၄၈။ ဝတ္ထုညးကၠတ်ပံၚ်ဖက်

၁၁၀။ ပ္ဍဲကာလမွဲအခိၚ် ကောန်ဂကူမွဲတၠ မဒှ်ကၠေံနှၚ်အိုတ်ကၠုၚ် နူဂကူဇၞော်ဂှ် ဒှ်ညးဍိုန်ဍောတ် ၜတ်တကတ်တုဲ “အဲတုန် ဒှ်ညးဍိုန်ဍောတ်ရ၊ တၞဟ်နကလိဂွံ ပိုဉ်ဟာန်ဘိုဂ်ဘဂ် မဟွံကလိဂွံဏီကီု ပိုဉ်ဟာန်ဘိုဂ်ဘဂ် မကလိဂွံတုဲလေဝ် တၞဟ်နပွမသ္ပညံၚ်ဂွံဇၞော်မောဝ်ကီုဂှ် ဟွံသၟဟ်ရထရ၊ အဲ မုရဴနနဲမွဲ သီုဟွံဍောၚ်ၜိုတ် သ္ဂောံဂယိုၚ်လမျီုဗွဲတသိုခ်ရော?” ရဴဝွံ ကသပ်ဒှ်ရ။

ပ္ဍဲကြဴနူဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ မၞုံအလေံဒှ်တသိုခ်အိုတ်ရ၊ မၞုံကဵုဒ္ဂေတ်ဒှ်တသိုခ်အိုတ်ရ၊ သ္ဂောံစ စၞစသုၚ်ခိုဟ်ဂမၠိုၚ်တုဲ ပ္ဍဲသၞာသတိက်သၞာဒၟံၚ် ဗၠးဗြဲကျာဂမၠိုၚ် သ္ဂောံတိက်အိုတ်ရ၊ အဲ အလဵုဇကု စဳရေၚ်ကေတ်ဗဗေၚ်သ္ၚာတုဲ ကးပါဲကၠေဴသော်က္ဍိုပ်သော်သၟိပ် သၠောံလတက်ကေတ် ယာတ်ဖျောန်ဍာ်လွံက်ဂမၠိုၚ်တုဲမ္ဂး အာ အာရှာမ်တုဲ သ္ဂောံပံၚ်ဖက်ပဒတဴမွဲစွံ ကေုာံခမဳဂမၠိုၚ်မ္ဂးး ခိုဟ်သန်ရ” ရဴဝွံ ကသပ်ဒှ်ပၠန်ရ။

ပ္ဍဲကြဴနူဂှ် ညးဂှ် အလဵုဇကု စဳရေၚ်ကေတ်ဗဗေၚ်သ္ၚာတုဲ ကးပါဲကၠေံသော်က္ဍိုပ်သော်သၟိပ် သၠောံလတက်ကေတ် ယာတ်ဖျောန်ဍာ်လွံက်ဂမၠိုၚ်တုဲမ္ဂး အာ အာရှာမ်တုဲ လ္ၚောဝ်ခမဳဂမၠိုၚ်ရ။ ခမဳဂမၠိုၚ် “ယွံကောန်တၠ တၠအဲ ကလိဂွံမုစိဝသ်ရော?” ရဴဝွံ သၟာန်အိုတ်ရ။

ယွံကောန်တၠတအ် ကလိဂွံမုစိဝသ်ရော? ဟီုမ္ဂးဂှ်တုန် မိက်ဟီုသ္ဂး မုမွဲဂှ်ရော? ရဴဝွံ (ကလေၚ်သၟာန်ရ)။ ယွံကောန်တၠ အ္စာဥပဇ္ၛာယ် တၠအဲတုန် ညးလဵုဂှ်ရော? ရဴဝွံ (သၟာန်အိုတ်ပၠန်ရ)။ ယွံကောန်တၠတအ် အ္စာဥပဇ္ၛာယ် ဟီုမ္ဂးဂှ်တုန် မိက်ဟီုသ္ဂး မုမွဲဂှ်ရော? ရဴဝွံ (ကလေၚ်သၟာန်ရ)။

ခမဳဂမၠိုၚ်ဂှ် “ယွံကောန်တၠဥပါလိ ဗတိုက်ဖအောဝ်ရ၊ ဩဝ်သၟာန်စၟဳစၟတ် ခမဳဝွံညိ” ရဴဝွံ သ္ဂးကဵုတဳလပိုဉ်ဥပါလိအိုတရ။ ပ္ဍဲအခိၚ်ဂှ် ကောန်ဂကူ မကၠေံနှၚ်အိုတ်ကၠုၚ် နူဂကူဇၞော်ဂှ် တဳလပိုဉ်ဥပါလိ ဂပ်ဝ်သၟာန်စၟဳစၟတ်မ္ဂး ဟီုလဴဗ္စ ပရူပရာဂှ်ရ။ တဳလပိုဉ်ဥပါလိ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ညးကၠတ်ပံၚ်ဖက်ဂှ် ဟွံဒှ်ခမဳပယျၚ်ရ၊ ဟဂပ်ဝ်ပကဵုခမဳပယျၚ်ရ၊ ပဒးကဵုခမဳပယျၚ်မ္ဂး သ္ဒးပြာမ်ပၠေၚ်ကၠေံ (သ္ဒးပလီုပလာ်ကၠေံ အယောၚ်အလာ) ရ ရဴဝွံ (သ္ဂးရ)။ ယွံခမဳတအ် ညးပြံၚ်အာဗော်တဳဂှ် ဟွံဒှ်ခမဳပယျၚ်ရ၊ ဟဂပ်ဝ်ပကဵုခမဳပယျၚ်ရ၊ ပဒးကဵုခမဳပယျၚ်မ္ဂး သ္ဒးပြာမ်ပၠေၚ်ကၠေံရ ရဴဝွံ (သ္ဂးရ)။ (၂—၃)