၁၂.၁။ ခဏ်ဝေတ်ဒၠောံဗတောန်ဥရုဝေလကဿပ
၃၇။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် က္ညဂေတ်ဂ္ၚေၚ်အာဒေသစာရိတ်မ္ဂး စိုပ်အာဥရုဝေလဗွဲမ္ဒးရးရ။ ပ္ဍဲအခိၚ်ဂှ် ပ္ဍဲဥရုဝေလ ရသိကောဒေံဂမၠိုၚ်ပိတၠ မတွံဂး ဥရုဝေလကဿပ နဒဳကဿပ ကယာကဿပ ပဒတဴဒၟံၚ်အိုတ်ရ၊ ပၞောဝ်ရသိဂမၠိုၚ်ဂှ် ရသိဥရုဝေလကဿပဂှ် ဒှ်ညးက္ဍိုပ်သကိုပ်စၞောန်ထ္ၜးဂၠံၚ် ဝေၚ်ဒၠောံဗတောန် ရသိဂမၠိုၚ်မသုန်ကၠံတုဲ ဒှ်ဇၞော်သကိုပ်သက ကၞောတ်အတောဋ်ရ။
ရသိနဒဳကဿပဂှ် ဒှ်ညးက္ဍိုပ်သကိုပ်စၞောန်ထ္ၜးဂၠံၚ် ဝေတ်ဒၠောံဗတောန် ရသိဂမၠိုၚ်ပိကၠံတုဲ ဒှ်ဇၞော်သကိုပ်သက ကၞောတ်အထောဋ်ရ။ ရသိဂယာကဿပဂှ် ဒှ်ညးက္ဍိုပ်သကိုပ်စၞောန်ထ္ၜးဂၠံၚ် ဝေတ်ဒၠောံဗတောန် ရသိဂမၠိုၚ်ၜါကၠံတုဲ ဒှ်ဇၞော်သကိုပ်သက ကၞောတ်အထောဋ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပြာပ်အာဇရေၚ် ဘာအဿမပိုဒ် ရသိဥရုဝေလကဿပတုဲ “ယွံကဿပ ယဝ်ဟွံဇြိုၚ်စိုတ် ကုတၠအဲမ္ဂး သၟိက်ပဒတဴ ပ္ဍဲရုၚ်ပၟတ် ဗၞတ်မွဲဗ္တံရ” ရဴဝွံ သ္ဂးတုဲ ရသိရရုဝေလကဿပရ။
ယွံခမဳဇၞော် ဟွံဇြိုၚ်စိုတ် ကုအဲရ၊ ပ္ဍဲရုၚ်ပၟတ်ဝွံ သၟိၚ်နာဂ် ကြမ်ကြသအဵုသအာ်တုဲ မၞုံကဵုဣဒ္ဓိကြဳဇှ်မဇၞော် မၞုံကဵုဂျိမပြဟ်သကာတ်မြဟ်ဂှ် နွံဒၟံၚ်ရ၊ သၟိၚ်နာဂ်ဂှ် လ္ပကဵုပျဲပျာံရာန်သကိုတ်တၠအဲညိ ရဴဝွံ (သ္ဂးရ)။
မရနုက်ကဵုၜါဝါလေဝ် တဳလမၞုံပိုဉ်ကျာ်တြဲဂှ် “ယွံကဿပ ယဝ်ဟွံဇြိုၚ်စိုတ် ကုတၠအဲမ္ဂး သၟိက်ပဒတဴ ပ္ဍဲရုၚ်ပၟတ် ဗၞတ်မွဲဗ္တံရ” ရဴဝွံ သ္ဂးကဵု ရသိဥရုဝေလကဿပရ၊ ယွံခမဳဇၞော် ဟွံဇြိုၚ်စိုတ်ကုအဲရ၊ ပ္ဍဲရုၚ်ပၟတ်ဝွံ သၟိၚ်နာဂ် ကြမ်ကြသအဵုသအာ်တုဲ မၞုံကဵုဣဒ္ဓိကြဳဇှ်မဇၞော် မၞုံကဵုဂျိမပြဟ်သကာတ်မြဟ်ဂှ် နွံဒၟံၚ်ရ၊ သၟိၚ်နာဂ်ဂှ် လ္ပကဵုပျဲပျာံရာန်သကိုတ် တၠအဲညိ ရဴဝွံ (သ္ဂးရ)။
မရနုက်ကဵုပိဝါလေဝ် တဳလမၞုံပိုဉ်ကျာ်တြဲဂှ် “ယွံကဿပ ယဝ်ဟွံဇြိုၚ်စိုတ် ကုတၠအဲမ္ဂး သၟိက်ပဒတဴ ပ္ဍဲရုၚ်ပၟတ် ဗၞတ်မွဲဗ္တံရ” ရဴဝွံ သ္ဂးကဵု ရသိဥရုဝေလကဿပရ၊ ယွံခမဳဇၞော် ဟွံဇြိုၚ်စိုတ်ကုအဲရ၊ ပ္ဍဲရုၚ်ပၟတ်ဝွံ သၟိၚ်နာဂ် ကြမ်ကြသအဵုသအာ်တုဲ မၞုံကဵုဣဒ္ဓိကြဳဇှ်မဇၞော် မၞုံကဵုဂျိမပြဟ်သကာတ်မြဟ်ဂှ် နွံဒၟံၚ်ရ၊ သၟိၚ်နာဂ်ဂှ် လ္ပကဵုပျဲပျာံရာန်သကိုတ် တၠအဲညိ ရဴဝွံ (သ္ဂးရ)။
ပျဲပျာံရာန်သကိုတ်အဲ ဟွံမာန်ရ၊ ယွံကဿပ တၠအဲ ဩဝ်ကဵုအခေါၚ် ရုပ်ပၟတ်ညိ ရဴဝွံ (သ္ဂးရ)။ ယွံခမဳဇၞော် ဩဝ်ပဒတဴ ဗွဲတသိုခ်ညိ ရဴဝွံ (သ္ဂးရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ လုပ်အာရုၚ်ပၟတ်တုဲ လးတဴသၞာလးချောဲ တက်ထွာဲတုဲမ္ဂး စွံပတန်လဝ်ဇကု ဗွဲမတပ်တုဲ သီုကဵုကတဵုဒှ်သတိတူရူကဵု (ကမ္မဋ္ဌာန်) ဂှ် ဂဇအ်ဒၟံၚ်ရ။
၃၈။ နာဂ်ဂှ် ညာတ်ဒးတဳလမၞုံပိုဉ်ကျာ်တြဲ လုပ်ကၠုၚ်မ္ဂး ဟွံမိပ်စိုတ်ဒှ်တုဲ ဗလးယက်ရ။ ပ္ဍဲအခိၚ်ဂှ် “အဲ ဟကဵုထ္ဍိမြိလုက်စုက်ဒး စၞာံပရဳ စၞာံသတီ ဖျုန် လတေၚ် ဇုတ် တ္ၜတ်ဇုတ်နာဂ်ဂမၠိုၚ်တုဲ နကဵုဣဒ္ဓိကြဳဇှ်အဲ သ္ဂောံကဵုဣဒ္ဓိကြဳဇှ်နာဂ်အိုတ်အာမ္ဂး ခိုဟ်သန်ရ” ရဴဝွံ ကသပ်ဒှ်ကၠုၚ် ကုတဳလမၞုံပိုဉ်ကျာ်တြဲရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ နိမိတ်ဗဒှ်တဴ ပွမနိမိတ်ဗဒှ်ဣဒ္ဓိကြဳဇှ် မၞုံသဘဴမဖှ်သာ်ဂှ်တုဲ ဗလးယေက်ရ၊ ပ္ဍဲအခိၚ်ဂှ် နာဂ်ဂှ် အေၚ်ဒုၚ်ပၞောတ်ဒေါသဟွံမာန်ဒှ်တုဲ ဗလးသၞ (ဂၠန်) ပၟတ်ရ။ တဳလမၞုံပိုဉ်ကျာ်တြဲလေဝ် လုပ်စၛာန် မၞုံအာရီုမ္ဂး တေဇောကသိုဏ်တုဲ ဗလးသၞပၟတ်ရ။ ပၟတ်ဂမၠိုၚ်ၜါ မဒှ်မွဲဟာန်ကေုာံသၞပၟတ် ဂဵုတိုန်အိုတ်မ္ဂး ရုၚ်ပၟတ်ဂှ် ဒှ်တဴသၟဟ်ညံၚ်ရဴဂဵုတၟးပွဳပွူ တူဒၟံၚ်မွဲဟာန်ကေုာံသၞပၟတ်ရ။ ပ္ဍဲအခိၚ်ဂှ် ရသိဂမၠိုၚ် ကောံဗိုၚ်ဒၟံၚ်ရုၚ်ပၟတ်အိုတ်တုဲ “ယွံသကအ်တအ် ခမဳဇၞော် ရုပ်သာ်မကျေဝ်ဂေါဝ်လောန်ဂှ် နာဂ် ပျဲပျာံရာန်သကိုတ်ရ” ရဴဝွံ ဟီုသ္ဂးအိုတ်ရ။
ပ္ဍဲကြဴနူဂှ် တဳလမၞုံပိုဉ်ကျာ်တြဲ ပ္ဍဲအခိၚ်ကလိလောန်အာဗ္တံဂှ် ဟကဵုထ္ဍိမြိလုက်စုက်ဒးစၞာံပရဳ စၞာံသတီု ဖျုန် လတေၚ် ဇုတ် တ္ၜတ်ဇုတ် နာဂ်ဂမၠိုၚ်တုဲ နကဵုဣဒ္ဓိကြဳဇှ်ဇကု ကဵုဣဒ္ဓိကြဳဇှ်နာဂ် အိုတ်အာတုဲမ္ဂး စုတ်ပ္ဍဲဗဗေၚ်တုဲ “ယွံကဿပ ဣဏအ်ဂှ် နာဂ် တၠအဲရ၊ နကဵုဣဒ္ဓိကြဳဇှ်အဲ ဂပ်ဝ်ကဵုဣဒ္ဓိကြဳဇှ်နာဂ်ဂှ် အိုတ်အာတုဲရ” ရဴဝွံ ထ္ၜးကဵုကုရသိဥရုဝေလကဿပရ။
ပ္ဍဲအခိၚ်ဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ဣဒ္ဓိကြဳဇှ်နာဂ် ကြမ်ကြသအဵသအာ်တုဲ မၞုံကဵုဣဒ္ဓိကြဳဇှ်မဇၞော် မၞုံကဵုဂျိမပြဟ်သကာတ်မြဟ်သာ်ဂှ်ဂှ် ဖအိုတ်ကၠေံ နကဵုဣဒ္ဓိကြဳဇှ်ဇကုမာန်ရ၊ ၜိုန်ဂှ် ညံၚ်ရဴအဲကီု တၠအရှန်တုန် ဟွံသေၚ်ဟေၚ်ရ” ရဴဝွံ ကသပ်ဒှ်ကုရသိဥရုဝေလကဿပရ။
