၆.၄။ သုတ်အနတ္တလက္ခဏ
၂၀။ ပ္ဍဲကြဴနူဂှ် တဳလမၞုံပိုဉ်ကျာ်တြဲ ကော်လၟိၚ်တိုန် ခမဳပဉ္စဝဝ်ဂမၠိုၚ်ရ— ယွံခမဳတအ် ရုပ်ဂှ် အဝ်တဟွံသေၚ်ရ၊ ယွံခမဳတအ် ရုပ်ဂှ် ဒှ်အတ္တမ္ဂး၊ ရုပ်ဝွံ တၞဟ်နပွမဂိသကဝ်ရ၊ “ရုပ်အဲဂှ် ဩဝ်ကဵုဒှ်ရဴဝွံညိ၊ ရုပ်အဲဂှ် လ္ပကဵုဒှ်ရဴဝွံညိ” ရဴဝွံလေဝ် ကလိဂွံ (ပွမစဳရေၚ်) ပ္ဍဲရုပ်မာန်ရ၊ ယွံခမဳတအ် ရုပ်ဂှ် ဟိုတ်မဟွံသေၚ်ကဵုအတ္တဂှ်ရ ဒှ်တဴ တၞဟ်နပွမဂိသကဝ်ရ၊ “ရုပ်အဲဂှ် ဩဝ်ကဵုဒှ်ရဴဝွံညိ၊ ရုပ်အဲဂှ် လ္ပကဵုဒှ်ရဴဝွံညိ” ရဴဝွံလေဝ် ဟဂပ်ဝ်ကလိဂွံ (ပွမစဳရေၚ်) ပ္ဍဲရုပ်ရ။
ဝေဒနာဂှ် အတ္တဟွံသေၚ်ရ၊ ယွံခမဳတအ် ဝေဒနာဂှ် ဒှ်အတ္တမ္ဂး၊ ဝေဒနာဝွံ ဟွံဒှ် တၞဟ်နပွမဂိကဝ်ရ၊ “ဝေဒနာအဲဂှ် ဩဝ်ကဵုဒှ်ရဴဝွံညိ၊ ဝေဒနာအဲဂှ် လ္ပကဵဒှ်ရဴဝွံညိ” ရဴဝွံလေဝ် ကလိဂွံ (ပွမစဳရေၚ်) ပ္ဍဲဝေဒနာမာန်ရ၊ ယွံခမဳတအ် ဝေဒနာဂှ် ဟိုတ်မဟွံသေၚ်ကဵုအတ္တဂှ်ရ ဒှ်တဴ တၞဟ်နပွမဂိသကဝ်ရ၊ “ဝေဒနာအဲဂှ် ဩဝ်ကဵုဒှ်ရဴဝွံညိ၊ ဝေဒနာအဲဂှ် လ္ပကဵုဒှ်ရဴဝွံညိ” ရဴဝွံလေဝ် ဟဂပ်ဝ်ကလိဂွံ (ပွမစဳရေၚ်) ပ္ဍဲဝေဒနာရ။
သညာဂှ် အတ္တဟွံသေၚ်ရ၊ ယွံခမဳတအ် သညာဂှ် ဒှ်အတ္တမ္ဂး၊ သညာဝွံ တၞဟ်နပွမဂိသကဝ်ရ၊ “သညာအဲဂှ် ဩဝ်ကဵုဒှ်ရဴဝွံညိ၊ သညာအဲဂှ် လ္ပကဵုဒှ်ရဴဝွံညိ” ရဴဝွံလေဝ် ကလိဂွံ (ပွမစဳရေၚ်) ပ္ဍဲသညာမာန်ရ၊ ယွံခမဳတအ် သညာဂှ် ဟိုတ်မဟွံသေၚ်ကဵုအတ္တဂှ်ရ ဒှ်တဴတၞဟ်နပွမဂိသကဝ်ရ၊ “သညာအဲဂှ် ဩဝ်ကဵုဒှ်ရဴဝွံညိ၊ သညာအဲဂှ် လ္ပကဵုဒှ်ရဴဝွံညိ” ရဴဝွံလေဝ် ဟဂပ်ဝ်ကလိဂွံ (ပွမစဳရေၚ်) ပ္ဍဲသညာရ။
