၁၁။ ဝတ္ထုသကအ်ရဲဘဒ္ဒဝဂ္ဂဳပိစှော်
၃၆။ ပ္ဍဲအခိၚ်ဂှ် တဳလမၞုံပိုည်ကျာ်တြဲ သ္ပဒတဴ ပ္ဍဲဍုၚ်ဗာရာဏသဳ ဗွဲမမိပ်လဟိၚ်တုဲမ္ဂး က္ညဂ္ၚေၚ်အာဒေသစာရိတ် ဂြိုပ်ဥရုဝေလရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲပါဲစ္ဍးနူဂၠံၚ်တုဲ လုပ်အာသပိုဟ်ဂြိုပ်မွဲတုဲ ဂဇအ်ဒၟံၚ် ပ္ဍဲသၟတ်တၞံဆုမွဲရ။
ပ္ဍဲအခိၚ်ဂှ် သကအ်ရဲ (ကောန်သၟိၚ်) ဘဒ္ဒဝဂ္ဂဳဂမၠိုၚ်ပိစှော်တၠ မိပ်ဇြိပ်လဟိၚ်လဟာဲတဴမွဲဟာန်ကေုာံသမ္ဘာဂမၠိုၚ် ပ္ဍဲသပိုဟ် ဂြိုပ်ဂှ်အိုတ်ရ၊ သွက်ညးဟွံမွဲကဵုသမ္ဘာမွဲတၠဂှ် သ္ဒးကော်နၚ်ကဵုဗြဴစရာဲဍုၚ်ရ၊ ဗြဴစရာဍုၚ်ဂှ် ဃောညးဂမၠိုၚ်ဂှ် ဝိဝိၚ် မိပ်ဇြိပ်လဟိၚ်ဒၟံၚ်အိုတ်ဂှ် ဂိုၚ်ကေတ်ဂြပ်ရတ်တုဲ ဂြိပ်ဒဴအာရ။
ပ္ဍဲအခိၚ်ဂြပ်ဒဴအာဂှ် သကအ်ရဲဂမၠိုၚ် ဗွဲအစောံရၚ်တၠုၚ်က၆ု ကမၠောန်ကေၚ်ကာ ညးမဒှ်သကအ်ရဲဇကု သီုမဂၠာဲသ္ၚေဝ်တဴဗြဴဂှ်အိုတ်ဂှ် ဂေတ်ဂ္ၚေၚ်အပ္ဍဲသပိုဟ်ဂြိုပ်ဂှ်အိုတ်မ္ဂး ညာတ်ဒးအာတဳလမၞုံပိုဉ်ကျာ်တြဲ မဂဇအ်ဒၟံၚ် ပ္ဍဲသၟဝ်တၞံဆုမွဲတုဲ ပြာပ်အာဇရေၚ် တဳလမၞုံပိုဉ်ကျာ်တြဲအိုတ်တုဲမ္ဂး “ယွံတဳလမၞုံပိုဉ် တဳလမၞုံပိုဉ်ကျာ်တြဲ ညာတ်ညးဗြဴမွဲကီုဟာ” ရဴဝွံ ဂရၚ်ပတီအိုတ်ရ။
ယွံသၟတ်တအ် မၞးတအ်ညးဂမၠိုၚ် မုဟိုတ် သၟာန်တဴအိုတ်ရော? ရဴဝွံ (သၟာန်တိုန်မ္ဂး)—
ယွံတဳလမၞုံပိုဉ် လၟုဟ်ပိုဲဍိက်တအ်သကအ်ရဲဘဒ္ဒဝဂ္ဂဳဂမၠိုၚ်ပိစှော်တၠ မိပ်ဇြိပ်လဟိၚ်လဟာဲဒၟံၚ် မွဲဟာန်ကေုာံသမ္ဘာဂမၠိုၚ် ပ္ဍဲသပိုဟ် ဂြိုပ်ဝွံအိုတ်ရ၊ သွက်ညးဟွံမွဲကဵုသမ္ဘာမွဲတၠဂှ် သ္ဒးကော်နၚ်ကဵုဗြဴစရာဲဍုၚ်ရ၊ ပ္ဍဲအခိၚ်ဂှ် ဗြဴစရာဲဍုၚ်ဂှ် ဃောပိုဲဍိက်တအ်ညးဂမၠိုၚ် ဝိဝိၚ် မိပ်ဇြိပ်လဟိၚ်ဒၟံၚ်အိုတ်ဂှ် ဂိုၚ်ကေတ်ဂြပ်ရတ်တုဲ ဂြိပ်ဒဴအာရ။