၃၉။ တဳလမၞုံပိုဉ်ကျာ်တြဲဂှ် ပ္ဍဲကြုၚ်နေရဥ္ဇရာ ယွံကဿပ ယဝ်ဟွံဇြိုၚ်စိုတ် ကုတၠအဲမ္ဂး ဗၞတ်တ္ၚဲဏအ်မွဲတ္ၚဲ သၟိက်ပဒတဴ ပ္ဍဲရုၚ်ပၟတ်ရ ရဴဝွံ သ္ဂးကဵုရသိဥရုဝေလကဿပရ။
ယွံခမဳဇၞော် အဲဟွံဇြိုၚ်စိုတ်ရ၊ မိက်ကဵုတၠအဲဒှ်တသိုခ်ဟေၚ်တုဲ သၟိၚ်နာဂ် ကြမ်ကြသအဵုသအာ်တုဲ မၞုံကဵုဣဒ္ဓိကြဳဇှ်မဇၞော် မၞုံကဵုဂျိမပြဟ်သကာတ်မြဟ် ပ္ဍဲရုၚ်ပၟတ်ဝွံ လ္ပကဵုပျဲပျာံရာန်သကိုတ် တၠအဲခမဳဇၞော်ညိ ရဴဝွံ ဆေဝ်ဒဝ်ကၠေံရ ရဴဝွံ (သ္ဂးရ)။
ပျဲပျာံရာန်သကိုတ်အြ ဟွံမာန်ရ၊ တၠအဲ ဩဝ်ကဵုအခေါၚ် ရုပ်ပၟတ်ဟေၚ်ညိ ရဴဝွံ သ္ဂးတုဲ တီကေတ် ကဵုအခေါၚ် (ရုပ်ပၟတ်) တုဲရမ္ဂး တဳလမၞုံပိုဉ်ကျာ်တြဲ မကလိလောန်ပွမဖေက်ဂၟံက်တုဲဂှ် က္ညလုပ် သီုဟွံဖေက်ရောံဒညရ။
နာဂ်ဇြုံ ညာတ်ဒး တဳလမၞုံပိုဉ်ကျာ်တြဲလုပ်ကၠုၚ်မ္ဂး ဟွံမိပ်စိုတ်ဒှ်တုဲ ဗလးယက်ရ၊ နာဂ်မၞိဟ် (မတါဴဂးကျာ်တြဲ) မၞုံကဵုဂၠမ်စိုတ်ခိုဟ်ဆာဲ မၞုံကဵုဂၠမ်စိုတ်ဟွံကၠိခန်လေဝ် ဗလးယေက် ပ္ဍဲရုၚ်ပၟတ်ဂှ်ရ။
နာဂ်ဇြုံလေဝ် အေၚ်ဒုၚ်ပၞောတ်ဒေါသဟွံမာန်ဒှ်တုဲ ဗလးသၞ (ဂၠန်) ပၟတ် ညံၚ်ရဴပၟတ်ရ။ နာဂ်မၞိဟ် (မတွံဂးကျာ်တြဲ) မစဳကၠးဆိုက်ဗ္ဒက် ပ္ဍဲပွမလုပ်စၛာန်ဂမၠိုၚ် မၞုံအာရီုမ္ဂး တေဇောကသိုဏ်လေဝ် ဗလးသၞပၟတ် ပ္ဍဲရုၚ်ပၟတ်ဂှ်ရ။
ပၟတ်ဂမၠိုၚ်ၜါ မဒှ်မွဲဟာန်ကေုာံသၞပၟတ် ဂဵုတိုန်အိုတ်မ္ဂး ရုပ်ပၟတ်ဂှ် ဒှ်တဴသၟဟ်ညံၚ်ရဴဂဵုတၟးပွဳပွူ တူဒၟံၚ်မွဲဟာန်ကေုာံသၞပၟတ်ရ။ ရသိဂမၠိုၚ် မၞုံပ္ဍဲပွဳပွူဂှ် ကောံဗိုန်ဒၟံၚ်ရုၚ်ပၟတ်အိုတ်တုဲ ယွံသကအ်တအ် ခမဳဇၞော် ရုပ်သာ်မကျေဝ်ဂေါဝ်ဂှ် နာဂ် ပျဲပျာံရာန်သကိုတ်တုဲရ ရဴဝွံ ဟီုသ္ဂးအိုတ်ရ။
ပ္ဍဲကြဴနူဂှ် ပ္ဍဲအခိၚ်ကလိလောန်အာဗ္တံဂှ် သၞပၟတ်နာဂ်ဂမၠိုၚ် ကၠေံစ္ဍးအိုတ်ရ။ သၞပၟတ်ဂမၠိုၚ် မၞုံကဵုသာ်ဂမၠိုၚ် ဒဒက်တဴတဳလမၞုံပိုဉ်ကျာ်တြဲ မၞုံကဵုဣဒ္ဓိကြဳဇှ်မဇၞော်တုန် တန်တဴဒၟံၚ်အိုတ်ရ။ သၞပၟတ်ဂမၠိုၚ် မၞုံကဵုသာ်ဒမျိုၚ် မဗကေတ် မဗကေတ်မမြံၚ် မဒှ်သာ်ထဝ် မဒှ်သာ်အဖၠိုက် (ဖာန်) ဂှ် ဒှ်ဒၟံၚ်ပ္ဍဲဇကု တဳလမၞုံပိုဉ်ကျာ်တြဲအိုတ်ရ။
စုတ်ကၠေံ နာဂ်ဇြုံ ပ္ဍဲဗဗေၚ်တုဲ ယွံကဿပ ဣဏအ်ဂှ် နာဂ် တၠအဲရ၊ နကဵုဣဒ္ဓိကြဳဇှ်အဲ ဂပ်ဝ်ကဵုဣဒ္ဓိကြဳဇှ်နာဂ်ဂှ် အိုတ်အာတုဲရ ရဴဝွံ ထ္ၜးကဵုကုရသိဥရုဝေလကဿပရ။
ပ္ဍဲအခိၚ်ဂှ် ဟိုတ်နူပွမထ္ၜးဣဒ္ဓိကြဳဇှ်ဂှ် ရသိဥရုဝေလကဿပ လျုၚ်ဇြုၚ်သ္ဍိုက် ကုတဳလမၞုံပိုဉ်ကျာ်တြဲလောန်ဂှ်ဒှ်တုဲ “ယွံခမဳဇၞော် ပ္ဍဲဌာန်ဝွံဟေၚ် ဩဝ်ပဒတဴညိ၊ အဲ ကၠောန်ၜိုတ် နကဵုဝတ်ပိဏ္ဍပါတ်လၟိုန် ကုတၠအဲရ” ရဴဝွံ သ္ဂးရ။
ဣဒ္ဓိပါဋိဲဟာမဒှ်ဗွဲကိုပ်ကၠာတုဲရ။
၄၀။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲသပိုဟ်ဂြိုပ်မွဲ ဇရေၚ်ဘာအဿမပိုဒ် ရသိဥရုဝေလကဿပရ။ ပ္ဍဲအခိၚ်ဂှ် ဒေဝတဴနာဲဝၚ်ဇၞော်ဂမၠိုၚ်ပန်တၠ ပ္ဍဲအခိၚ်သ္ဂးဗ္တံ ထေက်ကဵုသ္ဍိုက်မၠိုက်လောန်ဂှ် မၞုံကဵုသာ်မထေက်ကဵုသ္ဍိုက်မၠိုက်လောန်ဂှ်ဒှ်တုဲ သီုမကဵုယးတၟးဂဵုခၠၚ်တဴသပိုဟ်ဂြိုပ် အလုံပွဳပွူအိုတ်သီု နကဵုလျးအရံၚ်ဇကုဂှ် ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သၟဟ်ညံၚ်ရဴဗွဝ်ပၟတ်ဖအုံမဇၞော်ဂမၠိုၚ်ကီု တန်တဴဒၟံၚ်ပ္ဍဲဒိုဟ်ပန်ဂမၠိုၚ်ရ။
ပ္ဍဲအခိၚ်ဂှ် ရသိဥရုဝေလကဿပ ပ္ဍဲအခိၚ်ကလိလောန်အာဗ္တံဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ “ယွံခမဳဇၞော် ဒးအခိၚ်ရ၊ ပဠေဝ်ပဠေတ်လဝ်ပိဏ္ဍပါတ်တုဲရ၊ ယွံခမဳဇၞော်အခိၚ်သ္ဂာဗ္တံ ထေက်ကဵုသ္ဍိုက်မၠိုက်လောန်ဂှ် မၞုံကဵုသာ်ထေက်ကဵုသ္ဍိုက်မၠိုက်လောန်ဂှ်ဒှ်တုဲ သီုမကဵုယးတၟး ဂဵုခၠၚ်တဴ သပိုဟ်ဂြိုပ်အလုံပွဳပွူအိုတ်သီု နကဵုလျးအရံၚ်ဇကုဂှ် ပြာပ်ကၠုၚ်ဇရေၚ်တၠအဲခမဳဇၞော်တုဲ လ္ၚောဝ်သ္ပဝတ် တၠအဲခမဳဇၞော်တုဲမ္ဂး သၟဟ်ညံၚ်ရဴဗွဝ်ပၟတ်ဖအုံမဇၞော်ဂမၠိုၚ်ကီု ညးဂမၠိုၚ်မကၠုၚ် တန်တဴဒၟံၚ် ပ္ဍဲဒိုဟ်ပန်ဂမၠိုၚ်ဂှ် ဒှ်ညးလဵုအိုတ်ရော?” ရဴဝွံ သၟာန်တဳလမၞုံပိုဉ်ကျာ်တြဲရ။ ယွံကဿပ ညးဂမၠိုၚ်ဂှ်တုန် ဒေဝတဴနာဲဝၚ်ဇၞော်ဂမၠိုၚ်ပန်တၠရ၊ သွက်သ္ဂောံကလၚ်ပၚ်မှိၚ်ဓရ် ပြာပ်ကၠုၚ်ဇရေၚ်အဲအိုတ်ရ ရဴဝွံ (သ္ဂးရ)။
ပ္ဍဲအခိၚ်ဂှ် “ခမဳဇၞော် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ဒေဝတဴနာဲဝၚ်ဇၞော်ဂမၠိုၚ်ပန်တၠလေဝ် သွက်သ္ဂောံကလၚ်ပၚ်မှိၚ်ဓရ် သ္ဒးပြာပ်ကၠုၚ်အိုတ်ရ၊ ၜိုတ်ဂှ် ညံၚ်ရဴအဲကီု တၠအရှန်ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပပြဘိုဂ်ပိဏ္ဍပါတ် ရသိဥရုဝေလကဿပတုဲ သ္ပဒတဴဒၟံၚ် ပ္ဍဲသပိုဟ်ဂြိုပ်ဂှ်ဟေၚ်ရ။
ဣဒ္ဓိပါဋိဟာမရနုက်ကဵုၜါတုဲရ။
