ပိဋကတ်ပိ ဘာသာမန် - ၅။ ဗြီုအာတ်ပါန်အခေါၚ်

၅။ ဗြီုအာတ်ပါန်အခေါၚ်

၇။ ပ္ဍဲကြဴနူဂှ် နမကလိလောန်အာထပှ်တ္ၚဲ တဳလမၞုံပိုဉ်ကျာ်တြဲ ဒၠိုက်ကတဵုနူ (အရဟတ္တဖိုလ်) သမာဓိတုဲ နူသၟဝ်တၞံဗပိုန် ပြာပ်အာဇရေၚ်တၞံဇြဲပၟၚ်ဗ္ၜေအ်တုဲ သ္ပဒတဴဒၟံၚ် ပ္ဍဲသၟတ်တၞံဇြဲပၟၚ်ဗ္ၜေအ်ရ။

ပ္ဍဲအခိၚ်ဂှ် ပြာပ်အာဌာန်လ္ၚုသ္ၚိတ်ဇြတုဲ ဃောမသတၚ်တန်တဴဒၟံၚ်ညးမွဲဓဝ်ဂှ် ကသပ်စိုတ် ရဴဝွံ ဒှ်ကၠုၚ်ကုတဳလမၞုံပိုဉ်ကျာ်တြဲရ—

“ဓရ်အြမဂပ်ဝ်တီလဝ်တုဲဝွံတုန် ဇြိုဟ်နက်ရ၊ ဇြိုၚ်ကဵုညာတ်ရ၊ ဇြိုၚ်ကဵုတီရ၊ ၜိုဟ်လလမ်ရ၊ ပြဲရ၊ အရာပူဂိုလ်တက္ကဳတအ် ချပ်ဂေတ်ဂ္ၚေၚ်ဟွံသေၚ်ရ၊ ဇိပ်ဂၠိပ်ရ၊ တၠပညာတအ်ဟေၚ် တီမာန်ရ၊ သတ်ဂမၠိုၚ်ဝွံတုန် မိပ်လဟိၚ်ပ္ဍဲကာမဂုဏ်ဂမၠိုၚ်အိုတ်ရ၊ မိပ်ဇြိပ်လဟိၚ်လဟာဲ ပ္ဍဲကာမဂုဏ်ဂမၠိုၚ်အိုတ်ရ၊ သ္ဍိုက်မၠိုက်ဒးဂပ် ကာမဂုဏ်ဂမၠိုၚ် လောန်အိုတ်ရ၊ သတ်ဂမၠိုၚ် မမိပ်လဟိၚ် မိပ်ဇြိပ်လဟိၚ်လဟာဲ သ္ဍိုက်မၠိုက်ဒ:ဂၞပ်လောန် ပ္ဍဲကာမဂုဏ်ဂမၠိုၚ်ဂှ် ဓရ်ပဋိစ္စသမုပ္ပါဒ် မဒှ်ဟိုတ်ဒဒက်တဴကဵုဖဵုဝွံ ဇြိုၚ်ကဵုညာတ်မာန်ရ၊ ဓရ်နိဗ္ဗာန် မဒှ်အရာပွမပြုပြေၚ် အိုတ်သီုလလမ် ဒှ်အရာပါဲသၠးကၠေံ ဥပဓိအိုတ်သီု မဒှ်အရာစာ်စ္ဍးနူရာဂ မဒှ်အရာပၠိုတ်ဂှ်လေဝ် ဇြိုၚ်ကဵုညာတ်မာန်ရ၊ အဲလေဝ် တွံကဵုဓရ်ရ၊ ညးဂမၠိုၚ်မွဲသအာၚ်လေဝ် ဟွံတီကၠိုဟ်ခၠၚ်ကေတ် ဓရ်အဲအိုတ်ရ၊ ဒှ်သာ်ဂှ်မ္ဂး ပွမတွံဓရ်ဂှ် ဒှ်ဍောၚ်ၜိုတ်ကုအဲဟေၚ်ရ၊ အဲဂှ် ဒှ်ပျဲပျာံဇကုအဲရ” ရဴဝွံ (ကသပ်စိုတ် ဒှ်ကၠုၚ်ရ)။

သအာၚ်နူဂှ် ဂါထာဂမၠိုၚ် မထေက်ကဵုအမ်သဝ်လောန်ဝွံလေဝ် သီုဟွံကေၚ်မိၚ်ကိုပ်ကၠာတေံဂှ် ပြာကဋ်ကၠုၚ် ပ္ဍဲစိုတ်အဲအိုတ်ရ—