ယွံတဳလမၞုံပိုဉ် ပိုဲဍိက်တအ်ညးဂမၠိုၚ် ဒှ်သကအ်ရဲဂမၠိုၚ်တုဲ ဗွဲအစောံရၚ်တပုၚ်ကဵု ကမၠောန်ကေၚ်ကာ ညးမဒှ်သကအ်ရဲဇကု သီုမဂၠာဲသ္ၚေဝ်တဴဗြဴဂှ်အိုတ်ဂှ် ဂေတ်ဂ္ၚေၚ်ဒၟံၚ် ပ္ဍဲသပိုဟ်ဂြိုပ်ဝွံအိုတ်ရ ရဴဝွံ (ဂရၚ်ပတီအိုတ်ရ)။
ယွံသၟတ်တအ် ဂလာန်အဲကျာ် ကြက်သ္ဂးဂတဂှ် မၞးတအ်ညးဂမၠိုၚ် ပသာ်သမ္တီထေၚ်အိုတ်ရော? ပၞောဝ်ကဵုပွမဂၠာဲသ္ၚေဝ်ဗြဴ ပွမဂၠာဲသ္ၚေဝ်ဇကုဇကုဂမၠိုၚ်ဂှ် မုရဴပွမဂၠာဲသ္ၚေဝ်မွဲ သွက်မၞးတအ်ညးဂမၠိုၚ် ဒှ်ပြဲရော? ရဴဝွံ (သၟာန်တိုန်ဂှ်)—
ပွမဂၠာဲသ္ၚေဝ် ဇကုဇကုဟေၚ် သွက်ပိုဲဍိက်တအ်ညးဂမၠိုၚ် ဒှ်ပြဲရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ယွံကောန်သၟိၚ်တအ် ဒှ်သာ်ဂှ်မ္ဂး မၞးတအ်ညးဂမၠိုၚ် ဩဝ်ဂဇအ်အိုတ်ညိ၊ အဲတွံကဵုဓရ် ကုမၞးတအ်ညးဂမၠိုၚ်ရ ရဴဝွံ (သ္ဂးရ)။
“ယွံတဳလမၞုံပိုဉ် ခိုဟ်သန်ရ” ရဴဝွံ ဒုၚ်ဝန်တုဲအိုတ်မ္ဂး သကအ်ရဲ (ကောန်သၟိၚ်) ဘဒ္ဒဝဂ္ဂဳဂမၠိုၚ်ပိစှော်တၠ လ္ၚောဝ်သ္ပဝတ် တဳလမၞုံပိုဉ်ကျာ်တြဲ ဗွဲမရှ်ေသှ်ေရဴဂဴတုဲ ဂဇအ်ဒၟံၚ် ပ္ဍဲဒၞါဲမွဲအိုတ်ရ။
တဳလမၞုံပိုဉ်ကျာ်တြဲ တွံကဵုဂလာန်ဓရ် မဒှ်အတိုၚ်လၟေၚ် ကု (ကောန်သၟိၚ်) ဘဒ္ဒဝဂ္ဂဳဂမၠိုၚ်ဂှ်ရ၊ ဂလာန်ဓရ်ဂှ် ညးဍေံဂှ်ရော? ဂလာန်မစပ်ကဵုဒါနကီု ဂလာန်မစပ်ကဵုသဳလကီု ဂလာန်မစပ်ကဵုဍုၚ်သွဝ်ကီု ဒုဟ်ကီု ပွမယုတ်သဝ်ကီ ပွမကၠိခ္ဍက်ကာမဂုဏ်ဂမၠိုၚ်ကီု ဖဵုပ္ဍဲပွမတိတ်ဗၠး (နူကာမဂုဏ်ဂမၠိုၚ်) ကီု ထ္ၜးကဵုရ။
တဳလမၞုံပိုဉ်ကျာ်တြဲ ပ္ဍဲအခိၚ်မတီကေတ် မၞုံကဵုစိုတ်မဒုၚ်စရၚ် မၞုံကဵုစိုတ်မဍိုန်ညောန် မၞုံကဵုစိုတ်စာ်စ္ဍးနူ ‘နဳဝရဏ’ ကၟာတ်လဒဵု မၞုံကဵုစိုတ်မြဟ်တိုန် မၞုံကဵုစိုတ်မလျုၚ်ဇြုၚ်သ္ဍိုက် ပ္ဍဲ (ကောန်သၟိၚ်) ဘဒ္ဒဝဂ္ဂဳဂမၠိုၚ်ဂှ် ထ္ၜးကဵု ‘ဒုက္ခသစ္စ’ ဒဒိုခ်ကီု ‘သမုဒယသစ္စ’ ဟိုတ်ဒဒိုခ်ကတဵုဒှ်ကီု ‘နိရောဓသစ္စ’ အရာဒဒိုခ်ပၠိုတ်ကီု ‘မဂ္ဂသစ္စ’ ဂၠံၚ်တရဴဒှ်ဟိုတ်အရာဒဒိုခ်ပၠိုတ်ကီု မဒှ်ဓရ်ဒေသနာ ‘သာမုက္ကသိက’ မတီညာတ် ဓမံက်ပတိတ်အလဵုဇကုကျာ်ဂမၠိုၚ်ရ။
ယာတ်ဗုသအး မစာ်စ္ဍးနူကမၠိကၠိခ္ဍက်ဂှ် သၟဟ်ညံၚ်ရဴဒုၚ်ဂိုၚ်ကေတ်ဍာ်လွံက် ဗွဲမ္ဒးရးကီု တုပ်တဴသာ်ဂှ်ရ ပ္ဍဲဒၞာဲဂှ်ဟေၚ် “ဓရ်အိုတ်သီု မၞုံသဘဴပွမကတဵုဒှ်ဂှ် မၞုံသဘဴပၠိုတ်ရ” ရဴဝွံ ‘သောတာပတ္တိမဂ်ဉာဏ်’ မတ်ဓရ် မဟွံမွဲကဵုမၠိုက် မစာ်စ္ဍးနူကၠိုက်လ္ၚေၚ်ကိလေသဂှ် ကတဵုဒှ်ကု (ကောန်သၟိၚ်) ဘဒ္ဒဝဂ္ဂဳဂမၠိုၚ်ဂှ်ရ။
(ကောန်သၟိၚ်) ဘဒ္ဒဝဂ္ဂဳဂမၠိုၚ်ဂှ် ညာတ်ကေတ်ဓရ်တုဲဂမၠိုၚ်ဒှ်တုဲ အာစိုပ်ဓရ်တုဲဂမၠိုၚ်ဒှ်တုဲ တီကေတ်ဓရ်တုဲဂမၠိုၚ်ဒှ်တုဲ တၞီလုပ်အာဓရ်တုဲဂမၠိုၚ်ဒှ်တုဲ ကလိလောန်အာသၠေဟ်ပၟာတုဲဂမၠိုၚ်ဒှ်တုဲ စာ်စ္ဍးနူချပ်သၠေဟ်ပၟာ သာ်တေံဟာ, သာ်ဏအ်ဟာတုဲဂမၠိုၚ်ဒှ်တုဲ အာစိုပ်ဂံၚ်သကာ (သက်လှက်) ပ္ဍဲသာသနာကျာ်တြဲတုဲဂမၠိုၚ်ဒှ်တုဲ ဟွံမွဲကဵညးလျုၚ်ပတှ်ေ မသအာၚ်နူကျာ်ဂမၠိုၚ်ဒှ်တုဲ “ယွံတဳလမၞုံပိုဉ် ပိုဲဍိက်တအ်ညးဂမၠိုၚ် မိက်ကလိဂွံဒဒှ်ထပိုဲ ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ၊ မိက်ကလိဂွံဒဒှ်ခမဳပယျၚ်အိုတ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
“ယွံခမဳတအ် ဩဝ်ကၠုၚ်အိုတ်ညိ၊ ဂပ်ဝ်တွံလဝ်ဓရ် ဗွဲမ္ဒးရးတုဲရ၊ တၞဟ်နသ္ပကၠေံလအိတ်ဒဒိုခ်ဝဋ် ဩဝ်ဒ္ဂေတ်လ္ၚတ် ဒ္ဂေတ်မပြဲ ဗွဲမ္ဒးရးအိုတ်ညိ” ရဴဝွံ တဳလမၞုံပိုဉ်ကျာ်တြဲ သ္ဂးရ။ ဂလာန်ဂှ်ဟေၚ် တဳလပိုဉ်ဂမၠိုၚ်ဂှ် ဒှ်အာခမဳပယျၚ်တုဲရောၚ်။
ဝတ္ထုသကအ်ရဲဘဒ္ဒဝဂ္ဂဳပိစှော်တုဲရ။
ခဏ်ဒုတိယတုဲရ။