၄၁။ ပ္ဍဲအခိၚ်ဂှ် သၟိၚ်အိန် မဒှ်တၠနာဲဒေဝတဴဂမၠိုၚ် ပ္ဍဲအခိၚ်သ္ဂာဗ္တံ ထေက်ကဵုသ္ဍိုက်မၠိုက်လောန်ဂှ် မၞုံကဵုသာ်မထေက်ကဵုသ္ဍိုက်မၠိုက်လောန်ဂှ်ဒှ်တုဲ သီုမကဵယးတၟးဂဵုခၠၚ်တဴ သပိုဟ်ဂြိုပ်အလုံပွဳပွူအိုတ်သီု နကဵုလျးအရံၚ်ဇကုဂှ် ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး ထေက်ကဵုသ္ဍိုက်မၠိုက်လောန် လတူလျးအရံၚ်ဂမၠိုၚ် မဒှ်ပ္ဍဲကိုပ်ကၠာသၟးဟွံက ဗွဲတၟေၚ်လေဝ်ပြဲဂှ်ဒှ်တုဲ သၟဟ်ညံၚ်ရဴဗွဝ်ပၟတ်ဖအုံမဇၞော်ကီု တန်တဴဒၟံၚ် ပ္ဍဲဒၞါဲမွဲရ။
ပ္ဍဲအခိၚ်ဂှ် ရသိဥရုဝေလကဿပ ပ္ဍဲအခိၚ်ကလိလောန်အာဗ္တံဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ “ယွံခမဳဇၞော် ဒးအခိၚ်ရ၊ ပဠေဝ်ပဠေတ်လဝ်ပိဏ္ဍပါတ်တုဲရ၊ ယွံခမဳဇၞော် အခိၚ်သ္ဂးဗ္တံ ထေက်ကဵုသ္ဍိုက်မၠိုက်လောန်ဂှ် မၞုံကဵုသာ်မထေက်ကဵုသ္ဍိုက်မၠိုက်လောန်ဂှ်ဒှ်တုဲ သီုမကဵယးတၟး ဂဵုခၠၚ်တဴ သပိုဟ်ဂြိုပ်အလုံပွဳပွူအိုတ်သီု နကဵုလျးအရံၚ်ဇကုဂှ် ပြာပ်ကၠုၚ်ဇရေၚ်တၠအဲခမဳဇၞော်တုဲ လ္ၚောဝ်သ္ပဝတ် တၠအဲခမဳဇၞော်တုဲမ္ဂး ထေက်ကဵုသ္ဍိုက်မၠိုက်လောန် လတူလျးအရံၚ်ဂမၠိုၚ် မဒှ်ပ္ဍဲကိုပ်ကၠာသၟးဟွံက ဗွဲတၟေၚ်လေဝ်ပြဲဂှ်ဒှ်တုဲ သၟဟ်ညံၚ်ရဴဗွဝ်ပၟတ်ဖအုံမဇၞော်ကီု ညးမကၠုၚ်တန်တဴဒၟံၚ် ပ္ဍဲဒၞါဲမွဲဂှ်တုန် ဒှ်ညးလဵုရော?” ရဴဝွံ သၟာန်တဳလမၞုံပိုဉ်ကျာ်တြဲရ။ ယွံကဿပ ညးဂှ်တုန် သၟိၚ်အိန် မဒှ်တၠနာဲဒေဝတဴဂမၠိုၚ်ရ၊ သွက်သ္ဂောံကလၚ်ပၚ်မှိၚ်ဓရ် ပြာပ်ကၠုၚ်ဇရေၚ်အဲရ ရဴဝွံ (သ္ဂးရ)။
ပ္ဍဲအခိၚ်ဂှ် “ခမဳဇၞော် ဗွဲစမတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ သၟိၚ်အိန် မဒှ်တၠနာဲဒေဝတဴဂမၠိုၚ်လေဝ် သွက်သ္ဂောံကလၚ်ပၚ်မှိၚ်ဓရ် သ္ဒးပြာပ်ကၠုၚ်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပပြဘိုဂ်ပိဏ္ဍပါတ် ရသိဥဥုဝေလကဿပတုဲ သ္ပဒတဴဒၟံၚ် ပ္ဍဲသပိုဟ်ဂြိုပ်ဂှ်ဟေၚ်ရ။
ဣဒ္ဓိပါဋိဟာမရနုကဵုပိတုဲရ။
၄၂။ ပ္ဍဲကြဴနူဂှ် ဗြီုသဟမ္ပတိ ပ္ဍဲအခိၚ်သ္ဂးဗ္တံ ထေက်ကဵုသ္ဍိုက်မၠိုက်လောန်ဂှ် မၞုံကဵုသာ်မထေက်ကဵုသ္ဍိုက်မၠိုက်လောန်ဂှ်ဒှ်တုဲ သီုမကဵုယးတၟးဂဵုခၠၚ်တဴ သပိုဟ်ဂြိုပ် အလုံပွဳပွူအိုတ်သီု နကဵုလျးအရံၚ်ဇကုဂှ် ပြာပ်ကၠုၚ်ဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး ထေက်ကဵုသ္ဍိုက်မၠိုက်လောန် လတူလျးအရံၚ်ဂမၠိုၚ် မဒှ်ပ္ဍဲကိုပ်ကၠာသၟးဟွံက ဗွဲတၟေၚ်လေဝ်ပြဲဂှ်ဒှ်တုဲ သၟဟ်ညံၚ်ရဴဗွဝ်ပၟတ်ဖအုံမဇၞော်ကီု တန်တဴဒၟံၚ် ပ္ဍဲဒၞါဲမွဲရ။
ပ္ဍဲအခိၚ်ဂှ် ရသိဥရုဝေလကဿပ ပ္ဍဲအခိၚ်ကလိလောန်အာဗ္တံဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ “ယွံခမဳဇၞော် ဒးအခိၚ်ရ၊ ပဠေဝ်ပဠေတ်လဝ်ပိဏ္ဍပါတ်တုဲရ၊ ယွံခမဳဇၞော် အခိၚ်သ္ဂးဗ္တံ ထေက်ကဵုသ္ဍိုက်မၠိုက်လောန်ဂှ် မၞုံကဵုသာ်မထေက်ကဵုသ္ဍိုက်မၠိုက်လောန်ဂှ်ဒှ်တုဲ သီုမကဵုယးတၟးဂဵုခၠၚ်တဴ သပိုဟ်ဂြိုပ်အလုံပွဳပွူအိုတ်သီု နကဵုလျးအရံၚ်ဇကုဂှ် ပြာပ်ကၠုၚ်ဇရေၚ် တၠအဲခမဳဇၞော်တုဲ လ္ၚောဝ်သ္ပဝတ် တၠအဲခမဳဇၞော်တုဲ မ္ဂး ထေက်ကဵုသ္ဍိုက်မၠိုက်လောန် လတူလျးအရံၚ်ဂမၠိုၚ် မဒှ်ပ္ဍဲကိုပ်ကၠာသၟးဟွံက ဗွဲတၟေၚ်လေဝ်ပြဲဂှ်ဒှ်တုဲ သၟဟ်ညံၚ်ရဴဗွဝ်ပၟတ်ဖအုံမဇၞော်ကီု ညးမကၠုၚ်တန်တဴဒၟံၚ် ပ္ဍဲဒၞါဲမွဲဂှ်တုန် ဒှ်ညးလဵုရော?” ရဴဝွံ သၟာန်တဳလမၞုံပိုဉ်ကျာ်တြဲရ။ ယွံကဿပ ညးဂှ်တုန် ဗြီုသဟမ္ပတိရ၊ သွက်သ္ဂောံကလၚ်ပၚ်မှိၚ်ဓရ် ပြာပ်ကၠုၚ်ဇရေၚ်အဲရ ရဴဝွံ (သ္ဂးရ)။
ပ္ဍဲအခိၚ်ဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ဗြီုဇၞော်သဟမ္ပတိလေဝ် သွက်သ္ဂောံကလၚ်ပၚ်မှိၚ်ဓရ် သ္ဒးပြာပ်ကၠုၚ်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိရုဥဝေလကဿပရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပပြဘိုဂ်ပိဏ္ဍပါတ် ရသိဥရုဝေလကဿပတုဲ သ္ပဒတဴဒၟံၚ် ပ္ဍဲသပိုဟ်ဂြိုပ်ဂှ်ဟေၚ်ရ။
ဣဒ္ဓိပါဋိဟာမရနုကဵုပန်တုဲရ။
၄၃။ ပ္ဍဲအခိၚ်ဂှ် ပေါဲပူဇဴယဇ်ဇၞော် ဒှ်ကပုၚ်ကုရသိဥရုဝေလကဿပရ၊ ညးဂမၠိုၚ်မသ္ပဒတဴ ပ္ဍဲအၚ်္ဂရး မဂဓရးဂမၠိုၚ် အလုံပွဳပွူအိုတ်သီု ဂိုၚ်ကေတ်နၚ် စၞအာဟာရဘောဇိုန် ဗွဲမဂၠိုၚ်ဂၠၚ်တုဲ မိက်ကၠုၚ်အိုတ်ရ။ ပ္ဍဲအခိၚ်ဂှ် “ပ္ဍဲအခိၚ်လၟုဟ်ဝွံ ပေါဲပူဇဴယဇ်ဇၞော် ဒှ်ကၠုၚ်ကုအြရ၊ ညးဂမၠိုၚ်မသ္ပဒတဴ ပ္ဍဲအၚ်္ဂရး မဂဓရးဂမၠိုၚ် အလုံပွဳပွူအိုတ်သီု ဂိုၚ်ကေတ်နၚ် စၞအာဟာရဘောဇိုန်ဗွဲမဂၠိုၚ်ဂၠၚ်တုဲ ကြက်ကၠုၚ်အိုတ်ရ၊ ပ္ဍဲလဒေါဝ်မၞိဟ်ဂမၠိုၚ်မဂၠိုၚ်ဂှ် ယဝ်ခမဳဇၞော် သ္ပတဴပွမနိမိတ်ဗဒှ် ဣဒ္ဓိကြဳဇှ်မ္ဂး၊ လာဘ်ပူဇဴသက္ကာ ကြက်ဇၞော်မောဝ် ကုခမဳဇၞော်ရ၊ လာဘ်ပူဇဴသက္ကာ ကြက်ဟုတ်ယုတ် ကုအဲရ၊ ပ္ဍဲတ္ၚဲယး ခမဳဇၞော် ဟွံက္ညကၠုၚ်မ္ဂး ခိုဟ်သန်ရ” ရဴဝွံ ကသပ်ဒှ် ကုရသိဥရုဝေလကဿပရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ်ကသပ်စိုတ် ရသိဥရုဝေလကဿပနကဵုစိုတ်ဇကုတုဲ က္ညအာတကအ်သၟဝ်ကျာတုဲ ရၚ်တၠုၚ်နၚ်ပိဏ္ဍပါတ် နူတကအ်သၟဝ်ကျာတုဲမ္ဂး သ္ပပြဘိုဂ်ကဵုပိုဉ် ပ္ဍဲဇရေၚ်လ္စအနောတတ်တုဲမ္ဂး ပ္ဍဲဇရေၚ်လ္စအနောတတ်ဂှ်ဟေၚ် သ္ပဒတဴဒၟံၚ်တ္ၚဲရ။
