။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်ဖလာၚ်ဂယးပြဟ် ဒၠိုက်ကတဵုပြဟ်ပြဟ်တုဲ က္ညကွာ်ဒၟံၚ်စၚ်္ကြမ် ပ္ဍဲအမှဲဂၠးအကးရ၊ တဳလမၞုံပိုဉ်ကျာ်တြဲ ညာတ်ကေတ် ကောန်ဂကူယသ မကၠုၚ်ဒၟံၚ်နူဇမ္ၚောဲမ္ဂး စှ်ေနူစၚ်္ကြမ်တုဲ ဂဇအ်ဒၟံၚ်ပ္ဍဲသၞာမလးပညပ်လဝ်ရ။
ပ္ဍဲအခိၚ်ဂှ် ကောန်ဂကူယသဂှ် “ယွံသကအ်တအ် (မိကိလေသဂမၠိုၚ်မပ္တံတဏှာ) ဂပ်ဝ်ပ္ဍဵုပ္ဍိုက်ကွေံရောၚ်သွံ၊ ယွံသကအ်တအ် (မိန်ကိလေသဂမၠိုၚ်ပ္တံတဏှာ) ဂပ်ဝ်ပျဲပျာံရာန်သကိုတ်ကွေံရောၚ်သွံ” ရဴဝွံ ကြီုဂအောတ်မြော်ဒၟံၚ်ဥဒါန် ပ္ဍဲဇရေၚ်ဗ္ဒာဲ တဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် “ယွံယသ ဗွဲစၟတ် နိဗ္ဗာန်ဝွံ (မိန်ကိလေသဂမၠိုၚ်ပ္တံတဏှာ) မဟဂပ်ဝ်ပ္ဍဵုပ္ဍိုက်ရ၊ နိဗ္ဗာန်ဝွံ (မိန်ကိလေသဂမၠိုၚ်မပ္တံတဏှာ) မဟဂပ်ဝ်ပျဲပျာံရာန်သကိုတ်ရ၊ ယွံယသ ဩဝ်ကၠုၚ်ညိ၊ ဩဝ်ဂဇအ်ညိ၊ ကြက်တွံကဵုဓရ် ကုတၠအဲရ” ရဴဝွံ တဳလမၞုံပိုဉ်ကျာ်တြဲ သ္ဂးကဵုကောန်ဂကူယသရ။
ပ္ဍဲအခိၚ်ဂှ် ကောန်ဂကူယသဂှ် “နိဗ္ဗာန်ဝွံ (မိန်ကိလေသဂမၠိုၚ်မပ္ဝံတဏှာ) မဟဂပ်ဝ်ပ္ဍဵုပ္ဍိုက်ရဂး၊ နိဗ္ဗာန်ဝွံ (မိန်ကိလေသဂမၠိုၚ်မပ္တံတဏှာ) မဟဂပ်ဝ်ပျဲပျာံရာန်သကိုတ်ရဂး” ရဴဝွံ မြဟ်မြာအိုတ်တၟိုဟ်စိုတ်ဒှ်တုဲ စှ်ေနူဒၞပ်ထဝ်ဂမၠိုၚ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲ ဗွဲမရှ်ေသှ်ေရဴဂဴတုဲ ဂဇအ်ဒၟံၚ် ပ္ဍဲဒၞါဲမွဲရ။
တဳလမၞုံပိုဉ်ကျာ်တြ တွံကဵုဂလာန်ဓရ် မဒှ်အတိုၚ်လၟေၚ် ကုကောန်ဂကူယသ မဂဇအ်ဒၟံၚ်ပ္ဍဲဒၞါဲမွဲဂှ်ရ၊ ဂလာန်ဓရ်ဂှ် ညးဍေံဂှ်ရော? ဂလာန်မစပ်ကဵုဒါနကီု ဂလာန်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမပယုတ်သဝ်ကီု ပွမကၠိခ္ဍက်ကာမဂုဏ်ဂမၠိုၚ်ကီု ဖဵုပ္ဍဲပွမတတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။
တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ ‘နဳဝရဏ’ ကၟာတ်လဒဳု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲကောန်ဂကူယသဂှ် ထ္ၜးကဵု ‘ဒုက္ခသစ္စ’ ဒဒိုခ်ကီု ‘မသုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ်ပၠိုတ်ကီု ‘မဂ္ဂသစ္စ’ ဂၠံၚ်တရဴဒှ်ဟိုတ်အာစိုပ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကံသိက’ မတီညာတ် ဓမံက်ပတိတ်အလဵုဇကုကျာ်ဂမၠိုၚ်ရ။
ယာတ်ဗုသအး မစာ်စ္ဍးနူကမၠိုက်ကၠိခ္ဍက်ဂှ် သၟဟ်ညံၚ်ရဴဒုၚ်ဂိုၚ်ကေတ်ဍာ်လွံက် ဗွဲမ္ဒးရးကီု တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ်ကုကောန်ဂကူယသရ။
၂၇။ ပ္ဍဲအခိုၚ်ဂှ် မိယာဲ ကောန်ဂကူယသဂှ် တိုန်အာလတူပြာသာဒ်မ္ဂး ဟွံညာတ်ကေတ်ကောန်ဂကူယသတုဲ ပြာပ်အာဇရေၚ် သေဌဳတၠသ္ၚိဇၞော်တုဲမ္ဂး “ယွံသေဌဳဇၞော် ဟွံညာတ်ကေတ်ယသ ကောန်ဗၠာဲတၠအဲရ” ရဴဝွံ ဟီုသ္ဂးကဵုသေဌဳတၠသ္ၚိဇၞော်ရ။ ပ္ဍဲအခိၚ်ဂှ် သေဌဳတၠသ္ၚိဇၞော် ဗလးဏာကလုတ်ချေံဂမၠိုၚ် ဌာန်ပန်ဒိုဟ်ဂမၠိုၚ်တုဲ အလဵုဇကုဂှ်တုန် ပြာပ်အာဂြိုပ်မိဂဒါဝိုန် မၞုံယၟုဣသိပတနရ။
သေဌဳတၠသ္ၚိဇၞော် ညာတ်ကေတ် ပၞေတ်ဒၞါဲဖျေဲဒၞပ်ထဝ်ဂမၠိုၚ်တုဲ ဗက်အာအတိုၚ်လၟေၚ်ပၞေတ်ဒၞါဲဖျေံဒၞပ်ဂှ်ဟေၚ်ရ။
တဳလမၞုံပိုဉ်ကျာ်တြဲ သ္ဂောံညာတ်ကေတ် သေဌဳတၠသ္ၚိဇၞော် မကၠုၚ်ဒၟံၚ်နူဇမ္ၚောဲတုဲ “အဲဂွံနိမိတ်ဗဒှ်ဣဒ္ဓိကြဳဇှ် ညံၚ်သေဌဳတၠသ္ၚိဇၞော် မဂဇအ်ဒၟံၚ်ဒၞါဲဝွံ မဟဂွံညာတ်ကေတ် ကောန်ဂကူယသ မဂဇအ်ဒၟံၚ်ပ္ဍဲဒၞါဲဝွံမ္ဂး ခိုဟ်သန်ရ” ရဴဝွံ ချပ်တိုန်တုဲ နိမိတ်ဗဒှ် ပွမိတ်ဗဒှ်ဣဒ္ဓိကြဳဇှ်မဖှ်သာ်ဂှ်ရ။
