၁၄.၂။ ခဏ်မၞိဟ်ဒယှ်ဂမၠိုၚ် သ္ပခမဳ

၆၃။ ပ္ဍဲမွဲအခိၚ်တေံ ကောန်ဂကူဂမၠိုၚ် ညးပဒတဴပ္ဍဲမဂဓရး မဒှ်ပြာကဋ်ဒယှ်တှ်လောန်ဂှ် ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်တဳလမၞုံပိုဉ်ကျာ်တြဲအိုတ်ရ။ မၞိဟ်ဂမၠိုၚ်—

“ခမဳဂေါတမ ဒ္ဂေတ်သ္ပတဴ တၞဟ်နမဟွံမွဲကဵုကောန်ဇာတ်ရ၊ ခမဳဂေါတမ ဒ္ဂေတ်သ္ပတဴ တၞဟ်နသာဲခြာကေုာံတြုံတၠသ္ၚိရ၊ (တၞဟ်နဒှ်ဗြဴကၟာဲရ)၊ ခမဳဂေါတမ ဒ္ဂေတ်သ္ပတဴ တၞဟ်နဂကူပိုတ်ရ၊ ပ္ဍဲလၟုဟ်ရ ခမဳဂေါတမဝွံ သ္ပကဵုခမဳ ရသိလ္ၚီတုဲရ၊ ပြဘာဇ်ဂမၠိုၚ်ၜါကၠံမသုန်စှော် မဒှ်ကွးသဉ္စယလေဝ် သ္ပကဵုခမဳတုဲရ၊ ကောန်ဂကူဂမၠိုၚ် ညးပဒတဴပ္ဍဲမဂဓရး မဒှ်ပြာကဋ်ဒယှ်တှ်လေဝ် ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဂေါတမအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ သအာၚ်နူဂှ် အခိၚ်မညာတ်ခမဳဂမၠိုၚ်ဂှ်—

“ခမဳဇၞော်ဂေါတမ က္ညကၠုၚ်ရာဇဂြိုဟ် ဍုၚ်ဇၞော်မဂဓရး မဂပ်ဝ်စဵဗိုၚ်လဝ်ဒဵုမသုန်မရ၊ ရၚ်တၠုၚ်ကေတ် ကွးသဉ္စယဂမၠိုၚ်အိုတ်သီုတုဲမ္ဂး လၟုဟ် ကြက်ရၚ်တၠုၚ်တဴ ညးလဵုဂှ်ရော?” ရဴဝွံ ဟီုဂရိုဟ်တၚ်ဒုဟ် နကဵုဂါထာအိုတ်ရ။

ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ် မဟီုဂရိုဟ် ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ရမျာၚ်မဟီုဂရိုဟ်ဂှ် ကြက်ဟွံဒှ်ဗွဲလအ်လကာဖာရ၊ ကြက်ဒှ်ဗၞတ်ထပှ်တ္ၚဲဟေၚ်ရ၊ ကလိလောန်အာထပှ်တ္ၚဲမ္ဂး ကြက်ကၠေံဗ္ဒန်အာရ၊ ယွံခမဳတအ် ဒှ်သာ်ဂှ်မ္ဂး—

ညးဂမၠိုၚ် မဟီုဂရိုဟ်တၚ်ဒုဟ်ကဵု မၞးတအ်ညးဂမၠိုၚ် ရဴဝွံမ္ဂး “ခမဳဇၞော်ဂေါတမ က္ညကၠုၚ်ရာဇဂြိုဟ် ဍုၚ်ဇၞော်မဂဓရး မဂပ်ဝ်စဵုဗိုၚ်လဝ်ဒဵုမသုန်မရ၊ ရၚ်တၠုၚ်ကေတ်ကွးသဉ္စယဂမၠိုၚ်အိုတ်သီုတုဲမ္ဂး လၟုဟ် ကြက်ရၚ်တၠုၚ်တဴ ညးလဵုဂှ်ရော” ဂှ်—

“ကျာ်တြဲဂမၠိုၚ် မၞုံကဵုလွဳပရာမဇၞော်ဂှ် ဗွဲစၟတ် ရၚ်တၠုၚ်ကေတ်ဏာ နကဵုဓရ်သပ္ပုရိုဟ်အိုတ်ရ၊ နပွမစောန်စိုတ်ဟီုချေတ်ဓရေတ် တၠပညာဂမၠိုၚ် မရၚ်တၠုၚ်ကေတ်ဏာနဗဗွဲဓရ်ဂှ် မုဖဵုမၞုံရော?” ရဴဝွံ မၞးတအ်ညးဂမၠိုၚ် ဩဝ်ကလၚ်ဟီုပလန်တၚ်ဒုဟ်နကဵုဂါထာအိုတ်ညိ ရဴဝွံ သ္ဂးရ။

ပ္ဍဲအခိၚ်ဂှ် မၞိဟ်ဂမၠိုၚ် ညာတ်ဒးခမဳဂမၠိုၚ်မ္ဂး—

“ခမဳဇၞော်ဂေါတမ က္ညကၠုၚ်ရာဇဂြိုဟ် ဍုၚ်ဇၞော်မဂဓရး မဂပ်ဝ်စဵုဗိုၚ်လဝ်ဒဵုမသုန်မရ၊ ရၚ်တၠုၚ်ကေတ် ကွးသဉ္စယဂမၠိုၚ်အိုတ်သီုတုဲမ္ဂး လၟုဟ် ကြက်ရၚ်တၠုၚ်တဴ ညးလဵုဂှ်ရော?” ရဴဝွံ ဟီုဂရိုဟ်တၚ်ဒုဟ် နကဵုဂါထာအိုတ်ရ။

ခမဳဂမၠိုၚ်—

“ကျာ်တြဲဂမၠိုၚ် မၞုံကဵုလွဳပရာမဇၞော်ဂှ် ဗွဲစၟတ် ရၚ်တၠုၚ်ကေတ်ဏာ နကဵဓရ်သပ္ပုရိုဟ်အိုတ်ရ၊ နပွမစောန်စိုတ်ဟီုချေတ်ဓရေတ် တၠပညာဂမၠိုၚ် မရၚ်တၠုၚ်ကေတ်ဏာနဗဗွဲဓရ်ဂှ် မုဖဵုမၞုံရော?” ရဴဝွံ ကလေၚ်ဟီုပလန်တၚ်ဒုဟ် မၞိဟ်ဂမၠိုၚ်ဂှ် နကဵုဂါထာအိုတ်ရ။

မၞိဟ်ဂမၠိုၚ်ဂှ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ရၚ်တၠုၚ်ကေတ်ဏာနသဘဴဓရ်အိုတ်ရ၊ ရၚ်တၠုၚ်ကေတ်ဏာ နအဓမ္မဟွံဗဗွဲဓရ် ဟွံသေၚ်အိုတ်ရ” ရဴဝွံ (တီကေတ်အိုတ်တုဲ) ရမျာၚ်မဟီုဂရိုဟ်ဂှ် ဒှ်ဗၞတ်ထပှ်တ္ၚဲဟေၚ်ရ၊ အခိၚ်ကလိလောန်အာထပှ်တ္ၚဲဂှ် ကၠေံဗ္ဒန်အာရ။

ခဏ်သာရိပိုတ်မောဂ္ဂလာန်ဂမၠိုၚ် သ္ပခမဳတုဲရ။

ခဏ်စတုတ္ထတုဲရ။