၅၀။ ဝတ္ထုညးဂစိုတ်မိ

၁၁၂။ ပ္ဍဲကာလမွဲအခိၚ် သၟတ်ဗၠာဲမွဲ ဂစိုတ်ဒးမိအံက်တုဲ ဇအိုတ်ဇကု ဂွဂၠေံက္ဍုဟ်မၠေံကမ်ပွသရာံပါပ်ဂှ်တုဲ “အဲ မုရဴနနဲမွဲ သ္ဂောံသ္ပတဴ ပွမတိတ်ဗၠး နူကမ်ပွသရာံပါပ်ဝွံရော?” ရဴဝွံ ကသပ်ဒှ်ရ။

ပ္ဍဲကြဴနူဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ မၞုံအလေံဒ္ဂေတ်တဴ ဓရ်အိုတ်ရ၊ မၞုံအလေံဒ္ဂေတ်တဴ ဒ္ဂေတ်မသၟဟ်သၟန်အိုတ်ရ၊ မၞုံအလေံဒ္ဂေတ်တဴမပြဲအိုတ်ရ၊ မၞုံအလေံဟီုသ္ဂးဍာံစၟတ်အိုတ်ရ၊ မၞုံကဵုသဳလအိုတ်ရ၊ မၞုံသဘဴခိုဟ်ဆာဲအိုတ်ရ၊ ယဝ်အဲ သ္ဂောံသ္ပခမဳ ပ္ဍဲဇရေၚ်ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်မ္ဂး၊ သ္ပခမဳရဴဝွဴမ္ဂး အဲသ္ပတဴ ပွမတိတ်ဗၠး နူကမ်ပွသရာံပါပ်ဝွံမာန်ရ” ရဴဝွံ ကသပ်ဒှ် ကုသၟတ်ဗၠာဲဂှ်ပၠန်ရ။

ပ္ဍဲအခိၚ်ဂှ် သၟတ်ဗၠာဲဂှ် ပြာပ်အာဇရေၚ် ခမဳဂမၠိုၚ်တုဲ အာတ်အခေါၚ် ဒဒှ်ခမဳရ၊ ခမဳဂမၠိုၚ် “ယွံကောန်တၠဥပါလိ ပ္ဍဲကိုပ်ကၠာတေံလေဝ် နာဂ်ဂှ် နိမိတ်ဗဒှ်လွေဟ်သၟတ်ဗၠာဲတုဲမ္ဂး ကေၚ်ပခမဳပ္ဍဲဇရေၚ်ခမဳဂမၠိုၚ်ရ၊ ယွံကောန်တၠဥပါလိ ဗတိုက်ဖအောဝ်ရ၊ ဩဝ်သၟာန်စၟဳစၟတ် သၟတ်ဗၠာဲဝွံညိ” ရဴဝွံ သ္ဂးကဵုတဳလပိုဉ်ဥပါလိအိုတ်ရ။ ပ္ဍဲအခိၚ်ဂှ် သၟတ်ဗၠာဲဂှ် တဳလပိုဉ်ဥပါလိ ဂပ်ဝ်သၟာန်စၟဳစၟတ်မ္ဂး ဟီုလဴဗ္စပရူပရာဂှ်ရ။ တဳလပိုဉ်ဥပါလိ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ညးဂစိုတ်မိဂှ် ဟွံဒှ်ခမဳပယျၚ်ရ၊ ဟဂပ်ဝ်သ္ပကဵုခမဳပယျၚ်ရ၊ သ္ပဒးကဵုခမဳပယျၚ်မ္ဂး သ္ဒးပြာမ်ပၠေၚ်ကၠေံ (သ္ဒးပလီုပလာ်ကၠေံအယောၚ်အလာ) ရ ရဴဝွံ (သ္ဂးရ)။ (၅)