၁၇။ ပွမစၞောန်ထ္ၜးကဵုထေက်ကဵုဒးဗက်ဗ္ဒဴထောံ
၆၈။ ပ္ဍဲကာလမွဲအခိၚ် ကွးပဒတဴမွဲစွံဂမၠိုၚ် ဟွံဒ္ဂေတ်ဗွဲမ္ဒးရး ပ္ဍဲလတူအ္စာဥပဇ္ၛာယ်ဂမၠိုၚ်အိုတ်ရ၊ ခမဳပၟိက်အောန်ဂမၠိုၚ်ဂှ် “မုဟိုတ် ကွးပဒတဴမွဲစွံဂမၠိုၚ် ဟွံဒ္ဂေတ်ဗွဲမ္ဒးရး ပ္ဍဲလတူအ္စာဥပဇ္ၛာယ်ဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။
“ယွံခမဳတအ် ကွးပဒတဴမွဲစွံဂမၠိုၚ် ဟွံဒ္ဂေတ်ဗွဲမ္ဒးရး ပ္ဍဲလတူအ္စာဥပဇ္ၛာယ်ဂမၠိုၚ်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ကွးပဒတဴမွဲစွံဂမၠိုၚ် ဟွံဒ္ဂေတ်ဗွဲမ္ဒးရး ပ္ဍဲလတူအ္စာဥပဇ္ၛာယ်ဂမၠိုၚ်အိုတ်ရော?” ရဴဝွံ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး “ယွံခမဳတအ် ကွးပဒတဴမွဲစွံဂှ် သ္ဒးဒ္ဂေတ် ပ္ဍဲလတူအ္စာဥပဇ္ၛာယ်ဗွဲမ္ဒးရးရ၊ ကုခမဳ မဟွံဒ္ဂေတ်ဗွဲမ္ဒးရးဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
(ၜိုန်ဂှ်လေဝ်) ဟွံဒ္ဂေတ်တဴဗွဲမ္ဒးရးအိုတ်ဟေၚ်ရ။
ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကဵုအခေါၚ် သွက်ဂွံဗက်ဗ္ဒဴထောံ ကွးပဒတဴမွဲစွံ မဟွံဒ္ဂေတ်ဗွဲမ္ဒးရးရ”။
ယွံခမဳတအ် ရဴဝွံ သ္ဒးဗက်ဗ္ဒဴထောံရ “ဗက်ဗ္ဒဴထောံ တၠအဲရ” ရဴဝွံကီု “လ္ပကလေၚ်ကၠုၚ်ဌာန်ဝွံညိ” ရဴဝွံကီု “ဩဝ်ရၚ်တပုၚ်ကေတ်ဏာ ဗဗေၚ်သ္ၚာတၠအဲညိ” ရဴဝွံကီု “တၠအဲ လ္ပကၠောန်ၜိုတ်အဲရ” ရဴဝွံကီု နကဵုဇကုကဵုဒှ် နကဵုပါၚ်ကဵုဒှ် နကဵုဇကုပါၚ်ကဵုဒှ် ကဵုတီကေတ်မ္ဂး၊ ဒှ်ဗက်ဗ္ဒဴထောံ ကွးပဒတဴမွဲစွံရ။ နကဵုဇကုကဵုဒှ် နကဵုပါၚ်ကဵုဒှ် နကဵုဇကုပါၚ်ကဵုဒှ် ဟွံကဵုတီကေတ်မ္ဂး၊ ဟွံဒှ်ဗက်ဗ္ဒဴထောံ ကွးပဒတဴမွဲစွံရ ရဴဝွံ (သ္ဂးရ)။
ပ္ဍဲအခိၚ်ဂှ် ကွးပဒတဴမွဲစွံ မဒးဗက်ဗ္ဒဴထောံဂမၠိုၚ် ဟွံကလအ်ဒုၚ်ဂုဏ်အိုတ်ရ၊ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကဵုအခေါၚ်သွက်ဂွံကလအ်ဒုၚ်ဂုဏ်ရ” ရဴဝွံ (သ္ဂးရ)။
(ၜိုန်ဂှ်လေဝ်) ဟွံကလအ်ဒုၚ်ဂုဏ်အိုတ်ဟေၚ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကွးပဒတဴမွဲစွံ မဒးဗက်ဗ္ဒဴထောံဂှ် သ္ဒးကလအ်ဒုၚ်ဂုဏ်ရ၊ ကုကွးမဟွံကလအ်ဒုၚ်ဂုဏ်ဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
