၁၈။ ပွမစၞောန်ထ္ၜးကဵုဒ္ဂေတ်ဝတ်ထေက်ကဵုဒးသ္ပ ပ္ဍဲအ္စာနိဿယ
၇၄။ ပ္ဍဲကာလမွဲအခိၚ် သၟတ်ဗၠာဲမွဲ ပြာပ်အာဇရေၚ်ခမဳဂမၠိုၚ်တုဲ အာတ်အခေါၚ် ဒဒှ်ခမဳရ။
ခမဳဂမၠိုၚ် ဗွဲကိုပ်ကၠာ (ဟဂွံပခမဳဏီ) ဟေၚ် ဟီုလဴထ္ၜးကဵု အရာနိဿဲ (ပစ္စယ်ပန်) ဂမၠိုၚ် ကုညးဂှ်အိုတ်ရ။ သၟတ်ဗၠာဲဂှ် “ယွံတဳလပိုဉ်တအ် ယဝ်သ္ပခမဳတုဲမှ ဟီုလဴထ္ၜးကဵု အရာနိဿ (ပစ္စယ်ပန်) ဂမၠိုၚ် ကုအဲဍိက်အိုတ်မ္ဂး၊ အဲဍိက်ဂှ် မိပ်လဟိၚ်ဗွဲမလောန်ရ၊ ယွံတဳလပိုဉ်တအ် လၟုဟ်ဟီုမ္ဂး အဲဍိက်ဟွံသ္ပခမဳရ၊ အဲဍိက် က္ဍုဟ်မၠေံဇအိုန်ရ အရာနိဿဲ (ပစ္စယ်ပန်) ဂမၠိုၚ်ရ” ရဴဝွံ သ္ဂးရ။
ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကိုပ်ကၠာဟဂွံပခမဳဏီ ဟဂပ်ဝ်ဟီုလဴထ္ၜးကဵု အရာနိဿဲ (ပစ္စယ်ပန်) ဂမၠိုၚ်ရ၊ ကုခမဳ မဟီုလဴထ္ၜးဂှ် ဒးအာပတ်ဒုက္ကဋ်ရ။ “ယွံခမဳတအ် ပ္ဍဲမသက္ကုခြာ သ္ပခမဳတုဲဂှ် ကဵုအခေါၚ် သွက်ဂွံဟီုလဴထ္ၜးကဵု အရာနိဿဲ (ပစ္စယ်ပန်) ဂမၠိုၚ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ခမဳဂမၠိုၚ် နဂကောံဂိုဏ်ၜါဇကု နဂကောံဂိုဏ်ပိဇကု ပကဵုခမဳပယျၚ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ျကျာ်တြဲအိုတ်ရ။ ယွံခမဳတအ် နကဵုဂိုဏ် မယုတ်ဒေက်သၟဝ်ဂကောံစှ်ဇကုဂှ် ဟဂပ်ဝ်ပကဵုခမဳပယျၚ်ရ၊ ယြဴခမဳမွဲ ပကဵုခမဳပယျၚ်မ္ဂး၊ ကုခမဳဂှ် ဒးအာပတ်ဒုက္ကဋ်ရ။ ယွံခမဳတအ် နဂကောံဂိုဏ်စှ်ဇကုကီု နဂိုဏ်မလောန်လတူဂကောံစှ်ဇကုကီု ကဵုအခေါၚ်တၞဟ်နသ္ပကဵုခမဳပယျၚ်ရ” ရဴဝွံ (သ္ဂးရ)။
၇၅။ ပ္ဍဲအခိၚ်ဂှ် ခမဳမလိဂွံမွဲဝသ် ၜါဝသ်ဂမၠိုၚ် သ္ပကဵုပယျၚ် ကွးဒတဴမွဲစွံအိုတ်ရ။ တဳလပိုဉ်ဥပသေန မဒှ်ကောန်ဗဗၞးဝၚ်္ဂန္တလေဝ် သီုမကလိဂွံမွဲဝသ်ဓဝ်ဂှ် ပကဵုပယျၚ် ကွးပဒးတဴမွဲစွံရ၊ ဥပသေနဂှ် လိုက်ဝှ်မ္ဂး ဂွံၜါဝသ်ဒှ်တုဲ ကော်ကေတ်ကွးပဒတဴမွဲစွံ မကလိဂွံမွဲဝသ်ဟေၚ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ်တုဲ ဂဇအ်ဒၟံၚ်ပ္ဍဲဒၞါဲမွဲရ။
ပွမဟီုဂလာန််ဆက်မိတ် ဗွဲမမိပ်စိုတ်အိုဟ်တၟိုဟ် ကေုာံခမဳအာဂန္တုကဂမၠိုၚ်မွဲစွံဂှ် ဒှ်အခိုက်အလေံ တဳလမၞုံပိုဉ်ကျာ်တြဲဂမၠိုၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ်—
“ယွံခမဳ မိပ်ဇြိပ်ထတ်ယုက်ဟာ၊ ယိုပ်ယာပ်ဟာ၊ တၠအဲ သီုဟွံဍောၚ်ၜိုတ် သ္ဂောံကၠုၚ်တဴ တရဴအဓာန်မဂၠိၚ်သ္ၚောဲဟာ” ရဴဝွံ သၟာန်တိုန် တဳလပိုဉ်ဥပသေန မဒှ်ကောန်ဗဗၞးဝၚ်္ဂန္တဂှ်—
မိပ်ဇြိပ်ထတ်ယုက်ရ ယွံကျာ်မၞုံပိုဉ်၊ ယိုပ်ယာပ်၇ ယွံကျာ်မၞုံပိုဉ်၊ ပိုဲဍိက်တအ်ညးဂမၠိုၚ် သီုဟွံဍောၚ်ၜိုတ်ဂှ် သ္ဂောံကၠုၚ်တဴ တရဴအဓာန်မဂၠိၚ်သ္ၚောဲရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
ကျာ်တြဲဂမၠိုၚ် သီုကဵုမတီတဴလေဝ် သၟာန်သၟုက်အိုတ်ရ၊ သီုကဵုမတီတဴလေဝ် ဟွံသၟာန်သၟုက်အိုတ်ရ။ တီအခိၚ်အခါတုဲ သၟာန်သၟုက်အိုတ်ရ၊ တီအခိၚ်အခါတုဲ ဟွံသၟာန်သၟုက်အိုတ်ရ။ ကျာ်တြဲဂမၠိုၚ် သၟာန်သၟုက်တဴ စပ်ကဵုဒတုဲဖဵုအိုတ်ရ၊ ဟွံစပ်ကဵုဒတုဲဖဵုဂှ် ဟွံသၟာန်သၟုက်အိုတ်ရ။ ကျာ်တြဲဂမၠိုၚ် ပါဲကၠေံ မဟွံစပ်ကဵုဒတုဲဖဵုဂမၠိုၚ် နကဵုမဂ်တုဲအိုတ်ရ။ နကဵုဟွံတ်ဂမၠိုၚ်ၜါပြကာမတွံဂး “ဓရ်ဂှ်လေဝ် ကြက်တွံအိုတ်ရ၊ သိက္ခာပိုဒ်ဂှ်လေဝ် ကြက်ပညပ်တဴ ကုကွးဂမၠိုၚ်အိုတ်ရ” ဂှ် ကျာ်တြဲ မပတၠပိုဉ်တြဴပြကာဂမၠိုၚ် သၟာန်သၟုက်တဴ ခမဳဂမၠိုၚ်အိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳ တၠအဲ ဂွံမုစိဝသ်ရော?” ရဴဝွံ သၟာန်တဳလပိုဉ်ဥပသေန မဒှ်ကောန်ဗဗၞးဝၚ်္ဂန္တရ။ ယွံကျာ်မၞုံပိုဉ် အဲဍိက် ဂွံၜါဝသ်တုဲရ ရဴဝွံ (ဂရၚ်ပတီရ)။
