၄၃။ ဝတ္ထုပွမကဵုဒဏ်တပ်ဒဏ်
၁၀၇။ ပ္ဍဲကာလမွဲအခိၚ် သာမဏဳဂမၠိုၚ် သီုဟွံရှ်ေသှ်ေရဴဂဴ ဇအ်သဝ်အောပ်မာ ဟွံမွဲကဵုသဘဴတုပ်သၟဟ် ပ္ဍဲခမဳဂမၠိုၚ်ဂှ် ပဒတဴဒမံၚ်အိုတ်ရ။ ခမဳဂမၠိုၚ် “မုဟိုတ် သာမဏဳဂမၠိုၚ် သီုဟွံရှ်ေသှ်ေရဴဂဴ ဇအ်သဝ်အောပ်မာ ဟွံမွဲကဵုသဘဴတုပ်သၟဟ် ပ္ဍဲခမဳဂမၠိုၚ်ဂှ် ပဒတဴဒၟံၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကဵုအခေါၚ် တၞဟ်နပွမတပ်ဒဏ် ကုသာမဏဳမဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာရ။
ပတိတ်ဇြဟတ်လွဳပရာ တၞဟ်နခမဳဂမၠိုၚ် ဟွံကလိဂွံလာဘ်ရ၊ ပတိတ်ဇြဟတ်လွဳပရာ တၞဟ်နခမဳဂမၠိုၚ် ဂွံဒှ်လလေၚ်ဖဵုရ၊ ပတိတ်ဇြဟတ်လွဳပရာ တၞဟ်နခမဳဂမၠိုၚ် ဟဂွံပဒတဴ ပ္ဍဲဘမတန်ဒၟံၚ်ဒမၠိရ၊ တ္ၜေဟ်လက်လဗပ်ပကီု ဟီုတေၚ်စုတ် ခမဳဂမၠိုၚ်ရ၊ ကဵုခမဳဂမၠိုၚ် ပါဒကးအာရၚ်သကအ်ရ။ ယွံခမဳတအ် ကဵုအခေါၚ် တၞဟ်နပွမတပ်ဒဏ် ကုသာမဏဳ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံရ” ရဴဝွံ (သ္ဂးရ)။
ပ္ဍဲအခိၚ်ဂှ် “မုရဴသာ်လဵု သ္ဂောံတပ်ဒဏ်ရော?” ရဴဝွံ ကသပ်ဒှ် ကုခမဳဂမၠိုၚ်ရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကဵုအခေါၚ် တၞဟ်နပွမဆေဝ်ဒဝ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် ဆေဝ်ဒဝ်ကၟာတ်ကၠေံ သာမဏဳဂမၠိုၚ် (ရဴဝွံမ္ဂးလ္ပလုပ်) အာရှာမ်သၚ်အိုတ်သီုအိုတ်ရ။ သာမဏဳ ဟိုတ်မဟွံကလိဂွံအခေါၚ်လုပ် အပ္ဍဲအာရှာမ်ဂှ်ရ ဌာန်သအာၚ်လေဝ် စ္ဍးအာအိုတ်ရ၊ ခရှ်လေဝ် ရာံတိတ်အိုတ်ရ၊ ဗော်တဳလေဝ် ပြံၚ်အာအိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ဟဂပ်ဝ်ဆေဝ်ဒဝ်ကၟာတ်ကၠေံ (ရဴဝွံမ္ဂးလ္ပလုပ်) အာရှာမ်သၚ်အိုတ်သီုရ၊ ကုခမဳ မဆေဝ်ဒဝ်ကၟာတ်ကၠေံဂှ် ဒးအာပတ်ဒုက္ကဋ်ရ။ ယွံခမဳတအ် ပ္ဍဲဌာန်ပဒတဴမံၚ်စံၚ် ဌာန်လုပ်တိတ်ဂမၠိုၚ်ဟေၚ် ကဵုအခေါၚ် တၞဟ်နပွမဆေဝ်ဒဝ်ကၟာတ်ကၠေံရ” ရဴဝွံ (သ္ဂးရ)။
ပ္ဍဲမွဲအခိၚ်တေံ ခမဳဂမၠိုၚ် ဆေဝ်ဒဝ်ကၠေံ (ရဴဝွံမ္ဂးလ္ပစသုၚ်) စၞအာဟာရ သာမဏဳဂမၠိုၚ် မစသုၚ်အိုတ်ရ။ မၞိဟ်ဂမၠိုၚ် ဆန်ၜန်စဳရေၚ်တဴ ယာဂုထေက်ကဵုသုၚ်ကီု သံဃဘတ်ကီုအိုတ်မ္ဂး “ယွံတဳလပိုဉ်တအ် ဩဝ်က္ညကၠုၚ်အိုတ်ညိ၊ ဩဝ်သုၚ်ယာဂုအိုတ်ညိ။ ဩဝ်ပြဘိုဂ်ပိဏ္ဍပါတ်အိုတ်ညိ” ရဴဝွံ အခိၚ်မဟီုတိုန်ကဵုသာမဏဳဂမၠိုၚ်ဂှ် “ယွံဒကာတအ် ဟိုတ်နူခမဳဂမၠိုၚ် ဆေဝ်ဒဝ်ကၟာတ်လဝ်ဂှ်ရ ဟွံကလိဂွံ (အခေါၚ်သွက်ဂွံစသုၚ်)” ရဴဝွံ သာမဏဳဂမၠိုၚ် ဟီုသ္ဂးအိုတ်ရ။ မၞိဟ်ဂမၠိုၚ် “မုဟိုတ် တဳလပိုဉ်မဆာဲဂမၠိုၚ် ဆေဝ်ဒဝ်ကၠေံ စၞအာဟာရ သာမဏဳဂမၠိုၚ် မစသုၚ်အိုတ်ရော?” ရဴဝွံ ဟီုဂရိုဟ်အိုတ်၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ဟဂပ်ဝ်သ္ပ ပွမဆေဝ်ဒဝ်ကၠေံ စၞအာဟာရ သာမဏဳဂမၠိုၚ် မစသုၚ်ရ၊ ကုခမဳမသ္ပ (ပွမဆေဝ်ဒဝ်) ဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
ဝတ္ထုပွမကဵုဒဏ်တပ်ဒဏ်တုဲရ။