“ဓရ်အဲမဂပ်ဝ်တီကေတ် နပွမဒ္ဂေတ် ဗွဲမဝါတ်ဂါတ်ဍောၚ်ၜိုတ်ဂှ် ပ္ဍဲကာလၟုဟ်ဝွံ ဟွံထေက်ကဵုတၞဟ်နတွံရ၊ ညးဂမၠိုၚ် မိန်ရာဂဒေါသ မဂပ်ဝ်ပ္ဍဵုပ္ဍိုက်ဂှ် တီကေတ်ဓရ်ဝွံ ဗွဲမလောဲသွာမာန် ဟွံသေၚ်ရ။

ဒမၠုဂၠုဓီု မတွံဂးအဝိဇ္ဇာ မဂပ်ဝ်ကွိၚ်ဂြောပ်လဝ်တုဲ ညးဂမၠိုၚ်မထၞေန်စပ် နရာဂဂှ် ဓရ်ဒစးတိုန် (သံသာ) မဇိပ်ဂၠိပ် ဇြိုဟ်နက် ဇြိုၚ်ကဵုညာတ်မာန်ကၠာ ပမာလက်ကၠိုက်အဏုဂှ် ညာတ်ကေတ်မာန် ဟွံသေၚ်အိုတ်ရ” ရဴဝွံ (ပြာကဋ်ကၠုၚ်ပ္ဍဲစိုတ်အိုတ်ရ)။

ဃောမဗ္စာရဏာရဴဝွံ ဂၠမ်စိုတ်တဳလမၞုံပိုဉ်ကျာ်တြဲ ဟွံလၟောဝ်အာကဵု သွက်ဂွံတွံဓရ်တုဲ လၟောဝ်အာ သွက်ဂွံမံၚ်ထောံမသက္ကုဂဝိၚ်ရ။

၈။ ပ္ဍဲအခိၚ်ဂှ် ကုဗြီုသဟမ္ပတိ မတီကေတ်ကသပ်စိုတ်အဲ နကဵုစိုတ်ဇကုတုဲဂှ် ကသပ်ရဴဝွံ ကတဵုဒှ်ရ—

“ယွံမၞးတအ် လောကဝွံ အာစိုပ်လလေၚ်ရသွံ၊ ယွံမၞးတအ် လောကဝွံ အာစိုပ်လလေၚ်ရသွံ၊ ဂၠမ်စိုတ် တဳလမၞုံပိုဉ်ကျာ်တြဲ မထေက်ဒုၚ်ပူဇဴတၟေၚ် မဂြၚ်တီကေတ် (ဓရ်ဂမၠိုၚ်အိုတ်သီု) အလဵုဇကုမဍာံစၟတ်ဂှ် ဟွံလၟောဝ်အာ တၞဟ်နတွံဓရ်တုဲ လၟောဝ်အာတၞဟ်နမံၚ်ထောံ မသက္ကုဂဝိၚ်ရသွံ” ရဴဝွံ (ကသပ်ကတဵုဒှ်ရ)။

ပ္ဍဲကြဴနူဂှ် တြုံမၞုံကဵုဇြဟတ်ဂှ် သပါတဲမခ္ဍောပ်ကဝေန်လဝ်ဂှ် သၟဟ်ညံၚ်ရဴ ပၠးပတိတ်ကီု သပါတဲပၠးလဝ်ဂှ် သၟဟ်ညံၚ်ရဴ ခ္ဍောပ်ကဝေန်ပၠုပ်ကီု တုပ်သာ်ဂှ်ရ ဗြီုသဟမ္ပတိဂှ် ကၠေံဗ္ဒန်အာနူဍုၚ်ဗြီုတုဲ ကတဵုဒှ်ပြာကဋ် ပ္ဍဲဂတတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဗြီုသဟမ္ပတိ လ္ၜက်ကၠေဟ်ပတိုန် ယာတ်ကၞေဟ်လတူ ပ္ဍဲပၞးမွဲလပါ်တုဲ တၚ်က္ၜံၚ်ပုၚ်ဂှ် ထံက်ပ္ဍဲတိတုဲ ပၚ်ခၠအ်ခၟောံတဲ လၟောဝ်နၚ်ကဵုတဳလမၞုံပိုဉ်ကျာ်တြဲတုဲ ဂရၚ်ပတီဂလာန်ဝွံရ—

“ယွံတဳလမၞုံပိုဉ် တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဩဝ်က္ညတွံဓရ်ညိ၊ တဳလမၞုံပိုဉ်ကျာ်တြဲ မလေပ်သ္ဂးဂလာန်ခိုဟ်ဆာဲ ဩဝ်က္ညတွံဓရ်ညိ၊ သတ်ဂမၠိုၚ် မၞုံကဵုမၠိုက် (ကိလေသ) မအောန်ကြဳ ပ္ဍဲမတ်ပညာဂှ် နွံအိုတ်ရ၊ (သတ်ဂမၠိုၚ်ဂှ်) ဟိုတ်မဟဂွံကလၚ်ကေတ်ဓရ်ဂှ်ရ၊ ဟောံဗြမ်ဒၟံၚ်အိုတ်ရ၊ ညးမတီကေတ်ဓရ်ဂမၠိုၚ် ကြက်နွံအိုတ်ရ” ရဴဝွံ (ဂရၚ်ပတီရ)။