ခမဳဝွံ ဂွံမုစိဝသ်ရော? ရဴဝွံ (သၟာန်တိုန်ဂှ်) ယွံကျာ်မၞုံပိုဉ် ဂွံမွဲဝသ်ဓဝ်ဏီရ ရဴဝွံ (ဂရၚ်ပတီရ)။ ခမဳဝွံ သာ်လဵုဆေပ်စပ်ကဵုတၠအဲရော? ရဴဝွံ (သၟာန်တိုန်ဂှ်) ယွံကျာ်မၞုံပိုဉ် ကွးပဒတဴမွဲစွံ အဲဍိက်ရ ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ ယွံတြုံမလ္ၚုသၟး (နူမဂ်ဖိုလ်) ဟွံထေက်ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာအရာခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ ယွံတြုံမလ္ၚုသၟး (နူမဂ်ဖိုလ်) သီုကဵုညးသအာၚ်ဂမၠိုၚ် ဂပ်ဝ်ဒၠောံဗတောန်ဝေတ်စၞောန်ထ္ၜး တၠအဲဏီဂှ် မုဟိုတ် ဗှ်ဗၞုဟ်သမ္တီကေတ် တၞဟ်နပွမဒၠောံဗတောန်ဝေတ်စၞောန်ထ္ၜးညးသအာၚ်ရော? ယွံတြုံမလ္ၚုသၟး (နူမဂ်ဖိုလ်) တၠအဲ ဒ္ဂေတ်သ္ပတဴ တၞဟ်နဂကောံဂိုဏ်ဂၠိုၚ်ဂၠၚ်ကၠုၚ် ဗွဲမပြဟ်လောန်ရသွံ။ ယွံတြုံမလ္ၚုသၟး (နူမဂ်ဖိုလ်) (ကမၠောန်ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး—
“ယွံခမဳတအ် ခမဳမဟွံပေၚ်စှ်ၜသ်ဏီဂှ် ဟဂပ်ဝ်ပကဵုခမဳပယျၚ်ရ၊ ယြဴခမဳမွဲ ပကဵုခမဳပယျၚ်မ္ဂး၊ ကုခမဳဂှ် ဒးအာပတ်ဒုက္ကဋ်ရ။ ယွံခမဳတအ် ခမဳမကလိဂွံစှ်ဝသ်တုဲကီု ခမဳမကလိလောန်လတူစှ်ဝသ်တုဲကီု ကဵုအခေါၚ် တၞဟ်နသ္ပကဵုခမဳပယျၚ်ရ” ရဴဝွံ သ္ဂးခမဳဂမၠိုၚ်ရ။
၇၆။ ပ္ဍဲအခိၚ်ဂှ် ခမဳဂမၠိုၚ် “ပိုဲညးဂမၠိုၚ် ဂွံစှ်ဝသ်တုဲအိုတ်ရ၊ ဂွံစှ်ဝသ်တုဲအိုတ်ရ” ရဴဝွံ သီုဟွံတီဟွံစဳကၠး (ပ္ဍဲဝိနယ်သိက္ခာပိုဒ်) ဂမၠိုၚ်ဂှ် ပကဵုခမဳပယျၚ်အိုတ်ရ။ သ္ဂောံဆဵုညာတ်ကေတ်အ္စာဥပဇ္ၛာယ် မဟွံတီမဒိုဟ်ဓီု ကေုာံကွးပဒတဴမွဲစွံ မဍိုဟ်ကေက်၊ အ္စာဥပဇ္ၛာယ် မဟွံစဳကၠးဆိုက်ဗ္ဒက် ကေုာံကွးပဒတဴမွဲစွံ မစဳကၠးဆိုက်ဗ္ဒက်၊ အ္စာဥပဇ္ၛာယ် မအောန်ကဵုလမိၚ်လညာတ်ကေုာံကွးပဒတဴ မွဲစွံ လမိၚ်လညာတ်ဂၠိုၚ်၊ အ္စာဥပဇ္ၛာယ် မဟွံမွဲကဵုပညာ ကေုာံကွးပဒတဴမွဲစွံ မၞုံကဵုပညာအိုတ်ရ။ ခမဳမွဲဇကု မကေၚ်ဒှ်တီလေဝ် မှာထေရ်မဒှ်ဥပဇ္ၛာယ် ဒၠောံဗတောန် ဗဗွဲကဵုဓရ်မ္ဂး ပတိုန်ဝါဒ ကုအ္စာဥပဇ္ၛာယ်တုဲ ပြံၚ်အာဗော်တဳဂှ်ဟေၚ်ရ။
ခမဳပၟိက်အောန်ဂမၠိုၚ်ဂှ် “ခမဳဂမၠိုၚ် ‘ဂွံစှ်ဝသ်တုဲအိုတ်ရ၊ ဂွံစှ်ဝသ်တုဲအိုတ်ရ’ ရဴဝွံ သီုဟွံတီဟွံစဳကၠး (ပ္ဍဲဝိနယ်သိက္ခာပိုဒ်) ဂမၠိုၚ်ဂှ် မုဟိုတ်သ္ပကဵုခမဳပယျၚ်အိုတ်ရ။ သ္ဂောံဆဵုညာတ်ကေတ်အ္စာဥပဇ္ၛာယ် မဟွံတီမဒိုဟ်ဓီု ကေုာံကွးပဒတဴမွဲစွံ မဍိုဟ်ကေက်၊ အ္စာဥပဇ္ၛာယ် မဟွံစဳကၠးဆိုက်ဗ္ဒက် ကေုာံကွးပဒတဴမွဲစွံ မစဳကၠးဆိုက်ဗ္ဒက်၊ အ္စာဥပဇ္ၛာယ် မအောန်ကဵုလမိၚ်လညာတ်ကေုာံကွးပဒတဴ မွဲစွံ လမိၚ်လညာတ်ဂၠိုၚ်၊ အ္စာဥပဇ္ၛာယ် မဟွံမွဲကဵုပညာ ကေုာံကွးပဒတဴမွဲစွံ မၞုံကဵုပညာအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ခမဳဂမၠိုၚ် ‘ဂွံစှ်ဝသ်တုဲအိုတရ’ ရဴတွံ သီုဟွံတီစဳကၠး (ပ္ဍဲဝိနယ်သိက္ခာပိုဒ်) ဂမၠိုၚ်ဂှ် ပကဵုခမဳပယျၚ်အိုတ်ရ။ သ္ဂောံဆဵုညာတ်ကေတ် အ္စာဥပဇ္ၛာယ် မဟွံတီမဒိုဟ်ဓီု ကေုာံကွးပဒတဴမွဲစွံ မဍိုက်ကေက်၊ အ္စာဥပဇ္ၛာယ် မဟွံစဳကၠးဆိုက်ဗ္ဒက် ကေုာံကွးပဒတဴမွဲစွံ မစဳကၠးဆိုက်ဗ္ဒက်၊ အ္စာဥပဇ္ၛာယ် မအောန်ကဵုလမိၚ်လညာတ် ကေုာံကွးပဒတဴမွဲစွံ လမိၚ်လညာတ်ဂၠိုၚ်၊ အ္စာဥပဇ္ၛာယ် မဟွံမွဲကဵုပညာ ကေုာံကွးပဒတဴမွဲစွံ မၞုံကဵုပညာအိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် ‘ဂွံစှ်ဝသ်တုဲအိုတ်ရ၊ ဂွံစှ်ဝသ်တုဲအိုတ်ရ’ ရဴတွံ သီုဟွံတီဟွံစဳကၠး (ပ္ဍဲဝိနယ်သိက္ခာပိုဒ်) ဂမၠိုၚ်ဂှ် ပကဵုခမဳပယျၚ်အိုတ်ရော? သ္ဂောံဆဵုညာတ်ကေတ် အ္စာဥပဇ္ၛာယ် မဟွံတီမဒိုဟ်ဓီု ကေုာံကွးဒတဴမွဲစွံ မဍိုဟ်ကေက်၊ အ္စာဥပဇ္ၛာယ် မဟွံစဳကၠးဆိုက်ဗ္ဒက်ကေုာံကွးပဒတဴမွံစွံ မစဳကၠးဆိုက်ဗ္ဒက်၊ အ္စာဥပဇ္ၛာယ် မအောန်ကဵုလမိၚ်လညာတ် ကေုာံကွးပဒတဴမွဲစွံ လမိၚ်လညာတ်ဂၠိုၚ်၊ အ္စာဥပဇ္ၛာယ် မဟွံမွဲကဵုပညာ ကေုာံကွးပဒတဴမွဲစွံ မၞုံကဵုပညာအိုတ်ရ။
ယွံခမဳတအ် (ကမၠောန်ပွခမဳဂမၠိုၚ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး—
“ယွံခမဳတအ် ခမဳမဟွံတီစဳကၠး (ပ္ဍဲဝိနယ်သိက္ခာပိုဒ်) ဂှ် ဟဂပ်ဝ်သ္ပကဵုခမဳပယျၚ်ရ၊ ယြဴခမဳမွဲ သ္ပကဵုခမဳပယျၚ်မ္ဂး၊ ကုခမဳဂှ် ဒးအာပတ်ဒုက္ကဋ်ရ။ ယွံခမဳတအ် ခမဳမကလိဂွံစှ်ဝသ်တုဲ စဳကၠးဆိုက်ဗ္ဒက် (ပ္ဍဲဝိနယ်သိက္ခာပိုဒ်) တုဲ မၞုံကဵုအစောံသတ္တိဂှ်ကီု ခမဳမကလိလောန်လတူစှ်ဝသ်တုဲကီု ကဵုအခေါၚ် တၞဟ်နသ္ပကဵုခမဳပယျၚ်ရ” ရဴဝွံ သ္ဂးကဵုခမဳဂမၠိုၚ်ရ။
၇၇။ ပ္ဍဲမွဲအခိၚ်တေံ အ္စာဥပဇ္ၛာယ်ဂမၠိုၚ် စ္ဍးအာဌာန်သအာၚ်အိုတ်မ္ဂး ရာံတိတ်ခရှ်အိုတ်မ္ဂး ချိုတ်အာအိုတ်မ္ဂး ပြံၚ်အာဗော်တဳအိုတ်မ္ဂး ခမဳဂမၠိုၚ် ဟွံမွဲကဵုအ္စာ ဟွံမွဲကဵုညးဒၠောံဗတောန်ဝေတ်စၞောန်ထ္ၜးဒှ်တုဲ သီုမရုၚ်လတက် ဗွဲဟွံဒးရး သီုဟွံဍိုက်ပေၚ်တဴ ကေုာံအာကာရအရာခမဳဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရ၊ ခမဳဂမၠိုၚ်ဂှ် ဃောမၞိဟ်ဂမၠိုၚ်စသုၚ်ဒၟံၚ် လၟောဝ်ဏာဗဗေၚ်ဒုၚ်ပိဏ္ဍပါတ် ပ္ဍဲလတူဘောဇိုန် စၞစ စၞကၠာန် စၞသုၚ်ဂမၠိုၚ်အိုတ်ရ၊ ပုၚ်သွဂှ်လေဝ် အာတ်ကေတ် အလဵုဇကုတုဲ သ္ပပြဘိုဂ်အိုတ်ရ၊ ပ္ဍဲဇြပ်ကဵုပိုဉ်လေဝ် သီုမၞုံကဵုရမျာၚ်ကာတ်မြဟ်ဇၞော်လှဲဂှ် ပဒတဴဒၟံၚ်အိုတ်ရ။ မၞိဟ်ဂမၠိုၚ်ဂှ်—
“ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ မုဟိုတ် သီုမရုၚ်လတက် ဗွဲဟွံဒးရး သီုဟွံဍိုက်ပေၚ်တဴ ကေုာံအာကာရအရာခမဳဂမၠိုၚ်ဂှ် ဂေတ်ဂ္ၚေၚ်ပိဏ္ဍပါတ်အိုတ်ရော? ခမဳဂမၠိုၚ်ဂှ် ဃောမၞိဟ်ဂမၠိုၚ် ဃောမၞိဟ်ဂမၠိုၚ်စသုၚ်ဒၟံၚ် လၟောဝ်ဏာဗဗေၚ်ဒုၚ်ပိဏ္ဍပါတ် ပ္ဍဲလတူဘောဇိုန် စၞစ စၞကၠာန် စၞသုၚ်ဂမၠိုၚ်အိုတ်ရော? ပုၚ်သွဂှ်လေဝ် အာတ်ကေတ် အလဵုဇကုတုဲ သ္ပပြဘိုဂ်အိုတ်ရော? ပ္ဍဲဇြပ်ကဵုပိုဉ်လေဝ် ညံၚ်ရဴဗဗၞးဂမၠိုၚ် ပ္ဍဲပေါဲစသုၚ်ဗၞးကီု သီုမၞုံကဵုရမျာၚ်သကာတ်မြဟ်ဇၞော်လှဲဂှ် ပဒတဴဒၟံၚ်အိုတ်ရော?” ရဴဝွံ ဟီုဂရိုဟ်အိုတ်ရ။ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
ယွံခမဳတအ် ဍာံပြရဟာ ။ ပ ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ) ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး—