ပ္ဍဲအခိၚ်ဂှ် သေဌဳတၠသ္ၚိဇၞော် ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး “ယွံတဳလမၞုံပိုဉ် တဳလမၞုံပိုဉ်ကျာ်တြဲ ညာတ်တဴ ကောန်ဂကူယသကီုဟာ” ရဴဝွံ ဂရၚ်တီရ။
ယွံသမ္ၚေဟ် ယဝ်မိက်ဂွံညာတ်မ္ဂး ဩဝ်ဂဇအ်ညိ၊ တၠအဲ မဂဇအ်ဒၟံၚ်ပ္ဍဲဒၞါဲဝွံ သ္ဂောံညာတ်ကေတ် ကောန်ဂကူယသ မဂဇအ်ဒၟံၚ်ပ္ဍဲဒၞါဲဝွံ တန်ဒှ်မာန်ရ ရဴဝွံ (သ္ဂးရ)။
ပ္ဍဲအခိၚ်ဂှ် သေဌဳတၠသ္ၚိဇၞော် “အဲ မဂဇအ်ဒၟံၚ်ပ္ဍဲဒၞါဲဝွံ သ္ဂောံညာတ်ကေတ် ကောန်ဂကူယသ မဂဇအ်ဒၟံၚ်ပ္ဍဲဒၞါဲဝွံရဂး” ရဴဝွံ မြဟ်မြာမၞုံကဵုစိုတ်မတိုန်ဒှ်တုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ် ပ္ဍဲဒၞါဲမွဲရ။ တဳလမၞုံပိုဉ်ကျာ်တြ တွံကဵုဂလာန်ဓရ် မဒှ်အတိုၚ်လၟေၚ်ကုသေဌဳတၠသ္ၚိ မဂဇအ်ဒၟံၚ် ပ္ဍဲဒၞါဲမွဲဂှ်ရ၊ ဂလာန်ဓရ်ဂှ် ညးဍေံဂှ်ရော? ဂလာန်မစပ်ကဵုဒါနကီု ဂလာန်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီု ပွမကၠိခ္ဍက် ကာမဂုဏ်ဂမၠိုၚ်ကီု ဖဵုပ္ဍဲပွမတိတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။
တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ ‘နဳဝရဏ’ ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲသေဌဳတၠသ္ၚိဂှ် ထ္ၜးကဵု ‘ဒုက္ခသစ္စ’ ဒဒိုခ်ကို ‘သမုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ်ပၠိုတ်ကီု ‘မဂ္ဂသစ္စ’ ဂၠံၚ်းတရဴဒှ်ဟိုတ်အာစိုပ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကံသိက’ မတီညာတ် ဓမံၚ်ပတိတ်အလဵုဇကုကျာ်ဂမၠိုၚ်ရ။
ယာတ်ဗုသအး မစာ်စ္ဍးနူကမၠိကၠိခ္ဍက်ဂှ် သၟဟ်ညံၚ်ရဴဒုၚ်ဂိုၚ်ကေတ်ဍာ်လွံက် ဗွဲမ္ဒးရးကီု တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴပွမကတဵုဒှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ်ကုသေဌဳတၠသ္ၚိရ။