ဗြီုသဟမ္ပတိ ဂရၚ်ပတီ ဂလာန်ဝွံတုဲ သအာၚ်နူဂှ် ကလေၚ်ဂရၚ်ပတီ ဂလာန်ဝွံပၠန်ရ—

“ကိုတ်ကၠာတေံ ပ္ဍဲမဂဓရးဂမၠိုၚ် ဓရ်ကွေတ်မိစ္ဆာ မဟွံသအးဇ္ၚး အ္စာဇၞော်ဂိုဏ်ညးမၞုံကဵုကၠိုက်လ္ၚေၚ် (မပ္တံကဵုရာဂ) ဂမၠိုၚ် မဂပ်ဝ်ချပ်ကေတ်ဂှ် ကတဵုဒှ်ပြာကဋ်ရ၊ ဩဝ်ပံက်လဟာ်ကဵု တြၚ်နိဗ္ဗာန်အမြိုတ်ညိ၊ တဳလမၞုံပိုဉ်ကျာ်တြဲ မစာ်စ္ဍးနူကၠိုက်လ္ၚေၚ် ဓရ် (သစ္စပန်) မဂပ်ဝ်တီကေတ် ဗွဲသဘာဝဂှ် ဩဝ်ကဵု (သတ်ဂမၠိုၚ်) ကလၚ်ပၚ်မှိၚ်ကေတ်အိုတ်ညိ။

ယွံတဳလမၞုံပိုဉ်ကျာ်တြဲ မဒှ်တၠပညာခိုဟ်ဆာဲ ယွံတဳလမၞုံပိုဉ်ကျာ်တြဲ မၞုံကဵုမတ်ဉာဏ်မသၟဟ်ရထ ညာတ်ကေတ် ဗွဲပွဳပွူမာန် တြုံမၞုံကဵုမတ်မညာတ် တန်တဴ ပ္ဍဲလတူက္ဍဟ်ဒဵုတၟံတုဲ သၟဟ်ညံၚ်ရဴမၠာ်သ္ၚေဝ်ဂကောံမၞိဟ် ဗွဲပွဳပွူကီု တုပ်သာ်ဂှ်ရ တဳလမၞုံပိုဉ်ကျာ်တြဲ မစ္ဍးသ္ၚောဲအာ နူစံၚ်တူပူဆာဂှ် တိုန်အာလတူပြာသာဒ် မတုဲတဴနကဵုပညာ (ဓမ္မ) တုဲ ဩဝ်မၠာ်သ္ၚေဝ်ရံၚ် ဂကောံသတ် မတၞီစှ်ေအာစိုပ် ပွမစံၚ်တူပူဆာ နပွမဒးဒုၚ်ပ္ဍဵုပ္ဍိုက်ကဵုပွမတန်ပဋိသန္ဓိ ပွမဗျုတအ်ဂှ်ညိ။

ယွံတဳလမၞုံပိုဉ်ကျာ်တြဲ မဂံၚ်သကာ ယွံတဳလမၞုံပိုဉ်ကျာ်တြဲ မကလိဂွံပေါဲအံၚ်ဇၞးတုဲ ဩဝ်ဒၠိုက်ကတဵုညိ၊ ယွံတဳလမၞုံပိုဉ်ကျာ်တြဲ မတုပ်သၟဟ်ကဵုသၟာစဝ်ကွဳ ယွံတဳလမၞုံပိုဉ်ကျာ်တြဲ မသ္ၚောဲနူဂတှ် (ကိလေသ) ဩဝ်ဂေတ်ဂ္ၚေၚ် ပ္ဍဲလောကညိ၊ ယွံတဳလမၞုံပိုဉ်ကျာ်တြဲ မၞုံကဵုပိုဉ်ဇၞော်ကြဳဇှ်မဇၞော် ဩဝ်တွံဓရ်ညိ၊ ညးတီကေတ်ဓရ်ဂမၠိုၚ် ကြက်နွံအိုတ်ရ” ရဴဝွံ (ဂရၚ်ပတီပၠန်ရ)။