ယွံခမဳတအ် ကဵုအခေါၚ် အ္စာ (နိဿယ) ရ၊ ယွံခမဳတအ် အ္စာ (နိဿယ) ဂှ် ပ္ဍဲလတူကွးပဒတဴဇရေၚ် သ္ဒးစွံစိုတ်မတွံဂးကောန်ရ၊ ကွးပဒတဴဇရေၚ်ဂှ် ပ္ဍဲလတူအ္စာ (နိဿယ) သ္ဒးစွံစိုတ်မတွံဂးမအံက်ရ၊ ရဴဝွံ အ္စာ, ကွးဂမၠိုၚ်ဂှ် မၞုံကဵုပွမရှ်ေသှ်ေရဴဂဴ ပွမဇအ်သဝ်အောပ်မာ ပွမဂယိုၚ်လမျီု တုပ်သၟသ်ရၚ်သကအ်ဂှ်ဒှ်တုဲ ပဒတဴမ္ဂး ကြက်အာစိုပ် ပွမဇၞော်မောဝ် ဖောအ်ဗြေဝ်ဍိုပ်ဍဴလှဲလး ပ္ဍဲသာသနာဝွံအိုတ်ရ။
ယွံခမဳတအ် ရဴဝွံ သ္ဒးဂိုၚ်ကေတ် အ္စာ (နိဿယ) ရ၊ လ္ၜက်ကၠေဟ်ပတိုန် သ္ၚာကၞေဟ်ပ္ဍဲလတူပၞးပါဲမွဲလပါ်တုဲမ္ဂး လ္ၚောဝ်ဂၠးဇိုၚ်ဂမၠိုၚ်တုဲ သီုမဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး “ယွံတဳလပိုဉ် (တဳလပိုဉ်ဂှ်) ဩဝ်ဒှ်အ္စာ (နိဿယ) အဲဍိက်ညိ။ နိဿဲဗ္ဒာဲကဵုတဳလပိုဉ်တုဲ ကြက်ပဒတဴရ၊ ယွံတဳလပိုဉ် (တဳလပိုဉ်ဂှ်) ဩဝ်ဒှ်အ္စာ (နိဿယ) အဲဍိက်ညိ၊ နိဿဲဗ္ဒာဲကဵုတဳလပိုဉ်တုဲ ကြက်ပဒတဴရ၊ ယွံတဳလပိဒဉ် (တဳလပိုဉ်ဂှ်) ဩဝ်ဒှ်အ္စာ (နိဿယ) အဲဍိက်ညိ၊ နိဿဲဗ္ဒာဲကဵုတဳလပိုဉ်တုဲ ကြက်ပဒတဴရ” ရဴဝွံ သ္ဒဟီုရ။
“ခိုဟ်သန်ရ” ရဴဝွံကီု “ဟွံဇြိုၚ်ကုအဲရ” ရဴဝွံကီု “လျိုၚ်အဲရ” ရဴဝွံကီု “ဗဗွဲရ” ရဴဝွံကီု “ဩဝ်ကဵုဍိုက်ပေၚ်တဴကေုာံအကာဲအရာကာယပါၚ် မလေပ်ရၚ်တၠုၚ်ကဵုလျုၚ်ဇြုၚ်သ္ဍိုက်ညိ” ရဴဝွံကီု နကဵုဇကုကဵုဒှ် နကဵုပါၚ်ကဵုဒှ် နကဵုဇကုပါၚ်ကဵုဒှ် ကဵုတီကေတ်မ္ဂး၊ ဒှ်ဂိုၚ်ကေတ် အ္စာ (နိဿယ) ရ။ နကဵုဇကုကဵုဒှ် နကဵုပါၚ်ကဵုဒှ် နကဵုဇကုပါၚ်ကဵုဒှ် ဟွံကဵုတီကေတ်မ္ဂး၊ ဟွံဒှ်ဂိုၚ်ကေတ်အ္စာ (နိဿယ) ရ။
၇၈။ ယွံခမဳတအ် ကွးပဒတဴဇရေၚ်ဂှ် သ္ဒးဒ္ဂေတ်ပ္ဍဲအ္စာ (နိဿယ) ဗွဲမ္ဒးရးရ။ ကြက်သ္ဂးဂတဝွံတုန် ဗီုဒ္ဂေတ်ဗွဲမ္ဒးရးရ—
(ကွးပဒတဴဇရေၚ်ဂှ်) ဒၠိုက်ကတဵုနူဂယးပြဟ်တုဲ သၠောတ်ကၠေံဒၞပ်တုဲမ္ဂး လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲ သ္ဒးဗဂိန်ကဵုဆုဒကရ၊ သ္ဒးဗဂိန်ကဵုဍာ်လၚ်မုက်ရ၊ သ္ဒးလးသၞာဂဇအ်ရ၊ ယာဂုနွံမ္ဂး ကြဴကြာတ်ခရော်တုဲ သ္ဒးဗဂိန်ကဵုယာဂုရ၊ ကုအ္စာ (နိဿယ) မသုၚ်ယာဂုတုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ခရော်တုဲ သ္ပဗွဲမ္ဒးရး သီုဟွံကဵုထ္ဍိမြိလုက်စုက်ဒးဂှ် ကြဴကြာတ်တုဲမ္ဂး သ္ဒးသီဂိုၚ်ဒေပ်စွံရ၊ အ္စာ (နိဿယ) ဒၠိုက်ကတဵု (နူဒၞါဲ) မ္ဂး သ္ဒးသီဂိုၚ်ဒေပ်ထောံသၞာဂဇအ်ဂှ်ရ၊ ယဝ်သၟိက်ဟန်ဗန်နွံမ္ဂး၊ သ္ဒးကွဟ်ကၟဟ်ဒၞါဲဂှ်ရ။
အ္စာ (နိဿယ) သၟိက်လုပ်ကွာန်မ္ဂး၊ သ္ဒးဒုၚ်ကဵု သပိုၚ်ဗိုက်လုပ်ကွာန်ရ၊ သ္ဒးဂိုၚ်ကေတ်သပိုၚ်ဗိုက်ပ္ဍဲဘာရ၊ သ္ဒးဒုၚ်ကဵုဇုကကာယဗန်ရ၊ ထပ်လဝ် သ္ၚာသကိုပ်ဂမၠိုၚ်တုဲ သ္ဒးဒုၚ်ကဵုရ၊ ကြဴကြာတ်တုဲ သ္ဒးဒုၚ်ကဵုဗဗေၚ်မဒှ်မွဲဟာန်ကေုာံဍာ်ရ။ ယဝ်အ္စာ (နိဿယ) နွံပၟိက်ကဵုခမဳဗွက်ကြဴမ္ဂး၊ ဗိုက်သပိုၚ် ဗွဲဗၞဳအဝဏ်မညဳသာ နမဂြောပ်ဗ္ဒန် ဗၞဳအဝဏအ် ၁ ပိပြကာ, ဒက်ဇုက်ကာယဗန်, သၠောံရုၚ်လတက် သ္ၚာသကိုပ်ဂမၠိုၚ်မထပ်လဝ်, စုတ်ခၟောံသ္ၚာ, ကြာတ်ကြဴဂိုၚ်ကေတ်ဗဗေၚ်တုဲ သ္ဒးဒှ်ခမဳဗွက်ကြဴ အ္စာ (နိဿယ) ရ၊ ဟွံထေက်ကဵုဗက်အာ ဗွဲမသ္ၚောဲလောန်ရ၊ ဟွံထေက်ကဵုဗက်အာ ဗွဲကြပ်လောန်ရ၊ သ္ဒးဒုၚ်ဂိုၚ်ကေတ် ပွမလှာဲဂတးဗဗေၚ်ရ၊ ဃောအ္စာ (နိဿယ) ဟီုဒၟံၚ်ဂလာန်ဂှ် ပၠံက်ပၠုပ်ပ္ဍဲအကြာအကြာတုဲ ဟွံထေက်ကဵုဟီုရ၊ အ္စာ (နိဿယ) ဟီုသ္ဂးကြပ်ညောန်ကဵုအာပတ်မ္ဂး သ္ဒးဆေဝ်ဒဝ်ရ။
၁။ ဗၞဳအဝဏ်တၚ်က္ၜံၚ်ၜါလပါ် ကဵုပံၚ်ကဠုတ်—မိက်သ္ဂးရ။