ပ္ဍဲအခိၚ်ဂှ် ရသိဥရုဝေလကဿပ ပ္ဍဲအခိၚ်ကလိလောန်အာဗ္တံဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ “ယွံခမဳဇၞော် ဒးအခိၚ်ရ၊ ပဠေဝ်ပဠေတ်လဝ်ပိဏ္ဍပါတ်တုဲရ၊ ယွံခမဳဇၞော် ပ္ဍဲနူတနေံတေံ မုဟိုတ် ဟွံက္ညကၠုၚ်ရော? ဗွဲစၟတ်တုန် ပိုဲညးဂမၠိုၚ် ‘တၠအဲခမဳဇၞော် မုဟိုတ်ဟွံက္ညကၠုၚ်ရော?’ ရဴဝွံ ဗှ်ဗၞုဟ်ဒၟံၚ်အိုတ်ရ၊ ပါဲစွံလဝ် စၞအာဟာရဘောဇိုန် သွက်တၠအဲရ” ရဴဝွံ သ္ဂးကဵုတဳလမၞုံပိုဉ်ကျာ်တြဲရ။
ယွံကဿပ ကသပ်ရဴဝွံ ကတဵုဒှ်ကုတၠအဲရ ဟွံသေၚ်ဟာ “ပ္ဍဲအခိၚ်လၟုဟ်ဝွံ ပေါဲပူဇဴယဇ်ဇၞော် ဒှ်ကၠုၚ်ကုအဲရ၊ ညးဂမၠိုၚ်မသ္ပဒတဴ ပ္ဍဲအၚ်္ဂရး မဂဓရးဂမၠိုၚ် အလုံပွဳပွူအိုတ်သီု ဂိုၚ်ကေတ်နၚ် စၞအာဟာရဘောဇိုန် ဗွဲမဂၠိုၚ်ဂၠၚ်တုဲ ကြက်ကၠုၚ်အိုတ်ရ၊ ပ္ဍဲလဒေါဝ်မၞိဟ်ဂမၠိုၚ်မဂၠိုၚ်ဂှ် ယဝ်ခမဳဇၞော် သ္ပတဴပွမနိမိတ်ဗဒှ် ဣဒ္ဓိကြဳဇှ်မ္ဂး၊ လာဘ်ပူဇဴသက္ကာ ကြက်ဇၞော်မောဝ်ကုခမဳဇၞော်ရ၊ လာဘ်ပူဇဴသက္ကာ ကြက်ဟုတ်ယုတ် ကုအဲရ၊ ပ္ဍဲတ္ၚဲယး ခမဳဇၞော် ဟွံက္ညကၠုၚ်မ္ဂး ခိုဟ်သန်ရ” ရဴဝွံ ကသပ်ကတဵုဒှ်ရ ဟွံသေၚ်ဟာ။ ယွံကဿပ အဲ တီကေတ်ကသပ်စိုတ်တၠအဲ နကဵုစိုတ်အဲတုဲ က္ညအာတကအ်သၟဝ်ကျာတုဲ ရၚ်တၠုၚ်နၚ်ပိဏ္ဍပါတ် နူတကအ်သၟဝ်ကျာတုဲမ္ဂး သ္ပပြဘိုဂ်ကဵုပိုဉ် ပ္ဍဲဇရေၚ်လ္စအနောတတ်တုဲမ္ဂး ပ္ဍဲဇရေၚ်လ္စအနောတတ်ဂှ်ဟေၚ် သ္ပဒတဴဒၟံၚ်တ္ၚဲရ ရဴဝွံ (သ္ဂးရ)။
ပ္ဍဲအခိၚ်ဂှ “ခမဳဇၞော် ဗွဲစၟတ် ဣဒ္ဓိကြဳဇျ်ဇၞော်ရ၊ အာနုဘဴဇၞော်ရ၊ နကဵုစိုတ်ဇကု စိုတ်ညးသအာၚ်လေဝ် တီကေတ်မာန်ရ၊ ၜိုန်ဂှ် ညံၚ်ရဴအဲကီု တၠအရှန်ဟွံသေၚ်ဟေၚ်ရ” ရဴဝွံ ကသပ်ဒှ်ကုရသိဥရုဝေလကဿပရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပပြဘိုဂ်ပိဏ္ဍပါတ် ရသိဥရုဝေလကဿပတုဲ သ္ပဒတဴဒၟံၚ် ပ္ဍဲသပိုဟ်ဂြိုပ်ဂှ်ဟေၚ်ရ။
ဣဒ္ဓိပါဋိဟာမရနုက်ကဵုမသုန်တုဲရ။
၄၄။ ပ္ဍဲကာလမွဲအခိၚ် ယာတ်သ္ၚာံပံသုကူ ကတဵုဒှ်ကၠုၚ် ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် “မုရဴပ္ဍဲဌာန်မွဲ အဲ သ္ဂောံလပိုက်ကြာတ်ကြဴ ယာတ်သ္ၚာပံသုကူရော?” ရဴဝွံ ကသပ်ဒှ်ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် သၟိၚ်အိန် တီကေတ်ကသပ်စိုတ် တဳလမၞုံပိုဉ်ကျာ်တြဲ နကဵုစိုတ်ဇကုတုဲ ခါဲတဴ ဍာ်ကၟာ နကဵုတဲတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်လပိုက်ကြာတ်ကြဴ ယာတ်သ္ၚာပံသုကူ ပ္ဍဲဍာ်ကၟာဝွံညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ပ္ဍဲကြဴနူဂှ် “မုရဴပ္ဍဲဌာန်မွဲ အဲ သ္ဂောံချိုန်ပတ် ယာတ်သ္ၚာပံသုကူရော?” ရဴဝွံ ကသပ်ဒှ်ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် သၟိၚ်အိန် တီကေတ်ကသပ်စိုတ် တဳလမၞုံပိုဉ်ကျာ်တြဲ နကဵုစိုတ်ဇကုတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်ချိုန်ပတ် ယာတ်သ္ၚာပံသုကူ ပ္ဍဲတၟံလးဇၞော်ဝွံညိ” ရဴဝွံ ဖျေံစွံလဝ် တၟံလးမဇၞော်ရ။
ပ္ဍဲကြဴနူဂှ် “မုရဴဌာန်မွဲ အဲ သ္ဂောံလ္ၜက်တုဲ ဝတ်ယာတ်သ္ၚာပံသုကူရော?” ရဴဝွံ ကသပ်ဒှ်ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဒေဝတဴပၟၚ်တၞံဗလဲဍာ် တီကေတ်ကသပ်စိုတ် တဳလမၞုံပိုဉ်ကျာ်တြဲ နကဵုစိုတ်ဇကုတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ လ္ၜက်ပ္ဍဲတၞာၚ်ဗလဲဍာ်ဝွံတုဲ ဩဝ်ဝတ်ညိ” ရဴဝွံ ကဵုတၞာၚ်ဗလဲဍာ်လၟောဝ်လကဲစှ်ေရ။
ပ္ဍဲကြဴနူဂှ် “မုရဴဌာန်မွဲ အဲ သ္ဂောံလလိုဟ်ပၠး ယာတ်သ္ၚာပံသုကူရော?” ရဴဝွံ ကသပ်ဒှ်ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် သၟိၚ်အိန် တီကေတ်ကသပ်စိုတ် တဳလမၞုံပိုဉ်ကျာ်တြဲ နကဵုစိုတ်ဇကုတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်လလိုဟ်ပၠး ယာတ်သ္ၚာပံသုကူ ပ္ဍဲတၟံလးဇၞော်ဝွံညိ” ရဴဝွံ ဖျေံစွံလဝ် တၟံလးမဇၞော်ရ။
ပ္ဍဲအခိၚ်ဂှ် ရသိဥရုဝေလကဿပ ပ္ဍဲအခိၚ်ကလိလောန်အာဗ္တံဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ “ယွံခမဳဇၞော် ဒးအခိၚ်ရ၊ ပဠေဝ်ပဠေတ်လဝ်ပိဏ္ဍပါတ်တုဲရ၊ ယွံခမဳဇၞော် ကိုပ်ကၠာတေံ ပ္ဍဲဌာန်ဝွံ ဍာ်ကၟာဟွံမွဲရ၊ လၟုဟ် ပ္ဍဲဌာန်ဝွံ မုဟိုတ် ဍာ်ကၟာဂွံနွံကၠုၚ်ရော?