ဂရၚ်ပတီ ရဴဝွံမ္ဂး တဳလမၞုံပိုဉ်ကျာ်တြဲ သ္ဂးကဵုဗြီုသဟမ္ပတိ ဂလာန်ဝွံရ—

“ယွံဗြီု ကုအဲလေဝ် ကသပ်ရဴဝွံ ဒှ်ကၠုၚ်ရ၊ ‘ဓရ်အဲမဂပ်ဝ်တီလဝ်တုဲဝွံတုန် ဇြိုဟ်နက်ရ၊ ဇြိုၚ်ကဵုညာတ်ရ၊ ဇြိုၚ်ကဵုတီရ၊ ၜိုဟ်လလမ်ရ၊ ပြဲရ၊ အရာပူဂိုလ်တက္ကဳတအ် ချပ်ဂေတ်ဂ္ၚေၚ် ဟွံသေၚ်ရ၊ ဇိပ်ဂၠိပ်ရ၊ တၠပညာတအ်ဟေၚ် တီမာန်ရ၊ သတ်ဂမၠိုၚ်ဝွံတုန် မိပ်လဟိၚ် ပ္ဍဲကာမဂုဏ်ဂမၠိုၚ်အိုတ်ရ၊ မိပ်ဇြိပ်လဟိၚ်လဟာဲ ပ္ဍဲကာမဂုဏ်ဂမၠိုၚ်အိုတ်ရ၊ သ္ဍိုက်မၠိုက်ဒးဂၞပ်ကာမဂုဏ်ဂမၠိုၚ် လောန်အိုတ်ရ၊ သတ်ဂမၠိုၚ် မမိပ်လဟိၚ်မိပ်ဇြိပ်လဟိၚ်လဟာဲ သ္ဍိုက်မၠိုက်ဒးဂၞပ်လောန် ပ္ဍဲကာမဂုဏ်ဂမၠိုၚ်ဂှ် ဓရ်ပဋိစ္စသမုပ္ပါဒ် မဒှ်ဟိုတ်ဒဒက်တဴကဵုဖဵုဝွဴ ဇြိုၚ်ကဵုညာတ်မာန်ရ၊ ဓရ်နိဗ္ဗာန် မဒှ်အရာပွမပြုပြေၚ် အိုတ်သီုလလမ် ဒှ်အရာပါဲသၠးကၠေံဥပဓိအိုတ်သီု မဒှ်အရာစာ်စ္ဍးနူရာဂ မဒှ်အရာပၠိုတ်ဂှ်လေဝ် ဇြိုၚ်ကဵုညာတ်မာန်ရ၊ အဲလေဝ် တွံကဵုဓရ်ရ၊ ညးဂမၠိုၚ် မွဲသအာၚ်လေဝ် ဟွံတီကၠိုဟ်ခၠၚ်ကေတ် ဓရ်အဲအိုတ်ရ၊ ဒှ်သာ်ဂှ်မ္ဂး ပွမတွံဓရ်ဂှ် ဒှ်ဍောၚ်ၜိုတ် ကုအြဟေၚ်ရ၊ အဲဂှ် ဒှ်ပျဲပျာံဇကုအဲရ’ ရဴဝွံ (ကသပ်စိုတ် ဒှ်ကၠုၚ်ရ)။

‘ဓရ်အဲမဂပ်ဝ်တီကေတ် နပွမဒ္ဂေတ် ဗွဲမဝါတ်ဂါတ်ဍောၚ်ၜိုတ်ဂှ် ပ္ဍဲကာလၟုဟ်ဝွံ ဟွံထေက်ကဵုတၞဟ်နတွံရ၊ ညးဂမၠိုၚ် မိန်ရာဂဒေါသ မဂပ်ဝ်ဒးပ္ဍဵုပ္ဍိုက်ဂှ် တီကေတ် ဓရ်ဝွံဗွဲမလောန်သွာမာန် ဟွံသေၚ်ရ။ ဒမၠုဂၠုဓီု မတွံဂးအဝိဇ္ဇာ မဂပ်ဝ်ကွိၚ်ဂြောပ်လဝ်တုဲ ညးဂမၠိုၚ်မထၞေန်စပ် နရာဂဂှ် ဓရ်ဒစတိုန် (သံသာ) မဇိပ်ဂၠိပ်ဇြိုဟ်နက် ဇြိုၚ်ကဵုညာတ်မာန်ကၠာ ပမာလက်ကၠိုက်အဏုဂှ် ညာတ်ကေတ်မာန် ဟွံသေၚ်အိုတ်ရ’ ရဴဝွံ (ပြာကဋ်ကၠုၚ်ပ္ဍဲစိုတ်အိုတ်ရ)။

ဃောမဗ္စာရဏာရဴဝွံ ဂၠမ်စိုတ်အဲ ဟွံလၟောဝ်အာကဵု သွက်ဂွံတွံဓရ်တုဲ လၟောဝ်အာသွက်ဂွံမံၚ်ထောံမသက္ကုဂဝိၚ်ရ” ရဴဝွံ (သ္ဂးရ)။ မရနုက်ကဵုၜါဝါလေဝ် ဗြီုသဟမ္ပတိဂှ်—