ပ္ဍဲအခိၚ်ဂှ် ၜိုန်ကလအ်ဒုၚ်ဂုဏ်လေဝ် အ္စာဥပဇ္ၛာယ်ဂမၠိုၚ် ဟွံအေၚ်ဒုၚ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကဵုအခေါၚ် သွက်ဂွံအေၚ်ဒုၚ်ရ” ရဴဝွံ (သ္ဂးရ)။ (ၜိုန်ဂှ်လေဝ်) ဟွံအေၚ်ဒုၚ်အိုတ်ဟေၚ်ရ။ ကွးပဒတဴမွဲစွံဂမၠိုၚ် ဌာန်သအာၚ်လေဝ် စ္ဍးအာအိုတ်ရ၊ ခရှ်လေဝ် ရာံတိတ်အိုတ်ရ၊ ဗော်တဳလေဝ် ပြံအာအိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ကလအ်ဒုၚ်ဂုဏ်မ္ဂး အ္စာဥပဇ္ၛာယ်ဂှ် သ္ဒးအေၚ်ဒုၚ်ရ၊ ကုအ္စာဥပဇ္ၛာယ် မဟွံဒုၚ်ကလအ်ဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
ပ္ဍဲမွဲအခိၚ်တေံ အ္စာဥပဇ္ၛာယ်ဂမၠိုၚ် ဗက်ဗ္ဒဴထောံ ကွးပဒတဴမွဲစွံမဒ္ဂေတ်ဗွဲမ္ဒးရးအိုတ်ရ၊ ဟွံဗက်ဗ္ဒဴထောံ ကွးပဒတဴမွဲစွံ မဟွံဒ္ဂေတ်ဗွဲမ္ဒးရးအိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ဟွံထေက်ကဵုဗက်ဗ္ဒဴထောံ ကွးပဒတဴမွဲစွံ မဒ္ဂေတ်ဗွဲမ္ဒးရးရ၊ ကုခမဳမဗက်ဗ္ဒဴထောံဂှ် ဒးအာပတ်ဒုက္ကဋ်ရ။ ယွံခမဳတအ် သ္ဒးဗက်ဗ္ဒဴထောံ ကွးပဒတဴမွဲစွံ မဟွံဒ္ဂေတ်ဗွဲမ္ဒးရးရ၊ ကုခမဳမဟွံဗက်ဗ္ဒဴထောံဂှ် ဒးအာပတ်ဒုက္ကဋ်ရ” ရဴဝွံ (သ္ဂးရ)။
ယွံခမဳတအ် သ္ဒးဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာရ။ ပ္ဍဲလ္တူအ္စာဥပဇ္ၛာယ် ဟွံမွဲကဵုပွမသ္ဍိုက်ဆာန်သၞေံသၞဴ မလောန်ကာဲရ၊ ဟွံမွဲကဵုပွမလျုၚ်ဇြုၚ်သ္ဍိုက် မလောန်ကာဲရ၊ ဟွံမွဲကဵုပွမဂွပါပ် မလောန်ကာဲရ၊ ဟွံမွဲကဵုပွမသ္ပရှ်ေသှ်ေရဴဂဴ မလောန်ကာဲရ၊ ဟွံမွဲကဵုပွမဇၞော်ပၟဝ်မေတ္တာ မလောန်ကာဲရ။ ယွံခမဳတအ် သ္ဒးဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံရ။
ယွံခမဳတအ် ဟွံထေက်ကဵုဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာရ။ ပ္ဍဲလတူအ္စာဥပဇ္ၛာယ် မၞုံကဵုပွမသ္ဍိုက်ဆာန်သၞေံသၞဴ မလောန်ကာဲရ၊ မၞုံကဵုပွမလျုၚ်ဇြုၚ်သ္ဍိုက် မလောန်ကာဲရ၊ မၞုံကဵုပွမဂွပါပ် မလောန်ကာဲရ၊ မၞုံကဵုပွမသ္ပရှ်ေသှ်ေရဴဂဴ မလောန်ကာဲရ၊ မၞုံကဵုပွမဇၞော်ပၟတ်မေတ္တာ မလောန်ကာဲရ။ ယွံခမဳတအ် ဟွံထေက်ကဵုဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံရ။