ပ္ဍဲကိုပ်ကၠာတေံ ဟွံဖျေံလဝ် တၟံလးဇၞော်ဝွံရ၊ လၟုဟ် မုရဴညးမွဲ ဖျေံစွံလဝ် တၟံလးဇၞော်ဝွံရော? ပ္ဍဲကိုပ်ကၠာတေံ တၞာၚ်တၞးတၞံဗလဲဍာ်ဝွံ ဟွံလၟောဝ်စှ်ေရ၊ လၟုဟ် မုရဴညးမွဲ ကဵုတၞာၚ်တၞးတၞံဗလဲဍာ်ဂှ် လၟောဝ်လကဲစှ်ေရော?” ရဴဝွံ သၟာန်တဳလမၞုံပိုဉ်ကျာ်တြဲရ။
ယွံကဿပ ပ္ဍဲဌာန်ဝွဴ ယာတ်သ္ၚာပံသုကူ ကတဵုဒှ်ကၠုၚ် ကုအဲရ။ ယွံကဿပ “မုရဴပ္ဍဲဌာန်မွဲ အဲ သ္ဂောံလပိုက်ကြာတ်ကြဴ ယာတ်သ္ၚာပံသုကူရော?” ရဴဝွံ ကသပ်ဒှ် ကုအြ၇။ ယွံကဿပ ပ္ဍဲအခိၚ်ဂှ် သၟိၚ်အိန် တီကေတ်ကသပ်စိုတ်အဲ နကဵုစိုတ်ဇကုတုဲ ခါဲတဴ ဍာ်ကၟာ နကဵုတဲတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်လပိုက်ကြာတ်ကြဴ ယာတ်သ္ၚာပံသုကူပ္ဍဲဍာ်ကၟာဝွံညိ” ရဴဝွံ ဂရၚ်ပတီအဲရ။ ယွံကဿပ ဍာ်ကၟာဂှ် သၟိၚ်အိန် ဂပ်ဝ်ခါဲလဝ် နကဵုတဲရ။
ယွံကဿပ “မုရဴပ္ဍဲဌာန်မွဲ အဲ သ္ဂောံချိုန်ပတ် ယာတ်သ္ၚာပံသုကူရော?” ရဴဝွံ ကသပ်ဒှ်ကုအဲရ။ ယွံကဿပ ပ္ဍဲအခိၚ်ဂှ် သၟိၚ်အိန် တီကေတ်ကသပ်စိုတ်အဲ နကဵုစိုတ်ဇကုတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်ချိုန်ပတ် ယာတ်သ္ၚာပံသုကူ ပ္ဍဲတၟံလးမဇၞော်ဝွံညိ” ရဴဝွံ ဖျေံစွံလဝ် တၟံလးမဇၞော်ရ။ ယွံကဿပ တၟံလးဂှ် သၟိၚ်အိန် ဂပ်ဝ်ဖျေံစွံလဝ်ရ။
ယွံကဿပ “မုရဴပ္ဍဲဌာန်မွဲ အဲ သ္ဂောံလ္ၜက်တုဲ ဝတ်ယာတ်သ္ၚာပံသုကူရော?” ရဴဝွံ ကသပ်ဒှ် ကုအဲရ။ ယွံကဿပ ပ္ဍဲအခိၚ်ဂှ် ဒေဝတဴပၟၚ်တၞံဗလဲဍာ် တီကေတ်ကသပ်စိုတ်အဲ နကဵုစိုတ်ဇကုတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ လ္ၜက်ပ္ဍဲတၞာၚ်ဗလဲဍာ်ဝွံတုဲ ဩဝ်ဝတ်ညိ” ရဴဝွံ ကဵုတၞၚ်ဗလဲဍာ်လၟောဝ်လကဲစှ်ေရ၊ ယွံကဿပ တၞာၚ်ဗလဲဍာ်ဂှ် လၟောဝ်ကလဲစှ်ေဇရေၚ်တဲရ။
ယွံကဿပ “မုရဴပ္ဍဲဌာန်မွဲ အဲ သ္ဂောံလလိုဟ်ပၠး ယာတ်သ္ၚာပံသုကူရော?” ရဴဝွံ ကသပ်ဒှ် ကုအဲရ။ ယွံကဿ ပ္ဍဲအခိၚ်ဂှ် သၟိၚ်အိန် တီကေတ်ကသပ်စိုတ်အဲ နကဵုစိုတ်ဇကုတုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်လလိုဟ်ပၠး ယာတ်သ္ၚာပံသုကူ ပ္ဍဲတၟံလးမဇၞော်ဝွံညိ” ရဴဝွံ ဖျေံစွံလဝ် တၟံလးမဇၞော်ဝွံရ။ ယွံကဿပ တၟံလးဂှ် သၟိၚ်အိန် ဂပ်ဝ်ဖျေံစွံလဝ်ရ။
ပ္ဍဲအခိၚ်ဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ သၟိၚ်အိန်မဂွံအလဵုအသဳဒေဝတဴဂမၠိုၚ်လေဝ် သ္ဒးသ္ပပတုဲ ဝတ်ဇၞော်သၟတ်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဂှ် ကုရသိဥရုဝေလကဿပရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပပြဘိုဂ်ပိဏ္ဍပါတ် ရာသိဥရုဝေလကဿပတုဲ သ္ပဒတဴဒၟံၚ် ပ္ဍဲသပိုဟ်ဂြိုပ်ဂှ်ဟေၚ်ရ။
ပ္ဍဲအခိၚ်ဂှ် ရသိဥရုဝေလကဿပ ပ္ဍဲအခိၚ်ကလိလောန်အာဗ္တံဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ “ယွံခမဳဇၞော် ဒးအခိၚ်ရ၊ ပဠေဝ်ပဠေတ်လဝ်ပိဏ္ဍပါတ်တုဲရ” ရဴဝွံ ဟီုလၟိၚ်ဒးအခိၚ် ကုတဳလမၞုံပိုဉ်ကျာ်တြဲရ။
“ယွံကဿပ တၠအဲ ဩဝ်အာကၠာညိ၊ အဲဗက်ကၠုၚ်ဏောၚ်” ရဴဝွံ သ္ဂးတုဲ ဗလးကၠေံရသိဥရုဝေလကဿပတုဲမ္ဂး ယြဴဟိုတ်နူတၞံကြေၚ်ဇမြဟ်မွဲ တကအ်ဇမ္ဗူဒိဗ် ပြာကဋ်ရ၊ ဂိုၚ်ကေတ်နၚ်သတ်ကြေၚ် နူတၞံကြေၚ်ဇမြဟ်ဂှ်တုဲမ္ဂး ကၠုၚ်ဗွဲကိုပ်ကၠာတုဲ ဂဇအ်ဒၟံၚ်ပ္ဍဲရုၚ်ပၟတ်ရ။
ရသိဥရုဝေလကဿပ ညာတ်ဒး တဳလမၞုံပိုဉ်ကျာ်တြဲ မဂဇအ်ဒၟံၚ်ပ္ဍဲရုၚ်ပၟတ်တုဲ “ယွံခမဳဇၞော် တၠအဲ မုရဴနဂၠံၚ်တရဴမွဲ က္ညကၠုၚ်ရော? အဲကလေၚ်ကၠုၚ် ဗွဲကိုပ်ကၠာ တၠအဲရ၊ တၠအဲဂှ် စိုပ်ဗွဲကိုပ်ကၠာတုဲ ဂဇအ်ဒၟံၚ်ပ္ဍဲရုၚ်ပၟတ်ရ” ရဴဝွံ သ္ဂးကဵုတဳလမၞုံပိုဉ်ကျာ်တြဲရ။
ယွံကဿပ အဲဗလးကၠေံ တၠအဲတုဲ ယြဴဟိုတ်နူတၞံကြေၚ်ဇမြဟ်မွဲ တကအ်ဇမ္ဗူဒိဗ်ပြာကဋ်ရ၊ ဂိုၚ်ကေတ်နၚ်သတ်ကြေၚ် နူတၞံကြေၚ်ဇမြဟ်ဂှ်တုဲမ္ဂး ကၠုၚ်ဗွဲကိုပ်ကၠာတုဲ ဂဇအ်ဒၟံၚ်ပ္ဍဲရုပ်ပၟတ်ရ။
ယွံကဿပ သတ်ကြေၚ်ဇမြဟ်ဝွံ ဍိုၚ်ပေၚ်တဴကေုာံသာ် သၟူအမြာဲရှ်သာ်ရ၊ ယဝ်နွံပၟိက်မ္ဂး ဩဝ်ပြဘိုဂ်စဟာပ်ညိ ရဴဝွံ သ္ဂးရ။ ယွံခမဳဇၞော် ဒေါံရ၊ သတ်ဂှ်တုန် ထေက်ကြိုက်ကဵုကုတၠအဲဟေၚ်ရ၊ တၠအဲဟေၚ် ဩဝ်သ္ပပြဘိုဂ် သတ်ဂှ်ညိ ရဴဝွံ သ္ဂးရ။ ပ္ဍဲကြဴနူဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ခမဳဇၞော် အဲဗလးကၠေံအဲ ဗွဲကိုပ်ကၠာတုဲ ယြဴဟိုတ်နူတၞံကြေၚ်ဇမြဟ်မွဲ တကမ်ဇမ္ဗူဒိဗ် ပြာကဋ်ရ၊ ဂိုၚ်ကေတ်နၚ်သတ်ကြေၚ် နူတၞံကြေၚ်ဇမြဟ်ဂှ်တုဲမ္ဂး ကၠုၚ်ဗွဲကိုပ်ကၠာတုဲ ဂဇအ်ဒၟံၚ် ပ္ဍဲရုၚ်ပၟတ်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ သ္ပပြဘိုဂ်ပိဏ္ဍပါတ် ရသိဥရုဝေလကဿပတုဲ သ္ပဒတဴဒၟံၚ် ပ္ဍဲသပိုဟ်ဂြိုပ်ဂှ်ဟေၚ်ရ။
၄၅။ ပ္ဍဲအခိၚ်ဂှ် ရသိဥရုဝေလကဿပ ပ္ဍဲအခိုၚ်ကလိလောန်အာဗ္တံဂှ် ပြာပ်အာဇရေၚ်တဳလမၞုံပိုဉ်ကျာ်တြဲတုဲ “ယွံခမဳဇၞော် ဒးအခိၚ်ရ၊ ပဠေဝ်ပဠေတ်လဝ်ပိဏ္ဍပါတ်တုဲရ” ရဴဝွံ ဟီုလၟိၚ်ဒးအခိၚ် ကုတဳလမၞုံပိုဉ်ကျာ်တြဲရ။ “ယွံကဿပ တၠအဲ ဩဝ်အာကၠာညိ၊ အဲဗက်ကၠုၚ်ဏောဝ်” ရဴဝွံ သ္ဂးတုဲ ဗလးကၠေံရသိဥုရုဝေလကဿပတုဲမ္ဂး ယြဴဟိုတ်နူတၞံကြေၚ်ဇမြဟ်မွဲ တကအ်ဇမ္ဗူဒိဗ်ပြာကဋ်ရ၊ ပ္ဍဲဇရေၚ်တၞံကြေၚ်ဇမြဟ်ဂှ် တၞံကြုက်နွံရ ။ ပ ။
ပ္ဍဲဇရေၚ်တၞံကြေၚ်ဇမြဟ်ဂှ် တၞံတလုဲနွံရ ။ ပ ။
ပ္ဍဲဇရေၚ်တၞံကြေၚ်ဇမြဟ်ဂှ် တၞံဂမောဝ်နွံရ ။ ပ ။
က္ညတိုန်အာ ဍုၚ်သၟဝ်တာဝတိံတုဲ ဂိုၚ်ကေတ်နၚ် ကဴဗပေၚ်ပါရကဇာတ်တုဲမ္ဂး ကၠုၚ်ဗွဲကိုပ်ကၠာတုဲ ဂဇအ်ဒၟံၚ်ပ္ဍဲရုၚ်ပၟတ်ရ။ ရသိဥရုဝေလကဿပ ညာတ်ဒး တဳလမၞုံပိုဉ်ကျာ်တြဲ မဂဇအ်ဒၟံၚ်ပ္ဍဲရုၚ်ပၟတ်တုဲ “ယွံခမဳဇၞော် တၠအဲ မုရဴနဂၠံၚ်တရဴမွဲ က္ညကၠုၚ်ရော? အဲကလေၚ်ကၠုၚ်ဗွဲကိုပ်ကၠာ တၠအဲရ၊ တၠအဲဂှ် စိုပ်ဗွဲကိုပ်ကၠာတုဲ ဂဇအ်ဒၟံၚ်ပ္ဍဲရုၚ်ပၟတ်ရ” ရဴဝွံ သ္ဂးကဵု တဳလမၞုံပိုဉ်ကျာ်တြဲရ။
ယွံကဿပ အဲဗလးကၠေံ တၠအဲတုဲ က္ညတိုန်အာ ဍုၚ်သွဝ်တာဝတိံတုဲ ဂိုၚ်ကေတ်နၚ်ကဴဗပေၚ်ပါရကဇာတ်တုဲမ္ဂး စိုပ်ဗွဲကိုပ်ကၠာတုဲ ဂဇအ်ဒၟံၚ်ပ္ဍဲရုၚ်ပၟတ်ရ။ ယွံကဿပ ကဴဗပေၚ်ပါရကဇာတ်ဝွံ ဍိုက်ပေၚ်တဴကေုာံသာ်ရ၊ သၟူအမြာဲခိုဟ်ရ၊ ယဝ်နွံပၟိက်မ္ဂး ဩဝ်ဂိုၚ်ကေတ်ညိ ရဴဝွံ (သ္ဂးရ)။ ယွံခမဳဇၞော် ဒေါဴရ၊ ထေက်ကြိုက်ကဵု ကုတၠအဲဟေၚ်ရ၊ တၠအဲဟေၚ် ဩဝ်ဂိုၚ်ကေတ်ကဴဗပေၚ်ပါရကဇာတ်ဂှ်ညိ ရဴဝွံ သ္ဂးရ။
ပ္ဍဲကြဴနူဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ခမဳဇၞော် အဲဗလးကၠေံအဲဗွဲကိုပ်ကၠာတုဲ က္ညတိုန်အာ ဍုၚ်သွဝ်တာဝတိံတုဲ ဂိုၚ်ကေတ်နၚ် ကဴဗပေၚ်ပါရကဇာတ်တုဲမ္ဂး စိုပ်ဗွဲကိုပ်ကၠာတုဲ ဂဇအ်ဒၟံၚ်ပ္ဍဲရုၚ်ပၟတ်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။
၄၆။ ပ္ဍဲအခိၚ်ဂှ် ရသိဂမၠိုၚ် မမိက်ကၠောန်ၜိုတ်ပၟတ်ဂှ် ဟွံသၟဟ်ရထ တၞဟ်နကရေက်အှော်အိုတ်ရ။ ပ္ဍဲအခိၚ်ဂှ် “အဆက်ဨကန် ကြက်တန်ဒှ်ဣဒ္ဓိကြဳဇှ်အာနုဘဴ ခမဳဇၞော်ရ၊ ဟိုတ်နူဣဒ္ဓိကြဳဇှ်အာနုဘဴဂှ် ပိုဲညးဂမၠိုၚ် ဟွံသၟဟ်ရထ တၞဟ်နကရေက်အှော်ဂမၠိုၚ်အိုတ်ရ” ရဴဝွံ ကသပ်ဒှ် ကုရသိဂမၠိုၚ်ဂှ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံကဿပ မိက်ကဵုအှော်ဂမၠိုၚ်ဒကးအိုတ်ဟာ” ရဴဝွံ သ္ဂးကဵုရသိဥရုဝေလကဿပရ။ ယွံခမဳဇၞော် မိက်ကဵုဒကးအိုတ်ရ ရဴဝွံ (သ္ဂးရ)။ အှော်ဂမၠိုၚ်မသုန်ကၠံ ဗၞတ်မွဲအလန်ဓဝ်ဟေၚ် ဒကးအိုတ်ရ။
ပ္ဍဲကြဴနူဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ အှော်ဂမၠိုၚ်ဂှ်လေဝ် (ဗၞတ်မွဲအလန်ဓဝ်ဟေၚ်) ကဵုဒကးမာန်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။
၄၇။ ပ္ဍဲအခိၚ်ဂှ် ရသိဂမၠိုၚ် မမိက်ကၠောန်ၜိုတ်ပၟတ်ဂှ် ဟွံသၟဟ်ရထ တၞဟ်နကဵုပၟတ်ဂဵုအိုတ်ရ။ ပ္ဍဲအခိၚ်ဂှ် “အဆက်ဨကန် ကြက်တန်ဒှ်ဣဒ္ဓိကြဳဇှ်အာနုဘဴ ခမဳဇၞော်ရ၊ ဟိုတ်နူဣဒ္ဓိကြဳဇှ်အာနုဘဴဂှ် ပိုဲညးဂမၠိုၚ် ဟွံသၟဟ်ရထ တၞဟ်နကဵုပၟတ်ဂဵုအိုတ်ရ” ရဴဝွံ ကသပ်ဂှ် ကုရသိဂမၠိုၚ်ဂှ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံကဿပ မိက်ကဵုပၟတ်ဂဵုအိုတ်ဟာ” ရဴဝွံ သ္ဂးကဵုရသိဥရုဝေလကဿပရ။ ယွံခမဳဇၞော် မိက်ကဵုပၟတ်ဂဵုအိုတ်ရ ရဴဝွံ (သ္ဂးရ)။ ပၟတ်ဂမၠိုၚ်မသုန်ကၠံ မွဲဒမြိပ်ဓဝ်ဟေၚ် ဂဵုတိုန်အိုတ်ရ။ ပ္ဍဲကြဴနူဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ပၟတ်ဂမၠိုၚ်ဂှ်လေဝ် (မွဲဒမြိပ်ဓဝ်ဟေၚ်) ကဵုဂဵုတိုန်မာန်ရ၊ ၜိုန်ဂှ် ညံၚ်ရဴအဲကီု တၠအရှန်တုန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။
၄၈။ ပ္ဍဲအခိၚ်ဂှ် ရသိဂမၠိုၚ် ကၠောန်ၜိုတ်ပၟတ်တုဲပ္ဍဲကြဴ ဟွံသၟဟ်ရထ တၞဟ်နကဵုပလိုတ်ပၟတ်အိုတ်ရ။ ပ္ဍဲအခိၚ်ဂှ် “အဆက်ဨကန် ကြက်တန်ဒှ်ဣဒ္ဓိကြဳဇှ်အာနုဘဴ ခမဳဇၞော်ရ၊ ဟိုတ်နူဣဒ္ဓိကြဳဇှ်အာနုဘဴဂှ် ပိုဲညးဂမၠိုၚ် ဟွံသၟဟ်ရထ တၞဟ်နကဵုပလိုတ်ပၟတ်အိုတ်ရ” ရဴဝွံ ကသပ်ဒှ်ကုရသိဂမၠိုၚ်ဂှ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံကဿပ မိက်ကဵုပလိုတ်ပၟတ်အိုတ်ဟာ” ရဴဝွံ သ္ဂးကဵု ရသိဥရုဝေလကဿပရ။ ယွံခမဳဇၞော် မိက်ကဵုပလိုတ်ပၟတ်အိုတ်ရ ရဴဝွံ (သ္ဂးရ)။ ပၟတ်ဂမၠိုၚ်မသုန်ကၠံ မွဲဒမြိပ်ဓဝ်ဟေၚ် ပၠိုတ်အာအိုတ်ရ။ ပ္ဍဲကြဴနူဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ပၟတ်ဂမၠိုၚ်ဂှ်လေဝ် (မွဲဒမြိပ်ဓဝ်ဟေၚ်) ကဵုပၠိုတ်မာန်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။