ဗြီုသဟမ္ပတိ ဂရၚ်ပတီ ဂလာန်ဝွံတုဲ သအာၚ်နူဂှ် ကလေၚ်ဂရၚ်ပတီ ဂလာန်ဝွံပၠန်ရ—

“ကိုပ်ကၠာတေံ ပ္ဍဲမဂဓရးဂမၠိုၚ် ဓရ်ကွေတ်မိစ္ဆာမဟွံသအးဇ္ၚး အ္စာဇၞော်ဂိုဏ် ညးမၞုံကဵုကၠိုက်လ္ၚေၚ် (မပ္တံကဵုရာဂ) ဂမၠိုၚ် မဂပ်ဝ်ချပ်ကေတ်ဂှ် ကတဵုဒှ်ပြကာဋ်ရ၊ ဩဝ်ပံက်လဟာ်ကဵု တြၚ်နိဗ္ဗာန်အမြိုတ်ညိ၊ တဳလမၞုံပိုဉ်ကျာ်တြဲ မစာ်စ္ဍးနူကၠိုက်လ္ၚေၚ် ဓရ် (သစ္စပန်) မဂပ်ဝ်တီကေတ် ဗွဲသဘာဝဂှ် ဩဝ်ကဵု (သတ်ဂမၠိုၚ်) ကလၚ်ပၚ်မှိၚ်ကေတ်အိုတ်ညိ။

ယွံတဳလမၞုံပိုဉ်ကျာ်တြဲ မဒှ်တၠပညာခိုဟ်ဆာဲ ယွံတဳလမၞုံပိုဉ်ကျာ်တြဲ မၞုံကဵုမတ်ဉာဏ်မသၟဟ်ရထ ညာတ်ကေတ် ဗွဲပွဳပွူမာန် တြုံမၞုံကဵုမတ်မညာတ် တန်တဴ ပ္ဍဲလတူက္ဍဟ်ဒဵုတၟံတုဲ သၟဟ်ညံၚ်ရဴမၠာ်သ္ၚေဝ်ဂကောံမၞိဟ် ဗွဲပွဳပွူကီု တုပ်သာ်ဂှ်ရ တဳလမၞုံပိုဉ်ကျာ်တြဲ မစ္ဍးသ္ၚောဲအာ နူစံၚ်တူပူဆာဂှ် တိုန်အာလတူပြာသာဒ် မတုဲတဴနကဵုပညာ (ဓမ္မ) တုဲ ဩဝ်မၠာ်သ္ၚေဝ်ရံၚ်ဂကောံသတ် မတၞီစှ်ေအာစိုပ် ပွမစံၚ်တူပူဆာ နပွမဒးဒုၚ်ပ္ဍဵုပ္ဍိုက်ကဵု ပွမတန်ပဋိသန္ဓိ ပွမဗျုတအ်ဂှ်ညိ။

ယွံတဳလမၞုံပိုဉ်ကျာ်တြဲ မဂံၚ်သကာ ယွံတဳလမၞုံပိုဉ်ကျာ်တြဲ မကလိဂွံပေါဲအံၚ်ဇၞးတုဲ ဩဝ်ဒၠိုက်ကတဵုညိ၊ ယွံတဳလမၞုံပိုဉ်ကျာ်တြဲ မတုပ်သၟဟ်ကဵုသၟာစဝ်ကွဳ ယွံတဳလမၞုံပိုဉ်ကျာ်တြဲ မသ္ၚောဲနူဂတှ် (ကိလေသ) ဩဝ်ဂေတ်ဂ္ၚေၚ် ပ္ဍဲလောကညိ၊ ယွံတဳလမၞုံပိုဉ်ကျာ်တြဲ မၞုံကဵုပိုဉ်ကြဳဇှ်မဇၞော် ဩဝ်တွံဓရ်ညိ၊ ညးတီကေတ်ဓရ်ဂမၠိုၚ် ကြက်နွံအိုတ်ရ” ရဴဝွံ (ဂရၚ်ပတီပၠန်ရ)။