ပ္ဍဲကြဴနူဂှ် သေဌဳတၠသ္ၚိဇၞော် ညာတ်ကေတ်ဓရ်တုဲဂှ်ဒှ်တုဲ အာစိုပ်ဓရ်တုဲဂှ်ဒှ်တုဲ တီကေတ်ဓရ်တုဲဂှ်ဒှ်တုဲ တၞီလုပ်အာဓရ်တုဲဂှ်ဒှ်တုဲ ကလိလောန်အာသၠေဟ်ပၟာတုဲဂှ်ဒှ်တုဲ စာ်စ္ဍးနူချပ်သၠေဟ်ပၟာသာ်တေံဟာ, သာ်ဏအ်ဟာတုဲဂှ်ဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂှ်ဒှ်တုဲ ဟွံမွဲကဵုညးလျုၚ်ပတှ်ေ မသအာၚ်နူကျာ်ဂှ်ဒှ်တုဲ—
“ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ယွံတဳလမၞုံပိုဉ် (ဓရ်ဂှ်) ထေက်ကဵုသ္ဍိုက်မၠိုက်လောန်ရ၊ ဗွဲဥပမာမ္ဂးတုန် ဝတ္ထုဗကပ်စွံလဝ်ဂှ် သၟဟ်ညံၚ်ရဴဂတးလ္ၚာကဵုကီု ဝတ္ထုဂြောပ်ဗ္ဒန်လဝ်ဂှ် သၟဟ်ညံၚ်ရဴပံက်ထ္ၜးကဵုကီု ကုညးမတ်ဂေတ်တၠိၚ်ဂၠံၚ်ဂှ် သၟဟ်ညံၚ်ရဴဟီုလဴကဵုဂၠံၚ်ဍာန်ဍာံစၟတ်ကီု “ညးမၞုံကဵုမတ်မညာတ်ဂမၠိုၚ်ဂှ် ကြက်ဂွံညာတ်ကေတ် ရုပ်သာ်ဂမၠိုၚ်အိုတ်ရ” ရဴဝွံ ပ္ဍဲတိုၚ်ဒမၠုဂှ် သၟဟ်ညံၚ်ရဴစံၚ်ဗဂဵုက၆ု ပၟတ်ကၠေၚ်သ္ဍဴကီု တုပ်သၟဟ်သာ်ဂှ်ဟေၚ်ရ တဳလမၞုံပိုဉ် နကဵုဟိုတ်တၞဟ်တၞဟ် တွံထ္ၜးကဵုဓရ်ရ၊ ယွံတဳလမၞုံပိုဉ် အဲဍိက်ဂှ် ပြာပ်ခသ္ပစ္ၜုဲစ္ၜော်သကအ်ဗ္ဒကဵု တဳလမၞုံပိုဉ်ကျာ်တြဲရ၊ ဓရ်ဂှ်လေဝ် ပြာပ်ခသ္ပစ္ၜုဲစ္ၜော်သ္ကအ်ဗ္ဒရ၊ သၚ်ဂှ်လေဝ် ပြာပ်ခသ္ပစ္ၜုဲစ္ၜော်သ္ကအ်ဗ္ဒရ၊ တဳလမၞုံပိုဉ်ဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု အဲဍိက်ဂှ် ဥပးပြာပ်ခသ္ပစ္ၜုဲစ္ၜော်သကအ်ဗ္ဒ ရဴဝွဴ ဩဝ်ဂိုၚ်သမ္တီလဝ်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
သေဌဳဇၞော်ဂှ် ပ္ဍဲလောဝွံ ဒှ်ဥပး တေဝါစိကသရဏဂီု တန်တဴ ဗွဲကိုပ်ကၠာအိုတ်ရ။
၂၈။ ပ္ဍဲကြဴနူဂှ် ဃောတွံဒၟံၚ်ဓရ်ကဵုအပါအံက်ဂှ် စိုတ်ကောန်ဂကူယသ မဗ္စာရဏာတဴဓရ်သစ္စပန်ပန်ပြကာ မဒှ်အတိုၚ်မဂပ်ဝ်ညာတ်လဝ်တုဲ အတိုၚ်မဂပ်ဝ်တီလဝ်တုဲဂှ် ဟွံစောဲလာံ (မမိက်ကဵုမွဲမွဲ) တုဲ တိတ်ဗၠးနူဓရ်အာသဝဂမၠိုၚ်ရ။
