၆.၁။ ပွမတွံဓရ် ကုပဥ္စဝဝ်ဂမၠိုၚ်
၁၀။ ပ္ဍဲကြဴနူဂှ် “မုရဴညးမွဲ အဲဂွံတွံကဵုဓရ် ဗွဲကိုပ်ကၠာဂှ်ရော? မုရဴညးမွဲ ကြက်တီကေတ်ဓရ်ဝွံ ဗွဲမပြဟ်မာန်ဂှ်ရော?” ရဴဝွံ ကသပ်ကတဵုဒှ် ကုတဳလမၞုံပိုဉ်ကျာ်တြဲရ။ ပ္ဍဲကြဴနူဂှ်—
“ရးသိအာဠာရ မဒှ်တၞောဝ်ကာလာမဝွံ မၞုံကဵုပညာရ၊ စဳကၠးဆိုက်ဗဒက်ရ၊ မၞုံကဵုဉာဏ်သကေက်သကာရ၊ ကာလမလအ်လဟေၚ် မၠိုက်ကိလေသအောန်ဒၟံၚ် ပ္ဍဲမတ်ပညာရ၊ အဲဂွံတွံဓရ်ကဵု ကုရသိအာဠာရ မဒှ်တၞောဝ်ကာလာမ ဗွဲကိုပ်ကၠာမ္ဂး ခိုဟ်ရ၊ ရသိအာဠာရဂှ် ကြက်တီကေတ်ဓရ်ဝွံ ဗွဲမပြဟ်မာန်ရ” ဂှ် ကသပ်ရဴဝွံ ကတဵုဒှ် ကုတဳလမၞုံပိုဉ်ကျာ်တြဲရ။
ပ္ဍဲအခိၚ်ဂှ် ကောန်ဒေဝတဴ မဟွံထ္ၜးဇကုပြာကဋ်ဂှ် “ယွံတဳလမၞုံပိုဉ် ရသိအာဠာရမဒှ်တၞောဝ်ကာလာမဂှ် ချိုတ်တုဲ ဂွံအာထပှ်တ္ၚဲတုဲရ” ရဴဝွံ ဂရၚ်ပတီဂလာန်ဝွံရ၊ ကုတဳလမၞုံပိုဉ်ကျာ်တြဲလေဝ် “ရသိအာဠာရ မဒှ်တၞောဝ်ဒတောဝ်ကာလာမဂှ် ချိုတ်တုဲ ဂွံအာထပှ်တ္ၚဲတုဲရ” ရဴဝွံ လညာတ်ဉာဏ်ကတဵုဒှ် ပြာကဋ်ရ။
ပ္ဍဲအခိၚ်ဂှ် ကုတဳလမၞုံပိုဉ်ကျာ်တြဲဂှ် “ရသိအာဠာရ မဒှ်တၞောဝ်ကာလာမဂှ် ဟောံဗြမ်ဇၞော်ကဵုဇြဟတ်ရသွံ၊ ဟိုတ်ဍေံဟီုဂှ် ရသိအာဠာရဂှ် ယဝ်ဂွံကလၚ်ကေတ်ဓရ်ဝွံမ္ဂး တီကေတ်ဗွဲမပြဟ်မာန်ရ” ရဴဝွံ ဒှ်ဇြဟာန်ဆာန်ဍူရ။
ပ္ဍဲကြဴနူဂှ် “မုရဴညးမွဲ အဲဂွံတွံကဵုဓရ် ဗွဲကိုပ်ကၠာဂှ်ရော? မုရဴညးမွဲ ကြက်တီကေတ်ဓရ်ဝွံ ဗွဲမပြဟ်မာန်ဂှ်ရော?” ရဴဝွံ ကသပ်ကတဵုဒှ် ကုတဳလမၞုံပိုဉ်ကျာ်တြဲပၠန်ရ။
ပ္ဍဲကြဴနူဂှ် “ရသိဥဒက မဒှ်ကောန်ရာမဂှ် မၞုံကဵုပညာရ၊ စဳကၠးဆိုက်ဗ္ဒက်ရ၊ မၞုံကဵုဉာဏ်သကေက်သကာရ၊ ကာလမလအ်လဟေၚ် မၠိုက်ကိလေသအောန်ဒၟံၚ် ပ္ဍဲမတ်ပညာရ၊ အဲဂွံတွံကဵုဓရ် ကုရသိဥဒက မဒှ်ကောန်ရာမ ဗွဲကိုပ်ကၠာမ္ဂး ခိုဟ်ရ၊ ရသိဥဒကဂှ် ကြက်တီကေတ်ဓရ်ဝွံ ဗွဲမပြဟ်မာန်ရ” ဂှ် ကသပ်ရဴဝွံကတဵုဒှ်ရ။