ယွံခမဳတအ် ထေက်ကဵုဒးဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴ ကေုာံအၚ်္ဂဂမၠိုၚ်မသုန်ပြကာရ။ ပ္ဍဲလတူအ္စာဥပဇ္ၛာယ် ဟွံမွဲကဵုပွမသ္ဍိုက်ဆာန်သၞေံသၞဴ မလောန်ကာဲရ၊ ဟွံမွဲကဵုပွမလျုၚ်ဇြုၚ်သ္ဍိုက် မလောန်ကာဲရ၊ ဟွံမွဲကဵုပွမဂွပါပ် မလောန်ကာဲရ၊ ဟွံမွဲကဵုပွမသ္ပရှ်ေသှ်ေရဴဂဴ မလောန်ကာဲရ၊ ဟွံမွဲကဵုပွမဇၞော်ပၟတ်မေတ္တာ မလောန်ကာဲရ။ ယွံခမဳတအ် ထေက်ကဵုဒးဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာရ။
ယွံခမဳတအ် ဟွံထေက်ကဵုဒးဗက်ဗ္ဒဴထောံ ကွးပဒတဴမွဲစွံ မဍိုက်ပေၚတဴကေုာံအၚ်္ဂဂမၠိုၚ်မသုန်ပြကာရ။ ပ္ဍဲလတူအ္စာဥပဇ္ၛာယ် မၞုံကဵုပွမသ္ဍိုက်ဆာန်သၞေံသၞဴ မလောန်ကာဲရ၊ မၞုံကဵုပွမလျုၚ်ဇြုၚ်သ္ဍိုက် မလောန်ကာဲရ၊ မၞုံကဵုပွမဂွပါပ် မလောန်ကာဲရ၊ မၞုံကဵုပွမသ္ပရှ်ေသှ်ေရဴဂဴ မလောန်ကာဲရ၊ မၞုံကဵုပွမဇၞော်ပၟဝ်မေတ္တာ မလောန်ကာဲရ။ ယွံခမဳတအ် ဟွံထေက်ကဵုဒးဗက်ဗ္ဒဴထောံ ကွးပဒတဴမွဲစွံ မဍိုက်တဴ ကေုာံအၚ်္ဂမသုန်ပြကာဝွံရ။
ယွံခမဳတအ် အ္စာဥပဇ္ၛာယ် ဟွံဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဂှ် မၞုံကဵုဒုဟ်ရ ‘ဒးအာပတ်’ ရ၊ ဥပဇ္ၛာယ် မဗက်ဗ္ဒဴထောံဂှ် ဟွံမွဲကဵုဒုဟ်ရ ‘ဟွံဒးအာပတ်’ ရ။ ပ္ဍဲလတူအ္စာဥပဇ္ၛာယ် ဟွံမွဲကဵုပွမသ္ဍိုက်ဆာန်သၞေံသၞဴ မလောန်ကာဲရ၊ ဟွံမွဲကဵုပွမလျုၚ်ဇြုၚ်သ္ဍိုက် မလောန်ကၠာရ၊ ဟွံမွဲကဵုပွမဂွပါပ် မလောန်ကာဲရ၊ ဟွံမွဲကဵုပွမသ္ပရှ်ေသှ်ရဴဂဴ မလောန်ကာဲရ၊ ဟွံမွဲကဵုပွမဇၞော်ပၟဝ်မေတ္တာ မလောန်ကာဲရ။ ယွံခမဳတအ် အ္စာဥပဇ္ၛာယ် ဟွံဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံ မၞုံကဵုဒုဟ်ရ ‘ဒးအာပတ်’ ရ၊ ဥပဇ္ၛာယ် မဗက်ဗ္ဒဴထောံဂှ် ဟွံမွဲကဵုဒုဟ်ရ ‘ဟွံဒးအာပတ်’ ရ။
