၄၂။ သိက္ခာပိုဒ်

၁၀၆။ ပ္ဍဲအဃောဂှ် “ဒ္ဂေတ်ဝတ်သိက္ခာပိုဒ် ပိုဲညးဂမၠိုၚ် မၞုံဗၞတ်မုစိအိုတ်ရော? ပ္ဍဲဒ္ဂေတ်ဝတ် သိက္ခာပိုဒ်ဂမၠိုၚ်မုစိ ပိုဲညးဂမၠိုၚ်ဂွံဒ္ဂေတ်ရော?” ရဴဝွံ ကသပ်ဒှ် ကုသာမဏဳဂမၠိုၚ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကဵုအခေါၚ်သိက္ခာပိုဒ်ဂမၠိုၚ်စှ်ပြကာ ကုသာမဏဳဂမၠိုၚ်ရ၊ ပ္ဍဲသိက္ခာပိုဒ်ဂမၠိုၚ်ဂှ်လေဝ် တၞဟ်နသာမဏဳဂမၠိုၚ်ဒ္ဂေတ်လ္ၚတ်ကဵုအခေါၚ်ရ။

ပွမဝေၚ်ပါဲကၠေံ နူပွမဂစိုတ်လမျီု၊ ပွမတေၚ်ပါဲကၠေံ နူပွမဂိုၚ်ကၠတ်ကေတ် ဂြပ်မတွံကဵု၊ ပွမဝေၚ်ပါဲကၠေံ နူပွမဒ္ဂေတ်မေထုန်မယုတ်မာ၊ ပွမဝေၚ်ပါဲကၠေံ နူပွမဟီုဂလာန်ကၞိက်ဗ္ဒန်ဟွံဍာံစၟတ်၊ ပွမဝေၚ်ပါဲကၠေံ နူပွမသုၚ်စသိအရက် မဒှ်ဟိုတ်မၜူမာဲ၊ ပွမဝေၚ်ပါဲကၠေံ နူပွမစပ္ဍဲကာလတ္ၚဲမစေၚ်၊ ပွမဝေၚ်ပါဲကၠေံ နူပွမဗဵုကလၚ် ပွမလှ်ေပွမဂယှ်ေပွမတိၚ်တိုက် မဒှ်ညံၚ်ဒစုက်ဇၠသာသနာ၊ ပွမဝေၚ်ပါဲကၠေံ နူပွမဝက်စရှ်ပကဴသဴ ပွမလံက်ဗဗိုဟ်ဂ္စေအ်စၠန် ပွမကျိုၚ်ကျဝ်ဗြံက်ဗြ၊ ပွမဝေၚ်ပါဲကၠေံ နူပွမသတိက်ပွမဂဇအ် ပ္ဍဲသၞာမသၠုၚ် သၞာမပြဲ၊ ပွမဝေၚ်ပါဲကၠေံ နူပွမဒုၚ်ဂိုၚ်ကေတ် ကသာပ်ထဝ်သြန်ဂမၠိုၚ်ရ။ ယွံခမဳတအ် ကဵုအခေါၚ်သိက္ခာပိုဒ်ဂမၠိုၚ်စှ်ပြကာ ကုသာမဏဳဂမၠိုၚ်ရ၊ ပ္ဍဲသိက္ခာပိုဒ်ဂမၠိုၚ်ဂှ်လေဝ် တၞဟ်နသာမဏဳဂမၠိုၚ်ဒ္ဂေတ်လ္ၚတ် ကဵုအခေါၚ်ရ” ရဴဝွံ (သ္ဂးရ)။