ပ္ဍဲအခိၚ်ဂှ် ကောန်ဒေဝတဴ မဟွံထ္ၜးဇကုပြာကဋ်ဂှ် “ယွံတဳလမၞုံပိုဉ် ရသိဥဒက မဒှ်ကောန်ရာမဂှ် ချိုတ်အာနူတနေံဏအ်တုဲရ” ရဴဝွံ ဂရၚ်ပတီရ။
ကုတဳလမၞုံပိုဉ်ကျာ်တြဲလေဝ် “ရသိဥဒက မဒှ်ကောန်ရာမဂှ် ချိုတ်အာနူတနေံဏအ်တုရ” ရဴဝွံ လညာတ်ဉာဏ် ဒှ်ပြာကဋ်ရ။
ပ္ဍဲအခိၚ်ဂှ် ကုတဳလမၞုံပိုဉ်ကျာ်တြဲဂှ် “ရသိဥဒက မဒှ်ကောန်ရာမဂှ် ဟောံဗြမ်ဇၞော်ကဵုဇြဟတ်ရသွံ၊ ဟိုတ်ဍေံဟီုဂှ် ရသိဥဒကဂှ် ယဝ်ဂွံကလၚ်ကေတ်ဓရ်ဝွံမ္ဂး တီကေတ် ဗွဲမပြဟ်မာန်ရ” ရဴဝွံ ဒှ်ဇြဟာန်ဆာန်ဍူရ။
ပ္ဍဲကြဴနူဂှ် “မုရဴညးမွဲ ဂွံတွံကဵုဓရ် ဗွဲကိုပ်ကၠာရော? မုရဴညးမွဲ ကြက်တီကေတ်ဓရ်ဝွံ ဗွဲမပြဟ်မာန်ဂှ်ရော?” ရဴဝွံ ကသပ်ကတဵုဒှ် ကုတဳလမၞုံပိုဉ်ကျာ်တြဲပၠန်ရ။
ပ္ဍဲကြဴနူဂှ် “ခမဳပဉ္စဝဝ် (မၞုံကဵုဂကောံဗွဝ်မသုန်ဇကု) ဂှ် ဥပကာဂုဏ်ဂမၠိုၚ် ကုအဲအိုတ်ရ၊ ခမဳပဉ္စဝဝ်ဂမၠိုၚ်ဂှ် ကေၚ်ကၠောန်ၜိုတ်ဥပကာ အဲပတိတ်ဒၟံၚ်ဇြဟတ် ကမၠောန်ပဓာနအိုတ်ရ၊ အဲဂွံတွံဓရ် ကုခမဳပဉ္စဝဝ်ဂမၠိုၚ် ဗွဲကိုပ်ကၠာမ္ဂး ခိုဟ်ရ” ရဴဝွံ ကသပ်ကတဵုဒှ် ကုတဳလမၞုံပိုဉ်ကျာ်တြဲပၠန်ရ။
ပ္ဍဲကြဴနူဂှ် “ပ္ဍဲအခိၚ်လၟုဟ်ဝွံ ခမဳပဉ္စဝဝ်ဂမၠိုၚ် ပဒတဴဒၟံၚ် မုရဴပ္ဍဲဌာန်မွဲအိုတ်ရော?” ရဴဝွံ ပွမဗ္စာရဏာကတဵုဒှ် ကုတဳလမၞုံပိုဉ်ကျာ်တြဲရ။
တဳလမၞုံပိုဉ်ကျာ်တြဲဂှ် နကဵုဒိဗ္ဗစက္ခုအဘိဉာဏ် မတ်မတုပ်သၟဟ်ကေုာံ မတ်ဒေဝတဴတံမသအးဇ္ၚးဗွဲတၟေၚ် မလောန်လတူနူမတ်မၞိဟ်တအ်ဂှ် ဂွံညာတ်ကေတ် ခမဳပဉ္စဝဝ်ဂမၠိုၚ် မပဒတဴဒၟံၚ်ပ္ဍဲဂြိုပ်မိဂဒါဝိုန် မၞုံယၟုဣသိပတန ဇရေၚ်ဍုၚ်ဗာရဏသဳရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပဒတဴပ္ဍဲဂြိုပ်ဥရုဝေလ ဗၞတ်မမိပ်လဟိၚ် က္ညဂ္ၚေၚ်အာဒေသစာရိတ် ဍုၚ်ဗာရဏသဳရ။
