၁၂.၂။ သုတ်အာဒိတ္တပရိယာယ

၅၄။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲဂြိုပ်ဥရုဝေလ ဗွဲမမိပ်လဟိၚ်တုဲမ္ဂး မွဲဟာန်ကေုာံခမဳမဂၠိုၚ်ဂၠၚ် ခမဳဂမၠိုၚ်လ္ၚီမဒှ်ရသိတြေံအိုတ်သီုဂှ် က္ညအာဌာန်ဂယာသဳသရ။

တဳလမၞုံပိုဉ်ကျာ်တြဲ မွဲဟာန်ကေုာံခမဳလ္ၚီ သ္ပဒတဴတန်ဒၟံၚ် ပ္ဍဲဌာန်ဂယာသဳသ ဇရေၚ်ကွာန်ဂယာဂှ်ရ။ ပ္ဋဲအခိၚ်မသ္ပဒတဴတန်ဒၟံၚ်ဂှ် တဳလမၞုံပိုဉ်ကျာ်တြဲ ကော်လၟိၚ်တိုန် ခမဳဂမၠိုၚ်ရ—

“ယွံခမဳတအ်ဓရ်အလုံအိုတ်သီု ဂဵုတူဒၟံၚ်ဗြံၚ်ဗြံၚ်ရ။ ယွံခမဳတအ် မုရဴဓရ်အလုံအိုတ်သီုမွဲ ဂဵုတူဒၟံၚ်ဗြံၚ်ဗြံၚ်ရော? မတ်ဂှ် ဂဵုတူဒၟံၚ်ဗြံၚ်ဗြံၚ်ရ၊ ရုပ်သာ်ဂမၠိုၚ် ဂဵုတူဒၟံၚ်ဗြံၚ်ဗြံၚ်အိုတ်ရ၊ စက္ခုဝိညာဏ် ‘ပွမတီမတ်’ ဂှ် ဂဵုတူဒၟံၚ်ဗြံၚ်ဗြံၚ်ရ၊ စက္ခုသမ္ဖဿ ‘ပွမတၟတ်ဒွံမတ်’ ဂှ် ဂဵုတူဒၟံၚ်ဗြံၚ်ဗြံၚ်ရ၊ ပွမဒုၚ်စသိုၚ်တသိုခ်ကီု ပွမဒုၚ်စသိုၚ်ဒဒိုခ်ကီု ပွမဒုၚ်စသိုၚ် ဟွံသေၚ်ကဵုဒဒိုခ် ဟွသေၚ်ကဵုတသိုခ်ကီု မက္တဵုဒှ်ဟိုတ်နူဟိုတ်မတွံဂး ပွမတၟတ်ဒွံမတ်ဂှ်လေဝ် ဂဵုတူဒၟံၚ်ဗြံၚ်ဗြံၚ်ရ။

ဂဵုတူဒၟံၚ်ဗြံၚ်ဗြံၚ် မုရဴနမွဲရော? ဂဵုတူဒၟံၚ်ဗြံၚ်ဗြံၚ် နကဵုပၟတ် ‘ရာဂ’ ပွမစောဲစပ် နကဵုပမတ် ‘ဒေါသ’ ပွမထေဲပၞတ် နကဵုပၟတ် ‘မောဟ’ ပွမဝိဝိၚ်ရ၊ ဂဵုတူဒၟံၚ်ဗြံၚ်ဗြံၚ် နပွမဒးတန်ပဋိသန္ဓိ ပွမဒးဗျု ပွမဒးချိုတ် ပွမဒးစံၚ်တူ ပွမဒးလရိုအ်ယာံ ပွမဒးဒှ်ဒဒိုခ်ဇကု ပွမဒးဒှ်ဒဒိုခ်စိုတ် ပွမဒးစံၚ်တူပူဆာ ဗွဲမသကာတ်မြဟ်ဂမၠိုၚ်ရ ရဴဝွံ အဲတွံရ။

ကတောဝ်ဂှ် ဂဵုတူဒၟံၚ်ဗြံၚ်ဗြံၚ်ရ၊ ရမျာၚ်ဂမၠိုၚ် ဂဵုတူဒၟံၚ်ဗြံၚ်ဗြံၚ်အိုတ်ရ ။ ပ ။

မုဟ်ဂှ် ဂဵုတူဒၟံၚ်ဗြံၚ်ဗြံၚ်ရ၊ သၟူအမြာဲဂမၠိုၚ် ဂဵုတူဒၟံၚ်ဗြံၚ်ဗြံၚ်အိုတ်ရ ။ ပ ။

လတာ်ဂှ် ဂဵုတူဒၟံၚ်ဗြံၚ်ဗြံၚ်ရ၊ တၟတ်ဒွံလုက်စုက်ဂမၠိုၚ် ဂဵုတူဒၟံၚ်ဗြံၚ်ဗြံၚ်အိုတ်ရ ။ ပ ။

စိုတ်ဂှ် ဂဵုတူဒၟံၚ်ဗြံၚ်ဗြံၚ်ရ၊ အာရီုစိုတ်ဂမၠိုၚ် ဂဵုတူဒၟံၚ်ဗြံၚ်ဗြံၚ်အိုတ်ရ၊ ပွမတီစိုတ်ဂှ် ဂဵုတူဒၟံၚ်ဗြံၚ်ဗြံၚ်ရ၊ ပွမတၟတ်ဒွံစိုတ်ဂှ် ဂဵုတူဒၟံၚ်ဗြံၚ်ဗြံၚ်ရ၊ ပွမဒုၚ်စသိုၚ်တသိုခ်ကီု ပွမဒုၚ်စသိုၚ်ဒဒိုခ်ကီု ပွမဒုစသိုၚ် ဟွံသေၚ်ကဵုဒဒိုခ် ဟွံသေၚ်ကဵုတသိုခ်ကီု မကတဵုဒှ်ဟိုတ်နူဟိုတ်မတွံဂး ပွမတၟတ်ဒွံ စိုတ်ဂှ်လေဝ် ဂဵုတူဒၟံၚ်ဗြံၚ်ဗြံၚ်ရ။

ဂဵုတူဒၟံၚ်ဗြံၚ်ဗြံၚ် မုရဴနမွဲရော? ဂဵုတူဒၟံၚ်ဗြံၚ်ဗြံၚ် နကဵုပၟတ် ‘ရာဂ’ ပွမစောဲစပ် နကဵုပၟတ် ‘ဒေါသ’ ပွမထောဲပၞတ် နကဵုပၟတ် ‘မောဟ’ ပွမဝိဝိၚ်ရ၊ ဂဵုတူဒၟံၚ်ဗြံၚ်ဗြံၚ် နပွမဒးတန်ပဋိသန္ဓိ ပွမဒးဗျု ပွမဒးချိုတ် ပွမဒးစံၚ်တူ ပွမဒးလရိုအ်ယာံ ပွမဒးဒှ်ဒဒိုခ်ဇကု ပွမဒးဒှ်ဒဒိုခ်စိုတ် ပွမဒးစံၚ်တူပူဆာ ဗွဲမသကာတ်မြဟ်ဂမၠိုၚ်ရ” ရဴဝွံ အဲတွံရ။

ယွံခမဳတအ် ကွးအဲကျာ် မၞုံကဵုလၟိၚ်လညာတ် မမၠာ်သ္ၚေဝ်ရဴဝွံဂှ် ပ္ဍဲမတ်လေဝ် ဇအိုန်ဇရရ။ ပ္ဍဲရုပ်သာ်ဂမၠိုၚ်လေဝ် ဇအိုန်ဇရရ၊ ပ္ဍဲပွမတီမတ်လေဝ် ဇအိုတ်ဇရရ၊ ပ္ဍဲတၟတ်ဒွံမတ်လေဝ် ဇအိုတ်ဇရရ၊ ပ္ဍဲပွမဒုၚ်စသိုၚ်တသိုခ်ကီု ပွမဒုၚ်စသိုၚ်ဒဒိုခ်ကီု ပွမဒုၚ်စသိုၚ် ဟွံသေၚ်ကဵုဒဒိုခ် ဟွံသေၚ်ကဵုတသိုခ်ကီု မကတဵုဒှ်ဟိုတ်နူဟိုတ်မတွံဂး ပွမတၟတ်ဒွံမတ်ဂှ်လေဝ် ဇအိုန်ဇရရ။