ကလေၚ်ကၠုၚ် (နူဌာန်ဂ္ၚေၚ်ပိဏ္ဍပါတ်) မ္ဂး စဴကၠုၚ်ဗွဲကိုပ်ကၠာတုဲ သ္ဒးလးပညပ်လဝ်သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ ဒစးဒုၚ်တၠုၚ်တရဴတုဲ သ္ဒးဒုၚ်ဂိုၚ်ကေတ် ဗဗေၚ်သ္ၚာရ၊ သ္ဒးဒုၚ်ကဵုသပိုၚ်ဗိုက်ပ္ဍဲဘာရ၊ သ္ဒးဟောဝ်ဂိုၚ်ကေတ်သပိုၚ်ဗိုက် လုပ်ကွာန်ရ၊ ယဝ်သ္ၚာဍေက်ဒၟံၚ် ပဠက်မ္ဂး၊ ဗၞတ်မွဲခဏဍောတ် သ္ဒးစဲလဝ် ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးထပ်သ္ၚာရ၊ ထပ်သ္ၚာမ္ဂး “လ္ပကဵုဒှ် ကဝ်ကေက် ‘ပၞေတ်ခ္ဍပ်’ ပ္ဍဲလဒေါဝ်ညိ” ရဴဝွံ သီုမပၠုပ်စိုတ်ဂှ် ယှအ်ကၠေံတၞုၚ်မုဟ်ပန်လပုဟ်တုဲတုဲ သ္ဒထပ်လ္ၚာရ၊ သ္ဒးစွံလဝ် ဇုက်ကာယဗန် ပ္ဍဲအပ္ဍဲသ္ၚာထပ်လဝ်ရ။
ပိဏ္ဍပါတ်နွံတုဲ အ္စာ (နိဿယ) လေဝ် မိက်သ္ပပြဘိုဂ်မ္ဂး၊ ဒုၚ်ကဵုဍာ်ရပ်စပ်တုဲ သ္ဒးဗဂိန်ကဵုပိဏ္ဍပါတ်ရ၊ (နွံပၟိက်ဍာ်ဟာ ရဴဝွံ) သ္ဒးဂရၚ်ပတီသၟာန် အ္စာ (နိဿယ) နကဵုဍာ်သုၚ်ရ၊ ကုအ္စာ (နိဿယ) မကဵုပိုဉ်တုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ဗဗေၚ်တုဲမ္ဂး သ္ပဗွဲမ္ဒးရး သီုဟွံကဵုထ္ဍိမြိလုက်စုက်ဒးဂှ် ကြဴကြာတ်သအးဇ္ၚးတုဲ သ္ပစဵုကဵုဍာ်ကှ်တုဲမ္ဂး ဗၞတ်မွဲခဏဍောတ် သ္ဒးစဲလဝ် ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးစွံဗဗေၚ်သ္ၚာရ၊ မိက်စွံဗဗေၚ်မ္ဂး နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်၇ံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွဴမွဲကဵုသၞာရ။ မိက်စွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုြ နကဵုတဲမွဲလပါ်ဂှ် ဇွိတ်ပေါတ်ထောဴ ဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။ အ္စာ (နိဿယ) ဒၠိုက်ကတဵု (နူဒၞါဲ) မ္ဂး သ္ဒးသီဂိုၚ်ဒေပ်ထောံ သၞာဂဇအ်ဂှ်ရ၊ သ္ဒးသီဂိုၚ်ဒေပ်ထောံ ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ်ရ၊ ယဝ်သၟိက်ဟန်ဗန်နွံမ္ဂး၊ သ္ဒးကွဟ်ကၟဟ်ဒၞါဲဂှ်ရ။
အ္စာ (နိဿယ) မိက်ဟုမ်ဍာ်မ္ဂး၊ သ္ဒးစဳရေၚ် ဍာ်ဟုမ်ရ၊ နွံပၟိက်ကဵုဍာ်လၟုဟ်မ္ဂး သ္ဒးစဳရေၚ်ကဵုဍာ်လၟုဟ်ရ၊ နွံပၟိက်ကဵုဍာ်ဂမ္တဴမ္ဂး၊ သ္ဒးစဳရေၚ် ကဵုဍာ်ဂမ္တဴရ။
အ္စာ (နိဿယ) မိက်လပ်သ္ၚိဇရုၚ်ပဠက်မ္ဂး၊ သ္ဒးထ္ၜိုန်ကဠောံ ခၞိက်ကြကောတ် နကဵုဍာ်ရ၊ သ္ဒးဖ္ဍုက်တိကမၠေတ် နကဵုဍာ်ရ၊ ဂိုၚ်ကေတ်ဂတဵုသ္ၚိဇရုၚ်ပဠက်တုဲ သီုမဗက်အာ နူလက်ကရဴ နူလက်ကရဴ အ္စာ (နိဿယ) ဂှ် ဒုၚ်ကဵုဂတဵုသ္ၚိဇရုၚ်ပလက်တုဲမ္ဂး ဟောဝ်ဂိုၚ်ကေတ်သ္ၚာတုဲ သ္ဒးစွံလဝ် ပ္ဍဲဌာန်မဗဗွဲရ၊ သ္ဒးဒုၚ်ကဵုခၞိက်ကြကောတ်ရ၊ သ္ဒးဒုၚ်ကဵုတိကမၠောတ်ရ။ ယဝ်သၟဟ်ရထမ္ဂး သ္ဒးလုပ်သ္ၚိဇရုၚ်ပဠက်ရ၊ ခမဳမလုပ်သ္ၚိဇရုၚ်ပလက်ဂှ် လံက်လေတ်မုက် နကဵုတိကမၠေတ်မဖ္ဍုက်လဝ်ဍာ်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးလုပ်သ္ၚိဇရုၚ်ပဠက်ရ၊ ဃရိတ်ခတ် ခမဳဂမၠိုၚ်မဒှ်ထေရ်ဇၞော်တုဲ ဟဂပ်ဝ်ဂဇအ်ရ၊ ခမဳသၟတ်ဂမၠိုၚ်လေဝ် ဟဂပ်ဝ်ဆေဝ်ဒဝ် ပွမဂဇအ်ပ္ဍဲသၞာရ၊ ပ္ဍဲသ္ၚိဇရုၚ်ပဠက် သွက်အ္စာ (နိဿယ) သ္ဒးသ္ပကဵုကေၚ်ကာအိုတ်သီု (မပ္တံမစံၚ်ဗဂဵုပၟတ်) ရ၊ ခမဳမတိတ်ကၠုၚ် နူသ္ၚိဇရုၚ်ပဠက်ဂှ် ဂိုၚ်ကေတ်ဂတဵုသ္ၚိဇရုၚ်ပဠက်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူကက်ကရဴကီုတုဲ သ္ဒးတိတ်နူသ္ၚိဇရုၚ်ပလက်ရ။
