၁၉။ ဒ္ဂေတ်ဝတ်ထေက်ကဵုဒးသ္ပ ပ္ဍဲကွးပဒတဴဇရေၚ်
၇၉။ ယွံခမဳတအ် အ္စာ (နိဿယ) ဂှ် သ္ဒးဒ္ဂေတ်ပ္ဍဲကွးဒတဴဇရေၚ် ဗွဲမ္ဒးရးရ၊ ကြက်သ္ဂးဂတဝွံတုန် ဗီုဒ္ဂေတ်ဗွဲမုးရးရ—
ယွံခမဳတအ် အ္စာ (နိဿယ) ဂှ် သ္ဒးသၚ်ရိုဟ်ယိုက်ဒိုက်ထံက်ပၚ် ကွးပဒတဴဇရေၚ် နပွမပကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ ပွမဝေတ်ဗတောန် ဒၠောံဗတောန်စၞောန်ထ္ၜးရ။ ဗဗေၚ်အ္စာ (နိဿယ) နွံတုဲ ဗဗေၚ်ကွးပဒတဴဇရေၚ် ဟွံမွဲမ္ဂး၊ အ္စာ (နိဿယ) သ္ဒးကဵုဗဗေၚ် ကုကွးပဒတဴဇရေၚ်ရ၊ “မုရဴသာ်လဵု ဗဗေၚ်သ္ဂောံကတဵုဒှ်ကၠုၚ် ကုကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာ (နိဿယ) နွံတုဲ သ္ၚာကွးပဒတဴဇရေၚ် ဟွံမွဲမ္ဂး၊ အ္စာ (နိဿယ) သ္ဒးကဵုသ္ၚာ ကုကွးပဒတဴဇရေၚ်ရ၊ “မုရဴသာ်လဵု သ္ၚာသ္ဂောံကတဵုဒှ်ကၠုၚ် ကုကွးပဒတဴရော?” ရဴဝွံ ဂဗုဓ်လွဳပရာလေဝ် ဒးသ္ပရ။ ပရိက္ခရာ ‘အရပ်စပ်’ အ္စာ (နိဿယ) နွံတုဲ ပရိက္ခရာကွးပဒတဴဇရေၚ် ဟွံမွဲမ္ဂး၊ အ္စာ (နိဿယ) သ္ဒးကဵုပရိက္ခရာ ကုကွးပဒတဴဇရေၚ်ရ၊ “မုရဴသာ်လဵု ပရိက္ခရာ သ္ဂောံကတဵုဒှ်ကၠုၚ် ကုကွးဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။
ပွးပဒတဴဇရေၚ် ဂိယဲမ္ဂး၊ ဒၠိုက်ကတဵုနူဂယးပြဟ်တုဲ သ္ဒးဒုၚ်ကဵုဆုဒကရ၊ သ္ဒးဒုၚ်ကဵုဍာ်လာၚ်မုက်ရ၊ သ္ဒးလးသၞာဂဇအ်ရ၊ ယာဂုနွံမ္ဂး ကြဴကြာတ်ခရော်တုဲ သ္ဒးဒုၚ်ကဵုယာဂုရ၊ ကုကွးပဒတဴဇရေၚ် မသုၚ်ယာဂုတုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ခရော်တုဲ သ္ပဗွဲမ္ဒးရး သီုဟွံကဵုထ္ဍိမြိလုက်စုက်ဒးဂှ် ကြဴကြာတ်တုဲမ္ဂး သ္ဒးသီဂိုၚ်ဒေပ်စွံရ၊ ကွးပဒတဴဇရေၚ် ဒၠိုက်ကတဵု (နူဒၞါဲ) မ္ဂး သ္ဒးသီဂိုၚ်ဒေပ်ထောံ သၞာဂဇအ်ဂှ်ရ၊ ယဝ်သၟိက်ဟန်ဗန်နွံမ္ဂး၊ သ္ဒးကွဟ်ကၟဟ်ဒၞါဲဂှ်ရ။
ကွးပဒတဴဇရေၚ် သၟိက်လုပ်ကွာန်မ္ဂး၊ သ္ဒးဒုၚ်ကဵု သပိုၚ်ဗိုက်လုပ်ကွာန်ရ၊ သ္ဒးဂိုၚ်ကေတ်သပိုၚ်ဗိုက်ပ္ဍဲဘာရ၊ သ္ဒးဒုၚ်ကဵုဇုကကာယဗန်ရ၊ ထပ်လဝ် သ္ၚာသကိုပ်ဂမၠိုၚ်တုဲ သ္ဒးဒုၚ်ကဵုရ၊ ကြဴကြာတ်တုဲ သ္ဒးဒုၚ်ကဵုဗဗေၚ်မဒှ်မွဲဟာန်ကေုာံဍာ်ရ။
