၁၀။ ပရူဒေဝတဴမာရ် သကုတ်ဒုတိယ

၃၅။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဒၠိုက်ကတဵုနူဝသ်တုဲမ္ဂး—

“ယွံခမဳတအ် အဲကျာ် ဟိုတ်ပွမသ္ပပၠုပ်စိုတ်ဗွဲမဗွဲ ဟိုတ်ပွမသ္ပလွဳပရာဗွဲမ္ဒးရးဗွဲမဗဗွဲဂှ်ရ ဂပ်ဝ်အာစိုပ် အရဟတ္တဖိုလ် မပြဲဟၟဲပတောံၜတ်တုရ၊ ဂပ်ဝ်သ္ပဇၞောဝ်မတ် အရာဟတ္တဖိုလ် မပြဲဟၟဲပတောံၜတ်တုဲရ။

ယွံခမဳတအ် မၞးတအ်ညးဂမၠိုၚ်လေဝ် သ္ပပၠုပ်စိုတ်ဗွဲမဗဗွဲတုဲ သ္ပလွဳပရာဗွဲမ္ဒးရးဗွဲမဗဗွဲအိုတ်တုဲ ဩဝ်အာစိုပ် အရဟတ္တဖိုလ်မပြဲ ဟွံမွဲပတောံၜတ်အိုတ်ညိ၊ ဩဝ်သ္ပဇၞောဝ်မတ် အရာဟတ္တဖိုလ်မပြဲ ဟွံမွဲပတောံၜတ်အိုတ်ညိ” ရဴဝွံ သ္ဂးကဵုခမဳဂမၠိုၚ်ရ။

ပ္ဍဲအခိၚ်ဂှ် ဒေဝတဴမာရ်မယုတ်မာ ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲ ဖ္ဍောတ်တိုန်ကဵု တဳလမၞုံပိုဉ်ကျာ်တြဲ နကဵုဂါထာရ—

“ယြဴပးဒၞက်ဂမၠိုၚ် မဒှ်ပ္ဍဲဒေဝတဴကီု ယြဴပးဒၞက်ဂမၠိုၚ် မဒှ်ပ္ဍဲမၞိဟ်ကီု နွံအိုတ်ရ၊ နကဵုပဒၞက်ဂမၠိုၚ်ဂှ် ဂပ်ဝ်ဗန်ဒက်တၠအဲရ၊ ဂပ်ဝ်ဗန်ဒက်လဝ် နကဵုအဗန်ဒက်မဇၞော်ရ၊ ယွံခမဳ တၠအဲ ဗၠးတိတ်နူတွဵုရးဍုၚ်အဲ ဟွံမာန်ရ” ရဴဝွံ (ဖ္ဍောတ်တိုန်ရ)။

ဟာဲ ဒေဝတဴမာရ်အယုတ် ယြဴပးဒၞက်ဂမၠိုၚ် မဒှ်ပ္ဍဲဒေဝတဴကီု ယြဴပးဒၞက်ဂမၠိုၚ် မဒှ်ပ္ဍဲမၞိဟ်ကီု နွံအိုတ်ရ၊ အဲကျာ် တိတ်ဗၠးနူပ:ဒၞက် (ကိလေသ) အိုတ်သီုတုဲရ၊ အဲကျာ် တိတ်ဗၠးနူအဗန်ဒက်မဇၞော်တုဲရ၊ ဟာဲ ဒေဝတဴမာရ်အယုတ် တၠအဲတုန် ကျအာတုဲရ ရဴဝွံ (သ္ဂးရ)။

ပ္ဍဲအခိၚ်ဂှ် ဒေဝတဴမာရ် မယုတ်မာဂှ် “တဳလမၞုံပိုဉ်ကျာ်တြဲ တီဒၟံၚ်အဲရ၊ ကျာ်တြဲမလေပ် ဟီုသ္ဂးတဴဂလာန်ခိုဟ်ဆာဲ တီဒၟံၚ်အဲရ” ရဴဝွံ မၞုံကဵုပွမဒှ်ဒဒိုခ် ပွမဟွံမိပ်စိုတ်ဂှ်ဒှ်တုဲ ပ္ဍဲဌာန်ဂှ်ဟေၚ် ကၠေံဗ္ဒန်အာရ။

ပရူဒေဝတဴမာရ် သကုတ်ဒုတိယတုဲရ။