ပ္ဍဲအရာဟုမ်ဍာ်လေဝ် သွက်အ္စာ (နိဿယ) သ္ဒးသ္ပကဵုကေၚ်ကာအိုတ်သီု (မပ္တံပွမတုဟ်ပေါတ်မိဟ်) ရ၊ ခမဳမဟုမ်ဍာ်တုဲဂှ် တိုန်ကၠုၚ်ဗွဲကိုပ်ကၠာ အ္စာ (နိဿယ) တုဲ သ္ပဇကုဇကု စဵုကဵုဟွံမွဲကဵုဍာ်တုဲ ဗိုက်သပိုၚ်တုဲ သ္ဒးဇိုတ်ကဵုဍာ် နူဇကုအ္စာ (နိဿယ) ရ၊ သ္ဒးဒုၚ်ကဵုသပိုၚ်ရ၊ သ္ဒးဒုၚ်ကဵုသ္ၚာသကိုပ်ရ၊ ဂိုၚ်ကေတ်ဂတဵုသ္ၚဇရုၚ်ပဠက်တုဲ ကၠုၚ်ဗွဲကိုပ်ကၠာတုဲ သ္ဒးလးပညပ်လဝ်သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေၚ်ပေါတ်ဇိုၚ် ပ္ဍဲဇရေၚ်ရ၊ (နွံပၟိက်ဍာ်ဟာ ရဴဝွံ) သ္ဒးဂရၚ်ပတီသၟာန် အ္စာ (နိဿယ) နကဵုဍာ်သုၚ်ရ၊ ယဝ်မိက်ကဵုလ္ၚတ်ကတ်ဗတောန်မ္ဂး၊ သ္ဒးလ္ၚတ်ကတ်ဗတောန်ရ၊ ယဝ်မိက်ကဵုသၟာန်ဂၠိုၚ်ဂၠိုၚ်ကဵုဝါမ္ဂး၊ သ္ဒးသၟာန်ဂၠိုၚ်ဂၠိုၚ်ကဵုဝါရ။
ဘာအ္စာ (နိဿယ) ပဒတဴဂှ် သၟိက်ဟန်ဗန်နွံမ္ဂး၊ ယဝ်သၟဟ်ရထမ္ဂး သ္ဒးသောၚ်ဖ္ဍောၚ်ၚးတးရ၊ ခမဳ မသောၚ်ဖ္ဍောၚ်ၚးတးဘာဂှ် ဗွဲကိုပ်ကၠာ ရၚ်တၠုၚ်ပတိတ် ဗဗေၚ်သ္ၚာတုဲ သ္ဒးစွံလဝ်ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် သၞာနိသဳဒိုန်သၞာလးတိက်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ်ဖုန်ဂၞဳတုဲ သ္ဒးစွံလဝ် ပ္ဍဲဒၞါဲမဗဗွဲရ၊ ဇံၚ်ခါတ်ဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ဂတဵုဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ်ဇိုၚ်ဇံၚ်ဂမၠိုၚ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် ထၟာဲချဟ် ‘ထၟာဲတဲ’ တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် ဂတဵုဒလာဲတုဲ သ္ဒးစွံလဝ် ပ္ဍဲဒၞါဲမဗဗွဲရ၊ သၞာလးတိဂှ် သမ္တီလဝ်ဒၞါဲလးလၟိုန်တုဲ ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ပ္ဍဲဘာ ယဝ်သ္ၚိစၟဇာဖိုၚ်နွံမ္ဂး၊ သ္ဒးပါဲကၠေံနူသၠဖ္ဍာန်ဗွဲကိုပ်ကၠာရ၊ သ္ဒးဇိုတ်ပေါတ်ဗ္တၚ်ကျာ ကေုာံသကဲခဒမ်ဂမၠိုၚ်ရ။ ဗ္ဒၚ်မသ္ပလဝ် ကဠိတ်ကဠောတ် နကဵုခၞိက်တိကမၠေတ် ဗကေတ် (နကဵုဆီတၟံ) ဂှ် ပတိုဟ်တိုန်မ္ဂး၊ ဖ္ဍုက်ဍာ်ယတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ တိမသ္ပလဝ်ကဠိတ်ကဠောတ် နကဵုသာ်လမ္စံက်ဂှ် ပတိုန်တိုန်မ္ဂး၊ ဖ္ဍုက်ဍာ်ယာတ်တမြံၚ်တုဲ ဝတ်ကၠေဴတုဲမ္ဂး သ္ဒးဇိုတ်ပေါတ်ရ၊ ဒှ်တိမဟဂွံသ္ပလဝ်ကဠိတ်ကဠောတ်မ္ဂး၊ လၟုဟ်ဖရုဲဍာ်တုဲ “လ္ပကဵုမၠိုက်တိုန်အာညိ” ရဴဝွံ (စွံစိုတ်တုဲ) သ္ဒးကွဟ်ကၟဟ်ရ၊ ပကောံဖအုံလဝ် အိက်ကၟဟ်တုဲ သ္ဒးထောံထောံ ပ္ဍဲဌာန်မဗဗွဲရ။
စဲတ္ၚဲသအးဇ္ၚး သၞာလးတိတုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ဇိုၚ်ဇံၚ်ဂမၠိုၚ်တုဲမ္ဂး သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ စဲတ္ၚဲသအးဇ္ၚးဇံၚ်ခါတ်တုဲမ္ဂး ဂရိုက်ထောံတုဲ သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဖဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဂတဵုတုဲမ္ဂး ဂရိုက်ထောံတုဲ သ္ပဗွဲမသဝ်ဒးရး သီုဟွံကဵုထ္ဍိမြိ လုက်စုက်ဒး သၠးတြၚ်ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဖုန်ဂၞဳတုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚးသၞာနိသဳဒိန် သၞာလးတိက်တုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ထၟာဲဂစှ်တုဲမ္ဂး၊ သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ စဲတ္ၚဲဇိုတ်ပေါတ် ဂတဵုဒလာဲတုဲမ္ဂး သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ သ္ဒးစွံဗဗေၚ်သ္ၚာရ၊ ခမဳမိက်စွံဗဗေၚ်ဂှ် နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ မိက်စွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံ ဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
