၄။ ပွမပဒတဴ ပ္ဍဲသၟဝ်တၞံဗပိုန်
၆။ ပ္ဍဲကြဴနူဂှ် နမကလိလောန်အာထပှ်တ္ၚဲ တဳလမၞုံပိုဉ်ကျာ်တြဲ ဒၠိုက်ကတဵုနူ (အရဟတ္တဖိုလ်) သမာဓိတုဲ နူသၟဝ်တၞံပတုက် ပြာပ်အာဇရေၚ်တၞံဗပိုန်တုဲ သီုမဒုၚ်စသိုၚ် တသိုခ်အရဟတ္တဖိုလ် လုကဴထပှ်တ္ၚဲ ပ္ဍဲသၟဝ်တၞံဗပိုန်ဂှ် သ္ပပဒတဴဒၟံၚ် နမဂဇအ်တၚ်ထွာဲမွဲထွာဲဓဝ်ရ။
ပ္ဍဲအခိၚ်ဂှ် သၟာဗၞိက်တပုဿ, ဘလ္လိက (တပူတဗဝ်ကောကဵုဒေံ) ဂမၠိုၚ် နူဇနပိုဒ်ဥက္ကလာ သွိုန်ဗပိုန်တရဴအဓာန်မဂၠိၚ်သ္ၚောဲ ဌာန်ဂှ်ရ။ ပ္ဍဲအခိၚ်ဂှ် ဒေဝတဴဘုမ္မဇဵု မကေၚ်ဒှ်ကဠောကောန်မွဲမိ သၟာဗၞိက်တပုဿ, ဘလ္လိက (တပူတဗဝ်ကောကဵုဒေံ) ဂမၠိုၚ် “ယွံသကအ်တအ် တဳလမၞုံပိုဉ်ကျာ်တြဲဝွံ ဂြၚ်တီကေတ်သစ္စပန်တုဲ ဗွဲကိုပ်ကၠာ သ္ပဒတဴတန်ဒၟံၚ် ပ္ဍဲသၟတ်တၞံဗပိုန်ရ၊ ဩဝ်အာအိုတ်ညိ၊ ဩဝ်ကၠောန်ၜိုတ်ဥပကာ တဳလမၞုံပိုဉ်ကျာ်တြဲဂှ် နကဵုကွာၚ်ဗဗိုဟ်ကၞိကီု နကဵုကွာၚ်မြဳဗ္ကသာဲကီု အိုတ်ညိ၊ ပွမကၠောန်ၜိုတ်ဥပကာဂှ် ကြက်ဒှ်တဴ တၞဟ်နဒတုဲမြမောဝ်တသိုခ် ကုမၞးတအ်ညးဂမၠိုၚ် လုကဴဗ္တံတ္ၚဲမဂၠိၚ်သ္ၚောဲရ” ရဴဝွံ ဟီုသ္ဂးကဵု သၟာဗၞိက်တပုဿ,ဘလ္လိက (တူတဗဝ်ကောကဵုဒေံ) ဂမၠိုၚ်ရ။
ပ္ဍဲအခိၚ်ဂှ် သၟာဗၞိက်တပုဿ,ဘလ္လိက ဂကောကဵုဒေံ) ဂမၠိုၚ် ဂိုၚ်ကေတ် ကွာၚ်ဗဗိုဟ်ကၞိကီု ကွာၚ်မြဳဗ္ကသာဲကီုတုဲ ပြာပ်အာဇရေၚ်တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ် တန်တဴဒၟံၚ်ပ္ဍဲဒၞါဲမွဲအိုတ်တုဲ “ယွံတဳလမၞုံပိုဉ် တဳလမၞုံပိုဉ်ကျာ်တြဲ ဩဝ်ဒုၚ်ဂိုၚ်ကေတ် ကွာၚ်ဗဗိုဟ်ကၞိကီု ကွာၚ်မြဳဗ္ကသာဲကီု ပိုဲဍိက်တအ်ညးဂမၠိုၚ်ညိ၊ ပွမဒုၚ်ဒါန်သာ်ဂှ် ဒှ်တဴတၞဟ်နဒတုဲမြမောဝ်တသိုခ်ကုပိုဲဍိက်တအ်ညးဂမၠိုၚ် လုကဴဗ္တံတ္ၚဲမဂၠိၚ်သ္ၚောဲရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲအိုတ်ရ။