၄၉။ ပ္ဍဲအခိၚ်ဂှ် ရသိဂမၠိုၚ် ပ္ဍဲဗ္တံဂမၠိုၚ်ဒ္စာံဗ္တံ အကြာဥတုသ္ကတ်မၜိုဟ်ဂံက် အခိၚ်လတိုပ်စှ်ေထတ်ဂှ် ဗၠိုပ်လေဝ်ဗၠိုပ် ပ္ဍဲကြုၚ်နေရဥ္ဇရာအိုတ်ရ၊ မံက်လေဝ်မံက်တိုန်အိုတ်ရ၊ ပွမဗၠိုပ်ပွမမံက်တိုန်လေဝ် သ္ပအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ နိမိတ်ဗဒှ်လဝ် ပၟတ်ဖဴပယျေဝ်ဂမၠိုၚ်မသုန်ကၠံရ။ ရသိဂမၠိုၚ်ဂှ် တိုန်ကၠုၚ်နူဍာ်အိုတ်တုဲ ဖအၚ်တဴ ပ္ဍဲပၟတ်ဖဴပယျေဝ်ဂမၠိုၚ်မသုန်ကၠံဂှ်အိုတ်ရ။ ပ္ဍဲအခိၚ်ဂှ် “အဆက်ဨကန် ကြက်တန်ဒှ်ဣဒ္ဓိကြဳဇှ်အာနုဘဴ ခမဳဇၞော်ရ၊ နကဵုဣဒ္ဓိကြဳဇှ်အာနုဘဴဂှ် ဂပ်ဝ်နိမိက်ဗဒှ်လဝ် ပၟတ်ဖဴပယျေဝ်ဂမၠိုၚ် မသုန်ကၠံဝွံအိုတ်ရ” ရဴဝွံ ကသပ်ဒှ် ကုရသိဂမၠိုၚ်ဂှ်ရ။
ပ္ဍဲကြဴနူဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ နိမိတ်ဗဒှ် ပၟတ်ဖဴပယျေဝ်ဂမၠိုၚ် ဗွဲမဂၠိုၚ်မာန်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။
၅၀။ ပ္ဍဲအဃောအခိၚ်ဂှ် ဗြဲဇၞော်ဟွံသေၚ်ကဵုအခိၚ် ဂူစှ်ေကၠုၚ်ဗွဲမသကာတ်ရ၊ ဇၟောဝ်ဍာ်မဇၞော် ဒှ်တဴရ၊ ဌာန်တဳလမၞုံပိုဉ်ကျာ်တြဲ သ္ပဒတဴဒၟံၚ်ဂှ် ဍာ်ဟွံဓလီုဍိုက်ရ၊ (ဍာ်ဟွံဗၠိုက်ရ)။ ပ္ဍဲအခိၚ်ဂှ် “အဲ ပါဲကၠေံဍာ် နူပွဳပွူတုဲ သ္ဂောံကွာ်ဒၟံၚ်စၚ်္ကြမ် ပ္ဍဲလဒေါဝ်ဂၠးတိ မၠိုက်မကတဵုဒှ်ဒၟံၚ်ဟုဟ်ဟုဟ်မ္ဂး ခိုဟ်သန်ရ” ရဴဝွံ ကသပ်ဒှ် ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပါဲကၠေံဍာ် နူပွဳပွူတုဲ ကွာ်ဒၟံၚ်စၚ်္ကြမ် ပ္ဍဲလဒေါဝ်ဂၠးတိ မၠိုက်မကတဵုဒၟံၚ်ဟုဟ်ဟုဟ်ရ။
ပ္ဍဲအခိၚ်ဂှ် ရသိဥရုဝေလကဿပ “လ္ပကဵုခမဳဇၞော် ဟဳပါဗက်အာဍာ်ညိ” ရဴဝွံ မွဲဟာန်ကေုာံရသိဂမၠိုၚ်မဂၠိုၚ်ဂၠၚ် အာဌာန်တဳလမၞုံပိုဉ်ကျာ်တြဲ သ္ပဒတဴ နကဵုဂၠုၚ်ရ။
ရသိဥရုဝေလကဿပ သ္ဂောံညာတ်ကေတ် တဳလမၞုံပိုဉ်ကျာ်တြဲ ပါဲကၠေံဍာ် နူပွဳပွူတုဲ မကွာ်ဒၟံၚ်စၚ်္ကြမ် ပ္ဍဲလဒေါဝ်ဂၠးတိ မၠိုက်မကတဵုဒၟံၚ်ဟုဟ်ဟုဟ်တုဲ “ယွံခမဳဇၞော် ညးမဒတဴဒၟံၚ်ဝွံတုန် ဒှ်တၠအဲဟေၚ်ဟာ” ရဴဝွံ သၟာန်ရ။ “ယွံကဿပ ညးမဒတဴဒၟံၚ်ဝွံတုန် ဒှ်အဲဟေၚ်ရ” ရဴဝွံ သ္ဂးတုဲ တဳလမၞုံပိုဉ်ကျာ်တြဲ ကလာၚ်တိုန်အကးတုဲ တန်တဴဒၟံၚ်ပ္ဍဲဂၠုၚ်ရ။
နူကြဴနူဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ဍာ်ဂှ်လေဝ် ကဵုဟဳအာဟွံမာန်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ” ရဴဝွံ ကသပ်ဒှ် ကုရသိဥရုဝေလကဿပရ။
၅၁။ ပ္ဍဲအခိၚ်ဂှ် “ခမဳဇၞော် ဗွဲစၟတ် ဣဒ္ဓိကြဳဇှ်ဇၞော်ရ၊ အာနုဘဴဇၞော်ရ၊ ၜိုန်ဂှ် ညံၚ်ရဴအဲကီု တၠအရှန် ဟွံသေၚ်ဟေၚ်ရ ရဴဝွံ ကသပ်ဒှ်ဒၟံၚ် ကုတြုံမလ္ၚုသၟးဝွံတုန် လအ်လကာဖာရ၊ အဲ ယဝ်သ္ဂောံကဵုရသိဥရုဝေလကဿပဝွံ သမ္ၚံက်သမ္ၚာတ်စိုတ်မ္ဂး ခိုဟ်သန်ရ” ရဴဝွံ ကသပ်ဒှ်ကုတဳလမၞုံပိုဉ်ကျာ်တြဲရ။
ပ္ဍဲကြဴနူဂှ် တဳလမၞုံပိုဉ်ကျာ်တြဲဂှ် “ယွံကဿပ တၠအဲတုန် တၠအရှန်လေဝ် ဟွံသေၚ်ရ၊ ညးဍိုက်ပေၚ်တဴကေုာံအရဟတ္တမဂ်လေဝ် ဟွံသေၚ်ရ၊ ဒ္ဂေတ်မထေက်ကဵုဒှ် သွက်ဂွံဒှ်တၠအရှန်ကီု သွက်ဂွံဍိုက်ပေၚ်တဴကေုာံအရဟတ္တမဂ်ကီုလေဝ် ဟွံမွဲကုတၠအဲရ” ရဴဝွံ သ္ဂးကဵုရသိဥရုဝေလကဿပရ။ ပ္ဍဲအခိၚ်ဂှ် ရသိဥရုဝေလကဿပ မာဖျေံနကၞိပ် ပ္ဍဲဂၠးဇိုၚ်တဳလမၞုံပိုဉ်ကျာ်တြဲဂမၠိုၚ်တုဲ “ယွံတဳလမၞုံပိုဉ် အဲဍိက် မိက်ကလိဂွံဒဒှ်ထပိုဲ ဒဒှ်ခမဳပယျၚ် ပ္ဍဲဇရေၚ်တဳလမၞုံပိုဉ်ကျာ်တြဲရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။
ယွံကဿပ တၠအဲတုန် ဒှ်ညးက္ဍိုပ်သကိုပ်စၞောန်ထ္ၜးဂၠံၚ် ဝေတ်ဒၠောံဗတောန် ရသိဂမၠိုၚ်မသုန်ကၠံတုဲ ညးဇၞော်သကိုပ်သက ကၞောတ်အထောဋ်လေဝ် ဒှ်ရ၊ ရသိဂမၠိုၚ်ဂှ်လေဝ် ဩဝ်ဟီုလဴပတီညိ၊ ရသိဂမၠိုၚ်ဂှ် အတိုၚ်ထေၚ်ဂှ် ကြက်သ္ပအိုတ်ရ ရဴဝွံ (သ္ဂးရ)။
ပ္ဍဲကြဴနူဂှ် ရသိဥရုဝေလကဿပ ပြာပ်အာဇရေၚ် ရသိဂမၠိုၚ်ဂှ်တုဲ “ယွံရသိတအ် အဲ မိက်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဇၞော်ရ၊ တၠနာဲရသိဂမၠိုၚ် အတိုၚ်ထေၚ်ဂှ် ဩဝ်သ္ပအိုတ်ညိ” ရဴဝွံ ဟီုသ္ဂးရ။ ယွံတၠရသိ ပိုဲဍိက်တအ်ညးဂမၠိုၚ် လျုၚ်ဇြုၚ်သ္ဍိုက်ကၠုၚ်ဒၟံၚ် ပ္ဍဲခမဳဇၞော်ဂှ် လအ်လကာဖာရ၊ တၠရသိ ယဝ်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဇၞော်မ္ဂး ပိုဲညးဂမၠိုၚ်သီုဖအိုတ်ဟေၚ် ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဇၞော်အိုတ်ရ ရဴဝွံ (ဟီုသ္ဂးအိုတ်ရ)။