နူဒိုဟ်ဗၟံက် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံဗ္တၚ်ကျာဒိုဟ်ဗၟံက်ဂမၠိုၚ်ရ၊ နူဒိုဟ်ပလိုတ် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်ပလိုတ်ဂမၠိုၚ်ရ၊ နူဒိုဟ်သၟဝ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်သၟဝ်ကျာဂမၠိုၚ်ရ၊ နူဒိုဟ်သၠုၚ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်သၠုၚ်ကျာဂမၠိုၚ်ရ။ ဒှ်အခိၚ်ၜိုဟ်ဂံက်မ္ဂး ပ္ဍဲအခိၚ်တ္ၚဲ သ္ဒးပံက်လဝ် ဗ္တၚ်ကျဂမၠိုၚ်ရ၊ ပ္ဍဲအခိၚ်ဗ္တံ သ္ဒးကၟာတ်ဒဝ်ကၠေံရ၊ ဒှ်အခိၚ်ဂမ္တဴမ္ဂး ပ္ဍဲအခိၚ်တ္ၚဲ သ္ဒးကၟာတ်ဒဝ်လဝ် ဗ္တၚ်ကျာဂမၠိုၚ်ရ၊ ပ္ဍဲအခိၚ်ဗ္တံ သ္ဒးပံက်လဝ်ရ။
ပြဝိုဏ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ပြဝိုဏ်ရ။ ခဒမ်ဟုမ်ဍာ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ခဒမ်ဟုမ်ဍာ်ရ။ ဇြပ်ကောံဓရီု သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ်ဇြပ်ကောံဓရီုရ။ ရုၚ်ပၟတ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ရုၚ်ပၟတ်ရ။ သ္ၚိဝစ် (သ္ၚိဍာ်) သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် သ္ၚိဝစ်ရ။ ဍာ်သုၚ်ဟွံမွဲမ္ဂး၊ သ္ဒးစွံပတန်ဍာ်သုၚ်ရ။ ဍာ်ရပ်စပ်ဟွံမွဲမ္ဂး၊ သ္ဒးစွံပတန် ဍာ်ရပ်စပ်ရ။ ပ္ဍဲနုၚ်ဍာ်ကြာတ် (နုၚ်စအးသ္ၚိဍာ်) ဍာ်ဟွံမွဲဒှ်မ္ဂး၊ သ္ဒးဗပေၚ်စုတ်ဍာ်ရ။
အ္စာ (နိဿယ) ကတဵုဒှ်ပွမဟွံမိပ်လဟိၚ်မ္ဂး၊ ကွးပဒတဴဇရေၚ်ဂှ် (အလဵုဇကု) သ္ဒးကော်ဏာဌာန်သအာၚ်ရ၊ (ညးသအာၚ်လေဝ်) သ္ဒးကဵုကော်ဏာရ၊ ဂလာန်ဓရလေဝ် သ္ဒးဟီုတွံကဵုကုအ္စာ (နိဿယ) ဂှ်ရ။ အ္စာ (နိဿယ) ကတဵုဒှ် ‘သံသယကုက္ကုစ္စ’ ပွမချပ်သၠေဟ်ပၟာမ္ဂး၊ ကွးပဒတဴပ္ဍဲဇရေၚ်ဂှ် သ္ဒးပါဲပၠေၚ်ကၠေံရ၊ (ညးသအာၚ်လေဝ်) သ္ဒးကဵုပါဲပၠေၚ်ကၠေံရ၊ ဂလာန်ဓရ်လေဝ် သ္ဒးဟီုတွံကဵု ကုအ္စာ (နိဿယ) ဂှ်ရ။ အ္စာ (နိဿယ) ဂိုၚ်ကေတ်ကွေတ်မှာရာမ္ဂး၊ ကွးပဒတဴဇရေၚ်ဂှ် သ္ဒးသောၚ်ကၠးကဵုစာ်စ္ဍးအာရ၊ (ညးသအာၚ်လေဝ်) သ္ဒးကဵုသောၚ်ကၠးစာ်စ္ဍးအာရ၊ ဂလာန်ဓရ်လေဝ် သ္ဒးဟီုတွံကဵု ကုအ္စာ (နိဿယ) ဂှ်ရ။ အ္စာ (နိဿယ) အာစိုပ်ဂရုကအာပတ်တုဲ ထေက်ကဵု တၞဟ်နပဒတဴပြဝးမ္ဂး၊ ကွးပဒတဴဇရေၚ်ဂှ် “မုရဴသာ်လဵု သၚ် သ္ဂောံကဵုပြဝး ကုအ္စာ (နိဿယ) ရော?” ရဴဝွံ သ္ဒးသ္ပဂဗုဓ်လွဳပရာရ။ အ္စာ (နိဿယ) ထေက်ကဵုတံၚ်ဓဇက်တမ်ဒှ်မ္ဂး၊ ကွးဒတဴဇရေၚ်ဂှ် “မုရဴသာ်လဵု သၚ် သ္ဂောံတံၚ်ဓဇက်တမ် အ္စာ (နိဿယ) ရော?” ရဴဝွံ သ္ဒးသ္ပဂဗုဓ်လွဳပရာရ။ အ္စာ (နိဿယ) ထေက်ကဵုဒ္ဂေတ် ‘မာနတ်’ ထေက်ကဵုသ္ဍိုက်မၠိုက်ဒှ်မ္ဂး၊ ကွးပဒတဴဇရေၚ်ဂှ် “မုရဴသာ်လဵု သၚ် သ္ဂောံကဵုမာနတ် ကုအ္စာ (နိဿယ) ရော?” ရဴဝွံ သ္ဒးသ္ပဂဗုဓ်လွဳပရာရ။ အ္စာ (နိဿယ) ထေက်ကဵုကော်ပၠုပ်အဗ္ဘာန်ဒှ်မ္ဂး၊ ကွးပဒတဴဇရေၚ်ဂှ် “မုရဴသာ်လဵု