ယွံခမဳတအ် အ္စာဥပဇ္ၛာယ် မဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဂှ် မၞုံကဵုဒုဟ်ရ၊ ဥပဇ္ၛာယ် မဟွံဗက်ဗ္ဒဴထောံဂှ် ဟွံမွဲကဵုဒုဟ်ရ။ ပ္ဍဲလတူအ္စာဥပဇ္ၛာယ် မၞုံကဵုပွမသ္ဍိုက်ဆာန်သၞေံသၞဴ မလောန်ကာဲရ၊ မၞုံကဵုပွမလျုၚ်ဇြုၚ်သ္ဍိုက် မလောန်ကာဲရ၊ မၞုံကဵုပွမဂွပါပ် မလောန်ကာဲရ၊ မၞုံကဵုပွမသ္ပရှ်ေသှ်ေရဴဂဴ မလောန်ကာဲရ၊ မၞုံကဵုပွမဇၞော်ပၟတ်မေတ္တာ မလောန်ကာဲရ။ ယွံခမဳတအ် အ္စာဥပဇ္ၛာယ် မဗက်ဗ္ဒဴထောံ ကွးပဒတဴမွဲစွံ မဍိုက်ပေၚ်တဴကေုာံအၚ်္ဂဂမၠိုၚ်မသုန်ပြကာဝွံ မၞုံကဵုဒုဟ်ရ၊ ဥပဇ္ၛာယ် မဟွံဗက်ဗ္ဒဴထောံဂှ် ဟွံမွဲကဵုဒုဟ်ရ” ရဴဝွံ (သ္ဂးရ)။
၆၉။ ပ္ဍဲကာလမွဲအခိၚ် ဗဗၞးမွဲတၠ ပြာပ်အာဇရေၚ်ခမဳဂမၠိုၚ်တုဲ အာတ်အခေါၚ် ဒဒှ်ထပိုဲခမဳရ၊ ခမဳဂမၠိုၚ် ဟွံမိက်သ္ပကဵုထပိုဲခမဳ ဗဗၞးဂှ်အိုတ်ရ။ ဗဗၞးဂှ် ဟွံမဟွံကလိဂွံ ဒဒှ်ထပိုဲခမဳဇရေၚ်ခမဳဂမၠိုၚ်ဂှ်ရ၊ ဇြာဲသကှ်ကၠုၚ်တုဲ၊ ဖျုန်ဆီဒေက်ခ္ဍေက်ကၠုၚ်တုဲ၊ ရုပ်သာ်လီုလာ်ကၠုၚ်တုဲ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်တုဲ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) တုဲ၊ တဳလမၞုံပိုဉ်ကျာ်တြဲ သ္ဂောံညာတ်ကေတ် ဗဗၞးဂှ်မဇြာဲသကှ် ဖျုန်ဆီဒေက်ခ္ဍေက် ရုပ်သာ်လီုလာ် မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ် မၞုံကဵုဇကုဓရံၚ် ဇာလတေၚ်မံၚ်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) တုဲ “ယွံခမဳတအ် မုဟိုတ် ဗဗၞးဂှ် ဇြာဲသကှ်ရော? ဖျုန်ဆီဒေက်ခ္ဍေက်ရော? ရုပ်သာ်လီုလာ်ရော? မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်ရော? မၞုံကဵုဇကုဓရံၚ်ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) ရော?” ရဴဝွံ သၟာန်ခမဳဂမၠိုၚ်ရ။ ယွံတဳလမၞုံပိုဉ် ဗဗၞးဝွံ ပြာပ်ကၠုၚ်ဇရေၚ်ခမဳဂမၠိုၚ်တုဲ အာတ်အခေါၚ် ဒဒှ်ထပိုဲခမဳရ၊ ခမဳဂမၠိုၚ် ဟွံမိက်သ္ပကဵုထပိုဲခမဳ ဗဗၞးဂှ်အိုတ်ရ၊ ဗဗၞးဂှ် ဟိုတ်မဟွံကလိဂွံ ဒဒှ်ထပိုဲခမဳ ဇရေၚ်ခမဳဂမၠိုၚ်ဂှ်ရ ဇြာဲသကှ်ဒၟံၚ်ရ၊ ဖျုန်ဆီဒေက်ခ္ဍေက်ဒၟံၚ်ရ၊ ရုပ်သာ်လီုလာ်ဒၟံၚ်ရ၊ မၞုံကဵုသာ်ဇကုဖျိုဟ်ဖျေဟ် သၟဟ်ညံၚ်တၞးဆုဍုဟ်ဍုဟ်ရ၊ မၞုံကဵုဇကုဓရံၚ် ဇာလတေၚ်မံက်ထေၚ်ဒၟံၚ် (သၟဟ်ညံၚ်လးပၠးလဝ်ဇာနှိက်) ရ ရဴဝွံ (ဂရၚ်ပတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ယွံခမဳတအ် မုရဴညးမွဲ ဂွံသတိဗှ်ဗၞုဟ်ဒးဂုဏ်ဗဗၞးဂှ်ရော?” ရဴဝွံ သၟာန်ခမဳဂမၠိုၚ်ရ။ သၟာန်တဴရဴဝွံမ္ဂး တဳလပိုဉ်သာရိပိုတ် “ယွံတဳလမၞုံပိုဉ် အဲဍိက် ဂွံသတိဗှ်ဗၞုဟ်ဒး ဂုဏ်ဗဗၞးဂှ်ရ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ ယွံသာရိပိုတ် တၠအဲ မုရဴသာ်လဵု ဂွံသတိဗှ်ဗၞုဟ်ဒး ဂုဏ်ဗဗၞးဂှ်ရော? ရဴဝွံ သၟာန်ရ။ ယွံတဳလမၞုံပိုဉ် ကုအဲဍိက် မဂေတ်ဂ္ၚေၚ်ပိဏ္ဍပါတ် ပ္ဍဲဍုၚ်ရာဇဂြိုဟ်ဝွံ ဗဗၞးဂှ် ကေၚ်ကဵုလဝ်ဒါန်ပိဏ္ဍပါတ် အယာံမာတ်မွဲနော်ရ၊ ယွံတဳလမၞုံပိုဉ် အဲဍိက်ဂွံသတိဗှ်ဗၞုဟ်ဒး ဂုဏ်ဗဗၞးဂှ်ဝွံရ ရဴဝွံ ဂရၚ်ပတီရ၊ ယွံသာရိပိုတ် ခိုဟ်သန်ရ ခိုဟ်သန်ရ၊ ယွံသာရိပိုတ် ညးသပ္ပုရိုဟ်ဂမၠိုၚ် လေပ်တီတဴဂုဏ်ညးအိုတ်ဟေၚ်ရ၊ လေပ်တီတဴ မဂပ်ဝ်ဆာပ်ပလန်ဂုဏ်အိုတ်ဟေၚ်ရ။ ယွံသာရိပိုတ် ဒှ်သာ်ဂှ်မ္ဂး ဩဝ်သ္ပကဵုထပိုဲဗဗၞးဂှ်ညိ၊ ဩဝ်သ္ပကဵုခမဳပယျၚ်ညိ ရဴဝွံ (သ္ဂးရ)။ ယွံတဳလမၞုံပိုဉ် မုရဴသာ်လဵု အဲဍိက် သ္ဂောံသ္ပကဵုထပိုဲ ဗဗၞးဂှ်ရော? သ္ဂောံသ္ပကဵုခမဳပယျၚ်ရော? ရဴဝွံ (ဂရၚ်ပတီရ)။ ပ္ဍဲအခိၚ်ဂှ် ဟိုတ်နူဟိုတ်အရာဂှ် တဳလမၞုံပိုဉ်ကျာ်တြဲ တွံကဵုဂလာန်ဓရ်ဝွံတုဲ “ယွံခမဳတအ် အဲကျာ်ကဵုလဝ်အခေါၚ် ပွမသ္ပခမဳပယျၚ် နကဵုသရဏဂီုဂမၠိုၚ်ပိပြကာဂှ် သ္ပတမ်နူတ္ၚဲဝွံတုဲ ဂပ်ဝ်ပါဲပလီုကၠေံတုဲရ။ ယွံခမဳတအ် ကဵုအခေါၚ်သွက်ဂွံသ္ပခမဳပယျၚ် နကဵုကမ်မရနုက်ကဵုပန်အလန်မ္ဂးဉတ်ရ။ ယွံခမဳတအ် ရဴဝွံ သ္ဒးသ္ပကဵုခမဳပယျၚ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
၇၀။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ အလံၚ်ပယျၚ်မၞုံယၟုဝွံ (သ္ပဟိုတ်ကဵု) တဳလပိုဉ်မၞုံယၟုဝွံတုဲ မိက်သ္ပခမဳပယျၚ်ရ၊ ကမ်မၞုံကဵုအခိၚ်မဗဗွဲ ကုသၚ်ယဝ်ဒှ်မ္ဂး၊ သၚ် သ္ပကဵုခမဳပယျၚ် အလံၚ်ပယျၚ်မယၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ အလံၚ်ပယျၚ်မၞုံယၟုဝွံ (သ္ပဟိုတ်ကဵု) တဳလပိုဉ်မၞုံယၟုဝွံတုဲ မိက်သ္ပခမဳပယျၚ်ရ၊ သၚ် သ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ၊ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ အလံၚ်ပယျၚ်မၞုံယၟုဝွံ (သ္ပဟိုတ်ကဵု) တဳလပိုဉ်မၞုံယၟုဝွံတုဲ မိက်သ္ပခမဳပယျၚ်ရ၊ သၚ် သ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ၊ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ အလံၚ်ပယျၚ်မၞုံယၟုဝွံ (သ္ပဟိုတ်ကဵု) တဳလပိုဉ်မၞုံယၟုဝွံတုဲ မိက်သ္ပခမဳပယျၚ်ရ၊ သၚ် သ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရဂှ် သ္ဂးရ)။
၇၁။ ပ္ဍဲအခိၚ်ဂှ် ခမဳမွဲဇကု ပ္ဍဲမသက္ကုခြာသ္ပခမဳပယျၚ်တုဲဂှ် ဒ္ဂေတ်တဴဒ္ဂေတ် မဟွံထေက်ကဵုဒ္ဂေတ်ရ၊ ခမဳဂမၠိုၚ် “ယွံကောန်တၠ လ္ပပကမၠောန်ပွရဴဝွံညိ၊ ကမၠောန်ပွဝွံ ဟွံဂပ်ဝ်ရ” ရဴဝွံ ဟီုသ္ဂးအိုတ်ရ။ ခမဳဂှ် “ပကဵုအဲဍိက်ခမဳပယျၚ်အိုတ်ညိ ရဴဝွံ သီုဟွံအာတ်အခေါၚ် တဳလပိုဉ်တအ်ညးဂမၠိုၚ်ဂှ် မုဟိုတ် တဳလပိုဉ်တအ်ညးဂမၠိုၚ် ပကဵုအဲဍိက်ခမဳပယျၚ်အိုတ်ရော? ရဴဝွံ ဟီုသ္ဂးရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ညးဟွံအာတ်အခေါၚ်ဂှ် ဟဂပ်ဝ်ပကဵုခမဳပယျၚ်ရ။ ကုညးပကဵုခမဳပယျၚ်ဂှ် ဒးအာပတ်ဒုက္ကဋ်ရ။ ယွံခမဳတအ် ညးအာတ်အခေါၚ်ဂှ်ဟေၚ် ကဵုအခေါၚ်သွက်ဂွံပကဵုခမဳပယျၚ်ရ၊ ယွံခမဳတအ် ရဴဝွံ သ္ဒးကဵုအာတ်အခေါၚ်ရ၊ အလံၚ်ပယျၚ်ဂှ် ပြာပ်အာဇရေၚ်သၚ်တုဲ လ္ၜက်ကၠေဟ်ပတိုန် သ္ၚာကၞေဟ် ပ္ဍဲလတူပၞးပါဲမွဲလပါ်တုဲမ္ဂး လ္ၚောဝ်ဂၠးဇိုၚ်ခမဳဂမၠိုၚ်တုဲ သီုမဂဇအ်ဒၟံၚ်ဗွဲလံက်ဂဇုန် ပၚ်ပတိုန်ခၠအ်သၟိပ်တဲတုဲမ္ဂး “ယွံတဳလပိုဉ်တအ် အာတ်အခေါၚ်သၚ် ဒဒှ်ခမဳပယျၚ်ရ၊ ယွံတဳလပိုဉ်တအ် သၚ် သ္ပဟိုတ်ကဵုဓဝ်ဇြဟာန်ဆာန်ဍူ အဲဍိက်တုဲ ဩဝ်ပကဵုခမဳပယျၚ်ညိ” ရဴဝွံ သ္ဒးဟီုရ။ မရနုက်ကဵုၜါဝါလေဝ် သ္ဒးအာတ်အခေါၚ်ရ။ မရနုက်ကဵုပိဝါလေဝ် သ္ဒးအာတ်အခေါၚ်ရ။ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
၇၂။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ အလံၚ်ပယျၚ်မၞုံယၟုဝွံ (သ္ပဟိုတ်ကဵု) တဳလပိုဉ်မၞုံယၟုဝွံတုဲ မိက်သ္ပခမဳပယျၚ်ရ၊ အလံၚ်ပယျၚ်မၞုံယၟုဝွံ အာတ်သၚ် ဒဒှ်ခမဳပယျၚ် နကဵုအ္စာဥပဇ္ၛာယ် မၞုံယၟုဝွံရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ အလံၚ်ပယျၚ်မၞုံယၟုဝွံ (သ္ပဟိုတ်ကဵု) တဳလပိုဉ်မၞုံယၟုဝွံတုဲ မိက်သ္ပခမဳပယျၚ်ရ၊ အလံၚ်ပယျၚ်မၞုံယၟုဝွံ အာတ်သၚ် ဒဒှ်ခမဳပယျၚ် နကဵုအ္စာဥပဇ္ၛာယ် မၞုံယၟုဝွံရ၊ သၚ်ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ ။ ပ ။