ပ္ဍဲကတောဝ်လေဝ် ဇအိုတ်ဇရရ။ ပ္ဍဲရမျာၚ်ဂမၠိုၚ်လေဝ် ဇအိုန်ဇရရ ။ ပ ။

ပ္ဍဲမုဟ်လေဝ် ဇအိုန်ဇရရ။ ပ္ဍဲသၟူအမြာဲဂမၠိုၚ်လေဝ် ဇအိုတ်ဇရရ ။ ပ ။

ပ္ဍဲလတာ်လေဝ် ဇအိုန်ဇရရ။ ပ္ဍဲရှ်သာဂမၠိုၚ်လေဝ် ဇအိုန်ဇရရ ။ ပ ။

ပ္ဍဲဇကုလေဝ် ဇအိုန်ဇရရ။ ပ္ဍဲအာရီုစိုတ်ဂမၠိုၚ်လေဝ် ဇအိုန်ဇရရ၊ ပ္ဍဲပွမတီစိုတ်လေဝ် ဇအိုန်ဇရရ၊ ပ္ဍဲတၟတ်ဒွံစိုတ်လေဝ် ဇအိုတ်ဇရရ၊၊ ပ္ဍဲပွမဒုၚ်စသိုၚ်တသိုခ်ကီု ပွမဒုၚ်စသိုၚ်ဒဒိုခ်ကီု ပွမဒုၚ်စသိုၚ် ဟွံသေၚ်ကဵုဒဒိုခ် ဟွံသေၚ်ကဵုတသိုခ်ကီု မကတဵုဒှ်ဟိုတ်နူဟိုတ်မတွံဂး ပွမတၟတ်ဒွံစိုတ်ဂှ်လေဝ် ဇအိုတ်ဇရရ။

ဇအိုတ်ဇရမ္ဂး စာ်စ္ဍးနူထၞေန်စပ်ရ၊ ဟိုတ်ပွမစာ်စ္ဍးနူထၞေန်စပ်ဂှ် တိတ်ဗၠး နူကိလေသရ၊ တိတ်ဗၠးနူကိလေသမ္ဂး “တိတ်ဗၠးနူကိလောသတုဲရ” ရဴဝွံ ဉာဏ်ဒှ်ရ၊ “ပွမတန်ပဋိသန္ဓိအိုတ်အာတုဲရ၊ ဒ္ဂေတ်လ္ၚတ် ဒ္ဂေတ်မပြဲတုဲရ၊ သ္ပပတုဲကၠေံ ကိစ္စမဂ်တုဲရ၊ တၞဟ်နကိစ္စမဂ်ဝွံ ကိစ္စထေက်ကဵုသ္ပမွဲသအာၚ် ဟွံမွဲတုဲရ” ရဴဝွံ တီရဂှ် (အဲတွံရ)။

တွံတဴဓရ်ဒေသနာ အရေဝ်ပဠးသက်သက် ဟွံဖက်ကဵုဂါထာဝွံမ္ဂး စိုတ်ခမဳဂမၠိုၚ်လ္ၚီဂှ် ဟွံစောဲလာံ (မမိက်ကဵုမွဲမွဲ) တုဲ တိတ်ဗၠးနူအာသဝဂမၠိုၚ်အိုတ်တုဲရ။

သုတ်အာဒိတ္တပရိယာယတုဲရ။

ခဏ်တတိယတုဲရ။

*တၚ်သမ္တီ— သုတ်ဝွံ ပ္ဍဲပါဠိဟွံခ္ဍန်တုဲ ပ္ဍဲဗၟာခ္ဍန်လဝ်ရ၊ နွံပၟိက်ဗွဲတြးမ္ဂး လှာဲစုတ်ယၟု အာယတနတြဴညိ။