သၚ် သ္ဂောံကဵုကော်ပၠုပ်အဗ္ဘာန် အ္စာ (နိဿယ) ရော?” ရဴဝွံ သ္ဒးသ္ပဂဗုဓ် လွဳပရာရ။ သၚ် မိက်သ္ပ ‘တဇ္ဇနဳယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာနိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ဗ္ဒဴပတိတ်ထောံကီု ကုအ္စာ (နိဿယ) မ္ဂး၊ ကွးပဒတဴဇရေၚ်ဂှ် “မုရဴသာ်လဵု သၚ် ဟဂွံသ္ပကမ် ကုအ္စာ (နိဿယ) ရော? မုရဴသာ်လဵု သ္ဂောံကဵုဒဟ်သာစှ်ေရော?” ရဴဝွံ သ္ဒးသ္ပဂဗုဓ်လွဳပရာရ။ သၚ် သ္ပ ‘တဇ္ဇနဳယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာနိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ဗ္ဒဴပတိတ်ထောံကီု ကုအ္စာ (နိဿယ) ဂှ်တုဲမ္ဂး၊ ကွးပဒတဴဇရေၚ်ဂှ် “မုရဴသာ်လဵု အ္စာ (နိဿယ) သ္ဂောံဒ္ဂေတ်ဗွဲမ္ဒးရးရော? သ္ဂောံဖျေံတသော်မတွံဂးမာန်ရော? ဒ္ဂေတ်တဴဒ္ဂေတ်မတိတ်ဗၠးနူဒဏ်ရော? သၚ် သ္ဂောံလလမ်ကၠေံကမ်ဂှ်ရော?” ရဴဝွံ သ္ဒးသ္ပဂဗုဓ်လွဳပရာရ။
သ္ၚာအ္စာ (နိဿယ) ဂှ် ထေက်ကဵုဒးလပိုက်ကဆံၚ်ဒှ်မ္ဂး။ ကွးဒတဴဇရေၚ်ဂှ် သ္ဒးလပိုက်ကဆံၚ်ရ၊ “မုရဴသာ်လဵု သ္ဂောံလပိုက်ကဆံၚ် သ္ၚာအ္စာ (နိဿယ) ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာ (နိဿယ) ဂှ် ထေက်ကဵုဒးဇိၚ်ဒှ်မ္ဂး၊ ကွးပဒတဴဇရေၚ်ဂှ် သ္ဒးဇိၚ်ရ၊ “မုရဴသာ်လဵု သ္ဂောံဇိၚ် သ္ၚာအ္စာ (နိဿယ) ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သွက်အ္စာ (နိဿယ) ထေက်ကဵုဖျိန် ဍာ်လွံက်ဒှ်မ္ဂး၊ ကွးပဒတဴဇရေၚ်ဂှ် သ္ဒးဖျိန်ဍာ်လွံက်ရ၊ “မုရဴသာ်လဵု သ္ဂောံဖျိန်ဍာ်လွံက် သွက်အ္စာ (နိဿယ) ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာ (နိဿယ) ဂှ် ထေက်ကဵုဒးဖျောန်ဒှ်မ္ဂး၊ ကွးပဒတဴဇရေၚ်ဂှ် သ္ဒးဖျောန်ရ၊ “မုရဴသာ်လဵု သ္ဂောံဖျောန် သ္ၚာအ္စာ (နိဿယ) ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ ခမဳမဖျောန်သ္ၚာဂှ် သ္ဒးဖျောန်ဂတးဂတန် ဗွဲမ္ဒးရးရ၊ ကိုပ်ကၠာထၞဟ်ဍာ်လွံက် ဓဇူဟွံပိုတ်ဏီ စ္ဍးအာဟွံဂွံရ။
သီုဟွံဂရၚ်ပတီပါၚ်အခေါၚ် အ္စာ (နိဿယ) ဟဂပ်ဝ်ကဵုဗဗေၚ် ကုညးလ္ၚဵုရ၊ ဗဗေၚ်ညးလ္ၚဵုဂှ်ဟေၚ် ဟွံထေက်ကဵုဂိုၚ်ကေတ်ရ၊ ဟဂပ်ဝ်ကဵုသ္ၚာ ကုညးလ္ၚဵုရ၊ သ္ၚညးလ္ၚဵုဂှ်လေဝ် ဟွံထေက်ကဵု ဂိုၚ်ကေတ်ရ၊ ဟဂပ်ဝ်ကဵုပရိက္ခရာ ‘အရပ်စပ်’ ကုညးလ္ၚဵုရ၊ ပရိက္ခရာညးဂမၠိုၚ်ဂှ်လေဝ် ဟွံထေက်ကဵုဂိုၚ်ကေတ်ရ၊ ဟဂပ်ဝ်ကးသော်က္ဍိုပ် ညးလ္ၚဵုဂမၠိုၚ်ရ၊ ဟွံထေက်ကဵုကးသော်က္ဍိုပ်ဇကုဂမၠိုၚ် ကုညးလ္ၚဵုရ၊ ဟဂပ်ဋ္ဌဝ်သ္ပကမၠောန်ကေၚ်ကာ ညးလ္ၚဵုရ၊ ဟဂပ်ဝ်ကဵုကမၠောန်ကေၚ်ကာ (မပ္တံပွမတုဟ်ပေါတ်မိဟ်) ကုညးလ္ၚဵုရ၊ ဟဂပ်ဝ်သ္ပကေၚ်ကာဇၞော်သၟတ် ညးလ္ၚဵုရ၊ ဟဂပ်ဝ်ကဵုသ္ပကေၚ်ကာဇၞော်သၟတ်ဇကု ကုညးလ္ၚဵုရ၊ ဟဂပ်ဝ်သ္ပခမဳဗွက်ကြဴ ညးလ္ၚဵုရ၊ ဟဂပ်ဝ်ကဵုညးလ္ၚဵု သ္ပခမဳဗွက်ကြဴဇကုရ၊ ဟဂပ်ဝ်ရၚ်တၠုၚ်ပိဏ္ဍပါတ် ညးလ္ၚဵုရ၊ ဟဂပ်ဝ်ကဵုညးလ္ၚဵုရၚ်တၠုၚ်ပိဏ္ဍပါတ်ဇကုရ၊ သီုဟွံဂရၚ်ပတီပါန်အခေါၚ် အ္စာ (နိဿယ) ဟွံထေက်ကဵုလုပ်ကွာန်ရ၊ ဟွံထေက်က၆ုအာ သုသာန်ရ၊ ဟွံထေက်ကဵုစ္ဍးအာဌာန်သအာၚ်ရ၊ အ္စာ (နိဿယ) ဂိယဲဒှ်မ္ဂး၊ လုကဴကာမဂျိုၚ်ဒၟံၚ်လမျီု သ္ဒးကၠောန်ၜိုတ်လွဳပရာရ၊ စဵုကဵုယဲအ္စာ (နိဿယ) ဂှ်ဗၠး သ္ဒးလၟတ်မၚ်ဒၟံၚ်ရ။
ဒ္ဂေတ်ဝ်ထေက်ကဵုဒးသ္ပ ပ္ဍဲအ္စာ (နိဿယ) တုဲရ။