“အခိၚ်ဗၞတ်ဝွံ ကြက်ကလေၚ်စဴကၠုၚ်ရ” ရဴဝွံ (ပၠုပ်စိုတ်တုဲ) သ္ဒးလးပညပ်လဝ်သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ ဒစးဒုၚ်တၠုၚ်တရဴတုဲ သ္ဒးဒုၚ်ဂိုၚ်ကေတ် ဗဗေၚ်သ္ၚာရ၊ သ္ဒးဒုၚ်ကဵုသပိုၚ်ဗိုက်ပ္ဍဲဘာရ၊ သ္ဒးဟောဝ်ဂိုၚ်ကေတ်သပိုၚ်ဗိုက် လုပ်ကွာန်ရ၊ ယဝ်သ္ၚာဍေက်ဒၟံၚ် ပဠက်မ္ဂး၊ ဗၞတ်မွဲခဏဍောတ် သ္ဒးစဲလဝ် ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးထပ်သ္ၚာရ၊ ထပ်သ္ၚာမ္ဂး “လ္ပကဵုဒှ် ကဝ်ကေက် ‘ပၞေတ်ခ္ဍပ်’ ပ္ဍဲလဒေါဝ်ညိ” ရဴဝွံ သီုမပၠုပ်စိုတ်ဂှ် ယှအ်ကၠေံတၞုၚ်မုဟ်ပန်လပုဟ်တုဲတုဲ သ္ဒထပ်လ္ၚာရ၊ သ္ဒးစွံလဝ် ဇုက်ကာယဗန် ပ္ဍဲအပ္ဍဲသ္ၚာထပ်လဝ်ရ။
ပိဏ္ဍပါတ်နွံတုဲကွးပဒတဴဇရေၚ်လေဝ် မိက်သ္ပပြဘိုဂ်မ္ဂး၊ ဒုၚ်ကဵုဍာ်ရပ်စပ်တုဲ သ္ဒးဒုၚ်ကဵုပိဏ္ဍပါတ်ရ၊ (နွံပၟိက်ဍာ်ဟာ ရဴဝွံ) သ္ဒးဂရၚ်ပတီသၟာန် ကွးပဒတဴဇရေၚ် နကဵုဍာ်သုၚ်ရ၊ ကုကွးပဒတဴဇရေၚ် မကဵုပိုဉ်တုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ဗဗေၚ်တုဲမ္ဂး သ္ပဗွဲမ္ဒးရး သီုဟွံကဵုထ္ဍိမြိလုက်စုက်ဒးဂှ် ကြဴကြာတ်သအးဇ္ၚးတုဲ သ္ပစဵုကဵုဍာ်ကှ်တုဲမ္ဂး ဗၞတ်မွဲခဏဍောတ် သ္ဒးစဲလဝ်ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးစွံဗဗေၚ်သ္ၚာရ၊ မိက်စွံဗဗေၚ်မ္ဂး နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ မိက်စွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံ ဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။ ကွးပဒတဴဇရေၚ် ဒၠိုက်ကတဵု (နူဒၞါဲ) မ္ဂး သ္ဒးသီဂိုၚ်ဒေပ်ထောံ သၞာဂဇအ်ဂှ်ရ၊ သ္ဒးသီဂိုၚ်ဒေပ်ထောံ ဍာ်ကြဴဇိုၚ် ဂတဵုပေါတ်ဇိုၚ် ကဝေတ်ပေါတ်ဇိုၚ်ရ၊ ယဝ်သၟိက်ဟန်ဗန်နွံမ္ဂး၊ သ္ဒးကွဟ်ကၟဟ်ဒၞါဲဂှ်ရ။
ကွးပဒတဴဇရေၚ် မိက်ဟုမ်ဍာ်မ္ဂး၊ သ္ဒးစဳရေၚ် ဍာ်ဟုမ်ရ၊ နွံပၟိက်ကဵုဍာ်လၟုဟ်မ္ဂး၊ သ္ဒးစဳရေၚ်ကဵုဍာ်လၟုဟ်ရ၊ နွံပၟိက်ကဵုဍာ်ဂမ္တဴမ္ဂး၊ သ္ဒးစဳရေၚ်ကဵုဍာ်ဂမ္တဴရ။