မရနုက်ကဵုၜါဝါလေဝ် တဳလမၞုံပိုဉ်ကျာ်တြဲ သ္ဂးကဵုဗြီုသဟမ္ပတိ ဂလာန်ဝွံရ—

“ယွံဗြီု ကုအဲလေဝ် ကသပ်ရဴဝွံ ဒှ်ကၠုၚ်ရ၊ ‘ဓရ်အဲမဂပ်ဝ်တီလဝ်တုဲဝွံတုန် ဇြိုဟ်နက်ရ၊ ဇြိုၚ်ကဵုညာတ်ရ၊ ဇြိုၚ်ကဵုတီရ၊ ၜိုဟ်လလမ်ရ၊ ပြဲရ၊ အရာပူဂိုလ်တက္ကဳတအ် ချပ်ဂေတ်ဂ္ၚေၚ် ဟွံသေၚ်ရ၊ ဇိပ်ဂၠိပ်ရ၊ တၠပညာတအ်ဟေၚ် တီမာန်ရ၊ သတ်ဂမၠိုၚ်ဝွံတုန် မိပ်လဟိၚ် ပ္ဍဲကာမဂုဏ်ဂမၠိုၚ်အိုတ်ရ၊ မိပ်ဇြိပ်လဟိၚ်လဟာဲ ပ္ဍဲကာမဂုဏ်ဂမၠိုၚ်အိုတ်ရ၊ သ္ဍိုက်မၠိုက်ဒးဂၞပ် ကာမဂုဏ်ဂမၠိုၚ် လောန်အိုတ်ရ၊ သတ်ဂမၠိုၚ် မမိပ်လဟိၚ်မိပ်ဇြိုပ်လဟိၚ်လဟာဲ သ္ဍိုက်မၠိုက်ဒးဂၞပ်လောန် ပ္ဍဲကာမဂုဏ်ဂမၠိုၚ်ဂှ် ဓရ်ပဋိစ္စသမုပ္ပါဒ် မဒှ်ဟိုတ်ဒဒက်တဴကဵုဖဵုဝွံ ဇြိုၚ်ကဵုညာတ်မာန်ရ၊ ဓရ်နိဗ္ဗာန် မဒှ်အရာပွမပြုပြေၚ် အိုတ်သီုလလမ် ဒှ်အရာပါဲသၠးကၠေံ ဥပဓိအိုတ်သီု မဒှ်အရာစာ်စ္ဍးနူရာဂ မဒှ်အရာပၠိုတ်ဂှ်လေဝ် ဇြိုၚ်ကဵုညာတ်မာန်ရ၊ အဲလေဝ် တွံကဵုဓရ်ရ၊ ညးဂမၠိုၚ် မွဲသအာၚ်လေဝ် ဟွံတီကၠိုဟ်ခၠၚ်ကေတ် ဓရ်အဲအိုတ်ရ၊ ဒှ်သာ်ဂှ်မ္ဂး ပွမတွံဓရ်ဂှ် ဒှ်ဍောၚ်ၜိုတ် ကုအဲဟေၚ်ရ၊ အဲဂှ် ဒှ်ပျဲပျာံဇကုအဲရ’ ရဴဝွံ (ကသပ်စိုတ် ဒှ်ကၠုၚ်ရ)။

‘ဓရ်အဲမဂပ်ဝ်တီကေတ် နပွမဒ္ဂေတ် ဗွဲမဝါတ်ဂါတ်ဍောၚ်ၜိုတ်ဂှ် ပ္ဍဲကာလလၟုဟ်ဝွံ ဟွံထေက်ကဵုတၞဟ်နတွံရ၊ ညးဂမၠိုၚ် မိန်ရာဂဒေါသ မဂပ်ဝ်ဒးပ္ဍဵုပ္ဍိုက်ဂှ် တီကေတ်ဓရ်ဝွံ ဗွဲမလောဲသွာမာန် ဟွံသေၚ်ရ။

ဒမၠုဂၠုဓီု မတွံဂးအဝိဇ္ဇာ မဂပ်ဝ်ကွိၚ်ဂြောပ်လဝ်တုဲ ညးဂမၠိုၚ်မထၞေန်စပ် နရာဂဂှ် ဓရ်ဒစးတိုန် (သံသာ) မဇိပ်ဂၠိပ် ဇြိုဟ်နက် ဇြိုၚ်ကဵုညာတ်မာန်ကၠာ ပမာလက်ကၠိုက်အဏုဂှ် ညာတ်ကေတ်မာန် ဟွံသေၚ်အိုတ်ရ’ ရဴဝွံ (ပြာကဋ်ကၠုၚ်ပ္ဍဲစိုတ်အိုတ်ရ)။

ဃောမဗ္စာရဏာရဴဝွံ ဂၠမ်စိုတ်အဲ ဟွံလၟောဝ်အာကဵု သွက်ဂွံတွံဓရ်တုဲ လၟောဝ်အာသွက်ဂွံမံၚ်ထောံမသက္ကုဂဝိၚ်ရ” ရဴဝွံ (သ္ဂးရ)။ မရနုက်ကဵုပိဝါလေဝ် ဗြီုသဟမ္ပတိဂှ်—