သၚ်္ခါရဂမၠိုၚ်ဂှ် အတ္တဟွံသေၚ်အိုတ်ရ၊ ယွံခမဳတအ် သၚ်္ခါရဂမၠိုၚ်ဂှ် ဒှ်အတ္တအိုတ်မ္ဂး၊ သၚ်္ခါရဂမၠိုၚ်ဝွံ ဟွံဒှ် တၞဟ်နပွမဂိသကဝ်အိုတ်ရ၊ “သၚ်္ခါရဂမၠိုၚ် အဲဂှ် ဩဝ်ကဵုဒှ်ရဴဝွံအိုတ်ညိ၊ သၚ်္ခါရဂမၠိုၚ်အဲဂှ် လ္ပကဵုဒှ်ရဴဝွံအိုတ်ညိ” ရဴဝွံလေဝ် ကလိဂွံ (ပွမစဳရေၚ်) ပ္ဍဲသၚ်္ခါရဂမၠိုၚ်မာန်ရ၊ ယွံခမဳတအ် သၚ်္ခဂေမၠိုၚ်ဂှ် ဟိုတ်မဟွံသေၚ်ကဵုအတ္တဂှ်ရ ဒှ်တဴ တၞဟ်နပွမဂိသကဝ်ရ၊ “သၚ်္ခါရဂမၠိုၚ်အဲဂှ် ဩဝ်ကဵုဒှ်ရဴဝွံညိ၊ သၚ်္ခါရဂမၠိုၚ်အဲဂှ် လ္ပကဵုဒှ်ရဴဝွံအိုတ်ညိ” ရဴဝွံလေဝ် ဟဂပ်ဝ်ကလိဂွံ (ပွမစဳရေၚ်) ပ္ဍဲသၚ်္ခါရဂမၠိုၚ်ရ။
ဝိညာဏ်ဂှ် အတ္တဟွံသေၚ်ရ၊ ယွံခမဳတအ် ဝိညာဏ်ဂှ် ဒှ်အတ္တမ္ဂး၊ ဝိညာဏ်ဝွံ ဟွံဒှ်တၞဟ်နပွမဂိသကဝ်ရ၊ “ဝိညာဏ်အဲဂှ် ဩဝ်ကဵဒှ်ရဴဝွံညိ၊ ဝိညာဏ်အဒဂှ် လ္ပကဵုဒှ်ရဴဝွံညိ” ရဴဝွံလေဝ် ကလိဂွံ (ပွမစဳရေၚ်) ပ္ဍဲဝိညာဏ်မာန်ရ၊ ယွံခမဳတအ် ဝိညာဏ်ဂှ် ဟိုတ်မဟွံသေၚ်ကဵုအတ္တဂှ်ရ ဒှ်တဴ တၞဟ်နပွမဂိသကဝ်ရ၊ “ဝိညာဏ်အဲဂှ် ဩဝ်ကဵုဒှ်ရဴဝွံညိ၊ ဝိညာဏ်အဲဂှ် လ္ပကဵုဒှ်ရဴဝွံညိ” ရဴဝွံလေဝ် ဟဂပ်ဝ်ကလိဂွံ (ပွမစဳရေၚ်) ပ္ဍဲဝိညာဏ်ရ။
၂၁။ ယွံခမဳတအ် အရာဂှ် ပသာ်သမ္တီထေၚ်ရော? ရုပ်ဂှ် ဗိုန်ဟာ ဟွံဗိုန်ဟာ ရဴဝွံ (သၟာန်တိုန်ဂှ်)
ယွံကျာ်မၞုံပိုဉ် ဟွံဗိုန်ရ ရဴဝွံ (ဂရၚ်ပတီအိုတ်ရ)။
ရုပ်မဟွံဗိုန်ျဂှ် ဒဒိုခ်ဟာ တသိုခ်ဟာ ရဴတွံ (သၟာန်တိုန်ဂှ်)
ယွံကျာ်မၞုံပိုဉ် ဒှ်ဒဒိုခ်ရ ရဴဝွံ (ဂရၚ်ပတီအိုတ်ရ)။