ကွးပဒတဴဇရေၚ် မိက်လုပ်သ္ၚိဇရုၚ်ပဠက်မ္ဂး၊ သ္ဒးထ္ၜိုန်ကဠောံ ခၞိက်ကြကောတ် နကဵုဍာ်ရ၊ သ္ဒးဖ္ဍုက်တိကမၠေတ် နကဵုဍာ်ရ၊ ဂိုၚ်ကေတ်ဂတဵုသ္ၚိဇရုၚ်ပဠက်တုဲ သီုမဗက်အာ နူလက်ကရဴ နူလက်ကရဴ အ္စာ (နိဿယ) ဂှ် ဒုၚ်ကဵုဂတဵုသ္ၚိဇရုၚ်ပလက်တုဲမ္ဂး ဟောဝ်ဂိုၚ်ကေတ်သ္ၚာတုဲ သ္ဒးစွံလဝ် ပ္ဍဲဌာန်မဗဗွဲရ၊ သ္ဒးဒုၚ်ကဵုခၞိက်ကြကောတ်ရ၊ သ္ဒးဒုၚ်ကဵုတိကမၠောတ်ရ။ ယဝ်သၟဟ်ရထမ္ဂး သ္ဒးလုပ်သ္ၚိဇရုၚ်ပဠက်ရ၊ ခမဳမလုပ်သ္ၚိဇရုၚ်ပလက်ဂှ် လံက်လေတ်မုက် နကဵုတိကမၠေတ်မဖ္ဍုက်လဝ်ဍာ်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးလုပ်သ္ၚိဇရုၚ်ပဠက်ရ၊ ဃရိတ်ခတ်ခမဳဂမၠိုၚ် မဒှ်ထေရ်ဇၞော်ကီု ဟဂပ်ဝ်ဂဇအ်ရ၊ ခမဳသၟတ်ဂမၠိုၚ်လေဝ် ဟဂပ်ဝ်ဆေဝ်ဒဝ် ပွမဂဇအ်ပ္ဍဲသၞာရ၊ ပ္ဍဲသ္ၚိဇရုၚ်ပဠက် သွက်ကွးပဒတဴဇရေၚ် သ္ဒးသ္ပကဵုကေက်ကာအိုတ်သီု (မပ္တံပွမစံၚ်ဗဂဵုပၟတ်) ရ၊ ခမဳမတိတ်ကၠုၚ် နူသ္ၚိဇရုၚ်ပဠက်ဂှ် ဂိုၚ်ကေတ်ဂတဵုသ္ၚိဇရုၚ်ပဠက်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူကလက်ကရဴကီုတုဲ သ္ဒးတိတ်နူသ္ၚိဇရုၚ်ပဠက်ရ။
ပ္ဍဲအရာဟုမ်ဍာ်လေဝ် သွက်ကွးပဒတဴဇရေၚ် သ္ဒးသ္ပကဵုကေၚ်ကာအိုတ်သီု (မပ္တံပွမတုဟ်ပေါတ်မိဟ်) ရ၊ ခမဳမဟုမ်ဍာ်တုဲဂှ် တိုန်ကၠုၚ်ဗွဲကိုပ်ကၠာတုဲ သ္ပဇကုဇကု စဵုကဵုဟွံမွဲကဵုဍာ်တုဲ ဗိုက်သပိုၚ်တုဲ သ္ဒးဇိုတ်ကဵုဍာ် နူဇကုကွးပဒတဴဇရေၚ်ရ၊ သ္ဒးဒုၚ်ကဵုသပိုၚ်ရ၊ သ္ဒးဒုၚ်ကဵုသ္ၚာသကိုပ်ရ၊ ဂိုၚ်ကေတ်ဂတဵုသ္ၚိဇရုၚ်ပဠက်တုဲ ကၠုၚ်ဗွဲကိုပ်ကၠာတုဲ သ္ဒးလးပညပ်လဝ် သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေတ်ပေါတ်ဇိုၚ် ပ္ဍဲဇရေၚ်ရ၊ (နွံပၟိက်ဍာ်ဟာ ရဴဝွံ) သ္ဒးသၟာန် ကွးပဒတဴဇရေၚ် နကဵုဍာ်သုၚ်၇။