ပ္ဍဲအခိၚ်ဂှ် “ကျာ်တြဲဂမၠိုၚ် ဟွံဒုၚ်ဂိုၚ်ကေတ် နကဵုတဲဂမၠိုၚ်အိုတ်ရ၊ အဲ မုရဴသာ်လဵု သ္ဂောံဒုၚ်ဂိုၚ်ကေတ် ကွာၚ်ဗဗိုဟ်ကၞိကီု ကွာၚ်မြဳဗ္ကသာဲကီုရော?” ရဴဝွံ ကသပ်ကတဵုဒှ်ကၠုၚ်ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် ဒေဝတဴဝၚ်ဇၞော်ဂမၠိုၚ်ပန်တၠ တီကေတ်ကသပ်စိုတ်တဳလမၞုံပိုဉ်ကျာ်တြဲ နကဵုစိုတ်ဇကုဇကုတအ်တုဲ ကၠုၚ်နူဒိုဟ်ဂမၠိုၚ်ပန်တုဲ “ယွံတဳလမၞုံပိုဉ် နကဵုဗဗေၚ်ဝွံ တဳလပိုဉ်ကျာ်တြဲ ဩဝ်ဒုၚ်ဂိုၚ်ကေတ် ကွာၚ်ဗဗိုဟ်ကၞိကီု ကွာၚ်မြဳဗ္ကသာဲကီုညိ” ရဴဝွံ ဗဂိန်ကဵုဒါန် ကုတဳလမၞုံပိုဉ်ကျာ်တြဲ ဗဗေၚ်ဂမၠိုၚ်ပန်မ မတုဲတဴနကဵုတၟံလမ္စံက်အိုတ်ရ။ နကဵုဗဗေၚ် မတုဲတဴနကဵုတၟံလမ္စံက် မထေက်တန်ၚုဟ်မဂၠိုၚ်တၞဟ်တၞဟ်ဂှ် တဳလမၞုံပိုဉ်ကျာ်တြဲ ဒုၚ်ဂိုၚ်ကေတ် ကွာၚ်ဗဗိုဟ်ကၞိကီု ကွာၚ်မြဳဗ္ကသာဲကီုတုဲ သ္ပပြဘိုဂ်ရ။
ပ္ဍဲအခိၚ်ဂှ် သၟာဗၞိက်တပူဿ,ဘလ္လိက (ကောကဵုဒေံ) ဂမၠိုၚ် တီကေတ်တဳလမၞုံပိုဉ်ကျာ်တြဲ ပါဲကၠေံတဲနူဗဗေၚ်တုဲဒှ်တုဲ မာဖျေံနကၞိပ် ပ္ဍဲဂၠးဇိုၚ်တဳလမၞုံပိုဉ်ကျာ်တြဲတုဲ “ယွံတဳလမၞုံပိုဉ်ကျာ်တြဲ ပိုဲဍိက်တအ်ညးဂမၠိုၚ် ပြာပ်ခသ္ပစ္ၜုဲစ္ၜော်သကအ်ဗ္ဒကဵု တဳလမၞုံပိုဉ်ကျာ်တြဲအိုတ်ရ၊ ဓရ်ဂှ်လေဝ် ပြာပ်ခသ္ပစ္ၜုဲစ္ၜော်သကအ်ဗ္ဒအိုတ်ရ၊ တဳလမၞုံပိုဉ်ကျာ်တြဲဂှ် သ္ပတမ်နူတ္ၚဲဝွံတုဲ စဵုကဵုလအိတ်လမျီု ပိုဲဍိက်တအ်ညးဂမၠိုၚ်ဂှ် ဥပးပြာပ်ခသ္ပစ္ၜုဲစ္ၜော်သကအ်ဗ္ဒ ရဴဝွံ ဩဝ်ဂိုၚ်သမ္တီလဝ်ညိ” ရဴဝွံ ဂရၚ်ပတီအိုတ်ရ။
သၟာဗၞိက် (ကောကဵုဒေံ) ဂမၠိုၚ်ၜါတၠဂှ်တုန် ပ္ဍဲလောကဝွံ ဒှ်ဥပးဂမၠိုၚ် ဒွေဝါစိကသရဏဂီု တန်တဴ ဗွဲကိုပ်ကၠာအိုတ်ရ။
ပွမသ္ပဒတဴ ပ္ဍဲသၟဝ်တၞံဗပိုန်တုဲရ။