ရုပ်မဟွံဗိုန် မဒှ်ဒဒိုခ် မၞုံသဘဴပွမပၠန်ဂတးဂှ် တၞဟ်နမၠာ်သ္ၚေဝ် ရဴဝွံမ္ဂး “ရုပ်ဝွံ ဂြပ်အဲရ၊ ရုပ်ဝွံ ဒှ်အဲရ၊ ရုပ်ဝွံ အတ္တဇကုအဲရ” ဂှ် ဗဗွဲဟာ ရဴဝွံ (သၟာန်တိုန်ဂှ်)
ယွံကျာ်မၞုံပိုဉ် ဟွံဗဗွဲရ ရဴဝွံ (ဂရၚ်ပတီအိုတ်ရ)။
ဝေဒနာ ။ ပ ။
သညာ ။ ပ ။
သၚ်္ခါရဂမၠိုၚ် ။ ပ ။
ဝိညာဏ်ဂှ် ဗိုန်ဟာ ဟွံဗိုန်ဟာ ရဴဝွံ (သၟာန်တိုန်)
ယွံကျာ်မၞုံပိုဉ် ဟွံဗိုန်ရ ရဴဝွံ (ဂရၚ်ပတီအိုတ်ရ)။
ဝိညာဏ်မဟွံဗိုန်ဂှ် ဒဒိုခ်ဟာ တသိုခ်ဟာ ရဴဝွံ (သၟာန်တိုန်ဂှ်)
ယွံကျာ်မၞုံပိုဉ် ဒှ်ဒဒိုခ်ရ ရဴဝွံ (ဂရၚ်ပတီအိုတ်ရ)။
ဝိညာဏ်မဟွံဗိုန် မဒှ်ဒဒိုခ် မၞုံသဘဴပွမပၠန်ဂတးဂှ် တၞဟ်နမၠာ်သ္ၚေဝ် ရဴဝွံမ္ဂး “ဝိညာဏ်ဝွံ ဂြပ်အဲရ၊ ဝိညာဏ်ဝွံ ဒှ်အဲရ၊ ဝိညာဏ်ဝွံ အတ္တဇကုအဲရ” ဂှ် ဗဗွဲဟာ ရဴဝွံ (သၟာန်တိုန်ဂှ်)
ယွံကျာ်မၞုံပိုဉ် ဟွံဗဗွဲရ ရဴဝွံ (ဂရၚ်ပတီအိုတ်ရ)။
၂၂။ ယွံခမဳတအ် ဟိုတ်ဒှ်သာ်ဂှ်ဟေၚ် ရုပ်အိုတ်သီု မဒှ်အတိက်အနာဂတ်ပစ္စုပ္ပန် မဒှ်အပ္ဍဲမ္ၚးကဵုဒှ် မဒှ်ကြံၚ်မ္ၚိုဟ်ကဵုဒှ် မဒှ်ဍိုန်ညောန်ကဵုဒှ် မဒှ်ယုတ်ကဵုဒှ် မဒှ်ပြဲကဵုဒှ် မဒှ်ကြပ်ကဵုဒှ် မဒှ်သ္ၚောဲကဵုဒှ်ဂှ် “ရုပ်ဝွံ ဂြပ်အဲဟွံသေၚ်ရ၊ ရုပ်ဝွံ အဲဟွံသေၚ်ရ၊ ရုပ်ဝွံ ‘အတ္တ’ ဇကုအဲဟွံသေၚ်ရ” ရဴဝွံ ဂပ်ဝ်သ္ဒးမၠာ်သ္ၚေဝ် နကဵုပညာခိုဟ်ဆာဲ အတိုၚ်ဍာံစၟတ်ရ။
ဝေဒနာအိုတ်သီု ။ ပ ။
သညာအိုတ်သီု ။ ပ ။
သၚ်္ခါရဂမၠိုၚ်အိုတ်သီု ။ ပ ။