သၚ် ဂပ်ဝ်သ္ပကဵုခမဳပယျၚ် အလံၚ်ပယျၚ်မၞုံယၟုဝွံ နကဵုအ္စာဥပဇ္ၛာယ်မၞုံယၟုဝွံရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရဂှ် သ္ဂးရ)။
၇၃။ ပ္ဍဲအခိၚ်ဂှ် ပ္ဍဲဍုၚ်ရာဇဂြိုဟ် လၟေၚ်အလန်ပိဏ္ဍပါတ်မပြဲ တန်နွံဒၟံၚ်ရ။ ပ္ဍဲအခိၚ်ဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ မၞုံအလေံဒှ်တသိုခ်အိုတ်ရ၊ မၞုံကဵုဒ္ဂေတ်ဒှ်တသိုခ်အိုတ်ရ၊ သ္ဂောံစ စၞစသုၚ်ခိုဟ်ဂမၠိုၚ်တုဲ ပ္ဍဲသၞာသတိက်သၞာဒၟံၚ် ဗၠးဗြဲကျာဂမၠိုၚ် သ္ဂောံတိက်အိုတ်ရ၊ အဲသ္ဂောံပခမဳ ပ္ဍဲဇရေၚ်ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်မ္ဂး ခိုဟ်သန်ရ” ရဴဝွံ ကသပ်ဒှ် ကုဗဗၞးမွဲတၠရ။ ပ္ဍဲကြဴနူဂှ် ဗဗၞးဂှ် ပြာပ်အာဇရေၚ်ခမဳဂမၠိုၚ်တုဲ အာတ်အခေါၚ် ဒဒှ်ထပိုဲခမဳရ၊ ခမဳဂမၠိုၚ် ပကဵုထပိုဲ ဗဗၞးဂှ်အိုတ်ရ၊ ပကဵုခမဳပယျၚ်အိုတ်ရ။ ဗဗၞးဂှ်ပကဵုခမဳပယျၚ်တုဲ ပ္ဍဲကြဴ လၟေၚ်အလန်ပိဏ္ဍပါတ် အိုတ်အာရ။ ခမဳဂမၠိုၚ် “ယွံကောန်တၠ ဩဝ်ကၠုၚ်ညိ၊ ပ္ဍဲအခိၚ် လၟုဟ် ကြက်ဂေတ်ဂ္ၚေၚ်ပိဏ္ဍပါတ်အိုတ်ရ” ရဴဝွံ သ္ဂးအိုတ်ရ။ ခမဳတၟိဂှ် “ယွံကောန်တၠ သွက်ဂွံဂ္ၚေၚ်ပိဏ္ဍပါတ်ဂှ် အဲသ္ပခမဳဟွံသေၚ်ရ၊ ကဵုကုအဲမ္ဂး အဲစရ၊ ဟွံကဵုမ္ဂး အဲရာံတိတ်ခရှ်ရ” ရဴဝွံ သ္ဂးရ။ ယွံကောန်တၠ ပသာ်ရော? တၠအဲ ဟိုတ်နူဗုၚ်ဂၞဴဂှ် သ္ပခမဳဟာ ရဴဝွံ (သ္ဂးအိုတ်ရ)။ ဍာံပြရ ယွံကောန်တၠ ရဴဝွံ (သ္ဂးရ)။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် ဟိုတ်နူဗုၚ်ဂၞဴ သ္ဂောံသ္ပခမဳ ပ္ဍဲသာသနာ မဂပ်ဝ်တွံလဝ်ဗွဲမ္ဒးရးရဴဝွံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳ တၠအဲ ဟိုတ်နူသွက်ဗုၚ်ဂၞဴ သ္ပခမဳရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ ဟိုတ်နူသွက်ဗုၚ်ဂၞဴ သ္ဂောံသ္ပခမဳ ပ္ဍဲသာသနာ မဂပ်ဝ်တွံလဝ်ဗွဲမ္ဒးရးရဴဝွံရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်ပွမကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး—