ပ္ဍဲအခိၚ်ဂှ် “ဃောတွံဒၟံၚ်ဓရ်ကဵုအပါအံၚ်ဂှ် စိုတ်ကောန်ဂကူယသ မဗ္စာရဏာတဴဓရ်သစ္စပန်ပြကာ မဒှ်အတိုၚ်မဂပ်ဝ်ညာတ်လဝ်တုဲ အတိုၚ်မဂပ်ဝ်တီလဝ်တုဲဂှ် ဟွံစောဲလာံ (မမိက်ကဵုမွဲမွဲ) တုဲ တိတ်ဗၠးနူဓရ်အာသဝဂမၠိုၚ်တုဲရ၊ ကောန်ဂကူယသဂှ် တိတ်အာခရှ်တုဲ ညံၚ်ရဴအခိၚ်မပဒတဴ ပ္ဍဲအဝေါၚ်ခရှ်ကိုပ်ကၠာတေံကီု ဟွံထေက်ကဵုတၞဟ်နဒုၚ်စသိုၚ် ကာမဂုဏ်ဂမၠိုၚ်ရ၊ အဲ သ္ဂောံကဵုလလမ် (သိမ်ရုပ်) ကၠေံ ပွမနိမိတ်ဗဒှ်ဣဒ္ဓိကြဳဇှ်မ္ဂး ခိုဟ်သန်ရ” ရဴဝွံ ကသပ်ဒှ်ကုတဳလမၞုံပိုဉ်ကျာ်တြဲရ။
ပ္ဍဲကြဴနူချပ်ရဴသာ်ဝွံတုဲဂှ် တဳလမၞုံပိုဉ်ကျာ်တြဲ ကဵုလလမ်ကၠေံ ပွမနိမိတ်ဗဒှ်ဣဒ္ဓိကြဳဇှ်ဂှ်ရ။
သေဌဳတၠသ္ၚိဇၞော် ညတာ်ကေတ် ကောန်ဂကူယသ မဂဇအ်ဒၟံၚ်ဂှ်တုဲ “ယွံကောန်သ္ဍိုက်ယသ မိယာဲတၠအဲ အာစိုပ်ပွမလရိုအ်ယာံ ပွမဒှ်ဓဝိၚ်စံၚ်တူရ၊ ဩဝ်ကဵုလမျီု ကုမိယာဲတၠအဲညိ” ရဴဝွံ ဟီုသ္ဂးကဵုကောန်ဂကူယသရ။
ပ္ဍဲအခိၚ်ဂှ် ကောန်ဂကူယသ လ္ၚာ်ကျောဝ်ရံၚ် တဳလမၞုံပိုဉ်ကျာ်တြဲရ။
“ယွံသမ္ၚေဟ် အရာဂှ် ပသာ်သမ္တီထေၚ်ရော? ညံၚ်ရဴတၠအဲညာတ်ကီု ယြဴကုညးမွဲ ဂပ်ဝ်ညာတ်တဴ ဂပ်ဝ်တီတဴ ဓရ်သစ္စပန်ပြကာ နကဵုသေက္ခဉာဏ် သေက္ခလညာတ်ဉာဏ်တုဲရ၊ ကုညးဂှ် စိုတ်မဗ္စာရဏာတဴ ဓရ်သစ္စပန်ပြကာ မဒှ်အတိုၚ်မဂပ်ဝ်ညာတ်လဝ်တုဲ အတိုၚ်မဂပ်ဝ်တီလဝ်တုဲဂှ် ဟွံစောဲလာံ (မမိက်ကဵုမွဲမွဲ) တုဲ တိတ်ဗၠးနူဓရ်အာသဝဂမၠိုၚ်တုဲရ၊ ယွံသမ္ၚေဟ် ညးဂှ်တိတ်အာခရှ်တုဲ ညံၚ်ရဴအခိၚ်မပဒတဴ ပ္ဍဲအဝေါၚ်ခရှ်ကိုပ်ကၠာတေံကီု ထေက်ကဵုတၞဟ်နဒုၚ်စသိုၚ်ကာမဂုဏ်ဂမၠိုၚ်ဟာ” ရဴဝွံ တဳလမၞုံပိုဉ်ကျာ်တြဲ သၟာန်တဴ သေဌဳတၠသ္ၚိဇၞော်ရ။