ဝိညာဏ်အိုတ်သီု မဒှ်အတိက်အနာဂတ်ပစ္စုပ္ပန် မဒှ်အပ္ဍဲမ္ၚးကဵုဒှ် မဒှ်ကြံၚ်မ္ၚိုဟ်ကဵုဒှ် မဒှ်ဍိုန်ညောန်ကဵုဒှ် မဒှ်ယုတ်ကဵုဒှ် မဒှ်ပြဲကဵုဒှ် မဒှ်ကြပ်ကဵုဒှ် မဒှ်သ္ၚောဲကဵုဒှ်ဂှ် “ဝိညာဏ်ဝွံ ဂြပ်အဲဟွံသေၚ်ရ၊ ဝိညာဏ်ဝွံ အဲဟွံသေၚ်ရ၊ ဝိညာဏ်ဝွံ ‘အတ္တ’ ဇကုအဲဟွံသေၚ်ရ” ရဴဝွံ ဂပ်ဝ်သ္ဒးမၠာ်သ္ၚေဝ် နကဵုပညာခိုဟ်ဆာဲ အတိုၚ်ဍာံစၟတ်ရ။
၂၃။ ယွံခမဳတအ် မၠာ်သ္ၚေဝ်ရဴဝွံမ္ဂး ကွးအရဳ မၞုံကဵုလၟိၚ်လညာတ်ဂှ် ပ္ဍဲရုပ်လေဝ် ဇအိုတ်ဇရရ၊ ပ္ဍဲဝေဒနာလေဝ် ဇအိုတ်ဇရရ၊ ပ္ဍဲသညာလေဝ် ဇအိုတ်ဇရရ၊ ပ္ဍဲသၚ်္ခါရဂမၠိုၚ်လေဝ် ဇအိုတ်ဇရရ၊ ပ္ဍဲဝိညာဏ်လေဝ် ဇအိုတ်ဇကုရ၊ ဟိုတ်ပွမဇအိုတ်ဇရဂှ် ဟွံထၞေန်စပ်ရ၊ ဟိုတ်ပွမဟွံထၞေန်စပ်ဂှ် တိတ်ဗၠးနူကိလေသရ၊ တိတ်ဗၠးနူကိလေသတုဲမ္ဂး “တိတ်ဗၠးနူကိလေသရ” ရဴဝွံ ဉာဏ်ဒှ်ရ၊ “ပွမတန်ပဋိသန္ဓိအိုတ်အာတုဲရ၊ ဒ္ဂေတ်လ္ၚတ် ဒ္ဂေတ်မပြဲတုဲရ၊ သ္ပပတုဲကၠေံ ကိစ္စမဂ်တုဲရ၊ တၞဟ်နကိစ္စမဂ်ဝွံ ကိစ္စထေက်ကဵုသ္ပမွဲသအာၚ် ဟွံမွဲတုဲရ” ရဴဝွံ တီရဂှ် (သ္ဂးရ)။
၂၄။ တဳလမၞုံပိုဉ်ကျာ်တြဲ တွံတဴဓရ်ဝွံရ၊ ခမဳပဉ္စဝဝ်ဂမၠိုၚ် သ္ဍိုက်မၠိုက်ဓရ် တဳလမၞုံပိုဉ်ကျာ်တြဲ တွံဂမၠိုၚ်ဂှ်ဒှ်တုဲ ဒုၚ်ဂိုၚ်ကေတ်ဗွဲမအိုဟ်တၟိုဟ်အိုတ်ရ။ တွံလၟိၚ်တဴဒေသနာစုဏ္စိယသက်သက် ဟွံဖက်ကဵုဂါထာဝွံမ္ဂး စိုတ်ခမဳပဉ္စဝဝ်ဂမၠိုၚ် ဟွံစောဲလာံ (မမိက်ကဵုမွဲမွဲ) တုဲ တိတ်ဗၠးနူဓရ်အာသဝ ဂမၠိုၚ်အိုတ်ရ။ ပ္ဍဲအခိၚ်ဂှ် ပ္ဍဲလောက ဒှ်အာတၠအရှန်ဂမၠိုၚ်တြဴတၠအိုတ်ရ။
ပွမတွံဓရ် ကုပဉ္စဝဝ်ဂမၠိုၚ်တုဲရ။
ခဏ်ပဌမတုဲရ။
*သမ္တီ— သုတ်ဝွံ ပ္ဍဲပါဠိဟွံခ္ဍန်တုဲ ပ္ဍဲဗၟာခ္ဍန်လဝ်ရ၊ ကေတ်အတိုၚ်ပါဠိမ္ဂး တြးကေတ်ညိ။