“ယွံခမဳတအ် ခမဳပကဵုခမဳပယျၚ်ဂှ် ကဵုအခေါၚ်သွက်ဂွံဟီုလၟိၚ် အရာဒးနိဿဲဗ္ဒာဲပန်ပြကာဂမၠိုၚ်ရ။ ပ္ဍဲဒဒှ်ခမဳ မသ္ပနိဿဲဗ္ဒာဲကဵုပိဏ္ဍပါတ် မဒုၚ်သဇိုၚ်နကဵုတၚ်က္ၜံၚ်ၜါတုဲ မကလိဂွံဂှ် တၠအဲခမဳတၟိ လုကဴကာလဗၞတ်သိက္ခာပိုဒ် တန်တဴဒၟံၚ်ပ္ဍဲဇကု သ္ဒးပတိတ်ဇြဟတ်ရ။ (ပိုဉ်ကုသိုလ်နွံတုဲ) လာဘ်ဂၠိုၚ်ဂၠၚ်လောန်မ္ဂး ပိဏ္ဍပါတ်မကဵုဒါန်ကုသၚ် ပိဏ္ဍပါတ်မစၞောန်ထ္ၜးတုဲကဵုဒါန် ပိဏ္ဍပါတ်မဘိက်နိမန် ပိဏ္ဍပါတ်ထောံမာဲတုဲမကဵုဒါန် ပိဏ္ဍပါတ်မကဵုဒါန် ပက်မံက်ပက်စွေက် ပိဏ္ဍပါတ်မကဵုဒါန်ပ္ဍဲတ္ၚဲဥပေါသ် ပိဏ္ဍပါတ်မကဵုပ္ဍဲတ္ၚဲဒတိတ်မွဲတ္ၚဲ (တ္ၚဲတိတ်) လေဝ် (သ္ပပြဘိုဂ်ဂပ်ဝ်ဏီရ)။
ပ္ဍဲဒဒှ်ခမဳ မသ္ပနိဿဗ္ဒာဲကဵု သ္ၚာပံသကူ မကၠေဝ်ဗာန်ဒၟံၚ်ခၞိက်တိဂှ် တၠအဲခမဳတၟိ လုကဴကာလဗၞတ်သိက္ခာပိုဒ် တန်တဴဒၟံၚ်ပ္ဍဲဇကု သ္ဒးပတိတ်ဇြဟတ်ရ။ (ပိုဉ်ကုသိုလ်နွံတုဲ) လာဘ်ဂၠိုၚ်ဂၠၚ်လောန်မ္ဂး သ္ၚာတောဝ်ခေါမ သ္ၚာတောဝ် သ္ၚာတောဝ်သုတ် သ္ၚာကၟဝ် သ္ၚာတောဝ်ကာန် သ္ၚာနှဴလဝ်တောဝ်မသုန်သာ်တုဲ တုတ်လဝ်ဂမၠိုၚ်လေဝ် (သ္ပပြဘိုဂ်ဂပ်ဝ်ဏီရ)။
ပ္ဍဲဒဒှ်ခမဳ မသ္ပနိဿဲဗ္ဒာဲကဵု ဘာမတွံဂးသၟဝ်တၞံဆုဂှ် တၠအဲခမဳတၟိ လုကဴကာလဗၞတ်သိက္ခာပိုဒ် တန်တဴဒၟံၚ်ပ္ဍဲဇကု သ္ဒးပတိတ်ဇြဟတ်ရ။ (ပိုဉ်ကုသိုလ်နွံတုဲ) လာဘ်ဂၠိုၚ်ဂၠၚ်လောန်မ္ဂး ဘာဖျေံစၟဳၜါလပါ် ဘာဖျေံစၟဳမွဲလပါ် ပြာသာဒ်ပန်ကၠၚ် ပြာသာဒ်ခၠုပ် ထီုဂိုဟ်ဂမၠိုၚ်လေဝ် (သ္ပပြဘိုဂ်ဂပ်ဝ်ဏီရ)။
ပ္ဍဲဒဒှ်ခမဳ မသ္ပနိဿဲဗ္ဒာဲကီု ဂဥုဲမဂပ်ဝ်ထီုဗးလဝ် နကဵုပဿဴဂၠဴသမ္အုဲဂှ် တၠအဲခမဳတၟိ လုကဴကာလဗၞတ်သိက္ခာပိုဒ် တန်တဴဒၟံၚ်ပ္ဍဲဇကု သ္ဒးပတိတ်ဇြဟတ်ရ။ (ပိုဉ်ကုသိုလ်နွံတုဲ) လာဘ်ဂၠိုၚ်ဂၠၚ်လောန်မ္ဂး ကၠေၚ်သွဟ် ကၠေၚ်တိ ကၠေၚ် ဍာ်သာဲ တၚ်လာဲဂမၠိုၚ်လေဝ် (သ္ပပြဘိုဂ်ဂပ်ဝ်ဏီရ)” ရဴဝွံ (ကဵုအခေါၚ် သွက်ဂွံဟီုလၟိၚ်ရ) ရဴဝွံ သ္ဂးကဵုခမဳဂမၠိုၚ်ရ။
ဝတ်ဥပဇ္ၛာယ် ခဏ်ပဉ္စမတုဲရ။