ပ္ဍဲအခိၚ်ဂှ် ရသိဂမၠိုၚ် ဖဳထောံ အရပ်စပ်သုၚ်စောဲရသိဂမၠိုၚ် မပ္တံကဵုသော် သော်ဝန်ဇဋာ ဒလေၚ်ဂၠေၚ်ပရိက္ခရာ ဗွုက်ပၟတ်နော်ယံက် ပ္ဍဲဍာ်တုဲမ္ဂး ပြာပ်အာဇရေၚ်ဌာန် တဳလမၞုံပိုဉ်ကျာ်တြဲမၞုံတေံအိုတ်တုဲ မာဖျေံနကၞိပ် ပ္ဍဲဂၠးဇိုၚ်တဳလမၞုံပိုဉ်ကျာ်တြဲဂမၠိုၚ်တုဲ “ယွံတဳလမၞုံပိုဉ် ပိုဲဍိက်တအ်ညးဂမၠိုၚ် မိက်ကလိဂွံဒဒှ်ထပိုဲ ဒဒှ်ခမဳပယျၚ် ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ” ရဴဝွံ ဂရၚ်ပတီအိုတ်ရ။ “ယွံခမဳတအ် ဩဝ်ကၠုၚ်အိုတ်ညိ၊ ဂပ်ဝ်တွံလဝ် ဓရ် ဗွဲမဒးရးတုဲရ၊ တၞဟ်နသ္ပကၠေံလအိတ်ဒဒိုခ်ဝဋ် ဩဝ်ဒ္ဂေတ်လ္ၚတ်ဒ္ဂေတ်မပြဲ ဗွဲမ္ဒးရးအိုတ်ညိ” ရဴဝွံ တဳလမၞုံပိုဉ်ကျာ်တြဲ သ္ဂးရ။ ဂလာန်ဂှ်ဟေၚ် တဳလပိုဉ်ဂမၠိုၚ်ဂှ် ဒှ်အာခမဳပယျၚ်တုဲရောၚ်။
၅၂။ ရသိနဒဳကဿပ ညာတ်ဒး အရပ်စပ်သုၚ်စောဲရသိဂမၠိုၚ် မပ္တံကဵုသော် သော်ဝန်ဇဋာ ဒလေၚ်ဂၠေၚ်ပရိက္ခရာ ဗွုတ်ပၟတ်နော်ယံက် မဟဳကၠုၚ်ပ္ဍဲဍာ်မ္ဂး “ကုကောဂၠုအဲ လ္ပကဵုဒှ်ပရိုက်ဘဲ ညိ” ရဴဝွံ (ကသပ်ဒှ်တုဲ) “ဩဝ်အာအိုတ်ညိ ဩဝ်သ္ပစဵုကဵုမတီ (ညံၚ်ဂွံတီပရူပရာ) ကောဂၠုအဲအိုတ်ညိ” ရဴဝွံ ဟီုသ္ဂးတုဲ ဖအောဝ်ဗလးဏာ ရသိဂမၠိုၚ်ရ။
အလဵုဇကုလေဝ် မွဲဟာန်ကေုာံရသိဂမၠိုၚ်ပိကၠံ ပြာပ်အာဇရေၚ် တဳလပိုဉ်ဥရုဝေလကဿပတုဲ “ယွံကဿပ ဒဒှ်ခမဳဝွံ ပြသန်ဟာ” ရဴဝွဴ (သ္ဂး) ကဵုတဳလပိုဉ်ဥရုဝေလကဿပရ။ ဨ ယွံကောန်တၠ ဒဒှ်ခမဳဝွံ ပြဲသန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ရသိဂမၠိုၚ် ဖဳထောံ အရပ်စပ်သုၚ်စောဲရသိဂမၠိုၚ် မပ္တံကဵုသော် သော်ဝန်ဇဋာ ဒလေၚ်ဂၠေၚ်ပရိက္ခရာ ဗွုတ်ပၟတ်နော်ယံက် ပ္ဍဲဍာ်တုဲမ္ဂး ပြာပ်အာဇရေၚ် တဳလမၞုံပိုဉ်ကျာ်တြဲတုဲ မာဖျေံနကၞိပ် ပ္ဍဲဂၠးဇိုၚ်တဳလမၞုံပိုဉ်ကျာ်တြဲဂမၠိုၚ်တုဲ “ယွံတဳလမၞုံပိုဉ် ပိုဲဍိက်တအ် ညးဂမၠိုၚ် မိက်ကလိဂွံဒဒှ်ထပိုဲ ဒဒှ်ခမဳပယျၚ် ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ” ရဴဝွံ ဂရၚ်ပတီအိုတ်ရ။
“ယွံခမဳတအ် ဩဝ်ကၠုၚ်အိုတ်ညိ၊ ဂပ်ဝ်တွံလဝ်ဓရ် ဗွဲမ္ဒးရးတုဲရ၊ တၞဟ်နသ္ပကၠေံလအိတ်ဒဒိုခ်ဝဋ် ဩဝ်ဒ္ဂေတ်လ္ၚတ် ဒ္ဂေတ်မပြဲ ဗွဲမ္ဒးရးအိုတ်ညိ” ရဴဝွံ တဳလမၞုံပိုဉ်ကျာ်တြဲ သ္ဂးရ။ ဂလာန်ဂှ်ဟေၚ် တဳလပိုဉ်ဂမၠိုၚ်ဂှ် ဒှ်အာခမဳပယျၚ်တုဲရောၚ်။
၅၃။ ရသိဂယာကဿပ ညာတ်ဒး အရပ်စပ်သုၚ်စောဲရသိဂမၠိုၚ် မပ္တံကဵုသော် သော်ဝန်ဇဋာ ဒလေၚ်ဂၠေၚ်ပရိက္ခရာ ဗွုတ်ပၟတ်နော်ယံက် မဟဳကၠုၚ်ပ္ဍဲဍာ်မ္ဂး “ကုကောဂၠုအဲဂမၠိုၚ် လ္ပကဵုဒှ်ပရိုက်ဘဲညိ” ရဴဝွဴ (ကသပ်ဒှ်တုဲ) “ဩဝ်အာအိုတ်ညိ ဩဝ်သ္ပစဵုကဵုမတီ (ညံၚ်ဂွံတီပရူပရာ) ကောဂၠုအဲဂမၠိုၚ်အိုတ်ညိ” ရဴဝွံ ဟီုသ္ဂးတုဲ ဖအောဝ်ဗလးဏာ ရသိဂမၠိုၚ်ရ။
အလဵုဇကုလေဝ် မွဲဟာန်ကေုာံရသိဂမၠိုၚ်ၜါကၠံ ပြာပ်အာဇရေၚ် တဳလပိုဉ်ဥရုဝေလကဿပတုဲ “ယွံကဿပ ဒဒှ်ခမဳဝွံ ပြဲသန်ဟာ” ရဴဝွဴ (သ္ဂး) ကဵုတဳလပိုဉ်ဥရုဝေလကဿပရ။ ဨ ယွံကောန်တၠ ဒဒှ်ခမဳဝွံ ပြဲသန်ရ ရဴဝွံ (သ္ဂးရ)။
ပ္ဍဲအခိၚ်ဂှ် ရသိဂမၠိုၚ် ဖဳထောံ အရပ်စပ်သုၚ်စောဲရသိဂမၠိုၚ် မပ္တံကဵုသော် သော်ဝန်ဇဋာ ဒလေၚ်ဂၠေၚ်ပရိက္ခရာ ဗွုတ်ပၟတ်နော်ယံက် ပ္ဍဲဍာ်တုဲမ္ဂး ပြာပ်အာဇရေၚ် တဳလမၞုံပိုဉ်ကျာ်တြဲတုဲ မာဖျေံနကၞိပ် ပ္ဍဲဂၠးဇိုၚ်တဳလမၞုံပိုဉ်ကျာ်တြဲဂမၠိုၚ်တုဲ “ယွံတဳလမၞုံပိုဉ် ပိုဲဍိက်တအ် ညးဂမၠိုၚ် မိက်ကလိဂွံဒဒှ်ထပိုဲ ဒဒှ်ခမဳပယျၚ် ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ” ရဴဝွံ ဂရၚ်ပတီအိုတ်ရ။
“ယွံခမဳတအ် ဩဝ်ကၠုၚ်အိုတ်ညိ၊ ဂပ်ဝ်တွံလဝ်ဓရ် ဗွဲမ္ဒးရးတုဲရ၊ တၞဟ်နသ္ပကၠေံလအိတ်ဒဒိုခ်ဝဋ် ဩဝ်ဒ္ဂေတ်လ္ၚတ်ဒ္ဂေတ်မပြဲ ဗွဲမ္ဒးရးအိုတ်ညိ” ရဴဝွံ တဳလမၞုံပိုဉ်ကျာ်တြဲ သ္ဂးရ။ ဂလာန်ဂှ်ဟေၚ် တဳလပိုဉ်ဂမၠိုၚ်ဂှ် ဒှ်အာခမဳပယျၚ်တုဲရောၚ်။
ဟိုတ်နူအဓိဋ္ဌာန် တဳလမၞုံပိုဉ်ကျာ်တြဲ အှော်ဂမၠိုၚ်မသုန်ကၠံ ဟွံဒကးအိုတ်ရ။ (၅၀၀)
ဒကးအိုတ်ရ။ (၅၀၀)
ပၟတ်ဟွံဂဵုအိုတ်ရ။ (၅၀၀)
ပလိုတ်ပၟတ်ဟွံမာန်အိုတ်ရ။ (၅၀၀)
ပၟတ်ပၠိုတ်အိုတ်ရ။ (၅၀၀)
နိမိတ်ဗဒှ် ပၟတ်ဖဴပယျေဝ်ဂမၠိုၚ်မသုန်ကၠံတုဲ နနဲသာ်ဝွံ ဒှ်ဣဒ္ဓိပါဋိဟာဂမၠိုၚ်ပိလ္ၚီမသုန်ကၠံအိုတ်ရ။
ခဏ်ဝေတ်ဒၠောံဗတောန်ဥရုဝေလကဿပတုဲရ။