ဟွံထေက်ရ ယွံတဳလမၞုံပိုဉ် ရဴဝွံ (ဂရၚ်ပတီရ)။
ယွံသမ္ၚေဟ် ညံၚ်ရဴတၠအဲညာတ်ကီု ကောန်ဂကူယသဂှ် ဂပ်ဝ်ညာတ်တဴ ဂပ်ဝ်တီတဴဓရ်သစ္စပန်ပြကာ နကဵုသေက္ခဉာဏ် သေက္ခလညာတ်ဉာဏ်တုဲရ၊ ကုယသဂှ် စိုတ်မဗ္စာရဏာတဴ ဓရ်သစ္စပန်ပြကာ မဒှ်အတိုၚ်မဂပ်ဝ်ညာတ်လဝ်တုဲ အတိုၚ်မဂပ်ဝ်တီကေတ်လဝ်တုဲဂှ် ဟွံစောဲလာံ (မမိက်ကဵုမွဲမွဲ) တုဲ တိတ်ဗၠးနူဓရ်အာသဝဂမၠိုၚ်တုဲရ၊ ယွံသမ္ၚေဟ် ကောန်ဂကူယသဂှ် တိတ်အာခရှ်တုဲ ညံၚ်ရဴအခိၚ်မပဒတဴ ပ္ဍဲအဝေါၚ်ခရှ်ကိုပ်ကၠေတေံကီု ဟွံထေက်ကဵုတၞဟ်နဒုၚ်စသိုၚ် ကာမဂုဏ်ဂမၠိုၚ်ရ ရဴဝွံ (သ္ဂးရ)။
ယွံတဳလမၞုံပိုဉ် သွက်တ္ၚဲဏအ် တဳလမၞုံပိုဉ်ကျာ်တြဲ မွဲဟာန်ကေုာံကောန်ဂကူယသ မဒှ်ခမဳဗွက်ကြဴ ဩဝ်ဒုၚ်တဲ ပိဏ္ဍပါတ်အဲဍိက်ညိကျာ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ နမဒၟံၚ်သ္ၚိတ်သ္ၚိတ်ဂှ် ဒုၚ်တဲရ။ ပ္ဍဲအခိၚ်ဂှ် သေဌဳတၠသ္ၚိဇၞော် တီကေတ် တဳလမၞုံပိုဉ်ကျာ်တြဲဒုၚ်တဲတုဲ ဒၠိုက်ကတဵုနူဒၞါဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှ်ေသှ်ေရဴဂဴတုဲမ္ဂး ပါဲစ္ဍးအာရ။ ပ္ဍဲအခိၚ်ဂှ် ကောန်ဂကူယသဂှ် သေဌဳတၠသ္ၚိဇၞော် ပါဲစ္ဍးတိတ်အာတုဲ ဟွံသက်ဂတာပ်လအ် “ယွံတဳလမၞုံပိုဉ် အဲဍိက် မိက်ကလိဂွံဒဒှ်ထပိုဲ ပ္ဍဲဇရေၚ်တဳလမၞုံပိုဉ်ကျာ်တြဲရ၊ မိက်ကလိဂွံဒဒှ်ခမဳပယျၚ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
“ယွံခမဳ ဩဝ်ကၠုၚ်ညိ၊ ဂပ်ဝ်တွံလဝ် ဓရ် ဗွဲမ္ဒးရးတုဲရ၊ တၞဟ်နသ္ပကၠေဴလအိတ်ဒဒိုခ်ဝဋ် ဩဝ်ဒ္ဂေတ်လ္ၚတ် ဒ္ဂေတ်မပြဲ ဗွဲမ္ဒးရးညိ” ရဴဝွံ တဳလမၞုံပိုဉ်ကျာ်တြဲ သ္ဂးရ။ ဂလာန်ဂှ်ဟေၚ် တဳလပိုဉ်ယသဂှ် ဒှ်အာခမဳပယျၚ်တုဲရောၚ်။ ပ္ဍဲအခိၚ်ဂှ် ပ္ဍဲလောက ဒှ်အာတၠအရှန်ဂမၠိုၚ်ထပှ်တၠအိုတ်ရ။
ပရူပရာကေနာ်သေဌဳယသ သ္ပခမဳတုဲရ။