ဘာကွးပဒတဴဇရေၚ် ပဒတဴဂှ် သၟိက်ဟန်ဗန်နွံမ္ဂး၊ ယဝ်သၟဟ်ရထမ္ဂး သ္ဒးသောၚ်ဖ္ဍောၚ်ၚးတးရ၊ ခမဳ မသောၚ်ဖ္ဍောၚ်ၚးတးဘာဂှ် ဗွဲကိုပ်ကၠာ ရၚ်တၠုၚ်ပတိတ် ဗဗေၚ်သ္ၚာတုဲ သ္ဒးစွံလဝ်ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် သၞာနိသဳဒိုန်သၞာလးတိက်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ်ဖုန်ဂၞဳတုဲ သ္ဒးစွံလဝ် ပ္ဍဲဒၞါဲမဗဗွဲရ၊ ဇံၚ်ခါတ်ဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ဂတဵုဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ်ဇိုၚ်ဇံၚ်ဂမၠိုၚ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် ထၟာဲချဟ် ‘ထၟာဲတဲ’ တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ရၚ်တၠုၚ်ပတိတ် ဂတဵုဒလာဲတုဲ သ္ဒးစွံလဝ် ပ္ဍဲဒၞါဲမဗဗွဲရ၊ သၞာလးတိဂှ် သမ္တီလဝ်ဒၞါဲလးလၟိုန်တုဲ ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞါဲမဗဗွဲရ၊ ပ္ဍဲဘာ ယဝ်သ္ၚိစၟဇာဖိုၚ်နွံမ္ဂး၊ သ္ဒးပါဲကၠေံနူသၠဖ္ဍာန်ဗွဲကိုပ်ကၠာရ၊ သ္ဒးဇိုတ်ပေါတ်ဗ္တၚ်ကျာ ကေုာံသကဲခဒမ်ဂမၠိုၚ်ရ။ ဗ္ဒၚ်မသ္ပလဝ် ကဠိတ်ကဠောတ် နကဵုခၞိက်တိကမၠေတ် ဗကေတ် (နကဵုဆီတၟံ) ဂှ် ပတိုဟ်တိုန်မ္ဂး၊ ဖ္ဍုက်ဍာ်ယတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ တိမသ္ပလဝ်ကဠိတ်ကဠောတ် နကဵုသာ်လမ္စံက်ဂှ် ပတိုန်တိုန်မ္ဂး၊ ဖ္ဍုက်ဍာ်ယာတ်တမြံၚ်တုဲ ဝတ်ကၠေဴတုဲမ္ဂး သ္ဒးဇိုတ်ပေါတ်ရ၊ ဒှ်တိမဟဂွံသ္ပလဝ်ကဠိတ်ကဠောတ်မ္ဂး၊ လၟုဟ်ဖရုဲဍာ်တုဲ “လ္ပကဵုမၠိုက်တိုန်အာညိ” ရဴဝွံ (စွံစိုတ်တုဲ) သ္ဒးကွဟ်ကၟဟ်ရ၊ ပကောံဖအုံလဝ် အိက်ကၟဟ်တုဲ သ္ဒးထောံထောံ ပ္ဍဲဌာန်မဗဗွဲရ။
စဲတ္ၚဲသအးဇ္ၚး သၞာလးတိတုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ဇိုၚ်ဇံၚ်ဂမၠိုၚ်တုဲမ္ဂး သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ စဲတ္ၚဲသအးဇ္ၚးဇံၚ်ခါတ်တုဲမ္ဂး ဂရိုက်ထောံတုဲ သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠးတြၚ်ဖဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဂတဵုတုဲမ္ဂး ဂရိုက်ထောံတုဲ သ္ပဗွဲမသဝ်ဒးရး သီုဟွံကဵုထ္ဍိမြိ လုက်စုက်ဒး သၠးတြၚ်ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဖုန်ဂၞဳတုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚးသၞာနိသဳဒိန် သၞာလးတိက်တုဲမ္ဂး ဂရိုက်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ထၟာဲဂစှ်တုဲမ္ဂး၊ သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ စဲတ္ၚဲဇိုတ်ပေါတ် ဂတဵုဒလာဲတုဲမ္ဂး သ္ဒးကလေၚ်စွံ ပ္ဍဲဒၞါဲအတိုၚ်စွံလဝ်လၟိုန်ရ၊ သ္ဒးစွံဗဗေၚ်သ္ၚာရ၊ ခမဳမိက်စွံဗဗေၚ်ဂှ် နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ မိက်စွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံ ဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
နူဒိုဟ်ဗၟံက် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံဗ္တၚ်ကျာဒိုဟ်ဗၟံက်ဂမၠိုၚ်ရ၊ နူဒိုဟ်ပလိုတ် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်ပလိုတ်ဂမၠိုၚ်ရ၊ နူဒိုဟ်သၟဝ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်သၟဝ်ကျာဂမၠိုၚ်ရ၊ နူဒိုဟ်သၠုၚ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗ္တၚ်ကျာဒိုဟ်သၠုၚ်ကျာဂမၠိုၚ်ရ။ ဒှ်အခိၚ်ၜိုဟ်ဂံက်မ္ဂး ပ္ဍဲအခိၚ်တ္ၚဲ သ္ဒးပံက်လဝ် ဗ္တၚ်ကျဂမၠိုၚ်ရ၊ ပ္ဍဲအခိၚ်ဗ္တံ သ္ဒးကၟာတ်ဒဝ်ကၠေံရ၊ ဒှ်အခိၚ်ဂမ္တဴမ္ဂး ပ္ဍဲအခိၚ်တ္ၚဲ သ္ဒးကၟာတ်ဒဝ်လဝ် ဗ္တၚ်ကျာဂမၠိုၚ်ရ၊ ပ္ဍဲအခိၚ်ဗ္တံ သ္ဒးပံက်လဝ်ရ။
ပြဝိုဏ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ပြဝိုဏ်ရ။ ခဒမ်ဟုမ်ဍာ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ခဒမ်ဟုမ်ဍာ်ရ။ ဇြပ်ကောံဓရီု သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ်ဇြပ်ကောံဓရီုရ။ ရုၚ်ပၟတ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ရုၚ်ပၟတ်ရ။ သ္ၚိဝစ် (သ္ၚိဍာ်) သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် သ္ၚိဝစ်ရ။ ဍာ်သုၚ်ဟွံမွဲမ္ဂး၊ သ္ဒးစွံပတန်ဍာ်သုၚ်ရ။ ဍာ်ရပ်စပ်ဟွံမွဲမ္ဂး၊ သ္ဒးစွံပတန် ဍာ်ရပ်စပ်ရ။ ပ္ဍဲနုၚ်ဍာ်ကြာတ် (နုၚ်စအးသ္ၚိဍာ်) ဍာ်ဟွံမွဲဒှ်မ္ဂး၊ သ္ဒးဗပေၚ်စုတ်ဍာ်ရ။
