၅၀။ ဝတ္ထုတိရစ္ဆာန်
၁၁၁။ ပ္ဍဲကာလမွဲအခိၚ် နာဂ်မွဲ ဇအိုတ်ဇရ ဂွဂၠေံက္ဍုဟ်မၠေံ ဘဝနာဂ်တုဲ “အဲ မုရဴနနဲမွဲ သ္ဂောံဗၠးၜးတိတ် နူဘတနာဂ်ရော? သ္ဂောံကလိဂွံဒဒှ်မၞိဟ် ဗွဲမပြဟ်ရရော?” ရဴဝွံ ကသပ်ဒှ်ရ။
ပ္ဍဲကြဴနူဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ မၞုံအလေံဒ္ဂေတ်တဴဓရ်အိုတ်ရ၊ မၞုံအလေံဒ္ဂေတ်တဴ ဒ္ဂေတ်မသၟဟ်သမန်အိုတ်ရ၊ မၞုံအလေံဒ္ဂေတ်တဴမပြဲအိုတ်ရ၊ မၞုံအလေံဟီုသ္ဂးဍာံစၟတ်အိုတ်ရ၊ မၞုံကဵုသဳလအိုတ်ရ၊ မၞုံသဘဴခိုဟ်ဆာဲအိုတ်ရ၊ ယဝ်အဲ သ္ဂောံသ္ပခမဳ ပ္ဍဲဇရေၚ်ခမဳဂမၠိုၚ် မဒှ်တၞောတ်ကျာ်ကောန်သၟိၚ်သာကျဝၚ်မ္ဂး၊ သ္ပခမဳရဴဝွံမ္ဂး အဲ ဗၠးၜးတိတ်နူဘဝနာဂ်ရ၊ ဒဒှ်မၞိဟ်လေဝ် ကလိဂွံဗွဲမပြဟ်ရ” ရဴဝွံ ကသပ်ဒှ် ကုနာဂ်ဂှ်ပၠန်ရ။
ပ္ဍဲအခိၚ်ဂှ် နာဂ်ဂှ် နကဵုလွေဟ်အယောၚ်အလာသၟတ်ဗၠာဲ ပြာပ်အာဇရေၚ် ခမဳဂမၠိုၚ်တုဲ အာတ်အခေါၚ် ဒဒှ်ခမဳရ၊ ခမဳဂမၠိုၚ် ပကဵုထပိုဲ နာဂ်ဂှ်အိုတ်ရ၊ ပကဵုခမဳပယျၚ်အိုတ်ရ။ ပ္ဍဲအခိၚ်ဂှ် နာဂ်ဂှ် ပဒတဴဒၟံၚ် ပ္ဍဲဘာမဒှ်လအိတ်မုဟ် ကေုာံခမဳမွဲဇကုရ။ ပ္ဍဲအခိၚ်ဂှ် ခမဳမွဲဇကုဂှ် ပ္ဍဲအခၚ်ဖလာၚ်ယး ဒၠိုက်ကတဵုပြဟ်ပြဟ်တုဲ ကွာ်ဒၟံၚ်စၚ်္ကြမ် ပ္ဍဲအမှဲအကးရ။ ပ္ဍဲအခိၚ်ဂှ် နာဂ်ဂှ် အခိၚ်ခမဳ တိတ်အာမ္ၚးဂှ် သတိတိတ်ဗၠးတုဲ အာစိုပ်ပွမတိက်လှိၚ်ရ။ အလုံဘာမွဲ ပေၚ်ဒၟံၚ်နကဵုဇြုံရ၊ ကဝးဂမၠိုၚ် တိတ်ကၠုၚ်နူဗ္တၚ်ကျာဂမၠိုၚ်အိုတ်ရ။
ပ္ဍဲအခိၚ်ဂှ် ခမဳဂှ် “ကြက်လုပ်အာရ” ရဴဝွံ ဓရိုဟ်ထောံသၠတြၚ်မ္ဂး ဟိုတ်မဂွံညာတ်ကေတ်အလုံဘာမါဲ ပေၚ်က္ဍတ်ဒၟံၚ်နကဵုဇြုံတုဲ ကဝးဂမၠိုၚ် တိတ်ဒၟံၚ်နူဗ္တၚ်ကျာဂမၠိုၚ်ဂှ်ရ၊ ဖေက်ဂၟံက်ဒှ်တုဲ သ္ပတဴရမျာၚ်မက္ညာၚ်ကရေဲရ။ ခမဳဂမၠိုၚ် ဂြိပ်ကၠုၚ်တုဲမ္ဂး “ယွံကောန်တၠ တၠအဲ မုဟိုတ် သ္ပတဴရမျာၚ် မက္ညာၚ်ကရေဲရော?” ရဴဝွံ သၟာန်ခမဳဂှ်အိုတ်ရ။ ယွံကောန်တၠတအ် အလုံဘာမွဲ ပေၚ်ဒၟံၚ်နကဵုဇြုံရ၊ ကဝးဂမၠိုၚ် တိတ်ဒၟံၚ်နူဗ္တၚ်ကျာဂမၠိုၚ်အိုတ်ရ ရဴဝွံ (ဟီုသ္ဂးရ)။