ဗြီုသဟမ္ပတိ ဂရၚ်ပတီ ဂလာန်ဝွံတုဲ သအာၚ်နူဂှ် ကလေၚ်ဂရၚ်ပတီ ဂလာန်ဝွံပၠန်ရ—

“ကိုပ်ကၠာတေံ ပ္ဍဲမဂဓရးဂမၠိုၚ် ဓရ်ကွေတ်မိစ္ဆာမတွံဂးသအးဇ္ၚး အ္စာဇၞော်ဂိုဏ် ညးမၞုံကဵုကၠိုက်လ္ၚေၚ် (မပ္တံကဵုရာဂ) ဂမၠိုၚ် မဂပ်ဝ်ချပ်ကေတ်ဂှ် ကတဵုဒှ်ပြာကဋ်ရ၊ ဩဝ်ပံက်လဟာ်ကဵု တြၚ်နိဗ္ဗာန်အမြိုတ်ညိ၊ တဳလမၞုံပိုဉ်ကျာ်တြဲ မစာ်စ္ဍးနူကၠိုက်လ္ၚေၚ်ဂှ် ဓရ် (သစ္စပန်) မဂပ်ဝ်တီကေတ် ဗွဲသဘာဝဂှ် ဩဝ်ကဵု (သတ်ဂမၠိုၚ်) ကလၚ်ပၚ်မှိၚ်ကေတ်အိုတ်ညိ။

ယွံတဳလမၞုံပိုဉ်ကျာ်တြဲ မဒှ်တၠပညာခိုဟ်ဆာဲ ယွံတဳလမၞုံပိုဉ်ကျာ်တြဲ မၞုံကဵုမတ်ဉာဏ်မသၟဟ်ရထ ညာတ်ကေတ် ဗွဲပွဳပွူမာန် တြုံမၞုံကဵုမတ်မညာတ် တန်တဴ ပ္ဍဲလတူက္ဍဟ်ဒဵုတၟံတုဲ သၟဟ်ညံၚ်ရဴမၠာ်သ္ၚေဝ်ဂကောံမၞိဟ် ဗွဲပွဳပွူကီု တုပ်သာ်ဂှ်ရ တဳလမၞုံပိုဉ်ကျာ်တြဲ မစ္ဍးသ္ၚောဲအာ နူစံၚ်တူပူဆာဂှ် တိုန်အာလတူပြာသာဒ် မတုဲတဴနကဵုပညာ (ဓမ္မ) တုဲ ဩဝ်မၠာ်သ္ၚေဝ်ရံၚ် ဂကောံသတ်မတၞီစှ်ေအာစိုပ် ပွမစံၚ်တူပူဆာ နပွမဒးဒုၚ်ပ္ဍဵုပ္ဍိုက်ကဵု ပွမတန်ပဋိသန္ဓိ ပွမဗျုတအ်ဂှ်ညိ။

ယွံတဳလမၞုံပိုဉ်ကျာ်တြဲ မဂံၚ်သကာ ယွံတဳလမၞုံပိုဉ်ကျာ်တြဲ မကလိဂွံပေါဲအံၚ်ဇၞးတုဲ ဩဝ်ဒၠိုက်ကတဵုညိ၊ ယွံတဳလမၞုံပိုဉ်ကျာ်တြဲ မတုပ်သၟဟ်ကဵုသၟာစဝ်ကွဳ ယွံတဳလမၞုံပိုဉ်ကျာ်တြဲ မသ္ၚောနူဂတှ် (ကိလေသ) ဩဝ္ဂေတ်ဂ္ၚေၚ် ပ္ဍဲလောကညိ၊ ယွံတဳလမၞုံပိုဉ်ကျာ်တြဲ မၞုံကဵုပိုဉ်ကြဳဇှ်ဇၞော် ဩဝ်တွံဓရ်ညိ၊ ညးတီကေတ်ဓရ်ဂမၠိုၚ် ကြက်နွံအိုတ်ရ” ရဴဝွံ (ဂရၚ်ပတီပၠန်ရ)။