ကွးပဒတဴဇရေၚ် ကတဵုဒှ်ပွမဟွံမိပ်လဟိၚ်မ္ဂး၊ အ္စာ (နိဿယ) ဂှ် (အလဵုဇကု) သ္ဒးကေော်ဏာဌာန်သအာၚ်ရ၊ (ညးသအာၚ်လေဝ်) သ္ဒးကဵုကော်ဏာရ၊ ဂလာန်ဓရ်လေဝ် သ္ဒးဟီုတွံကဵုကုကွးပဒတဴ ဇရေၚ်ဂှ်ရ။ ‘သံသယကုက္ကုစ္စ’ ပွမချပ်သၠောပၟာ ကတဵုဒျ်ကုကွးဒတဴဇရေၚ်မ္ဂး၊ အ္စာ (နိဿယ) ဂှ် သ္ဒးပါဲပၠေၚ်ကၠေံရ၊ (ညးသအာၚ်လေဝ်) သ္ဒးကဵုပါဲပၠေၚ်ကၠေံရ၊ ဂလာန်ဓရ်လေဝ် သ္ဒးဟီုတွံကဵု ကုကွးပဒတဴဇရေၚ်ဂှ်ရ။ ကွေတ်မှာရာ ကတဵုဒှ်ကုကွးပဒတဴဇရေၚ်မ္ဂး၊ အ္စာ (နိဿယ) ဂှ် သ္ဒးသောၚ်ကၠးကဵုစာ်စ္ဍးအာရ၊ (ညးသအာၚ်လေဝ်) သ္ဒးကဵုသောၚ်ကၠးစာ်စ္ဍးအာရ၊ ဂလာန်ဓရ်လေဝ် သ္ဒးဟီုတွံကဵု ကုကွးပဒတဴဇရေၚ်ဂှ်ရ။ ကွးပဒတဴဇရေၚ် အာစိုပ်ဂရုကအာပတ်တုဲ ထေက်ကဵုတၞဟ်နပဒတဴပြဝးမ္ဂး၊ အ္စာ (နိဿယ) ဂှ် “မုရဴသာ်လဵု သၚ် သ္ဂောံကဵုပြဝး ကုကွးပဒတဴဇရေၚ်ရော?” ရဴဝွံ သ္ဒးသ္ပဂဗုဓ်လွဳပရာရ။ ကွးပဒတဴဇရေၚ် ထေက်ကဵုတံၚ်ဓဇက်တမ်ဒှ်မ္ဂး၊ အ္စာ (နိဿယ) ဂှ် “မုရဴသာ်လဵု သၚ် သ္ဂောံတံၚ်ဓဇက်တမ် ကွးပဒတဴဇရေၚ်ရော?” ရဴဝွံ သ္ဒးသ္ပဂဗုဓ်လွဳပရာရ။ ကွးပဒတဴဇရေၚ် ထေက်ကဵုဒ္ဂေတ် ‘မာနတ်’ ထေက်ကဵုသ္ဍိုက်မၠိုက်ဒှ်မ္ဂး၊ အ္စာ (နိဿယ) ဂှ် “မုရဴသာ်လဵု သၚ် သ္ဂောံကဵုမာနတ် ကုကွးပဒတဴဇရေၚ်ရော?” ရဴဝွံ သ္ဒးသ္ပဂဗုဓ်လွဳပရာရ။ ကွးပဒတဴဇရေၚ် ထေက်ကဵုကော်ပၠုပ်အဗ္ဘာန်ဒှ်မ္ဂး၊ အ္စာ (နိဿယ) ဂှ် “မုရဴသာ်လ၆ု သၚ် သ္ဂောံကဵုကော်ပၠုပ်အဗ္ဘာန် ကွးပဒတဴဇရေၚ်ရော?” ရဴဝွံ သ္ဒးသ္ပဂဗုဓ်လွဳပရာရ။ သၚ် မိက်သ္ပ ‘တဇ္ဇနဳယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာနိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ပတိတ်ထောံကီု ကုကွးပဒတဴဇရေၚ်မ္ဂး၊ အ္စာ (နိဿယ) ဂှ် “မုရဴသာ်လဵု သၚ် ဟဂွံသ္ပကမ် ကုကွးပဒတဴဇရေၚ်ရော? မုရဴသာ်လဵု သ္ဂောံကဵုဒုဟ်သာစှ်ေရော?” ရဴဝွံ သ္ဒးသ္ပဂဗုဓ်လွဳပရာရ။ သၚ် သ္ပ ‘တဇ္ဇနဳယကမ်’ ပွမဘပဠကီု ‘နိယဿကမ်’ ပွမကဵုပဒတဴ ကေုာံအ္စာနိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ပတိတ်ထောံကီု ကုကွးပဒတဴဇရေၚ်ဂှ်တုဲမ္ဂး၊ အ္စာ (နိဿယ) ဂှ် “မုရဴသာ်လဵု ကွးပဒတဴဇရေၚ် သ္ဂောံဒ္ဂေတ် ဗွဲမ္ဒးရးရော? သ္ဂောံဖျေံတသော် မတွံဂးမာန်ရော? ဒ္ဂေတ်တဴဒ္ဂေတ် မတိတ်ဗၠးနူဒဏ်ရော? သၚ် သ္ဂောံလလမ်ကၠေံကမ်ဂှ်ရော?” ရဴဝွံ သ္ဒးသ္ပဂဗုဓ်လွဳပရာရ။
သ္ၚာကွးပဒတဴဇရေၚ်ဂှ် ထေက်ကဵုဒးလပိုက်ကဆံၚ်ဒှ်မ္ဂး၊ အ္စာ (နိဿယ) ဂှ် “ရဴဝွံ ဩဝ်လပိုက်ကဆံၚ်ညိ” ရဴဝွံ သ္ဒးဟီုထ္ၜးရ၊ “မုရဴသာ်လဵု သ္ဂောံလပိုက်ကဆံၚ် သ္ၚာကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာကွးပဒတဴဇရေၚ်ဂှ် ထေက်ကဵုဒးဇိၚ်ဒှ်မ္ဂး၊ အ္စာ (နိဿယ) ဂှ် “ရဴဝွံ ဩဝ်ဇိၚ်ညိ” ရဴဝွံ သ္ဒးဟီုထ္ၜးရ၊ “မုရဴသာ်လဵု သ္ဂောံဇိၚ် သ္ၚာကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သွက်ကွးပဒတဴဇရေၚ် ထေက်ကဵုဖျိန် ဍာ်လွံက်ဒှ်မ္ဂး၊ အ္စာ (နိဿယ) ဂှ် “ရဴဝွံ ဩဝ်ဖျိန်ညိ” ရဴဝွံ သ္ဒးဟီုထ္ၜးရ၊ “မုရဴသာ်လဵု သ္ဂောံဖျိန်ဍာ်လွံက် သွက်ကွးပဒတဴဇရေၚ်ရော?” ရဴဝွံ ဂဗုမ်လွဳပရာလေဝ် ဒးသ္ပရ။ သ္ၚာကွးပဒတဴဇရေၚ်ဂှ် ထေက်ကဵုဒးဖျောန်ဒှ်မ္ဂး၊ အ္စာ (နိဿယ) ဂှ် “ရဴဝွံ ဩဝ်ဖျောန်ညိ” ရဴဝွံ သ္ဒးဟီုထ္ၜးရ၊ “မုရဴသာ်လဵု သ္ဂောံဖျောန် သ္ၚာကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ ခမဳမဖျောန်သ္ၚာဂှ် သ္ဒးဖျောန်ဂတးဂတန် ဗွဲမ္ဒးရးရ၊ ကိုပ်ကၠာ ထၞဟ်ဍာ်လွံက် ဓဇူဟွံပိုတ်ဏီ စ္ဍးအာဟွံဂွံရ။ ကွးပဒတဴဇရေၚ် ဂိယဲဒှ်မ္ဂး၊ လုကဴကာလမဂျိုၚ်ဒၟံၚ်လမျီု သ္ဒးကၠောန်ၜိုတ်လွဳပရာရ၊ စဵုကဵုယဲကွးပဒတဴဇရေၚ်ဂှ်ဗၠး သ္ဒးလၟတ်မၚ်ဒၟံၚ်ရ။
ဒ္ဂေတ်ဝတ်ထေက်ကဵုဒးသ္ပ ပ္ဍဲကွးပဒတဴဇရေၚ်တုဲရ။
ခဏ်ဆဋ္ဌမတုဲရ။