ပ္ဍဲအခိၚ်ဂှ် နာဂ်ဂှ် လကိုတ်ၚုဟ်တိုန် နကဵုဗရုရမျာၚ် မဟီုသ္ဂးဂှ်တုဲ ဂဇအ်ဒၟံၚ် ပ္ဍဲဒၞါဲဇကုရ။ ခမဳဂမၠိုၚ် “ယွံကောန်တၠ တၠအဲဂှ် ဒှ်ညးဂှ်ရော?” ရဴဝွံ သၟာန်အိုတ်ရ။ “ယွံတဳလပိုဉ်တအ် အဲဍိက်တုန် နာဂ်ရ” ရဴဝွံ ဟီုသ္ဂးတိုန်မ္ဂး ယွံကောန်တၠ တၠအဲ မုဟိုတ် သ္ပတဴပွမၞုံသဘဴရဴဝွံရော? ရဴဝွံ (သၟာန်အိုတ်ရ)။ ပ္ဍဲအခိၚ်ဂှ် နာဂ်ဂှ် ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုဂကောံခမဳကောံဓရီုတုဲ “မၞးနာဂ်တအ်ညးဂမၠိုၚ် ပ္ဍဲသာသနာဝွံ ဟွံမွဲကဵုသဘဴပွမဇၞော်မောဝ်အိုတ်ရ၊ ယွံနာဂ် တၠအဲ ဩဝ်အာညိ၊ ပ္ဍဲဍုၚ်နာဂ်ဂှ်ဟေၚ် ပ္ဍဲတ္ၚဲဥပေါသ်မရနုက်ကဵုစှ်ပန်ကီု ပ္ဍဲတ္ၚဲဥပေါဟ်မရနုက်ကဵုစှ်သုန်ကီု ပ္ဍဲတ္ၚဲဥပေါဟ် ဒ္စာံမံက်ဒ္စာံစွေက်ကီု ဩဝ်ဒ္ဂေတ်လ္ၚတ်မၚ်မွဲ ဥပေါသ်ညိ၊ ယွံနာဂ်ဂှ် တၠအဲဒ္ဂေတ်လ္ၚတ်မၚ်မွဲဥပေါဟ်ရဴဝွံမ္ဂး နူဂကူနာဂ်လေဝ် ကြက်ဂွံတိတ်ဗၠးရ၊ ဒဒှ်မၞိဟ်လေဝ် ကြက်လလိဂွံ ဗွဲမပြဟ်ရ” ရဴဝွံ သ္ဂးကဵုနာဂ်ဂှ်ရ။ ပ္ဍဲအခိၚ်ဂှ် နာဂ်ဂှ် “အဲ ဟွံမွဲကဵုသဘဴပွမဇၞော်မောဝ် ပ္ဍဲသာသနာဝွံရ” ရဴဝွံ မၞုံကဵုပွမဒှ်ဒဒိုခ်စိုတ် ဟွံမိပ်စိုတ်ဒှ်တုဲ သီုကဵုဇွောဝ်တဴဍာ်ရမတ်ဂမၠိုၚ် လရိုအ်ယာံတုဲ စ္ဍးအာရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ် ဟိုတ်သွက်ဂွံကတဵုဒှ်ကၠုၚ်ပြာကဋ်သဘဴပကတိ နာဂ်ဂမၠိုၚ်တုန် ပွမသွိုန်ဗပိုန်သိပ်ဂၠိပ်မေထုန် ပ္ဍဲနာဂ်ၝောံဇာတ်တုပ် သတိတိတ်ဗၠးတုဲ အာစိုပ်ပွမတိက်လှိၚ်ၜါပြကာဂမၠိုၚ်ရ။
ယွံခမဳတအ် တိရစ္ဆာန်ဂှ် ဟွံဒှ်ခမဳပယျၚ်ရ၊ ဟဂပ်ဝ်သ္ပကဵုခမဳပယျၚ်ရ၊ သ္ပဒးကဵုခမဳပယျၚ်မ္ဂး သ္ဒးပြာမ်ပၠေၚ်ကၠေံ (သ္ဒးပလီုပလာ်ကၠေံ အယောၚ်အလာ) ရ” ရဴဝွံ (သ္ဂးရ)။ (၄)