၉။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပစၟတ်သမ္တီကေတ် ဗြီုအာတ်ပါန် အခေါၚ်ဂှ်တုဲမ္ဂး သ္ပဟိုတ်ကဵုပွမဆာန်ဍူ ပ္ဍဲသတ်ဂမၠိုၚ်ကီုတုဲ သ္ၚေဝ်ရံၚ်လောက နကဵုဗုဒ္ဓစက္ခုရ၊ တဳလမၞုံပိုဉ်ကျာ်တြဲ သ္ၚေဝ်ရံၚ်လောက နကဵုဗုဒ္ဓစက္ခုမ္ဂး ဂွံညာတ်ကေတ် ညးမၞုံကဵုမၠိုက်ကိလေသမအောန်ပ္ဍဲမတ်ပညာ ညးမၞုံမၠိုက်ကိလေသဂၠိုၚ် ပ္ဍဲမတ်ပညာ ညးမၞုံဣန္ဒြဳကြံၚ်ဍုဟ်တုဲ ညးမၞုံဣန္ဒြဳၜတ် ညးမၞုံကဵုအကာဲအရာခိုဟ်ဆာဲ ညးမၞုံကဵုအကာဲအရာဟွံခိုဟ်ဆာဲ ညးကဵုတီကေတ်လောဲသွာ ညးကဵုတီကေတ်ဝါတ်ဂါတ် ညးလ္ၚဵုမၞုံအလေံမၠာ်သ္ၚေဝ်ဒုသ်ပရလိုက်ဂမၠိုၚ် ရဴဝွံမ္ဂးဘဲ ကေုာံညးလ္ၚဵုမၞုံအလေံဟွံမၠာ်သ္ၚေဝ် ဒုသ်ပရလိုက်ဂမၠိုၚ် ရဴဝွံမ္ဂးဘဲဂမၠိုၚ်ရ၊ ဗွဲဥပမာမ္ဂးတုန် ပ္ဍဲဂြိုပ်ဒကှ်ဥပ္ပိုလ်ကီု ပ္ဍဲဂြိုပ်ဒကှ်ပဒုမကီု ပ္ဍဲဂြိုပ်ဒကှ်ပုဏ္ဍရိက်ကီု ဒကှ်ဥပ္ပိုလ်, ဒကှ်ပဒုမ, ဒကှ်ပုဏ္ဍရိက်ဂမၠိုၚ်လ္ၚဵုဂှ် ကၠုတ်တိုန် ပ္ဍဲဍာ်အိုတ်ရ၊ ဇၞော်မောဝ်ဗြေဝ်တိုန် ပ္ဍဲဍာ်အိုတ်ရ၊ မံက်တိုန်လတူဍာ်တုဲ တန်တဴအိုတ်ရ၊ ဟွံဗာန်ကၠေဝ်ကဵုဍာ်အိုတ်ရ၊ တုပ်သာ်ဂှ်ဟေၚ်ရ တဳလမၞုံပိုဉ်ကျာ်တြဲ သ္ၚေဝ်ရံၚ်လောက နကဵုဗုဒ္ဓစက္ခုမ္ဂး ဟိုတ်မဂွံညာတ်ကေတ် ညးမၞုံကဵုမၠိုက်ကိလေသမအောန် ပ္ဍဲမတ်ပညာ ညးမၞုံကဵုမၠိုက်ကိလေသဂၠိုၚ် ပ္ဍဲမတ်ပညာ ညးမၞုံဣန္ဒြဳကြံၚ်က္ဍုဟ် ညးမၞုံဣန္ဒြဳၜတ် ညးမၞုံကဵုအကာဲအရာခိုဟ်ဆာဲ ညးမၞုံကဵုအကာဲအရာဟွံခိုဟ်ဆာဲ ညးကဵုတီကေတ်လောဲသွာ ညးကဵုတီကေတ်ဝါတ်ဂါတ် ညးလ္ၚဵုမၞုံအလေံမၠာ်သ္ၚေဝ် ဒုသ်ပရလိုက်ဂမၠိုၚ် ရဴဝွံမ္ဂးဘဲ ကေုာံညးလ္ၚဵုမၞုံအလေံဟွံမၠာ်သ္ၚေဝ် ဒုသ်ပရလိုက်ဂမၠိုၚ် ရဴဝွံမ္ဂးဘဲဂမၠိုၚ်ဂှ်ရ အဲသ္ဂးကဵုဗြီုသဟမ္ပတိ နကဵုဂါထာရ—

ယွံဗြီု ဓရ်မပြဲမလ္ၚတ်လဝ်တုဲဂှ် မၞုံကဵုစၟတ်သမ္တီ အယာံမာတ်ဍောၚ်ၜိုတ်ဟေၚ်ရနွံဂှ်ဒှ်တုဲ ဟွံတွံကဵု ကုမၞိဟ်ဂမၠိုၚ်ရ၊ (မံၚ်ထောံ သီုဟွံတွံဓရ်ဂှ် ကသပ်ကတဵုဒှ် တုဲရ)၊ ညးဂမၠိုၚ် မဍိုက်ပေၚ်ကဵု ကတောဝ်မတွံဂး ပညာဂှ် ဩဝ်ဗလးကဵုဓရ်သဒ္ဒါ ပွမလျုၚ်ပတှ်ေအိုတ်ညိ၊ သွက်ညးဂမၠိုၚ်ဂှ် အဲပံက်ကဵုတြုၚ်နိဗ္ဗာန်တုဲရ ရဴဝွံ (သ္ဂးရ)။

ပ္ဍဲအခိၚ်ဂှ် ဗြီုသဟမ္ပတိ (တီကေတ်) ရဴဝွံ “တဳလမၞုံပိုဉ်ကျာ်တြဲ သ္ပကဵုအခေါၚ် သွက်ဂွံတွံဓရ်တုဲရ” ရဴဝွံ လ္ၚောဝ်သ္ပဝတ် တဳလမၞုံပိုဉ်ကျာ်တြဲ သ္ပရှ်ေသှ်ေရဴဂဴတုဲ ပ္ဍဲဒၞာဲဂှ်ဟေၚ် ကၠေံဗ္ဒန်အာရ။

ဗြီုအာတ်ပါအခေါၚ်တုဲရ။